Read Kahua 2 ESETARASE 10 Bible Online

2 ESETARASE 10 - Kahua bible

2 ESETARASE 10

¹Igê na bungiana na hagatakuha, matena o kareku ki banu igê na kiboru ni mêruha, ngaia ki me ki apuri.

²Ngekana igami kami hunuigi na laite ni hagatakuha. Na enoni hato i pasiku ka râ me ka hagareko parongaku. Inê kê hagatogo suriê mareku mataro me igê na manurahitana na ruata na tangiana,

³matena ga aporo ngaira hato. Igê na bungiana ngekana inê kê aharaga ma kê hura kê râme igê na bena ikê, manga go bâsia.

⁴Inê kê bani kato, vi i asa vê, vi ve page aporo nikâ i hinua ngekana. Inê kê gâga nga ikê, hanana gê ama ni angiangi maramara nga, ma ki asa vi ve ngê se vi ve totono, mataro me kê meme.”

⁵Matena gê rongo vikana, inê kê nakagi râ nga na takotako iaku mareku ma kê ramonia, kê vi:

⁶“Inê kê pe bani bâsia me rârâ na gete i bekabekaga vikana. Igo ko pe takusigi vari na mamasiaganiha iata na goaka? Go pe giraragi vari na tarani hato ga bani tarahugia?

⁷I Jerusaleme, kenaka igia hato, ki rugu ngavê na obana ma ki maki ngavê. I ararigo hete, vi go angiangi maramara renia ngaia

⁸ma ki rugurugu na obamu renigia hato ma ku hetaki henigia. Ma igo ko angi maramara ma renia o karemu. Na vere tage ma kani ngaia.

⁹Gu hagatea na maveta. Ngaia ki girara, i visia tangago, vi ngaia nga ka na ani i araria vi angiangi maramara renira na bera na enoni i aparara.

¹⁰Igia hato, ga oga i ngekê, ka râ me tenia ngaia igê na haganegahana ma ka rako mêngara ga page arâ me i hemuri. Hagarangia vi igia hato ka arâ ototo râ tanga na mera. Na bera na karena na maveta ka pe tahitahi.

¹¹Hoi, ti ka na hitangimurua i araria vige angi maramara, igo renia o karemu i vere tage ma, se na maveta ga me tenia rako ngavê na karena?

¹²Inê kê bani girara na takoha iamu. Igo ko takusia, vi na takiha iamu ki raha teharia na takiha iana na maveta. Igo ko takusia, vi na marâ purua ma vari ka na bera na karena na maveta ka mauri ma ka kahu meme, ma hete, igo ko têtara renia na tavona na apemu maremu go apara me i maveta ikê. I pe mataku tangago ma ko mamasiaga renia. Hoi, be vi tangago,

¹³

¹⁴haganega me tenia na matena God ki hagavora igê na maveta, na maveta ki mamasiaga, matena i aparara na enoni tanga God, manga igo, matena go apara kare.

¹⁵Ngekana go angi munimuni so maremu ma ku ramo era ma ki aharêsigo na tarana i tarahugo.

¹⁶Manga go aganaria na katoha iana God, suria ki na katoha i koro, igo ko page nahunia aporo o karemu igê na matena tanga, ma na enoni ki page tuguhira, viga hagarahasigo, suria vi igo kani kenani kare.

¹⁷Gu aporo i hinua tanga o vaniamu.”

¹⁸Ngaia ki arami, ki vi: “Mareha! I bara vê vi ve aporo. Inê kê gâga nga ikê tanga gê meme.”

¹⁹Inê kê vi: “Siana! Gu takusigi na bagabevoani ma na mamasiaganiha ga tarahua i Jerusaleme ma ko kahu pe takigo bâraha so maremu.

²⁰

²¹Igo ko bani girara, vi na merongaka ka bani ruhuruhua na agua ni hagarahenga iaka, ka bani hogea na bea ni vogasiha iaka ma ka bani hagamakaka na ruma ni rotu iaka.

²²I mareha rârâ ta na enoni vige kahu êhihi se vige tarotaro igê nikâ, se vige kirigi na ki iaka. Na vagevageha iaka ki bani hato. Ngaira ka bani hunuia na laiti apuna igê. Ngaira ka bani hanagoa na bokesi na suruheri iaka. Ngaira ka atani ataka mavê renigi na marâ apuna iaka ni hagarahenga. Ngaira ka bani erasia na atana na God iaka. Ngaira ka bani hagamakira na ani ga bêngenigia. Ngaira ka bani sungira ka me na mane ni vogasiha iaka. Ngaira ka bani henahuraura na mane ni hagarahenga iaka. Ngaira ka bani tugurira na kare viru tatara iaka ka merarongo era ma tagenana ma tangara na gete iaka. Ngaira ka bani henahuraura na mane i pasika ga totosuria God. I mareha rârâ ta na enoni vige hita so, hanana vige bâbâsurira na kere kare iaka. Na enoni na gapu haoru iaka ka bani vora re na kare rakuraku. Na mane ni me ramo iaka ki bara tangara.

²³Hoi, ma na tarana i erataga ngavê: i Jerusaleme, God i bani atea tanga so marena, ngaia ki oga i rimata na merongaka.

²⁴Vikana, gu hatungigi râ na obaerana ma na ruguha ni oba iamu. God raramohaga hunia ke takigo ma ke haganahunigo renia na marepeha. Ngaia ke hagamamarogo tenigi na mamasiaganiha iamu.”

²⁵Matena gê tamasi tanga na gete ngekana, na mane ki parama ma ki haganega ki togatoga renia na marara i sisiki manga na marangeia. Inê kê magu vi ve ura hagarangia ma kê kone, kê vi: “E, na ta ka na girarana na tarana vikana.”

