Read Kahua 2 MAKABEO 9 Bible Online

2 MAKABEO 9 - Kahua bible

2 MAKABEO 9

¹I na matena ngekana o Antioko ki ata ni gava mavê tenia i Pesia, suria i manga ikê.

²Ngaia ki banu i hinua i Peresepoli ma ki rapasia, vi hanago tenia na ngêsu igê ma ki vi taua na hinua. Na enoni ka tahuragi na tangaruha iata ma ka meraheariha ngaia ma na mane ni me iana. Ngaia ki so renira, ki maki ma ki gava.

³Matena i ata râ i Ekebatana, ngaia ki rongoa na tarana i tarahurerua o Nikanore mo Timoti henira na mane ni me iaterua.

⁴Ngaia ki mangariaga ngavê ma ki kato vi hagaitangira na Siu, ga hagamakia, suria ga teharira na mane ni me iana. Tahema ngaia ki bonasia na mane i hagaotoa na kati ni me iana, ki ama ni arâ nga mataro me ka atata i Jerusaleme. Igê na paroparoha iana ngaia ki vi: “I hinua i Jerusaleme inê be horoa ke vora re na anoano raha gi tage ma tangara na Siu hato. Ma hete, God ki hagaitangia ototo râ nga.

⁵Matena i tamasi hato vikana, na Araha, i aitangisigi na ara ni marâ hato, na God iata na Isiraelita, ki hitaria renia na maeha, i pe bani tarahua rârâ ta na enoni ma ki hagamesira na enoni. Ngaia ki nahunia na haraniha raha igê na obana, i asa vige page hato.

⁶Ngaia nga ka na mena tanga na mane i nahunahu hagatavatavara na enoni igê na mani tarani igê na obata.

⁷Henaka, ma ngaia ki pe kasia râ hete na paroparoha iana, ma ki ama ni paroparo ma ngavê teharia i nago. Na hariparaniha iana tangara na Siu ki manga na gi i harana. Ngaia ki bonasia na mane i hagaotoa na kati ni me iana ki ama ni tangotango rêrê nga nikâ. Matena ga tango ngavê, ngaia ki hatani vota harê ki so ki puta i ano. Na surina hato i apena ka atasitasi ma ka hahara.

⁸Igê na paroparoha raha iana ngaia ki takusia ma, vi ngaia ki nahunia na ramoha manga God, hanana i bonasigi na navo i avoa ka têtê viteana ma ki hagararingenigi na higahigani na hungani i rimana. Ma ke bâ! Ngaia ki parama ma ki vota ki so ki puta i ano ma ka tugia igê na bea. Ngaia nga ka na girarana na raramohana God tangara na enoni hato.

⁹Na mama ka hehurahurasi me i maana na eragani nuni ngekana. Ngaia ki mamasiaga ngavê. Na apena mamauri ki kakaga. Na mapugana ki katora na mane ni me hato ka maeha.

¹⁰Suria i mapu teha ngavê, tahema na kariana ki bara, vige ura hagarangia, hanana vigê tugia. Ma i na kere matena i nago râ ngaia ki takusia, vi ngaia ki girara ma i taugi akê na higu.

¹¹O Antioko ki roraera ngavê renia na haharaniha raha ngavê, God ki hagaitangia renia. Rârâ ma ngaia ki tangahuria ma ki kasia râ na paroparoha iana.

¹²Matena i haganega ki hata vige ugumia na mapuana marena, ngaia ki vi: “Na enoni hato ki tuguhira viga têtê viteana God ma siana ka vivi, vi ngaira ka maratorana God.”

¹³Na matena iana na Araha vi takia igê o Antioko ki hato, ma na eragani nuni ngekana ki nunginungi ma ki suru tanga God, ki vi:

¹⁴“Inê kê bani kato, vi ve ruhuruhua i Jerusaleme ma kê horoa na hinua apuna ki vora re na anoano raha gi tage ma tangara na Siu, ma i ngekê inê kê haribona, vi i Jerusaleme na hinua apuna, ki gâga suri parongana.

