Read Kahua 2 MAKABEO 8 Bible Online

2 MAKABEO 8 - Kahua bible

2 MAKABEO 8

¹O Juta Makabeo ma na kariana ka râhigi pinihi na hinua, ka gari tamata i berarogata na Siu, ga ama ni totosuria nga na rotu. Ngaira ka hagahakura me na ararina na 6000 na me.

²Ngaira ka avarasia na Araha, hanana i tamanira na kariana, suria na ahuroto rihira ka hagamamasiagara ngavê. Ngaira ka nungia na Araha, ki takia na ruma ni rotu, na ahuroto ga bani hagaerasia ngavê,

³ma ki takia i Jerusaleme, na ahuroto ka bani ruhuruhua ma ka haga ni sinoa ngavê.

⁴Ngekana ngaira ka nungia na Araha, hanana i bâsigi na gaputa na kariana ga me ma ki naka na siva tangara na ani ga mutera na kariana, ka tako hagetage ka nahuira ka me na kere kare, ga pe erasia rârâ ta na marâ, ma ka tamasi erasia na Araha.

⁵Matena o Juta ki bani hagananêra hato na me iana, na enoni ahuroto ki bara tangara vige teharira, suria na mangariaganiha iana na Araha tanga i Isiraele ki ahoro igê na hetakiha tanga.

⁶O Juta ki hagakakangi ki taharigi na hinua, na ani raha ma na ani sisite, ma ki sungigi. Ngaia ki ogasigi na agua ga hagagara koro ni hearihatana ma ki nahuira ka me rako na merongana.

⁷Ngaia ki tarahua vi na bungiana kani koro tange na tahariha ngegana. Na tarotarohana na ramoha iana ni hearihatana ki râhigi na ara ni agua hato.

⁸Matena o Pilipo, na gavumane i Jerusaleme, ki bâsia, vi o Juta ki ama ni ramoramo nga ma ki ama ni tehateha nga igê na hearihatana, ngaia ki segea na leta tanga o Potolemeo na gavumane i Selesiria me Punisia. Ngaia ki nungia na hetamaniha tenia, hanana i rêrabarasia na arahanga iana na maneraha.

⁹O Potolemeo ki atea ototo râ nga o Nikanore, karena o Patorokulo. O Nikanore ki na hitangita na mane ni hagaotonga iana na maneraha. O Potolemeo ki hagatorangenia tanga i Jutea henira na 20.000 ma ki asiba na mane ni me tenigi na agua hehegitigi, hanana ga hagamagahurura na Siu hato. Ngaia ki atea o Sosiasi ki tamania o Nikanore, suria o Sosiasi ki na mane i bêngenira na mane ni me ma ki manisingenia na hearihatana.

¹⁰Na maneraha o Antioko ki kaone na 60.000 kilo na siliva tenira na ai ni Roma. O Nikanore ki kato, vi nahuia na kaone renigi na meta na Siu, i henahuraura ma ki hagavurira ka vora re kare vurivuri.

¹¹Ngaia ki kasi tamasinga ototo râ nga tangagi na hinua igê na tarasini, ka râ me ka vurira na Siu: na tangahuru gi oru na Siu renia na kilo gi tage na siliva. Ma ngaia ki pe girara, vi God raramohaga hunia ki bani naka, vi sugi hagaitangia.

¹²Matena o Juta ki rongoa, vi o Nikanore henira na mane ni me iana ki tangotango tanga i Jutea, ngaia ki hagarongora na me iana renia.

¹³Na ani ga magu ma na ani ga pe hagêguritogo renia God vi tamanira, ngaira ka gava tanga na tahingata.

¹⁴Ma na ani ga oga so, ka hagavuringenigi hato na nahuninga iata ga hita so mêngagi, ma ka nungia na Araha, hanana vige hagatahira tenia o Nikanore, i pe botage renia God ma ki bani hagavuringenira, matena i mamênga na hearihatana.

¹⁵Manga vi God ma ki takusia, vi ngaira ma ki pe ararira vige tahitahi, ngaira ka nungia, hanana vi hagatahira renia na suruheri iana henira na êvarita ma renia i bani atera ka vora re na kariana, na kariana ngaia i apuna ma ki raha teha ngavê.

¹⁶O Juta ki hagahakura ngaira hato na 6000 na mane ni me iana ma ki hagaramonira, vi siana ke magu, se vige tugupu ke gavagava i maata na mane ni me gahu na ahuroto, ga maatira ka meraheariha. I tuguhira hete viga meraheariha ramo,

¹⁷ma ka takusia, vi na ahuroto kaniga bani hagaerasia ngavê na ruma ni rotu ma ka bani hagamamasiaga ngavê i Jerusaleme ma ka bani hagamagahurugi na tauha iata na êvarita na Siu.

¹⁸O Juta ki vi: “Ngaira ka hagêgurigi na tangaruha iata ma na togeaganiha iata, ma igia, igia ka hagêguria hete God raramohaga hunia, i girara i kangikangi bê ma, ma ka magahuru mareha vi na mane ni me ngegana ma, ma na maveta hagenani nikâ.”

