Read Kahua MATEO 10 Bible Online

MATEO 10 - Kahua bible

MATEO 10

¹O Jesu ki hagahakura na kariana tangahuru matarerua, ma ki hagatarêngenia, na ramoha tangara, hanana ga paira na ataro era ma ka rikira na enoni, i tarahura na ani mavê na mera ma na maeha.

²Ikê na atata na aposotolo tangahuru matarerua: hagenago o Simone, ga hêtana renia vi o Petero, mo Anterea o vesina; o wahegoana o Jakobo mo Joane, ngairerua ka no karena o Sebeteo;

³o Pilipo mo Batolomeo; o Toma mo Mateo, na mane i totora takesi; o Jakobo, ngaia ki no karena o Alapeo, mo Tateo;

⁴o Simone, na mane ramo, mo Juta Isikariote, o va ani i hagavuringenia o Jesu.

⁵O Jesu ki hagatorangenira vê na mane tangahuru matarerua ngegê ka râ, ma ki vi tangara, ki vi: “Siana kamu arâ i pasita na enoni, ga pe Siu, se vi i hinua iata na Ai ni Samaria.

⁶Ma kamu arâ hete tangara na Ai ni Isiraele, suria ngaira ka mangara na sipi, ga tarupe.

⁷Mu arâ ma kamu ateate, kamu vivi, ‘Na Arahanga iana God ki hagarangi me noga!’

⁸Mu rikira na enoni, ga maeha. Kamu hagamaurira aporo na enoni, ga me. Kamu hagamavora na enoni asiahu. Ma kamu paira na ataro. Mu tavotavo purua, hoi, mu votovoto purua ma nikâ.

⁹Siana kamu migirâ na kato iami, na haga na golo se na siliva, se na kere maani sisite na haga.

¹⁰Siana kamu toregi na tuguni gi rua, se vi na buti, se vi na vato. Na enoni tagara ki araria, i nahunia na mena na tagaraha iana.

¹¹“Matena mu atata vê i hinua, na ani raha se na ani sisite, mu bêbanu ma kamu bâbâ renia ta na enoni, i koro ma ki agana, ki unigamu banu i pasina, ma kamu goga i pasina, mataro me kamu tavoraha nikâ tenia na hinua.

¹²Matena mu bêbanu vê i ruma, mu vivi, ‘Na marapeha iana God ke goga henigamu.’

¹³Manga na enoni i ruma ngekana, ma ka unigamu banu, na marapeha, mu nungia tenia God tangara, ki oga henira. Ma ki manga ga pe unigamu banu i pasita, na marapeha, mu nungia tenia God tangara, ki pe oga henira.

¹⁴Ma ki manga na enoni i ta na hinua se i ta na ruma, ma ka pe unigamu banu, se ga usi, vi ge tê viteami, mu arâ nga tenia na agua ngekana, ma kamu kangikangi uga, hanana ngaira ka girara, vi i pe koro na parongata.

¹⁵Mu rongo! Na Tangiana ni Suriha Raha ki page era tangara na ai ni Sotomo me Gomora, ma ki page era ngavê tangara na enoni i hinua, ga katogamu vikana.

¹⁶“Mu rongo! Inê kê hagatorangenigamu mangara na sipi tangara na totoha ni o vasiga. Mu hagatogo surigamu maremi mangara na ma, ma kamu haritagi mangara na kuvê.

¹⁷Mu hinaru, suria ga page oga na mane, ga page rakugamu, ma ka page toregamu igê na tamasinga, ma ka page ramusigamu i ruma ni sukuru iata.

¹⁸Ka page hagatamasigamu i maata na gavumane ma na maneraha reniê inê, ma i ngekana igamu kamu girara mu tarohenia na Taroha Koro tangara ngaira, ma tangara na enoni, ga pe Siu.

¹⁹Ma na matena ga toregamu igê na tamasinga, siana kamu anumanuma, vi gamu arami bê aporo, se vi gamu visigi na teha iami, renia igê na matena ngekana na Higona Apu ki page hagatako obami, kamu visigi na marâ, i oto.

²⁰Renia na marâ, mu visigi, ki mareha vi na tamasinga iami maremi, ngaigi ka na tamasinga iana hete na Higona Apu iana God Vaemami, i tamasi i harami.

²¹“Na mane ka page hagatotongora na goata so mareta ma ka page hagamesira. O vaema ni kare ka page katokato vikê nogata tangara na kareta. Ma na kare ka page urapusira na enata ma ka page hagamesira.

