Read Kahua 2 ESETARASE 9 Bible Online

2 ESETARASE 9 - Kahua bible

2 ESETARASE 9

¹Ngaia ki arami, ki vi: “Gu takusigi maninga na tarani hato igê. Matena go bâsia, viga bani akê me tani na girarani, gê bani hagarongogo renia,

²igo ko kahu girara, vi i arâ me noga na matena God raramohaga hunia i page suria igê na maveta, i bani hagavora.

³Ga page akê me na nunu raha, na hemerongeana so i na agua, na hearihatani i berarogani na agua, na gavumane ga heheurisige rêrê tare se ga takotako tugupu. Matena go bâsigi ga akê me na tarani ngegana,

⁴igo ko kahu tahetara, vi ngaigi ka na tarani God raramohaga hunia i bani visigi hagenago me tenia na matena i hagavorara na ara ni marâ hato igê.

⁵Na haganegahani ma na hagahatongini na ara ni tarani ga akê me i maveta ikê, ka rongo mataha.

⁶I tagenana ma nikâ tanga na maveta i haha. Na mena ma na tarani vigana ka hagabângenigi na haganegahani na tarani ga akê me, ma na girarani raha ka hagabângenia na matena ga hatohato igê.

⁷Tani na enoni ka page tahi tenia na hagaitangiha. Na tauhata koro se na tongesuriha iata ka page hagatahira ngaira hato.

⁸Ngaira ka page tahi tenigi na bagabevoani gê bani visigi, ma ka page vagevagesia na tahingata igê na agua gê bani naka hagahu me tangê inê mareku.

⁹Na ani, ga pe bani botage renigi na ramata iaku ma ka kitenigi, ngaira ka page konekone, matena ga tahetara, vi ngaira ka oga igê na mamasiaganiha, i asa vige page hato.

¹⁰I berarogata ka page oga nikâ igê na ani ga pe takusiê rârâ, matena ga tahitahi mêngara, henaka vi ngaira ka aganarigi na marâ koro gê vatera renigi.

¹¹Henira na ani ngegana inê kê page hakura na ani ga kitakitagi na ramata iaku igê na matena ga asitatara viga katokato vikana, ma nikâ na ani ga usi vige urisi parongata, matena ga nahunia mênga na matena tanga vikana.

¹²Na mamasiaganiha, ga page oga igê i murina ga meme, ki page hagagirarara renia na monariha.

¹³Tahema, o Esera, siana ko hagate nikâ renia na hagaitangiha i page tarahura na enoni erataga. Gu takusia hete, vi manga i he ma i na keta kani page tahitahi igê na enoni koro. Na maveta ki vora tangara ngaira ma ki na anita.”

¹⁴Ma inê kê vi:

¹⁵“E, inê be visia aporo na tarana gê bani visia. Na ani ga pe tahi, ka rako teha ngavê teharira na ani ga tahi.

¹⁶Na ani ga pe tahi ka manga na hêna na navo ma na ani ga tahi ka manga na êsusu gi tage na ve.”

¹⁷Ngaia ki arami, ki vi: “Na maani na ngêra, na mane i hasigi i mu iana, na mako ma kani girara; na bâbâhana na mahe na mahe ma kani girara; na korohana na marâ, na mane i tagarahia, na manisingeniha iana ma kani girara; na harisi ga raharaha na tagaraha raha ma iana na enoni kani girara.

¹⁸I nago tarana gê hagavora na maveta ikê, se na enoni ga oga igê, ki mareha rârâ ta na enoni vige tamasi pusiê, suria na enoni ka mamêngara vige voravora me.

¹⁹Matena gê hagavora hato na maveta, inê kê vatea renigi rako ngavê na ngêra ma na ramata ni morana na takoha mataha, ma na enoni gê bani hagavorara, ka bagatauhata.

²⁰Inê kê bâsia na maveta iaku ma kê tarahua, viga hagaerasia ngavê. Inê kê bâsia, vi na katoha era iata na enoni igê kaniga haganega ka hagaerasia ngavê.

²¹Matena gê bâsia vikana, inê kê tarahua, vi i bara ngavê tangê, vi ve hagatahira. Henaka, ma inê kê hagatahira ta kereani tangê inê mareku: na guana gi tage na vaini tenia na parana; na apinige gi tage tenia na bagavapuna raha.

