Read Kahua 2 ESETARASE 4 Bible Online

2 ESETARASE 4 - Kahua bible

2 ESETARASE 4

¹Na angero Uriele, God i bani hagatorangenia me tangê, ki arami, ki vi:

²“Igo ko takusia vari, vi igo ko girara go aitangisigi na tauhana God raramohaga hunia? E, igo ki mareha ngavê, vigu aitangisigi na tarani ga akê me i maveta ikê!”

³Inê kê arami, kê vi: “Angero inê kê aitangisigi!” Na angero ki arami, ki vi: “God ki hagatorangeniê, hanana gê hagatego renigi na hagatenga gi oru renigi na tarani ga akê me i maveta ikê. Ma igo nga ko aramigi.

⁴Manga igo ma ko girara vi go aramia na ani gi tage ma na hitangini, hoi, inê kê aramigi na hagatenga iamu renigi na tauhana God ma kê hagagirarago vi manga i he na teniha era kani oga igê na aitangihata na ara ni enoni hato.”

⁵Inê kê arami, kê vi: “Hoita, angero.” Na angero ki vi tangê, ki vi: “Hoi, manga i he kanigo hagararingenia na kilo gi tage na higahigana na gi? Manga i he kanigo hagararingenia na higahigana na roga? Manga i he kanigo torea aporo me na tangiana i bani hato?”

⁶Inê kê arami, kê vi: “Tanu hega kanigo hagateê renigi na hagatenga ga bara ngegana? I mareha rârâ ta na enoni vige girara ge aramigi!”

⁷Hoi, ngaia ki vi: “Manga vi inê ma be hagatego ma, vi gi hita na ruma kani i na porona na asi? Gi hita na ve kaniga gogo ka hetakutaku henigi na ve i ruguhana na maveta? Gi hita na ve kaniga oga i avorana na vavearo? I he nga na teha, ga huhura igê tenia na agua iata na enoni ga me? I he nga na teha ga bêbanu igê tanga na Paratiso?

⁸Manga vi ve hagatego renigi ma na hagatenga ngegana, vari igo ku bani aramiê, ku vi: ‘E, inê ki mareha rârâ vi ve so igê na ve i ruguhana na maveta. Inê kê mamênga vi ve bêbanu igê na agua iata na enoni ga me. Inê kê ki mareha rârâ vi ve akê i vavearo.’

⁹Bâ, inê kê hagatego ma renigi na roga, na gi ma na tangiana i nanora i bani hato. Ngaigi ka na marâ go bani giraragi.

¹⁰Ma igo ko pe girara vigu aramiê. E, igo ko pe aitangisigi rârâ na marâ ga bani oga me henigo tenia na matena go sisite.

¹¹Manga i he na kere takoha iamu kani vi girara i aitangisigi na tauhana God raramohaga hunia? I hega, na enoni, na maveta erataga ki bani hagaerasia, ngaia ki girara vari i aitangisigi na tauhana God, i asa vige erataga?” Matena gê rongo vikana, inê kê susure kê tubê so kê puru i ano.

¹²Inê kê vi tanga na angero, kê vi: “Igami kami gahanita kanimi vora me, suria na ogaha iamami i maveta ni tasi ma ni mamasiaganiha ki era ngavê, suria igami kami pe aitangisia, vi manga i he kaniga akê me na tarani, manga vi hanani ge akê me.”

¹³Na angero Uriele ki arami, ki vi: “I ta na tangiana inê kê râ i bemu ma kê rongora na apinige ga harikato.

¹⁴Ngaira ka vi: ‘Nika, ge râ ke meheriha na asi ma ke bugurenia bê aporo taraka.’

¹⁵Ma na navo na asi ka harikato nogata, ka vi: ‘Nika, ge parênia na bemu taraka.’

¹⁶Ma na apinige ka harikato hagaborâ ma, suria na gi ki râ me ma ki ngêgi hato.

¹⁷Ma na asi ki harikato hagaborâ ma nogana, suria na one ki gatagata pusia vige banu me.

¹⁸Hoi, manga go surirerua ma ko hagakitakitagi na berarogaterua, na ani ta na hitangiterua kani oto?”

¹⁹Inê kê arami, kê vi: “Ngairerua tagenaterua karu pe oto, suria na apinige kani tanga ma na bemu ma na navo na asi kani tanga ma na asi.”

²⁰Na angero ki arami, ki vi: “Go vi koro. Hoi, tanu hega kanigo pe girara na aramiha tangagi na hagatenga ga takego so igo maremu?

²¹I tagenana ma na apinige ka tanga ma na bemu ma na navo ka tanga ma na asi, na ani i maveta ikê ka girara ga aitangisigi ma na tarani ga akê me i maveta ikê, ma na ani i vavearo ka girara ga aitangisigi ma na tarani ga akê me i vavearo.”

²²Inê kê hagatea na angero, kê vi: “Gu visia me tangê. Tanu hega kanigê girara vigê aitangisia ta na marâ?

²³Inê kê pe obania vi ve hagate renigi na tarani ga akê me i vavearo. Inê kê obania ma hete, vigê hagate renigi na tarani ga akê me i pasimami i maveta ikê. Tanu hega God kani nakara na enoni i na agua getigi ka hagamakira na Isiraelita? Tanu hega kani naka mavê i Isiraele i takuia, ki vota igê na raramohata na enoni ahuroto i na agua getigi? Tanu hega na ramata ma na suruheri, God i bani vatera re na êvarimami, kaniga bani vora re na marâ purua ma i ngekê?

²⁴Tanu hega na mêriha iamami kaniga abubu mangagi na anita na rango se na namu ma na marâ vigana? Tanu hega God kani takusia vi igami kami pe araria na hetakiha iana?

