Read Kahua MATEO 11 Bible Online

MATEO 11 - Kahua bible

MATEO 11

¹Matena o Jesu ki hagesurira hato vikê na kariana tangahuru matarerua, ngaia ki râ pania na agua ngekana, hanana vi hagesurira na enoni i hinua hagarangia i ngekana, ma ki ateate tangara igê.

²O Joane Batisita ki oga i ruma ni hagaitangiha. Matena i rongoa renigi na tagaraha iana o Kirisito, ngaia ki hagatorangenira tani na kariana tanga o Jesu.

³Ngaira ka hagatea, ka vi: “Visia me, igo vari ki no vani o Joane i bani visia, vi page arâ me, se i ararigami, vigami naasia o vani getea?”

⁴O Jesu ki arami, ki vi: “Mu aporo, ma kamu hagarongoa o Joane renigi na marâ, mu rongogi ma kamu bâsigi:

⁵Ga marava aporo na maata na enoni, ga guru. Na enoni, ga tavi, ka arârâ. Na enoni, ga asiahu, ka mavo. Na enoni, i pungu na karingata, ka rongorongo. Na enoni, ga me, ka mêri aporo. Ma na enoni matareha ka rongoa na Taroha Koro.

⁶I babarisi na enoni i tanga monari reniê!”

⁷Matena na kariana o Joane ka aporo, o Jesu ki tamasi renia o Joane tangara na enoni. Ngaia ki vi: “Matena mu râ i na manihê i pasina o Joane, na ta kanimu takusia, vi gamu bâsia igê? Na ri i ababarere vari?

⁸Na ta kanimu râ kamu bâsia? Na mane i tuguni bâkoro vari? Na enoni, ga tuguni manga ngegana, ka goga ma igê na ruma raha iata na maneraha.

⁹Mu visia me! Na ta kanimu takusia, vi gamu bâsia? Ta na poropete vari? Hoi, be vi tangagamu: igamu kamu bâsia o vani, i teharira na poropete.

¹⁰Renia o Joane ki no vani na Buka Apuna i tamasi renia, vi God ki vi, ‘Ikê ki na mane i torea na tamasinga iaku. Inê kê hagatorangenia ki nanago taramu, hanana i hagarêa na tara taramu.’

¹¹Mu rongo! O Joane Batisita ki teharira na enoni hato, ga bani vora me i maveta. Ma na enoni purua, i tototo suria na Arahanga iana God, ngaia nga kani teharia o Joane.

¹²Haganega me tenia na matena i ateate igê o Joane renia na taroha iana, mataro me i ngekê, na enoni ka uhungia nga, vi ga taharia na Arahanga iana God, ma na enoni, ga ramoramo, ka uhungia, vi ga raua.

¹³Na Ramata iana o Moise ma na poropete hato, mataro me na matena iana o Joane, ngaira ka bani tamasi renia na Arahanga iana God.

¹⁴Ma ki manga mu aganaria na taroha iana, hoi, o Joane ki no Elia, ga bani visia, vi page arâ me.

¹⁵Hoita, mu rongo, manga vi gamu karinga!

¹⁶“Hoi, na ta be hagararia renira na enoni, ga oga i ngekê? Ngaira ka bâ mangara na kere kare, ga oga igê na mahera. Ngaira na ani ga panepane getera, ka ngerengere ka vivi,

¹⁷‘Igami kami êhihi, ma igamu kamu pe mâmâ. Igami kami angiangi maramara, ma igamu kamu pe angiangi.’

¹⁸O Joane ki râ me ma ngaia ki hari ma ki pe tono na vaini, ma na enoni hato ka vi, ‘E, ngaia ki beka!’

¹⁹O Karena Enoni ki râ me, ma ngaia ki ngêngê ma ki totono, ma na enoni hato ka vi, ‘E, bâsia noga! Ngaia ki ngêngê papasi ma ki totono tare na vaini, ma ki hakunira na mane, ga totora takesi, ma na enoni, ga aharê igê na ramata!’ God ki tako mataha. Ma na tagaraha iana ka hagabângenia, vi ngaia ki tako mataha.”

²⁰Mo Jesu ki haganega ki ramonigi na hinua, renia na enoni i hinua ngegana ka pe angitenigi na tasi iata ma ka pe urisi parongata, henaka vi o Jesu ki bani tanugi igê rako era na mena.

²¹Ngaia ki vi: “I era ngavê tangagamu, igamu na enoni i Gorasini! I era ngavê tangagamu nikâ, igamu na enoni ni Betesaita! Manga na enoni i Taire ma i Sitone, ma ka bâsigi nogata na mena, mu bani bâsigi igamu, ngaira na enoni i hinua i ngekana ka bani tangahurira, ka bani hagesuru renigi na tarisigani na gahu, ma ka bani kuhira mareta renigi na rahu, hanana ga haganbângenia, vi ngaira ka angitenigi na tasi iata ma ka urisi parongata.

²²Mu rongo! Igê na Tangiana ni Suriha Raha God ki page takuira ngavê igê na enoni i Taire ma i Sitone teharigamu igamu.

²³Ma tangagamu, igamu na enoni ni Kapenamu, vari igamu kamu obania, vi ga kasigamu akê? Hoi, ga page kasigamu so hete igê na agua ni hagaitangiha! Ma ki manga na Ai ni Sotomo, ma ka bâsigi nogata na mena, mu bani bâsigi igamu, na hinua iata ki goga mênga mataro me i rikini ikê.

²⁴Mu rongo! Igê na Tangiana ni Suriha Raha God ki page takuira ngavê igê na ai ni Sotomo teharigamu igamu!”

²⁵I na matena ngekana o Jesu ki vi: “Vaemaku, igo ki na Araha, i nahunirerua na vavearo ma na ano. Inê kê visigo koro, renia go bani hagabâsira na enoni purua renigi na marâ, go bani pinihigi tenira na enoni raha, ga hagesuri.

²⁶I monari, Vaemaku, igo ko bani kato vikana, suria igo ko obania ma ko obakoro renia.

²⁷“Vaemaku, igo ko bani hagatarêngenigi na ara ni marâ hato tangê. I mareha ngavê ta na enoni, ge girara, vi o ti ka no Karemu, nga noga ma igo, Vaemaku. Ma ki mareha ngavê ta na enoni, vi ge girarago, Vaemaku, nga noga ma o Karemu ma na enoni o Karemu ki obania, vi hagagirara renia.

²⁸“Mu râ me tangê, igamu hato, i me na apemi, suria mu tora higa, ma kê hagamahagamu.

²⁹Mu bugurua na ebuguru iaku ma kamu nakê, kê hagesurigamu, renia inê kê haritagi ma kê pe kasiê akê mareku, ma ka page hatara na obami.

³⁰Na eburugu iaku ki tora koro, ma na toraha iaku ki mahaha.”