Read Kahua 2 ESETARASE 3 Bible Online

2 ESETARASE 3 - Kahua bible

2 ESETARASE 3

¹Na harisi tangahuru gi oru i murina i vota i Jerusaleme, inê o Sealitiele, ga visiê nikâ vi o Esera, inê kê oga i Babilone. Inê kê tâ i bea iaku. Inê kê tako bâraha ma kê hataera,

²suria gê tako renia i Jerusaleme i aruhuruhu ma renia na ramana iata na ani ga oga i Babilone.

³Inê kê anumanuma ma kê hagarongoa God raramohaga hunia renigi na anumanumaha iaku.

⁴Inê kê vi: “Araha God, igo, igo getego ma ko tamasi ma, matena go haganega ko hagavorara na ara ni marâ hato ma ko maningaia na maveta. Igo ko bonasia na momo,

⁵ki vora re na apena o Atama, i mamênga igê na mêriha. Hemuri igo ko maningaia renigi na rimamu. Igo ko uhia banu na roga ni mêriha ma ngaia ki haganega ki mêri.

⁶Igo ko kasia igê na agua bâkoro ngavê i Etene, go bani hagarêa, matena i mamênga na maveta.

⁷Igo ko naka tanga na ani gi tage togo ma na ramata ma ngaia ki pe râ suria. Ma igo ko nakara ototo râ nga ngaia ma na raraha iana i ruguhana na mera. Tenia O Atama ka vora me rako teha ngavê na enoni hehegitigi, na apaparaha, na varo ninuni ma na ahemata, ma ki bara vige tomanira.

⁸Na marâ hato ka râ suri barisuta ma. Ngaira ka haritohego ma ka usitenigi na ramata iamu. Ma igo ko pe manimani rârâ.

⁹Ma hemuri ki rârâ, ma igo ko kasia me na maganuha raha ma ko hagamesira na enoni hato i maveta.

¹⁰Ngaira hato ka me. Na mera ki bani tarahua o Atama ma i ngekê na mera ki tarahura na enoni hato renia na maganuha raha.

¹¹Ma igo ko hagatahia na mane gi tage o Noa henia na ahemata iana ma henira na raraha hato iana ga tê viteamu.

¹²Na enoni i maveta ka haganega ka ama ni tataka nga ma ka ama ni rakorako nga na ahemata, na hagosi ninuni suria na maveta. Ngaira nikâ ka tasi ma ka erataga ngavê teharira na enoni i nago tarata.

¹³Ma hemuri igo ko atea o Abarahamo.

¹⁴Igo ko takuia ma igê na gupuna na bungiana igo ko hagagirara pinihi, manga i he na maveta ki page hatohato.

¹⁵Igo ko naka na suruheri hagahu henia ma ko suru tanga, vi igo ki asa vigu rumakaka renira na raraha iana. Igo ko vatea renia o Isako, ma o Isako renirerua o Jakobo mo Esau.

¹⁶Igo ko atea o Jakobo, ma na raraha iana ka tataka ngavê ma ko usitenia o Esau.

¹⁷Igo ko hagatahira na raraha iana o Jakobo tenia i Esipito ma ko bêngenira tanga na hungana i Sinai.

¹⁸I ngekana igo ko piringia vato na vavearo ko ngingia na ano, ko gurugurua na maveta, ko katogi na ve i ruguhana na maveta ka tatata ma ko katogi na ara ni marâ hato i vavearo ma i maveta ka hagatasigi na atohani.

¹⁹Na marara mave na bâbâhamu raha ki râ tararugi na maani para ge he, tani na gi, tani na nunu, tani na roga raha ma tani na anumaganiha raha, hanana go vatea na buka ni ramata henigi na tamasinga iamu igê tangara na raraha iana o Jakobo. Ngaira ka na Isiraelita.

²⁰Igo ko pe tavogi râ na teniha era tenira ma ko nakagi na ramata iamu ka hagaotogi hete na ogaha iata.

²¹O Atama na mane hagenago na teniha era ki higea vato ma ki tasi, suria na teniha era ki teharia. Na tarana ngekana ki tarahura na raraha hato iana.

²²Tahema na maeha ngekana ki haganega ki tatarê ma ki asa vige page hato. Henaka na ramata ka oga igê na aitangihata na enoni, ma na eraha ki vagavagaraga igê nogana. Tahema na tarani ga koro ka magahuru, ma na tarani ga era ka ama ni goga nga.

²³Rârâ rako na harisi, igo ko atea o Tavite na kariamu,

²⁴ma ko vi tanga ki tagarahia na hinua raha, i torea na atamu ma ka vogasigo igê.

²⁵Ngaira ka kato vikana surigi rako na harisi ma hemuri na enoni igê na hinua ka haritohego

²⁶ma ka tasi mangara o Atama ma na raraha hato iana, suria na teniha era ki oga igê na aitangihata nogata.

²⁷Tahema igo ko tagarenia na hinua iamu maremu tangara na merongamu.

²⁸Inê kê tako, kê vi: ‘Vari God ki hagamarumungenia i Babilone, hanana i henahuraua i Jerusaleme, suria na enoni i Babilone ka koro teharigia igia.’

²⁹Ma na matena gê râ me i Babilone, inê kê bâsigi rako teha ngavê na tasi, i asa vi ve tomanigi. Hoi, surigi na harisi tangahuru gi oru gê oga i ngekana, inê kê bani bâsira rako na enoni tasi. Ngekana inê kê tako tugupu ngavê,

³⁰suria gê bâsia, vi igo ko nakara mavê na enoni tasi ma ko pe hagaitangira, ma vi igo ko anumasira na merongamu ma ko mutera ma na kariamu ma.

³¹Igo ko pe hagarari rârâ, manga i he igami kami girara mi urusigi na tauhamu ngegana. Bâ, i Babilone ki pe koro teharia i Jerusaleme!

³²I mareha rârâ na enoni i ta na agua vige bani girarago me, se vige aganarigi na suruheri iamu, nga noga ma i Isiraele.

³³Ma i Isiraele na ta ki nahunia re? Ngaia ki tagara hagaborâ ma. Inê kê bani râ i na agua hato surigi na agua getigi ma kê bani bâsia, vi na enoni ngegana ka oga igê na ramana, henaka vi ngaira ka pe marupegi na ramata iamu.

³⁴Hoita, Araha, manga go hagararingenigi na higahigani na tasi iamami henigi na anita na enoni hato getera i maveta, igo ko page tarahua, vi na tasi iata ka higa teharigi na tasi iamami igami.

³⁵I mareha rârâ ta na matena na enoni i maveta vige pe haritohego igê. Ma ki hega, na enoni i na agua getigi vari ka marupegi maninga na ramata iamu teharira na Isiraelita?

³⁶Vari igo ko tarahua na tarana ngekana i pasita tani na enoni ma, ma vi i pasita na enoni hato ki mareha?”