²⁵Tanu hega God kani pe tamanira na kariana marena? Nga na hagatenga gê obania vigê hagate renigi ngegana.”

²⁶Uriele ki arami, ki vi: “Manga vi igo ma ko mauri arihu, igo ko page konekone renigi na tarani go page bâsigi, suria i ngegê ki magahuru rêrê râ nga.

²⁷Na mamasiaganiha ma na tarani ga pe koro ka aharêsia i ngegê. Tahema ngaia ki pe ararigi na ara ni marâ koro hato, God i bani surugi tangara na enoni ga têtê viteana i muri me.

²⁸Na eraha, go hagateê renia, ka bani hasia ma na matena ni reteha ki mamênga.

²⁹Na reteha ni eraha ki akê me nga hagenago ma na maveta ga hasia igê, ki magahuru râ nga hagenago, hanana i kahu girara i akê me na matena haoru tanga na hasiana na koroha igê.

³⁰Igê na haganegahana na maveta na maana gi tage na eraha ka hasia igê na aitangihana o Atama. Bâ, na eraha ki bani rasi teha ngavê! Takusia, ngaia ki ama ni rasirasi nga mataro me na matena ni reteha ma ni tahurunga igê na tangiana ni suriha raha.

³¹Igo ko bani girara, vi na maana gi tage togo na eraha ki rasirasi teha ngavê.

³²Igê na tangiana ni suriha raha karu page era ngavê na reteha ma na tahurunga ni bêni na eraha, i bara vige tomanigi.”

³³Hoi, inê kê hagate, kê vi: “Mi nanasi arihu manga i he ma ki kahu akê me na tarana ngekana? Tanu hega na mêriha iamami kani abubu ma na mamasiaganiha ka aharêsia?”

³⁴Uriele ki arami, ki vi: “Siana ko hagatata teharia God raramohaga hunia. Igo ko takusigo so maremu ma, ma God ngaia ki takusira na ara ni enoni hato.

³⁵Na hagatenga iamu ka tagenani ma henigi na hagatenga iata na enoni koro ga bani me ma ka oga igê na agua, God i nakara ka oga nanasi igê. Ngaira ka hagate, ka vi: ‘Igami kami oga taraha ikê? I na keta ka na tangiana ni suriha raha? I na keta kanimi taugi igê na memami?’

³⁶Na angero Jeremiele ki aramira, ki vi: ‘Igê nga na matena ga page gâga ikê na ara ni enoni hato, ga mamasiaga manga igamu, suria God ki bani hagararingenia na higahigana na matena i ngegê.

³⁷Ngaia ki bani tomanigi na harisi ma na tangiani. I mareha rârâ ta na marâ vige urusi mataro me na matena ngegê i hatongia igê na tara, i tuguhia vi arâ suria.’”

³⁸Inê kê arami, kê vi: “Bâ, angero, igami hato i maveta kami erataga ngavê.

³⁹I hega, i monari, vi na enoni koro ga bani me, ki tuguhira viga naasigi na meta surigi na tasi iamami?”

⁴⁰Ngaia ki arami, ki vi: “I hega, na gete i obara, ki girara vari i pe apara na karena matena ga bani hatohato na hageha gi siva?”

⁴¹Inê kê arami, kê vi: “I bara vê nga!” Na angero ki vi nikâ: “Igê na agua iata na enoni ga bani me, na agua God i nakara igê na atarota, ki manga na anga ni kare.

⁴²Na agua ngekana ki obania bâraha vi tagarenira aporo na atarota, God ki hagêguria renira haganega me tenia na haganegahana na maveta, manga na gete i obania bâraha vige hato na haraniha ni aparaha.

⁴³Igê nga na matena ngekana igo ko page nahunigi na aramiha tangagi na hagatenga hato iamu.”

⁴⁴Inê kê hagete, kê vi: “Angero, manga igo ma ko takusia, vi inê kê girara gê aitangisia, i hega, i arari ma,

⁴⁵vigo visia me tangê ta na marâ nikâ? I hega, na matena i mamênga ma ki borahu teharia vari na matena i bani hato?

⁴⁶Inê kê bani girara, vi borahu manga i he na matena i bani hato, ma na matena i mamênga me inê kê pe girara.”

⁴⁷Na angero ki bonasiê, ki vi: “Râ me, ku ura i otoku. Inê be hagabâsigo renia na maruteha ma be ramatenia na girarana.”

⁴⁸Hoi, inê kê ura hagarangia ma kê bâ, ma kê bâsia na gi i vavata ki ritare i maaku, ma na matena i teha râ, inê kê bâsia na robona i gâga mênga i ngekana.

⁴⁹Hemuri na roto ni rangi ki ritare i maaku, ma ki rangi ru. Matena i hato na rangi ru na sivosivo ki gâga mênga.

⁵⁰Uriele ki vi tangê, ki vi: “Gu takorihia. Na rangi ru ki raha teharia na sivosivo i mumuri me, ma na gi ki raha teharia na robona i hita so i muri. I tagenana ma na matena i bani hato ki borahu teharia na matena i mamênga me. Na matena i mamênga me ki mangarerua na sivosivo ma na robona.”

⁵¹Inê kê hagatea na angero, kê vi: “Gu takusia manga vi inê ma kê tahitahi mênga mataro me na hagahatongina na maveta? Manga i mareha, ti kani tahitahi mênga igê na matena ngekana?”

⁵²Ngaia ki arami, ki vi: “Inê kê girara gê hagarongogo renigi tani na girarana na hagahatongina na matena, manga vi igo ma ko hagateê vikana. Ma inê kê pe oga ikê, hanana vi ve hagarongogo, vi manga i he kanigo mauri borahu. Ma inê nogaku kê pe hagare.