Read Kahua 2 ESETARASE 13 Bible Online

2 ESETARASE 13 - Kahua bible

2 ESETARASE 13

¹I murini ga hato na tangiani gi pi, inê kê marute igê na varuta na tangiana i bungi me.

²Matena gê marute, inê kê bâsia na roga i akê me tenia na asi ma ki rogasia na asi ka hehanehi na navo.

³Matena gê borebore, ma na roga ki meakê tenia na asi na marâ i bâ manga na mane. Ngaia ki gaha igê na vaha. Matena i bâ rârâ, na ara ni marâ i boretenigi ka haganega ka tata.

⁴Matena i tamasi, na enoni hato ka rongoa na ringena ma ka rono manga na aena na mangate i rono igê na gi.

⁵Inê kê bore nikâ ma kê bâsia na bera na enoni i asa vige tomanira. Ngaira ka na enoni ga bani haku me tenia na maveta hagenani, hanana viga meheariha na mane i bani akê me tenia na asi.

⁶Hemuri inê kê bâsia na mane ngekana i tahea na barana ma ki gaha tagere ki oga igê.

⁷Inê kê uhungia vigê bâsia na agua se na apanena i he na barana, ma ki bara tangê.

⁸Hemuri inê kê bâsia, vi na enoni hato, ga bani haku me, hanana viga meheariha, ngaira ka bubununuga. Henaka ma ngaira ka hagarê viga meheariha.

⁹Matena na mane ngekana ki bâsia na bera na enoni ga râ me, hanana viga taharia, ngaia ki pe tangaru rârâ.

¹⁰Na marâ gi tage ma gê bâsia ka na marâ i bâ manga na gi i gogo hura me tenia na harana. Ngaia ki uhigenigi hura na roga na vavatana tenirerua na gaviharana, na roga raha sisiki tenia na meana. Na gi i gogogo, na roga na vavatana ma na roga raha sisiki ka haku,

¹¹ma ka vato hurira na bera na enoni ga arâ me, hanana viga taharia, ma ka hagamakakara ngaira hato. Ki parama ma ki magahuru râ na bera na enoni i bara vige tomanira. I mareha rârâ ta na marâ vige hita so, nga noga ma na rahu ma na siginihana na robona na gi. Inê kê kakangi, matena gê bâsia vikana.

¹²Hemuri inê kê bâsia na mane i so me tenia na barana ma ki unia me ta na bera na enoni nikâ. Ngaira ka na enoni ni hekomaniha.

¹³Na ani mavê na enoni ka râ me: tani ka obakoro, tani ka obaera, tani ka rakugi na rimata ma na êgata, ma tani ka torera me tani manga na votovoto tanga na Araha. Inê kê rite, suria gê bubununuga. Inê kê nunginungi, kê vi tanga God raramohaga hunia, kê vi:

¹⁴Araha, igo ko bani hagabâsiê renigi na tarani ngegana ga hagakoneê. Igo ko bani takusiê vi arariê ma ko bani aganarigi na nunginungiha iaku.

¹⁵Hoi, gu ramatenia tangê na maruteha ngekê nikâ.

¹⁶Inê kê bani takusia me, vi i page era tangara na enoni ga page tahitahi igê na tangiani ngegana ma ki page era ngavê tangara na ani ga page pe tahitahi.

¹⁷Ngaira ka page obaera ngavê,

¹⁸suria ngaira ki asa vige page vagevagesigi na marâ koro, ga oga tangagi na hatongini na tangiani.

¹⁹Ma tangara na ani ga tahitahi ki page era nikâ, suria ngaira ka page tarahugi na bagabevoani raha ma na mamasiaganiha rako, manga ga bani hagabângenia na maruteha ngegana.

²⁰Henaka i manga ngekana, ngaia ki arari ma viga bêbanu igê na bagabevoani ngegana mataro me ka huhura tenigi igê na hatongina na tangiana, teharia vige magahuru tenia na maveta manga na vaha ma ki asa vige bâsia na ta ki akê me igê na hagahato tangiani.” Ngaia ki arami, ki vi:

²¹“Inê be ramatenia na maruteha ma be aramigi na hagatenga iamu.

²²Na hagatenga iamu ka renira na enoni ga page tahitahi mêngara igê na hatongina. Na aramiha ki manga ikê.

²³Na ani i hagavoregi na bagabevoani igê na tangiani ngegana, ngaia nikâ ki page anumasira tenia na bagabevoana na enoni ga bani rurugi na tauhata koro i pasina God raramohaga hunia, ga totosuria.

²⁴Inê kê vi tangago, vi na ani ga tahitahi, ngaira ka babarisi ngavê teharira na ani ga pe tahitahi.

²⁵Hoi, na girarana na maruteha ki manga ikê. Na mane go bâsia i akê me tenia na asi,

²⁶ngaia ki na ani God raramohaga hunia i bani naka nanê me i nago kerevê noga. Ngaia ki page katoa na maveta, i hagavora, ki gâga purunguniaga ma ki page hagavorea na ogaha haoru tangara na ani ga tahitahi.

²⁷Igo ko bâsigi na roga, na gi ma na roga raha ga hura me tenia na harana na mane

²⁸ma ko bâsia i pe tangaru rârâ renia na ora se vi na ani getigi na tangaruha, hanana vige mutea na bera na enoni ga râ me, hanana viga taharia. Ngaia ki vi vikê.

