Read Kahua 2 ESETARASE 12 Bible Online

2 ESETARASE 12 - Kahua bible

2 ESETARASE 12

¹Matena na laione ki tamasi vikana tanga na ahetaronga, inê kê bâ,

²ma kê bâsia na bêna na ahetaronga i hita so, i bani magahuru. Hemuri na gagahana sisite gi rua garu bani guru râ tanga na bêna ngekana, ngairerua karu akê, hanana vigaru marungia na maveta, ma na arahanga iaterua ki abubu ma ki erataga.

³Ngairerua karu magahuru i maaku ma na apena hagenani na ahetaronga ki raboa renigi na vavatani na gi ma na maveta ki bubununuga ngavê. Inê kê rite, suria gê anumanuma ma kê magu. Inê kê vi:

⁴“Inê kê hagarateku mareku, suria gê uhungia vigê aitangisigi na tauhana God raramohaga hunia.

⁵Inê ki hato ngavê na takoha ma ki me bâraha na apeku. Na bubununuganiha ga tarahuê i na bungi ka hatungia ngavê na raramohaku.

⁶Na tarana gi tage ma kanigê girara gê nungia God raramohaga hunia re, hanana i hagaramoniê rârâ mataro me na hatongina.”

⁷Tahema inê kê nunginungi, kê vi: “Araha God, manga i monari, vigo takusia, vi inê kê koro i maamu teharira rako na enoni getera ma ki manga go aganarigi na nunginungiha iaku, hoi, inê be nungigo nga,

⁸hanana gu hagaramoniê. Araha God, gu ramatenia me nga tangê na girarana hagenani na maruteha i hagamamagutaga ngekana ma ko katoa ki banabana na aitangihaku.

⁹Igo ngekana kanigo takusia vi inê kani arariê, vigo hagabâsiê renia na hatongina na matena ngegê.”

¹⁰Na angero iana God ki vi tangê, ki vi: “Ikê nga ka na ramateniana na maruteha go bâsia.

¹¹Na ahetaronga, go bâsia i akê me tenia na asi, ngaia ki vi, vi na heta na arahanga igê na maruteha iana o goamu o Taniele.

¹²Henaka, ma na ramateniana tanga o Taniele ki tora getea tenia na ani gê vatego inê i ngekê.

¹³I râ me noga na matena tanga na arahanga i page buhia na maveta ma ki page erataga ngavê teharigi na ani ga bani akê me i nago tarana.

¹⁴Na maneraha tangahuru matarerua ka page heheuri ka marungia na maveta.

¹⁵Na ruata na maneraha ki page marungia arihu na maveta teharigi na mateni hehegitigi iata na tamana.

¹⁶Ngaia nga nga na girarani na gagahani tangahuru matarerua go bâsigi.

¹⁷Igo ko rongoa na ringena, i tamasi tenia na gupuna na apena na ahetaronga, mareha vi tenigi na bêna.

¹⁸Ngaia ki vi, vi i murina na arahanga iana na ruata na maneraha, ki page akê me na heparaparaniha, vi ti kani maneraha ma ka page hagani rakorako na maneraha. Ma ki mareha vige akê me vikana. Na vere tage ma kani page tehateha ma ki page maneraha ma ki page raramohaga aporo mangarerua na ani i nago tarana.

¹⁹Igo ko bâsigi na gagahana sisite ge varu, ga bâgo akê me tenigi na gagahana raha na ahetaronga. Ngaia ki vi,

²⁰vi na maneraha ge varu ka page rêra akê ma na arahanga iata ki page abubu ma ki pe page rongo raha na atata.

²¹Na vererua na hitangita karu page maneraha abubu râ ma igê na gupuna na matena. Na verehe na hitangita ka page maneraha hagarangia na hatongina, ma na vererua karu page akê me igê nga na hatongina.

²²Igo ko bâsigi na bêna gi oru ga mauru.

²³Ngaia ki vi, vi igê na hagahatongini na tangiani na arahanga iata na maneraha, God raramohaga hunia ki page katora ka rêra akê na maneraha gi oru. Ngaira ka page hagagatagatania aporo na arahanga iata na maneraha ma ka page marungia bagararamo na maveta

²⁴ma na enoni igê teharira na ani i nago tarata. Ga visira vi ngaira ka na bêna na ahetaronga,

²⁵suria na maneraha gi oru ngegana ka page hagauhua ma ka page hatungia na bagatauhana na ahetaronga.

²⁶Igo ko bâsia vi na maneraha ki magahuru. Ngaia ki vi, vi na vere tage na hitangita na maneraha ki page meme igê na mamasiaganiha raha i bea iana.

