Read Kahua 2 ESETARASE 1 Bible Online

2 ESETARASE 1 - Kahua bible

2 ESETARASE 1

¹Ikê ki na ruata na buka i segea o Esera, na poropete. Ngaia ki no karena o Seraia. O virana ka no Asaria. Ngaia ki na raraha iana o Gilikia, o Salumu, o Satoke, o Ahitube,

²o Ahia, o Pinehasi, o Eli, o Amaria, o Asaria, o Meraiote, o Arana, o Usi, o Boriti, o Abisua, o Pinegasi, o Eleasare,

³ma o Arone, tenia na varo ninuni iana o Levi. Matena inê o Esera kê vora re na kare rakuraku i Metia igê na matena o Ataseresese i maneraha i Pesia,

⁴na Araha ki tamasi tangê, ki vi:

⁵“Gu râ ma ku hagatakusira na kariaku henira na kareta renigi na tasi iata, suria ga haritoheê, hanana ga hagarongora na esita renigi.

⁶Na kariaku ka tasi teharira na êvarita, suria ngaira ka pe takusiê hete ma ka vogasira ma na ataro iata na enoni ahuroto.

⁷Matena ngaira ka vora re na kare rakuraku i Esipito, inê kê hagatahira tenia ma na bagaparongata ka hagamangariê. Inê kê bani haganunura ma ngaira ka pe tê viteaku.

⁸“Igo o Esera, ge rugu na obamu ma ku pirigi na varehumu ma ku kuasira renigi na ara ni bagabevoani, ge ararira. Ngaira ka guguruga ma ka usi ngavê, vige râ surigi na ramata iaku.

⁹Hagehita nikâ kani vigê piringiape henira na enoni ngegana, gê tamanira bâraha?

¹⁰Renira ngaira tahema inê kê hatungira rako na maneraha ma kê mutera na maneraha i Esipito ma na gavumane hato iana ma na mane ni me hato iana.

¹¹Inê kê mutera na ara ni apaneni nuni hato ga merongasira na kariaku. I kerekê inê kê tokorenira na enoni igê na apanena i Taire ma i Sitone, ma kê mutera na merongata hato na Isiraelita.

¹²Igo o Esera, gu hagarongora nga, vi inê na Araha kê vi:

¹³“Inê kê toregamu tarê na Asi Memera. Igê na agua i mareha rârâ igê na tara, inê kê hagaotogi tangagamu kamu râ purunguni igê. Inê kê atea o Moise ki bêngenigamu ma kê kasia o Arone ki mane ni vogasiha iami.

¹⁴Inê kê mavesigamu renia na u na gi ma kê katogi na mena raha i berarogami, ma igamu kamu bonoteniê. Inênga na Araha kanigê tamasi.

¹⁵Inê na Araha raramohaga huniê kê vi: Inê kê hagatorangenira na manu tangagamu, hanana mu girara, vi inê kê marupegamu. Inê kê katogamu kamu tênga igê na agua i purunguni, ma igamu kamu hagagege ma igê.

¹⁶Henaka inê kê mutera na merongami, ma igamu kamu pe visiê koro renia, nga noga ma na hagagegeana.

¹⁷Mu bonotenigi vari na hetamaniha iaku tangagamu? I ngekana igê na bagamasusu raha, matena mu magê ma ki mamata na riomi, igamu kamu hagagege reniê, kamu vi:

¹⁸‘Tanu hega kanigo toregamu me ikê igê na bagamasusu raha? Go mutegami vari igê? Mi vora re na kare rakuraku i Esipito ki koro teharia vigami râ me kami meme ikê’.

¹⁹Suria mu hagagege bâraha, tahema inê kê takigamu ma kê hagangêgamu renigi na mana, na ngêra iata na angero.

²⁰Matena i mamata na riomi, inê kê tahurua na verake ma na ve mu obania ki gogogo raha me. Inê kê mamarusigamu renigi na apinige ga arubebe tenia na singihana na arito.