²⁹I sugia ma na matena, God raramohaga hunia i page haganega ki katora na enoni i maveta ka gâga purunguniaga.

³⁰Igê na matena ngekana na enoni hato ka page hagani bagatatako.

³¹Ngaira ka page haganega ka hearihaheri, na hinua ma na hinua, na apaneni ma na apaneni, na agua ma na agua, ma na maneraha ma na maneraha.

³²Igê na matena ngekana na girarani na hatongini na tangiani, gê bani visigi tangago i nago, ngaigi ka page akê me. Ma hemuri inê kê page hagabângenia o kareku. Ngaia ka na mane go bani bâsia i akê me tenia na asi.

³³Matena na enoni hato i maveta ka rongoa na ringena, ngaira ka page panigi i pasita, ka page nakagi ngavê na hearihatana iata heri,

³⁴ma ka page hakuhaku me ka voravora na bera na enoni i bara vige tomanira, manga go bani bâsia igê na maruteha. Na enoni hato ngegana ka page haku tanga ma ga meheariha o kareku.

³⁵Ngaia ki page rêra i hungana i Sione pusira.

³⁶Ngaira hato ka page bâsia i Jerusaleme haoru, i uhuhu ma ki hatohato hagetage, tagenana ma manga go bâsia igê na maruteha iamu na barana, i mareha vi na enoni kanige tahea.

³⁷Hemuri o kareku ki page hagaitangira na enoni hato ga bani haku me, suria ngaira ka haritohea God. Na girarana na roga raha ngekana.

³⁸Ngaia ki page tamasigi i maata na katoha era iata ma nikâ na mamasiaganiha ga tuguhira. Na girarani na vavatani na gi ngekana. Hemuri ngaia ki page atani hagamagahurura râ renia na buka ni ramata. Na girarana na gi ngekana.

³⁹Igo ko bâsia i hagahakura ta na bera na enoni ni hekomaniha.

⁴⁰Ngaira nga ka na tangahuru na varo ninuni iana o Isiraele, ga bani henahuraura i na matena i maneraha igê o Hosea. O Salamanasere na maneraha i Asiria ki henahuraura ma ki torera râ tanga na apanena iata na mahuara kerekê i ve i Uparatesi.

⁴¹Ma na tangahuru na varo ninuni ngegana ka usi vige oga i berarogata rako na enoni ahuroto igê na apanena ngekana. Tahema ngaira ka râ bêkê nga tanga na agua, i mareha rârâ vige bani oga me igê ta na enoni.

⁴²I ngekana ngaira ka tako viga marupegi na ramata iata, ga pe bani marupegi me i pasita.

⁴³Matena i kere bara tangara, hanana vige tarêhia na ve i Uparatesi,

⁴⁴God raramohaga hunia ki katogi na mena tangara ma ki hagabarasigi na ve ka pe gogogo mataro me ka panetarê hato.

⁴⁵Na râha iata i na apanena ngekana, i Arasarete, ki borahu: na harisi gi tage ma na hageha ge ono.

⁴⁶Ngaira ka oga tonge i ngekana. Ma i ngekê nga igê na hatongini na tangiani ngegê, ngaira ka aporo me i pasita,

⁴⁷ma God raramohaga hunia ki hagabarasigi nikâ na ve, hanana ngaira ka tarêhigi. Na girarana na bera na enoni ni hekomaniha go bâsia ngekana.

⁴⁸I berarogata ka page oga igê nikâ na kariamu hato maremu ga hita ma ka oga i raroni na pereperegani na apanena apuna iaku.

⁴⁹Matena i arâ me na matena tanga o kareku i hagamagahurura igê na bera na enoni ga bani haku me tenigi na agua hato i maveta, ngaia ki page anumasira na kariana ga hita,

⁵⁰ma ki page katogi rako na mena tangara.”

⁵¹Inê kê vi: “Araha God, gu visia me, tanu hega na mane kani akê me tenia na asi?”

⁵²Ngaia ki arami, ki vi: “I bara ngavê vi ta na enoni vige hahariria na porona na asi, hanana vige girara na ta kani igê. I tagenana ma i mareha rârâ ta na enoni vige girara ge bâsia o kareku se vi na enoni ge takua, mataro me na tangiana, i bani naka ki tâ.

⁵³Na girarana na maruteha iamu ngekana. Igo getego ma ko nahunia na giraraha ngekê gê vatego renia,

⁵⁴suria igo ko bani rumakaka vigu tagara tangago so maremu, hanana go tagara tangê inê ma ko hagesuringenigi na ramata iaku.

⁵⁵Igo ko bani naka na mêriha iamu igê na takoha mataha, ma na aitangisiha ki manga kenamu.

⁵⁶Tahema God raramohaga hunia ki bani vatego na memu, i hagabâsigo renigi na tarani ngegana. Hoi, i murini na tangiani gi oru inê be aporo me ma kê hagarongogo renigi tani na tarani nikâ ga pinihi.”

⁵⁷Inê kê barebare rârâ igê na bena, matena gê rahesia ma kê visia raha God raramohaga hunia renigi na mena i katogi igê na matena iana tangagi.

⁵⁸Ngaia ki bâsurigi na matena ma na ta ka akê me igê. Inê kê oga i ngekana surigi na tangiani gi oru.