²⁷Ma na vererua karu page meme igê na hearihatana.

²⁸Tani ki page nahuia na tamana ki meme ma hemuri ngaia nogana ki page meme igê na hearihatana igê na hatongina na matena.

²⁹Igo ko bâsirerua na gagahana sisite gi rua garu guru akê hagarangia na bêna i otona.

³⁰Ngaia ki vi, vi God raramohaga hunia ki bani nakarerua mataro me na hatongina, ma na arahanga iaterua ki abubu ma ki erataga, manga go bani bâsia.

³¹Igo ko bâsia na laione i mangariaga i nguru ki râ me tenia na vapu ma ko rongoa i tamasi tanga na ahetaronga ma ki ramonia renia na eraha i katoa ma renigi na tamasinga hato iana.

³²Na laione ki vi, vi na Mesaia. God raramohaga hunia ki bani naka mataro me na hatongina. Ngaia ki page vora re na raraha iana o Tavite. Ngaia ki page râ me ki tamasi tangara na mane ni marungiha. Ngaia ki page ramonira renigi na eragata, na bagatauhata, ma na pebotagehata renigi na ramata iana God.

³³Matena ngaira ka tahitahi mêngara, ngaia ki page surira, ki page hagaitangira meni na tasi iata ma ki page hagamagahurura ngavê.

³⁴Ngaia ki page takira na kariaku getera, ga hita so igê na apanena iaku. Ngaia ki page katora ka gâga purunguni ma ka vagevage mataro me na hatongina, na tangiana na suriha raha, gê bani hagarongogo renia hagenago.

³⁵Nga na maruteha iamu ngekana ma na ramateniana tanga.

³⁶Igo getego ma ka na ani God raramohaga hunia i takusia vi ararigo vigo girara na giraraha pinihi ngekê.

³⁷Hoi, gu segegi so igê na buka na ara ni marâ go bâsigi ma ko bagia maninga pinihi igê na agua koro.

³⁸Hemuri ko hagesurira tani na enoni renigi na tarani pinihi ngegana, na enoni ga tako mataha i berarogata na kariamu, na ani ga girara ga aitangisigi ma ka munigi so.

³⁹Ma igo ko gâga so nga ikê surigi na tangiani gi pi nikâ, hanana God raramohaga hunia ke hagagirarago renigi na anima na marâ i obania vari vi visigi tangago.” Hemuri na angero ki râ paniê.

⁴⁰Matena ga bani hato na tangiani gi pi ma na enoni hato ka rongo, vi inê ki mamênga vi ve aporo i hinua, ngaira hato, na ani ga ruruguha ma na ani ga matareha, ka râ me ma ka hagateê, ka vi:

⁴¹“I hega, igami kami katoa vari ta na tarana era tangago? I hega, igami vari kami pe katogo bâkoro? Tanu hega kanigo râ panigami ma ko oga i na agua ikê?

⁴²Igo getego ma kanigo hita so renira na poropete hato iamami. Igo nga kanigo manga na hunguna na guani na vaini i hagemuri tatare i mu ni vaini, manga na laiti igê na agua i roto, manga na sugu i purunguniaga tanga na haka igê na matena na roga raha.

⁴³I hega, i mamênga vari vige arari na mamasiaganiha iamami?

⁴⁴Manga go panigami, igami ki ararigami ma vigami bani me igê na gi i hagamakaka i Jerusaleme henira na ani ga me igê.

⁴⁵I hega, igami kami koro teharira vari na ani ga me igê?” Hoi, ngaira hato ka haganega ka angiangi raha. Inê kê arami, kê vi:

⁴⁶“Isiraelita, mu ramo! Siana ki rugurugu na obami.

⁴⁷God raramohaga hunia ki ama ni takusigamu nga. God raramohaga hunia ki pe rumakaka renigamu igê na mamasiaganiha hato iami.

⁴⁸Ma inê nogaku kê pe panigamu se vi ve kasi renigamu. Inê kê râ me ikê hete, hanana gê nungia God tanga i Jerusaleme ma tanga na ruma ni rotu iami i aruhuruhu i ngekê.

⁴⁹Igamu hato kamu aporo nga i pasimi. Inê kê page aporo me tangagamu i murini na kere tangiani.”

⁵⁰Hoi, ngaira ka râ paniê ma ka aporo i hinua.

⁵¹Inê kê oga igê na bena surigi na tangiani gi pi nikâ, manga i bani bonasiê na angero. Inê kê ngêgi ma na mahe ni bemu, suria bani hanaku me inê kê pe ngaugi na ganiani.