²²Na ara ni enoni hato ka page kikitenigamu reniê inê. Ma na enoni, i gatagata ka nahuia na merongana, ngaia ki page tahi.

²³Ma na matena ga merongasigamu i ta na hinua, mu gavagava tanga ta na hinua getea. Mu rongo! I asa, vigamu me na matena i arâ me igê o Karena Enoni.

²⁴“Na kare hagesuri ki pe teharia na mane ni hagesuringa iana; na kare vurivuri ki pe teharia na araha iana.

²⁵Manga ngekana, na kare hagesuri ki araria i uhungia nga, hanana i manga na mane ni hagesuringa iana; ma na kare vurivuri ki araria, i uhungia nga, hanana i manga na araha iana. Manga vi ga visia bera na maneraha tanga na ruma, ka vivi, ‘Belesebulu’, vikana ka page visira bera ngavê na ahemata iana.

²⁶“Hoita, siana kamu magutenira na enoni. Na ara ni marâ, ga buhigi, ka page gagatenigi; ma na ara ni marâ, ga pinihi, ka page ranganigi.

²⁷Na ara ni marâ, ga visigi tangagamu igê na bungiana, mu visigi aporo igê na tangiana: ma na marâ, ga hahanategamu renigi, mu ngerehenigi igê na mahera.

²⁸Siana kamu magutenira na enoni, ga girara ga nahuigi na apemi, ma ka pe girara, vi ge nahuigi na ataromi. Mu magutenia hete God, renia ngaia ki girara ki hagaerasigi hagetage ngavê na apemi ma na ataromi, igê na agua ni hagaitangiha.

²⁹Mu girara mu vurirerua na gapagapêsu gi rua renia na kere maana na haga gi tage. Ma ki asa na hitangiterua, vi ge vota so i ano, manga vi God Vaemami ma ki pe obania.

³⁰Ma igamu, ngaia ki bani giraragi, vi gi hita na varehu i bêmi.

³¹Vikê, siana kamu magu: na memi ka teharigi na mena na gapagapêsu!

³²“Na anima na enoni, ma ki rangania marena i maata na enoni, vi ngaia ki na kariaku, inê kê page katokato vikana nogaku tanga i maana God Vaemaku.

³³Ma na anima na enoni i hagaiga pusia marena i maata na enoni, vi ngaia ki mareha vi na kariaku, inê nikâ kê page hagaiga nogaku i maana God Vaemaku.

³⁴“Siana kamu takusia, vi inê kê merâ me na marapeha tangara na enoni i maveta. Mareha vê! Inê kê pe merâ me na marapeha, ma kê merâ me hete na hemerongeana.

³⁵Inê kê râ me, hanata na kare mane ka merongasira o vaemata; na kare hehene ka merongasira kenata; na ahehungâta ka hemeronge.

³⁶Ngaira so na ahemata ka page hemeronge ngavê.

³⁷“Na enoni, i takuirerua so na enana tehariê inê, ngaia ki pe araria, vi ge voravora renia na kariaku. Na enoni, i takuia so o karena se ka karena tehariê inê, ngaia ki pe araria, vi ge voravora renia na kariaku.

³⁸Ma na enoni, i mumuriê, ma ki pe torea na kuruse na mamasiaganiha iana, ngaia ki pe araria, vi ge voravora renia na kariaku.

³⁹Na enoni, i uhungia vi hagatahia na mêrihana marena, ngaia ki page hagatasia. Ma na enoni, i hagatasia na mêrihana reniê inê, ngaia ki page hagatahia.

⁴⁰“Na enoni, i unigamu banu, ki uniê banu nogaku inê; ma na enoni, i uniê banu inê, ki unia banu nogana God, i hagatorangeniê.

⁴¹Na enoni i unia banu na mane, i tora tamasinga iana God, ngaia ki page nahunia na vurina, i tagenana manga na vurina na mane, i tora tamasinga iana God. Ma na enoni, i unia banu na mane, i koro maninga, suria vi ngaia ki koro maninga, ngaia ki page nahunia na vurina, i tagenana manga na vurina na mane, i koro maninga.

⁴²Mu rongo! Na enoni, i vatea na ve magarisi tanga na ani mavê na kariaku ki totono, suria vi ngaia ki na kariaku, ngaia ki page nahunia nga na vurina.”