¹⁹Matena o Juta ki tamasi tangara, ngaia ki hagatakusira renigi na tarani God ki bani tamanira na êvarita renigi. Igê na matena iana o Senagiribi ka mute igê na 185.000 na merongata na Siu.

²⁰I Babilonia na 8000 na Siu ka tamanira na 4000 na me ni Masetonia ma ka teharira na 120.000 na mane ni me ni Galasia ma ka rurugugi rako na marâ tenira, suria God nga kani tamanira.

²¹Na tamasinga iana o Juta ki hagaramonira ngavê na me iana, ka agana, hanana vige meme renirerua na rotu ma na apanena iata. O Juta ki voasira na mane ni me iana ka vora na apaneni me ge he.

²²Igê na apaneni me gi tage ka oga igê na ararina na 1500 na mane ni me. O vahegoata kaniga tonganira ka bêngenira na apaneni me na mane ni me: ngaia marena o Juta, o Simone, o Joane mo Jonatane.

²³O Juta ki vi tanga o Eleasare ki tomatoma raha tenia na buka apuna ma hemuri ngaia ki hagarari ni hearihatana tangara na mane ni me iana, ki ngere, ki vi “God ki tamanigia!” Ngaia marena ki bêngenia na apaneni me na mane ni me hagenago ka meheariha o Nikanore.

²⁴God raramohaga hunia ki tamanira ma ngaira ka mutera na 9000 ma ki asiba na merongata. Ngaira ka hagamamarira nikâ rako ma ka hagavasira na merongata hato.

²⁵Ngaira ka tavogi na haga tenira na enoni, ga bani râ me, hanana viga vurira na kare vurivuri iata. Ngaira ka tarigenira râ ma noga na merongata, suria ga pe nahunia na matora,

²⁶suria i sugi haganega noga na tangiana ni mamaroha.

²⁷Ngaira ka aporo, ka ruguni na tangaruha ma na nahuninga iata na merongata, ma ka kahu hagarahasia na tangiana ni mamaroha. Ngaira ka hagarahasia na Araha ma ka visia koro, suria i hagatahira ma ki haganega ki hagabângenia tangara, vi i takira aporo igê na tangiana ngekana.

²⁸I hato na tangiana ni mamaroha, ma ngaira ka votogi tani na nahuninga, ga bani rurugugi tenira na merongata tangara na enoni, na merongata ga hagamamasiagara ngavê ma tangara na gete na nâ ma na kare banogo. Ma tani ka votungira re na ahemata iata mareta so hegitigi.

²⁹Hemuri ngaira ka nunginungi haku tanga God ni takiha, hanana vi tamanira ngavê aporo ngaira na kariana.

³⁰Na Siu ka meraheariha nikâ na mane ni me iaterua o Timoti mo Bakitesi ma ka mutera na 20.000 ma ki asiba. Ngaira ka henahuraugi tani na ruma na para nganganihaga ga akê ngavê. Ngaira ka rurugugi rako na marâ ma ka voasigi ka vora gi rua. Ta apanena ki tangara so mareta ma ta apanena ki tangara na gete na nâ, na kare banogo, na gemêa ma na enoni na merongata ga bani hagamamasiagara ngavê.

³¹Ngaira ka ruguni na tangaruha iata na merongata ma ka nakagi bâkoro igê na agua ga hagagara koro ni hearihatana. Na ani getigi na marâ ga rurugugi ka migirâ i Jerusaleme.

³²Ngaira ka nahuia ki me na mane i bêngenira na mane ni me iana o Timoti. Ngaia ki na eragani nuni, i bani hagamamasiagara ngavê na Siu.

³³Igê na hinua iata na êvarita, matena ga vagevagesia vi ngaira ka teha, ngaira ka sungira hemêri na mane, ga bani hagamakakagi na maani para ni ruma ni rotu. Ta na hitangita ka no Kalisitenesi, i oga pinihi i rarona na kere ruma. Vikana ngaia ki tarahua na hagaitangiha meni na bagatauhana.

³⁴Vikana na eragani nuni o Nikanore, i bani merarâ me na rehagaro na mane tanga viga vurira na Siu,

³⁵ngaia ki so renira na enoni nga i ruhira ngavê, suria na Araha ki tamanira. Ngaia ki kasigi râ na gahu ni tagaraha raha iana ma ki gava ki râ getegetea manga na kare vurivuri i gava, ki rârâ ma ki tariha i Antioko. Ngaia ki babarisi i tahi ki ata i Antioko. Na mena na paraparangasiha iana kani ga mute na mane ni me hato iana.

³⁶Ngaia ki takusia ma vi i nahuia na kaone tanga i Roma, suria vi hagavuringenira na ai ni Jerusaleme, ma hete i tarohenia, vi i bara vige teharira na Siu, suria God raramohaga hunia ki anumasira, suria ngaira ka marupegi na ramata iana tangara.