Read Kahua 2 ESETARASE 11 Bible Online

2 ESETARASE 11 - Kahua bible

2 ESETARASE 11

¹Na ruata na bungiana inê kê marute. Inê kê bâsia na ahetaronga i hura akê me tenia na asi. Ngaia ki tonga renigi na gagahana tangahuru matarerua ma na bêna gi oru.

²Inê kê bâsia, i gasigi na gagahana ka buhia na maveta hagenani. Na roga ka rogasia tenigi na ara ni maani na roga ma na vaha ka râ me haku ka oga i avorana.

³Hemuri, tenigi na gagahana, inê kê bâsigi ga ba me na gagahana, ga paregi na bani ani. Ma ngaigi ka sisite ma ka pe nahuni ramoha.

⁴Na bêna hato gi oru na ahetarango ka mêru, nikâ na ani i gupu, i raha teharirerua na ani gi rua.

⁵Matena gê borebore, ma na ahetaronga ki gaha akê ma ki haganega ki marungia na maveta hagenani ma na enoni hato igê.

⁶Inê kê bâsia, vi na ahetaronga ki nakara na ara ni marâ hato i maveta i ruguhana. I mareha rârâ ta na enoni i maveta ge girara vige oga hura tenia.

⁷Hemuri inê kê bâsia na ahetaronga i ura renigi na kakêna ma ki vi tangagi na gagahana, ki vi:

⁸“Siana igamu hato kamu riterite igê na matena gi tage. Mu mauru nga igê na agua mu oga igê, ma kamu riterite nga tatage igê na mateni iami hegitigi.

⁹Na bêku ka riterite nga hagemuri.”

¹⁰Inê kê bore maninga nikâ ma kê bâsia, vi na ringena ki pe râ me tenigi na bêna na ahetaraonga ma ki râ me hete tenia na gupuna na apena.

¹¹Inê kê tomanigi na gagahana sisite, ga paregi na ani raha. Ngaigi ka vora ge varu.

¹²Inê kê bâsia na ani gi tage na hitangini na gagahana i otona ki akê ma ki marungia na maveta hagenani.

¹³Matena i hato na marungiha iana, ngaia ki magahuru hagetage vê, i mareha rârâ vige oga na kere girarana. Hemuri ki akê nikâ ta na gagahana ma ki marungia na maveta arihu era ngavê.

¹⁴Matena i sugi hato na marungiha iana ma ki sugi magahuru manga na ani i nago,

¹⁵ta na ringe ki tamasi tanga, ki vi:

¹⁶“Bâ, igo ko bani marungia me na maveta arihu era ma inê kê obanigo, vigo girara hagenago na tamasinga ngekê ma ko kahu magahuru.

¹⁷Na ani ga page marungia na maveta i murimu igo ki asa vige page marungia borahu manga igo, henaka vige aragupu.”

¹⁸Na oruta na gagahana ki akê ma ki marungia na maveta mangarerua na ani i nago. Hemuri ngaia ki magahuru nogana.

¹⁹I tagenana ma vikana tangagi na gagahana ga mamêngagi. Ngaira ka akê me tatage, ka marungia na maveta ma hemuri ka magahuru râ.

²⁰Inê kê ama ni borebore nga ma ki rârâ, ma na gagahana sisite igê na apena na otona ka akê tatage, hanana ga marungia na maveta. Tani na hitangini ka marungia na maveta sisite râ me ma ka hatani magahuru râ,

²¹ma tani na hitangini ka akê ma ki bara tangara vige marungia na maveta.

²²Hemuri inê kê bâsigi na gagahana raha tangahuru matarerua ma na ani gi rua na hitangini na gagahana sisite ka bani magahuru râ.

²³I mareha rârâ ta na marâ vige hita so i apena na ahetaronga, nga noga ma na bêna gi oru ga mêru ma na gagahana sisite ge ono.

²⁴Inê kê ama ni borebore nga, ma ki parama ma na ani gi rua na hitangini na gagahana sisite ge ono karu râ panigi na ani ge he ma karu guru râ i ruguhana na bêna i otona na ani raha ma na ani ge he ka oga tonge so ma.

