Read Kahua 2 MAKABEO 6 Bible Online

2 MAKABEO 6 - Kahua bible

2 MAKABEO 6

¹I murina ma ngekana na maneraha ki hagatorangenia na meraha ni Atene, hanana i tugurira na Siu ka kasigi râ na rotu iata, na tauha iata na êvarita ma na ramata iana God.

²Na maneraha ki bonasia nikâ, hanana i hagaerasia na ruma ni rotu renia na hagapuana tanga o Sosi Olimpio na ataro raha ma ki hagapunaria na ruma ni rotu igê na hungana i Gerisimi tanga o Sosi Senio na ataro ni anumasiha ni mahuara, suria na enoni i ngekana ka obania vikana.

³Na hagamamasiaganiha ki nahuira ngavê na enoni, ka hataera bâraha.

⁴Na enoni ahuroto ka totono tare i ruma ni rotu ki ruguhira ma ka katogi igê na ani mavê na rongoeraganiha. Ngaira ka merarongo era na êrâ na gete igê. Ngaira ka migibanu i ruma ni rotu na marâ, ga apu vige oga igê.

⁵Na bea ni vogasiha ki vunu renigi na ganiani, na tauha na rotu ma na ramata iana o Moise ga manimanigi vige vogasi renigi.

⁶Na enoni ahuroto ka urapusira na Siu, vi siana ka hagahigasigi na tangiani ni mamaroha se vi na tangiani raha ni rotu ga bani oga me. Ki apu tangara na Siu vige Siu ni rotu.

⁷Ngaira ka tugurira na Siu ka ngaugi na angeni na ganiani ni vogasiha igê na tangiana i na ara ni hageha ga takusia vi na maneraha ki vora igê. Igê na tangiana raha tanga o Tioniso na ataro ni vaini ngaira ka tugurira na Siu, viga hagamahegi na bêta ma ka arâ ga angapopo haku, hanana ga hagahigasia na ataro ngekana.

⁸Suria o Potolemeo ki obania, tahema ga bonasira na hinua iata na ai ni Gris ga oga hagarangi, ka katora na Siu vikana nogata ma ka tugurira ka ngaugi na vogasiha ni ataro.

⁹I tuguhira na ai ni Gris ngegana, viga nahuira ka meme na Siu hato ga usi vige râ suria na ogaha iata na ai ni Gris. Na tarani ngegana ka hagabângenia, vi na mamasiaganiha tangara na Siu ka page akê me raha ngavê.

¹⁰Bâ, ngaira ka têrerua na gete gi rua, suria garu retegi râ na gavoni na varatererua o kareterua hegitigi. Ngaira ka mererârua karu râhia na hinua henirerua na kareterua, garu kuku i na susu, hanana na enoni ka rurusirerua. Hemuri ngaira ka kasira vato tenia na para ni hinua ka me.

¹¹Nikâ, ta na enoni ki hagarongoa o Pilipo, vi tani na Siu ka haku me pinihi igê na vaba hagarangia na hinua, hanana ga hagahigasia na tangiana ni mamaroha. O Pilipo ki taharira ma ki su mamêrigata. Suria ngaira ka hagahigasia ngavê na tangiana ni mamaroha, tahema ngaira ka usi vige heariha tange na manavata.

¹²Hoi, inê kê nungigamu kamu tomania na buka ikê, siana kamu bagahagêguri renigi na bagabevoani ngegana. Mu takusia hete, vi God kani hagaitangira na kariana vikana, mareha vi suria vige mutera, ma ki hagaotora hete.

¹³God ki hagabângenia na korohana, matena i hagaitangia ototo râ nga na enoni renigi na bagatauhana, ma ki pe naka vê noga.

¹⁴Na Araha ki pe hagaitangigia igia na Siu tagenana ma manga i hagaitangira na enoni ga pe Siu. Ngaia ki nakara ma vê noga mataro me ki akê raha me na bagaparongata ma ki kahu hagaitangira.

