Read Kahua 2 ESETARASE 14 Bible Online

2 ESETARASE 14 - Kahua bible

2 ESETARASE 14

¹Igê na oruta na tangiana, matena gê oga so i mamarugana na apinige raha, ki parama na ringe ma ki râ me tenia na kere apinige hagarangiê, ki vi: “Esera! Esera!”

²Inê kê aharaga, kê arami, kê vi: “Araha, inê akê”.

³Na ringe ki vi: “Inê kê hagabângeniê mareku tenia na kere apinige, vi o ti kani inê. Inê kê tamasi tanga o Moise, matena na kariaku ka vora re na kare rakuraku i Esipito.

⁴Inê kê hagatorangenia ki bêngenira hura tenia i Esipito ma kê torera tanga na hungana i Sinai. Inê kê têngania o Moise ki oga heniê arihu igê na hungana i ngekana.

⁵Inê kê hagarongoa renigi na tarani ga pinihi, renigi na mateni na hagahatongina na matena. Inê kê hagarongoa

⁶renigi na ta ki araria vi hagarongora na enoni renigi ma na ta ki munigi so.

⁷Hoi, inê kê bonasigo,

⁸hanana go hagesuringenigi ma ko giraragi i obamu na girarani, na maruteha ma na ramateniani, gê bani visigi tangago.

⁹Igo ka page torego akê tenia na maveta ikê tanga na agua i haha, igamu, igo ma na enoni ga maratoramu, kamu page oga igê henia o kareku mataro me na hatongina na maveta.

¹⁰Na maveta ki bani hato vige haoru. Ngaia ki hatani varahu rêrê.

¹¹Igê na ogaha hagenani iana na maveta ka oga igê na apaneni tangahuru matarerua na mateni. Na tangahuruta na matena ki bani ata me,

¹²i aragupu. Na mateni gi rua ma na ani i aragupu ka mamêngagi me.

¹³Hoita, gu hagaotoa na ruma iamu, gu haganunura na kariamu, gu hagaramonira na ani ga haritagi ma ku hagesurira na ani ga tako mataha. Ma hemuri ko kahu aria na mêriha i girara i meme.

¹⁴Gu rumakaka vê renigi na marâ ni maveta. Gu kasigi so na marâ ga hagahigera na enoni ma ku nakagi râ na tauhamu vi igo ka na enoni.

¹⁵Gu murisigegi na ara ni anumanumaha hato iamu ma ku nanê, hanana gu pania rêrê na maveta ikê.

¹⁶Igo ko bani bâsigi rako na tarani erataga, ma na tarani ga erataga ngavê teharigi na ani ngegana, ka sugia me.

¹⁷Matena na maveta ki ama ni varahu nga ma ki ama ni mameaga nga, na eraha, ga page tarahura na enoni igê, ka page ama ni rakorako me nga.

¹⁸Na monariha ki page arâ vê, ma na hagaparunga ki ama ni hagarangi me nga. Na ahetaronga, go bâsia igê na maruteha iamu, ki sugia ma vige ata me.”

¹⁹Inê kê vi: “Nakê be tamasi tangago, Araha.

²⁰Inê kê nanê, hanana vigê arâ, manga go bani bonasiê. Inê kê page haganunura na enoni ga oga i ngekê. Ma ti kani page haganunura na enoni ga mamêngara vige voravora me? Na maveta ikê ka na mengo ma na enoni igê ka pe nahunia na marara.

²¹Na buka ni ramata iamu ki bani makaka renia na gi. Tahema ki mareha rârâ ta na enoni vige page giraragi na tauhamu i nago se na katoha iamu tanga na matena i hemuri me.

²²Gu kasia me na higona apu iamu ke angariê, hanana ve girara ve segegi so na ara ni marâ ga akê me i maveta ikê haganega me tenia na haganegahana, na marâ hato ga bani oga igê na buka ni ramata iamu. Vikana igê na hagahato tangiani ngegê, na enoni ka page girara ga tarahugi na tarani ga oto ma ka nahunia na mêriha, manga viga obania.”

²³Ngaia ki arami, ki vi: “Râ, ku hagahakura na enoni ma ku vi tangara, vi siana ka garigo surigi na tangiani tangahuru ge he.

²⁴Go nanê renigi rako na ahani na pepa ma ko merarâ na mane gi rima, ga girara ga segesege garigari. Ngaira ka no Seraia, o Tabiria, o Selemia, o Etane ma o Asiele.