¹⁵Inê kê bani kato, vigê kasigi hura na gahuata na Siu ma na kareta tangara na marâ vasiga ma na manu ka ngaura, suria inê kê tako maromarâ purua renira vi ve bagira. Ma i ngekê inê kê obania vigê haganahunira na ai ni Jerusaleme renigi na otoha mangara na ai ni Atene.

¹⁶I nago inê kê rurugu tenia na ruma ni rotu ma kê hanagogi na marâ apuna ni hagarahenga. Ma i ngekê inê be mahata tanga na ruma ni rotu renigi rako na mahatanga bâkoro ma renigi na marâ ni hagarahenga ga koro teharigi na ani i nago, ma inê be vurigi na meni na vogasiha renigi na haga iaku mareku.

¹⁷Ma nikâ inê kê suru, vigê voravora re na Siu ma kê arâhia na maveta hagenani, hanana ve hagarongora na enoni renia na raramohana God.”

¹⁸Ma na haharaniha ka pe so rârâ, suria God ki hagaitangia araria meni na bagatauhana. O Antioko ki bagahagêguri. Tahema ngaia ki segea na leta ikê tangara na Siu, ki vi:

¹⁹“Inê na maneraha o Antioko, gê bêngenira na mane ni me hato, inê kê hagamauru koro tangagamu na Siu, na kariaku koro. Na apekoroha, na ramana ma na vagevageha ke aharêsigamu.

²⁰Inê be visia koro God, manga vi igamu ma na ahemata iami kamu apeapekoro ma na ara ni marâ ka akê me bâkoro tangagamu. Inê kê hagêguritogo renia God.

²¹Inê kê maeha ma kê takusigamu ma kê obakoro renigamu, suria mu bani hagahigasiê ma kamu bani koro tangê. Matena gê aporo tenia i Pesia, inê kê gasuga ni ape era ngavê. Tahema inê kê takusia, vi i koro kê haganega kê migiakê me na katoha tanga na ogaha koro tangara na enoni.

²²Inê kê pe bagahagêguri mênga vi ve komaga aporo, ma hete inê kê tako togo ngavê, vigê page apekoro aporo.

²³Inê kê takusia aporo, o vaemaku i atea tare na urusina i na ara ni mateni i bêngenira na mane ni me iana tanga i na apanena bêkê na ve i Uparatesi.

²⁴Ngaia ki kato vikana, hanana vi siana na kariana ka takoha raha, suria ga girara vi o ti kani urusia ki torea na gavumane, manga vi hagagasuga me ta na tarana se i aporo me ta na rongoha era.

²⁵Inê kê bani girara nikâ, vi na maneraha surigi na agua i na apanena hura na agua gê marungia, ka bâbâ tare, vi na tarani ta ka page akê me ma ka naasia na matena koro tangara. Tahema inê kê atea o Antioko o kareku ki maneraha urusiê. Hagarako inê kê bani vi tangagamu, matena gê vatugigi na apaneni bêkê i Uparatesi, vigamu aganaria, suria inê kê tako togo renia. Inê kê bani segea na leta tanga. Na tamasinga i rarona kamu page tarahua i hemuri.

²⁶Hoi, inê kê nungigamu nga, hanana mu ama ni takusigi nga na tarani koro gê bani katogi tangagamu, igamu hegitigi ma igamu hato, ma kamu ama ni aganarigamirua nga inê ma o kareku.

²⁷Inê kê girara nga, vi ngaia ki page korokoro tangagamu ma ki page komanigamu, tagenana manga inê gê katogamu vikana tare.”

²⁸Hoita, na mane nahu enoni ngekana, i tamasi erasia tare God, ngaia ki hatamigi na mamasiaganiha, i hagamamasiagara na enoni getera renigi. Ngaia ki mamasiaga ngavê ma ki kahu me i tagua igê na hungani hagatê ngavê tenia i pasina.

²⁹O Pilipo na kariana koro, ki torea aporo me na gahuana. Ma suria i magutenia o karena o Antioko, tahema ngaia ki râ tanga i Esipito i pasina na maneraha o Potolemeo Pilometore.