²⁵Hemuri inê kê bâsigi na gagahana sisite ge he ngegana ga harikato, hanana viga akê, hanana viga marungia na maveta.

²⁶Tani na hitangini ki akê ma ki hatani magahuru râ rêrê.

²⁷Na ruata ki akê nogana ma ki hatani magahuru râ rêrê teharia na ani i nago.

²⁸Inê kê bâsirerua na gagahana sisite gi rua garu hita so, karu harikato nogaterua, hanana vigaru marungia na maveta.

²⁹Matena garu harikato mênga, na hitangini na bêna ga mêru, ki parama ma ki rite. Ngaia ki na ani i gupu, i raha teharirerua na ani gi rua garu oga hetangenia.

³⁰Hemuri inê kê bâsirerua garu rite nogaterua.

³¹Matena na bêna raha ki aharo râ, hanana vi ngaurerua na gagahana sisite, garu harikato vigaru marungia na maveta, na bêna gi rua sisite karu tamania.

³²Na bêna raha ngekana ki haganega ki marungia na maveta hagenani. Ngaia ki hagamamasiagara ngavê na enoni hato i marungira. Ngaia ki marungia na maveta henia na ramoha i teharia na ramoha iata na gagahana ga bani akê me i nago tarana.

³³Hemuri, matena gê ama ni borebore mênga nga, na bêna raha i gupu ki parama ma ki magahuru râ mangagi na gagahana i nago.

³⁴Na bêna gi rua karu hita so, ma ngairerua nogaterua karu marungia na maveta ma na enoni igê.

³⁵Ma na matena gê borebore mênga, na bêna igê na otona ki ngaua na bêna i mahana.

³⁶Hemuri inê kê rongoa na ringena, i vi: “Esera, gu bâ ototo râ ma ku tako renia na marâ go bâsia.”

³⁷Inê kê bâ ma kê bâsia na marâ i bâ manga na laione i mangariaga. Ngaia ki nguru ki râ me tenia na vapu. Inê kê rongoa i tamasi manga na enoni tanga na ahetaronga, ki vi:

³⁸“Ahetaronga, gu karinga na marâ i tuguhiê vigê visia tangago. Ngaia ki na tamasinga iana God raramohaga hunia.

³⁹Igo getego ma kanigo hita so tenira na ani ge he na marâ mamauri gê ategamu, hanana vigamu marungia na maveta ma kamu hagahatungigi na mateni iana na maveta ikê.

⁴⁰Igo nga ka na heta na marâ mamauri ma ko bani teharira na marâ mamauri hato, ga râ hagenago taramu. Suria na ogaha iamu hagenani i maveta ikê igo ko marungia suria go hagatavatava, ko hagamamasiaga ma ko hagabekasia,

⁴¹ma ko pe botage ngavê renia na monariha.

⁴²Suria go erataga, igo ko teharira na enoni hatara ga oga igê na marapeha. Igo ko kitenira na ani ga tamasi igê na monariha ma ko takuira hete na enoni ni hagaparunga. Igo ko ruhuruhugi na ruma iata na ani ga oga igê na ramana ma ko hogegi na para ni hinua iata na ani, ga pe hagaerasigo rârâ.

⁴³God raramohaga hunia ki bani girara, vi igo ko paroparo ma ko hetagetage ngavê. God raramohaga hunia

⁴⁴ki bani hahariria na maveta i hagavora. Na hagahatongina ki râ me. Na hatongina na maveta ki hato.

⁴⁵Hoi, ahetaronga, i râ me na matena tangago go magahuru râ henigi na gagahamu raha ga mamagutaga, henigi na gagahamu sisite ga erataga, henigi na bêmu era, henigi na kakêmu hagamamaguraga, ma henia na apemu hagenani hagaborâ.

⁴⁶Na maveta hagenani ki page oga purunguni tenigi na bagabevoani go hagavoregi tanga ma ki page haoru aporo, suria i tako togo renirerua na suriha ma na takiha iana God, i hagavora.”