²⁶Ngaia ki parama ma ki ngere raha. Na ringena ki rongo mamagutaga ma ki ngingia na maveta.

²⁷Matena gê ahaukê, na gete ki bani magahuru, ma kê bâsia hete na hinua, ga bani tagarahia igê na angisi ruma i raha, i bagararaha ngavê. Inê kê bagangerengere, kê vi:

²⁸“I he nga Uriele na angero i bani râ me tangê i nago? Ngaia kani katoê kê tako tugupu. Inê kê nunginungi hagaborâ ma. Inê kê pe tako togo rârâ, nga noga ma na mera.”

²⁹Matena gê tamasi mênga, na angero Uriele ki vora me nikâ. Ngaia ki bâsiê,

³⁰gê tâtâ i ngekana ma kê bagamame, manga na gahuana na enoni. Vikana ngaia ki here i rimaku na otoku ma ki katoê kê ramo aporo. Ngaia ki rageê aharaga kê ura. Hemuri ngaia ki hagateê, ki vi:

³¹“Na ta kani katogo? Tanu hega kanigo obaera ma ko bagatatako bâraha?”

³²Inê kê arami, kê vi: “Igo ko reteniê. Inê kê râ suria na tamasinga iamu ma kê râ me igê na bena ikê. I bara vi ve ramatenia na marâ gê bâsia.”

³³Ngaia ki arami, ki vi: “Gu ura gatagata, na mane kani igo. Inê be ramatenia tangago.

³⁴Inê kê arami, kê vi: “Angero, gu ramatenia me nga. Siana ko arâ paniê, i era ma kê meme renia gê bonoani,

³⁵suria i bara vi ve aitangisigi na marâ gê bâsigi ma kê rongogi.

³⁶Se na takoha ma iaku vari kani hagabekasiê? Se gê bagamamêru kê magu ma vari?

³⁷Angero, inê kê nungigo nga, gu ramatenia nga na maruteha ngekê.”

³⁸Na angero ki vi: “Hoi, gu karinga maninga. Inê be ramatenigi na tarani ga hagamagusigo ngegana. God raramohaga hunia ki bani hagarongogo renigi rako na marâ ga pinihi,

³⁹suria ngaia ki bani girara, vi igo ki oto na ogaha iamu i maana ma ko obarugu ma ko angisira tare na kariamu ma i Jerusaleme.

⁴⁰Na girarana na maruteha ki manga ikê. Na gete ki vora tangago i na kere matena i hato râ.

⁴¹Matena go bâsia i angi maramara, igo ko uhungia vigo hagareko parongana.

⁴²Na gete ki hagarongogo renia o karena i me. Hemuri ngaia ki magahuru râ tenigo. Na girarana ki manga ikê.

⁴³

⁴⁴Na gete, go bani bâsia, kani i Jerusaleme, go bâsia i ngekê manga na hinua i uhu.

⁴⁵Na gete ki hagarongogo, vi ngaia ki pe apara kare rârâ surigi na harisi tangahuru gi oru. Ngaia ki vi, vi surigi na rehagaro gi oru na harisi na vogasiha ki mamênga me igê.

⁴⁶I murina ngekana o Solomo ki tagarahia na hinua ma na vogasiha ki kahu haganega igê. Igê na matena ngekana na gete, i mamênga vige apara kare, ngaia ki apara na kare mane.

⁴⁷Ngaia ki hagarongogo, vi ngaia ki marupea maninga o karena ki raharaha. Ngaia ki vi, vi ngaia ki na matena na enoni ka ogasia i Jerusaleme.

⁴⁸Ngaia ki hagarongogo, vi o karena ki me igê nga na tangiana ni êragiha iana. Ngaia ki vi, vi na aruhuruhunga tanga i Jerusaleme.

⁴⁹Hoi, igê na maruteha iamu, ngaia ki angi maramara renia o karena ma igo ko uhungia vigo hagareko parongana, suria i akê me na tarana ngekana. Ngaigi nga na tarani God ki obanigo vigo giraragi.

⁵⁰Matena God raramohaga hunia ki bâsia, vi igo ko takia ngavê na gete i mêrihamu hagenani, ngaia ki hagabâsigo renigi na bâkorohana ma na raramohana ga hahanetaga.

⁵¹Tahema inê kê vi tangago, hanana go arâ ma ko gâgâ igê na bena, i mareha rârâ ta na enoni, vige bani oga me igê,

⁵²suria inê kê bani girara, vi God raramohaga hunia ki page hagabâsigo renigi na tarani ngegana.

⁵³Inê kê vi tangago ko râ igê na bena ngekana, i mareha rârâ me igê na angisi ruma,

⁵⁴suria i apu vige oga na anima na marâ na enoni i tagarahia igê na agua God raramohaga hunia i hagabângenia igê na hinua iana.

⁵⁵Hoi, siana ko magu. Gu banu i hinua. Gu râ ku bâsigi na ruma bâkoro ma ka hahanetaga igê. Gu râhia hagenani ku bâ.

⁵⁶Hemuri igo ko page karingagi na marâ hato ga ararigo vigo rongogi.

⁵⁷Igo ko babarisi teharira na enoni hato, nga noga ma ta kereani, suria ta kereani ma kaniga koro i maana God raramohaga hunigo manga igo.

⁵⁸Gu gâgâ nga ikê mataro me i gomaha bungi.

⁵⁹Matena go marute ma ko bagamamêru, God ki page hagabâsigo renigi na katoha iana tangara na enoni, ga page gâga i maveta igê na hagahato tangiani.” Hoi, inê kê mêru hagerua i ngekana, manga i bani vi tangê.