²⁵Hoi, go arâ me ikê ma inê kê tanga na laiti ni aitangisiha igê na aitangihamu, ma ngaia ki asa vige page me mataro me ko segegi hato na marâ ga tuguhigo vigo segegi.

²⁶Matena go segesege hato, go vatera nga na enoni renigi ta ahani ma na ahani getigi ko vatera nga na mane ni takoha mataha, hanana ga page munigi so mareta. Hoi, i gomaha, igê na matena vikê, ko haganega nga ko segesege.”

²⁷Inê kê kato vikana ma kê hagahakura na enoni hato. Inê kê vi tangara, kê vi:

²⁸“Isiraelita, mu karingê gê tamasi.

²⁹I nago na êvarika ka oga mamahuara i Esipito ma hemuri God ki hagatahira tenia i Esipito.

³⁰God ki vatera renia na buka ni ramata ni mêriha. Ma ngaira ka pe marupegi na ramata. Ma na mateni iami igamu, igamu kamu pe marupegi nogami.

³¹God ki haganahugigamu renia na agua apuna kamu nahunia, ma igamu kamu bagatauhami mangara na êvarimi ma kamu pe râ surigi nogami na ramata, manga God raramohaga hunia i bani bonasigamu re.

³²God ki surira na enoni igê na otoha. Tahema ki rârâ ma ngaia ki torea aporo tenigamu na agua i bani vategamu.

³³Tahema igamu kamu oga ikê igê na agua ga henahuraugamu tanga. Ma igamu kamu oga hagarangia i Jerusaleme teharira tani na goami na Siu.

³⁴Ma ki manga mu page hagaotogi na takoha iami ma kamu page agana kamu hagesuri, igamu kamu page tahitahi igê na mêriha ikê ma kamu page tarahua na takiha i murina mu meme,

³⁵suria na tangiana ni suriha raha ki arâ me i murina na mera. Igia ka page mauri aporo ma na enoni koro ka page rikiriki râ getera, ma na bagatauhata na enoni era ka page rangaranga.

³⁶Hoita, i raroni na tangiani tangahuru ge he siana ta na hitangimi ke arâ me i pasiku se vige gariê.”

³⁷Inê kê merarâ na vere rima na mane ma kami râ igê na bena kami oga igê, manga i bani bonasiê na Araha.

³⁸Igê na ruata na tangiana ki parama ma kê rongoa na ringe, i vi: “Esera, gu manganga ma ku tonomia na marâ gê vatego.”

³⁹Hoi, inê kê manganga ma ngaia ki tagarenia me na kâkâ i vunu renia na tavona na marâ i bâ manga na anguruna na gi.

⁴⁰Inê kê têa ma kê tono. Matena gê tono hato, na aitangisiha ki aharêsia ngavê na aitangihaku ma na takoha mataha ki raha ngavê igê ma na ara ni marâ i nago ka mave aporo ngavê tangê.

⁴¹Inê kê haganega kê tamasi ma kê ama ni tamasi nga ki râ.

⁴²God raramohaga hunia ki haganahunira nogata na vere rima na mane renia na takoha mataha ma ngaira ka heheuri ka segegi so na tamasinga iaku. Ngaira ka sege igê na segeha ga pe bani girara me i nago. Igê na tangiani ngaira ka segesege ma ka ngêngê igê na bungiani.

⁴³Inê kê tamasi igê na ara ni tangiani hagenani, henaka igê na bungiani.

⁴⁴I raroni na tangiani tangahuru ge he ngaira ka segegi na buka tangahuru gi siva matare ge he.

⁴⁵Ga hato na tangiani tangahuru ge he, God raramohaga hunia ki vi tangê, ki vi: “Go votogi nga na buka tangahuru gi rua matare he, go segegi hagenago tangara na enoni, hanana ga tomanigi, henaka vi ngaira ka na enoni koro se mareha.

⁴⁶Ma na buka tangahuru gi pi, go segegi hagemuri, ko taugi so gatagata ma ko vatera ma na mane ni takoha mataha i berarogata na kariamu,

⁴⁷suria na buka ngegana ka na maganuha ni aitangisiha, na ve banga ni takoha mataha ma na ve ni giraraha.”

⁴⁸Ma inê kê kato vikana.