Read Kahua MATEO 1 Bible Online

MATEO 1 - Kahua bible

MATEO 1

¹Ikê ki na raraha iana o Jesu Kirisito. Ngaia ki râ me tenia na raraha iana o Tavite. Mo Tavite ki râ me tenia na raraha iana o Abaramo.

²O Abaramo ki apara o Isako. O Isako ki apara o Jakobo. O Jakobo ki aparara o Juta mo vesina.

³O Juta ma ka Tamara karu apararerua o Peresi mo Sera. O Peresi ki apara o Heseroni. O Heseroni ki apara o Ramo.

⁴O Ramo ki apara o Aminataba. O Aminataba ki apara o Nasoni. O Nasoni ki apara o Salamone.

⁵O Salamone ma ka Ragaba karu apara o Boasi. O Boasi ma ka Ruti karu apara o Obeti. O Obeti ki apara o Jese.

⁶O Jese ki apara o Tavite, na maneraha. O Tavite ma kaniana o Uria karu apara o Solomone.

⁷O Solomone ki apara o Rehoboamo. O Rehoboamo ki apara o Abia. O Abia ki apara o Asa.

⁸O Asa ki apara o Jehosapa. O Jehosapa ki apara o Joramo. O Joramo ki apara o Usia.

⁹O Usia ki apara o Jotamo. O Jotamo ki apara o Agasa. O Agasa ki apara o Hesekia.

¹⁰O Hesekia ki apara o Manase. O Manase ki apara o Amoni. O Amoni ki apara o Josia.

¹¹O Josia ki aparara o Jekonia mo vesina igê na matena na me i Babilone ka henahuraura igê na Ai ni Isiraele i pasita.

¹²Matena na Ai ni Isiraele ka oga i Babilone, o Jekonia ki apara o Salatiele. O Salatiele ki apara o Serubabele.

¹³O Serubabele ki apara o Abiuti. O Abiuti ki apara o Eliakimo. O Eliakimo ki apara o Asore.

¹⁴O Asore ki apara o Sadoki. O Sadoki ki apara o Akimo. O Akimo ki apara o Eliuti.

¹⁵O Eliuti ki apara o Eleasare. O Eleasare ki apara o Matano. O Matano ki apara o Jakobo.

¹⁶O Jakobo ki apara o Josepo, na mane iana ka Maria, i apara o Jesu, ga hêtana vi o Kirisito.

¹⁷Hoita, haganega tenia o Abaramo mataro me o Tavite ka vora na apaparaha tangahuru matara gi he. Ma nikâ na apaparaha tangahuru matara gi he ka haganega tenia o Tavite mataro me na matena na me ni Babilone ka henahuraura igê na Ai ni Isiraele i pasita. Ma nikâ na apaparaha tangahuru matara gi he ka haganega tenia na matena ngekana mataro me ki vora me o Kirisito.

¹⁸O Jesu Kirisito ki vora me manga ikê. Ga bani atengenia ka Maria, na kenana o Jesu, tanga o Josepo. I mamênga vi garu auragi ma o Josepo ki girara, vi ka Maria ki obara renia na Higona Apu.

¹⁹O Josepo, i atengenia ngekana ngaia ki na mane, i koro ma ki oto i maana God. Ngaia ki pe obania, vi ge hagamakia ka Maria i maata na enoni. Tahema ngaia ki kato, vi kasia pinihi.

²⁰Matena i tako vikana, na angero iana na Araha ki vora me tanga igê na maruteha, ma ki vi: “Josepo, igo na raraha iana o Tavite, gu torea ka Maria manga na gete iamu. I koro ma. Suria ngaia ki bani atui renia na raramohana na Higona Apu.

²¹Ngaia ki page apara na kare mane, ma ko page hêtana renia vi o Jesu, renia ngaia ki page hagatahira na kariana tenigi na tasi iata.”

²²Hoi, na ara ni marâ ngegê ka voravora me, hanana ga hagamonarigi na marâ, God i bani tamasi i harana na poropete renigi.

²³Ngaia ki tamasi vikê: “Bâ, na kare viru ni page obara ma ki page apara na kare mane, ma ka page hêtana renia vi o Emanuele,” (i vi, vi “God ki ngahisigia”).

²⁴Vike, matena o Josepo ki rite, ngaia ki râ suria na marâ, na angero iana na Araha i bani visia tanga, ma ki êragia ka Maria.

²⁵Ma ngaia ki pe mêru rârâ henia, mataro me ki apara na kare mane. Ma o Josepo ki hêtana vi o Jesu.