²²Nakara vê ke me na enoni hato ngegana, ga vora ma me tanga ga pe tahi. Ma be nakara na kariaku hetakui ke oga purunguni, na kariaku gê bani tagara bâraha renira ka koro ngavê.

²³Hoi, o Esera, gu oga surigi na tangiani gi pi nikâ ma ki mareha vigu kahu harihari.

²⁴Gu râ igê na bena ni mahe ni bemu, i mareha rârâ ta na enoni vige bani oga igê, ma ku ngêgi ma na mahe. Siana ko ngaugi na ganiani se vigo totono na vaini.

²⁵Gu rahesia God raramohaga hunia suria na metana ngekana. Hemuri inê kê aporo me nikâ ma kê megotamasi.”

²⁶Inê kê râ suria na bonasiha iana na angero ma kê râ igê na bena ga visia Aratata. Inê kê oga so i ngekana i berarogani na mahe ma kê ngêgi na rauga ngegana. Ngaigi ka arariê gê ngê masu.

²⁷I murini na tangiani gi pi inê kê tâ so igê na go ma kê haganega kê takoha bâraha nikâ.

²⁸Vikana inê kê haganega kê tamasi tanga God raramohaga hunia, kê vi:

²⁹“Araha, igo ko vora tangara na êvarimami, matena ngaira ka aharêvoro igê na bagamasusu raha, ga mareha igê na tara ma ki bêratega, i murina ga bani pania i Esipito. Igo ko vi tangara, ko vi:

³⁰‘Isiraelita, mu karingê.

³¹Inê kê vategamu na buka ni ramata iaku. Ngaia ki manga na maana na ngêra i akê i berarogami ma ki ganora. Ngaia ki page vategamu na ageageha tare ki bê ki arâ, manga na tarepuri i bêmi.’

³²Na êvarimami ka aganaria na buka ngekana ma ka pe marupegi na ramata igê. Henaka, ma na guani na ramata ki asa vige magahuru. Ngaira ki asa vige hatungia, suria ki na animu.

³³Na ani ga aganaria na buka ni ramata, ka mutemute hete, suria ngaira ka pe marupea na maana koro na ngêra igê na aitangihata.

³⁴Tarema na baguruna na marâ ki gâga i murina i hatohato na marâ i rarona. Na hagararinga: na maani na ngêra i rarona na mako, na haka igê na asi se na ngêra igê na apira. Ma igami na enoni tasi kami pe manga ngegana.

³⁵

³⁶Igo ko nakagi na ramata iamu igê na aitangihamami ma igami nga hete kanimi page magahuru, suria mi tasi.

³⁷Na ramata ki asa vige page magahuru. Ngaigi ki gâga hagahu henigi na raramohana hato igê.”

³⁸Matena gê tamasi so tangê mareku vikana, inê kê bâ rârâ ma kê bâsia na gete i na apaneku na otoku. Ngaia ki angiangi, ki angi maramara ma ki era ngavê na obana. Na tuguni iana ka taritarisiga ma na rahu i bêna.

³⁹Inê kê nakagi vê ototo râ nga na takoha bâraha iaku ma kê aharia na gete.

⁴⁰Inê kê hagatea, kê vi: “Hega kanigo angi? Hega kanigo obaera ngavê?”

⁴¹Ngaia ki arami, ki vi: “Goaku, gu nakê so, be ama ni angi nga ma be ama ni angi maramara nga. Inê kê obaera ngavê ma ki rugu ngavê na obaku.”

⁴²Inê kê vi: “Na ta kanigo angisia?”

⁴³Ngaia ki arami, ki vi: “Goaku, inê kê bani êragi me surigi na harisi tangahuru gi oru ma kê gomara.

⁴⁴Surigi na harisi tangahuru gi oru ngegana, i na ara ni tangiani, ma i na ara ni mateni, surigi na tangiani ma na bungiani, inê kê nungia God raramohaga hunia, hanana vi ve apara kare.

⁴⁵I murini na harisi tangahuru gi oru ngegana, God ki aganaria na nunginungiha iaku. Ngaia ki hatungia râ na makiha teniê, suria i haganahuniê renia na kare mane. Igami hato kami vagevage bâraha, inê, o vaniaku ma na enoni hato i pasimami. Igami kami hagarahasia God raramohaga hunia.

⁴⁶Inê kê marupea bâkoro ngavê o karemirua ki raha.

⁴⁷Matena i raha, inê kê atea na gete tanga ma kê hagarêa na hagatakuha tanga.