²¹Inê kê tonganigamu renigi na mako ango ma kê paira hura na Kananita, na Perisita ma na Pilisitina ga urapusigamu, matena mu banu me kamu parênigi na mako iata. Na ta nikâ be katoa tangagamu?

²²“Inê na Araha raramohaga huniê, kê vi: I ngekana, igê na bagamasusu raha, hagarangia na ve mahe, matena mu pasi tono ma kamu guhariê,

²³inê kê pe kasia na gi hurigamu, henaka mu guhariê. Inê kê katoa na ve ngekana ki arari ni tonoha hete, suria gê kasia so na marupigana na apinigi igê.

²⁴Isiraelita, gê katogamu mara ta? Ai ni Juta, igamu kamu usi vigamu tê viteaku. Tahema inê be aharo tangara na enoni ahuroto ma be atera ngaira ke vora re na kariaku. Ngaira nga kaniga page marupegi na ramata iaku.

²⁵Suria igamu kamu rumakaka reniê inê, inê be rumakaka renigamu igamu. Igamu kamu page avarasiê, vi ve takigamu ma inê ki asa.

²⁶Matena mu avarasiê, inê ki asa be aganarigamu. Igamu kamu nahu enoni tare. Na gaputa na ani mu nahuira ka me ka gagapugaga i rimami.

²⁷Igamu kamu pe hagarateku inê, ma kamu hagaratemi maremi hete.

²⁸“Inê na Araha raramohaga huniê, kê vi: Inê kê bani tamasi tangagamu manga o vaema ni kare i tamasi tangara o karena, se manga ka enani kare tangara ka karena, se manga na gete tangara na karena i marupera.

²⁹Inê kê nungigamu nga, hanana mu voravora re na kariaku, hanana gê God iami. Inê kê nungigamu nga, hanana mu voravora re na kariaku, hanana gê vaemami.

³⁰Inê kê hagarukunigamu manga na kua hehene, i hagarukunira na karena renigi na gagahana. Hoita, gê katogamu mara ta? Inê kê pe obania vi ve bâsigamu aporo nikâ.

³¹Henaka igamu kamu vogasiê, inê kê page murisigegamu. Tangê inê, na tangiana raha na rotu iami, na hagarahasiani na hageha haoru, se na reteha ni gavoni vara, ngaigi ka na marâ purua ma tangê.

³²Inê kê kasira me tangagamu na poropete na kariaku, ma igamu kamu nahuira ma ka meme ma kamu reterete menamenarigi na gahuata. Inê be hagaitangigamu, suria mu mutera.

³³“Inê, na Araha raramohaga huniê, kê vi: Na ruma ni rotu iami ki hihiruga. Inê be tokorenigamu, manga na roga i ahegenigi râ na momogani ma na go maria.

³⁴Na karemi ki asa vige page apara kare, suria ngaira ka usitenigi na ramata iaku ma ka bagaparongata manga igamu.

³⁵I pasimi inê be haganahunira na enoni ga sugi akê me renigi. Ngaira ka page tongesuriê, henaka ga pe bani rongo tarohaku. Ngaira ka page râ surigi na ramata iaku, henaka inê ki mareha rârâ vi ve katogi na mena tangara.

³⁶Ngaira ka pe bani bâsira na poropete, ma ngaira ka page hagaotogi na ogaha iata surigi na bani hagesuringa iata tangara.

³⁷Inê be tohe, vigê korokoro tangara na enoni ngegana ma na kareta ka page ruru ma ka page ngerengere vagevage. Na enoni ngegana ka pe bani bâsiê, ma igê na aitangihata ngaira ka page tongesurigi na tamasinga iaku.

³⁸“Hoita o Esera vaema ni kare, gu ageagesira na enoni, go bâsira noga ga râ me tenia i kerekê.

³⁹Bâsira na mane gê bani kasira ka bêngenira. Ngaira ka no Abarahamo, o Isako, o Jakobo, o Hosea, o Amose, o Mika, o Joele, o Obatia, o Jona,

⁴⁰o Nahumu, o Habakuku, o Sepania, o Hagai, o Sekaria ma o Malaki ga visia vi mane tora tamasinga iana na Araha.