¹⁵Ma tangagia igia, ngaia ki hatani hagaitangigia, hanana i hagabungigi na tasi iaka.

¹⁶Hoi, na Araha ki takigia tare vikana igia na kariana. Henaka vi ngaia ki hagaitangigia suria viga tarahugia na bagabevoani, ngaia ki asa ngavê vige rumakaka renigia.

¹⁷Inê kê vi tangagamu vikana, hanana gê hagatakusigamu re. Hoi, ge râhia na sihonga.

¹⁸Ta na meraha, na atana ka no Eleasare. Ngaia ki na mane ni hagesuringa ni rotu. Na enoni ka hagahigasia ngavê. Ngaia ki bâ hahanetaga. Ga tangahia na harana, ki ngêa na bo.

¹⁹Ngaia ki aganaria na mera koro hete teharia vige oga igê na makiha. Vikana ngaia ki pusurenia hura na bo. Ngaia ki agana ki râ tanga na agua ni hagamamasiaganiha.

²⁰Ngaia ki hagabâsira na enoni igê na tarana ngekana, hanana viga togeaga ka usisi tenigi na ngêra, ga apu tangara, henaka viga meme.

²¹Na mane ga bâsuria na vogasiha ni ataro, ngaira ka na bani tamana koro me arihu o Eleasare. Suria ga bani hegirare vikana, tahema ngaira ka vi tanga pinihi o Eleasare, hanana vi merâ me na ganiana i pe apu tanga ma ki hagaparu vi ngaua na bo.

²²Vikana ngaira ki asa vige nahuia ki meme.

²³O Eleasare ki râ suria na tarana i marisina na meraha i gemêa ngavê ma ki gohogohoraga. Haganega me tenia i sisite mataro ma i ngekê, ngaia ki rotu koro tare ma ki marupegi maninga na ramata apuna iana God. Tahema ngaia ki arami, ki vi: “Hoi, mu nahuiê râ nga be me!

²⁴Na hagaparuana mu visia ki pe araria na gemêa manga inê, i era ma na enoni haoru ka vi ma, vi inê kê kasia na rotu iaku, matena i tangahuru gi siva na harisi iaku.

²⁵Manga gê hagaparu vigê ngaua na ganiana ngekana, hanana vigê gâga sisite râ noga, inê kê page hagatasira rako na enoni haoru. Na tarana ngekana ki page hagamakiê ngavê ma ki page takeê na makiha.

²⁶Henaka vi manga i ngekê ma be tahi tenia na hagaitangiha, na enoni ga rapasiê tanga, ma inê ki bara tangê vi ve tahi tenia God raramohaga hunia, henaka vigê tahitahi se vigê meme.

²⁷Tahema inê kê pe magu vi ve me i ngekê, hanana i marisiku inê na gemêa.

²⁸Vikana inê kê hagabângenia na tarana koro tangara na enoni haoru, hanana vi ngaira nogata ka aganaria ma ka ageagesia na mera renigi na ramata apuna ga bani oga me.” Matena i tamasi hato vikana, ngaia ki tari ototo râ nga tanga na agua ni hagamamasiaganiha.

²⁹Ma ngaira nga na enoni, ga koro tanga sisite râ noga, ngaira ka ruhia, suria ga vi, vi ngaia ki tamasi bekabekaga.

³⁰Ngaira ka ramusia ki me. Ma i nago tarana i me, ngaia ki manava tanga na matona, ki vi: “Na Araha apuna, i aitangisigi na ara ni marâ hato, ngaia ki girara, vi i pe bara vi inê kê bani tahi tenigi na mamasiaganiha raha ma na mera, ma ngaia ki girara nikâ, vi inê kê aganarigi ma kê ageagesigi, suria inê kê hagahigasia.”

³¹O Eleasare ki me vikana. Suria ngaia ki pe magu vige me, ngaia ki hagabângenia na tarana koro ngavê, mareha vi tangara ma na enoni haoru ma tangara nikâ hete na enoni hato.