Read Kahua MATEO 12 Bible Online

MATEO 12 - Kahua bible

MATEO 12

¹Ma i muri me, igê na Tangiana ni Mamaroha, o Jesu ki barebare suria na tara i gupuna na mu ni koni. Na kariana ka magê. Tahema ngaira ka haganega ka husigi na guani na koni, ma ka ngê na maani.

²Matena na Pariseo ka bâsira vikana, ngaira ka vi tanga o Jesu, ka vi: “Bâ, na kariamu ka katoa na tarana, na Ramata i na Buka Apuna ka manimania, vi ge katoa igê na Tangiana ni Mamaroha!”

³O Jesu ki arami, ki vi: “I hega? Mu pe bani tomania vari na tamasinga renia na tarana i katoa o Tavite, matena ga magê ngaia ma na kariana.

⁴Ngaia ki banu i ruma iana God, ma ngaia ma na kariana ka ngêa na bereti, ga bani tagarenia tanga God, henaka vi na Ramata i na Buka Apuna ki manimania tenira, vi ge ngaua.

⁵Se mu pe bani tomania vari na tamasinga igê na Ramata iana o Moise, i vi, vi igê na ara ni Tangiana ni Mamaroha na mane ni vogasiha ka aharê igê na ramata tanga na Tangiana ni Mamaroha, ma ngaira ka pe tasi renia?

⁶Be vi tangagamu: ta na marâ, i goga ikê, ki teharia na Ruma ni Rotu.

⁷I hega? Mu pe girara vari na girarana na tamasinga igê na Buka Apuna, i vi, ‘Inê kê pe obanigi na vogasiha; inê kê obani ma hete na takiha’? Manga mu girara maninga na ta ki na girarana, i asa iami, vi gamu hagaitangira na enoni, ga pe tasi.

⁸Renia o Karena Enoni ki araha tanga na Tangiana ni Mamaroha.”

⁹O Jesu ki pania na agua ngekana ma ki banu i ruma ni sukuru iata.

¹⁰Ta na mane, i tavi na rimana, ki oga i ngekana. Ma i ngekana ka oga igê tani na mane, ga obania, vi ga ramonia o Jesu, manga vi tanua ta na tarana i pe oto. Vikê ngaira ka hagatea, ka vi: “Na Ramata iaka igê na Buka Apuna ka hega, ga manimania vari, vi siana ka rikia na enoni igê na Tangiana ni Mamaroha?”

¹¹O Jesu ki arami, ki vi: “Manga na hitangimi, ma ki nahunia ta na sipi, ma igê na Tangiana ni Mamaroha na sipi ki vota igê na kokoro. Ki hega, mu pe taua gatagata vari ma kamu pe okea akê me vari tenia?

¹²Ma na enoni ngaia ki na marâ, i raha teharia na sipi! Tahema na Ramata iaka i na Buka Apuna ka hagamarumungenigia, viga tamania ta na enoni igê na Tangiana ni Mamaroha.”

¹³Hemuri ngaia ki vi tanga na mane i tavi ki vi: “Gu gusia na rimamu!” Ma ngaia ki gusia, ma ki koro aporo tagenana manga ta rimana.

¹⁴Na Pariseo ka hura vê, ma ka hekarigi, ka kato, vi ga nanahuia o Jesu.

¹⁵Matena o Jesu ki rongora, ngaia ki pania na agua ngekana, ma ka rako na enoni, ga takua. Ngaia ki rikira na enoni hato, ga maeha.

¹⁶Ma ngaia ki hagapêpura, vi siana ka hagarongora na enoni renia.

¹⁷Igê na tarana ngekê ngaia ki hagamonaria na tamasinga iana o Isaia na poropete, ki vi:

¹⁸“God ki vi, ‘Ikê nga na kariaku mora gê bani atea. Inê kê takuia bâraha, ma kê ageagesia. Inê be naka na Higona Apu, ke angaria, hanana i tarohenia na arahanga iaku tangara na enoni hato i maveta.

¹⁹Ngaia ki asa, vi ge page merahetuguri na enoni, se vi ge rabahira. Ma nikâ i asa, vi ge tamasi ramo igê na mahera.

²⁰Ngaia ki asa, vi ge barugia na ate i aroro se vi ge hunuia na kere vavatana na mangate. Ngaia ki ama ni tagara nga mataro me ki akê me raha teha ngavê na arahanga iaku.

²¹Na enoni hato i maveta ka page hagêguritogo renia.’”

²²Ma tani na enoni ka urua me tanga o Jesu ta na mane, i guru na maana ma ki bi, renia i atataroga. O Jesu ki rikia na mane, ma ngaia ki kahu tamasi ma ki marava aporo na maana.

²³Ngaira hato na enoni ka konekone bâraha. Ngaira ka hetamatamasi, ka vi: “E, o Karena o Tavite vari?”

²⁴Matena na Pariseo ka rongo vikana, ngaira ka arami, ka vi: “Ngaia ki paira na ataro, suria Belesebulu, na araha iata na ataro, kani vatea re na ramoha, ki katokato vikana.”

²⁵O Jesu ki giraragi na takotako iata, ma ki vi tangara, ki vi: “Manga vi na marê, ma ki hevoavoa so marena, ma ka hemeronge, na marê ngekana ki asa, vi ge page ramo i hemuri. Ma na hinua se na ahemata, ma ki hevoavoa so marena ma ka hemeronge, ngaia ki asa, vi ge page ramo i hemuri.

²⁶Manga na ataro, ma ki merongasira so na ataro, ngaia ki na girarana, vi ngaira ka bani hevoavoa, ma ki asa iata, vi ge page ramo i hemuri.

²⁷Igamu kamu vi, vi inê kê paira na ataro, suria vi Belesebulu kani vateê re na ramoha, kê katokato vikê. Hoita, ma o ti kini vatera na kariami na ramoha, hanana ga paira na ataro? Na kariami maremi ka hagatanga monari renigamu, vi igamu kamu hagahagaparu bâraha.

²⁸Bâ, na Higona Apu iana God ngaia nga kani vateê re na ramoha, hanana gê paira na ataro. Ma na tarana ngekê ki hagatanga monari renia vi na Arahanga iana God ki bani haganega me i pasimi.

²⁹“I asa ta na enoni, vi ge girara ge hogea banu na ruma iana na mane ramo, hanana vi ge hanagogi igê na nahuninga iana. Manga i obania vikana, ngaia ki rakua hagenago na mane ramo, ma hemuri ki kahu girara, i hanago tenia na ruma.

³⁰“Na anima na enoni, i pe tamaniê, ngaia ki urapusiê; ma na anima na enoni, i pe hagahakura na sipi heniê, ngaia ki kahu tokorenira nga.

³¹Tahema be vi tangagamu: God ki girara, i bonotenigi na ani mavê na tasi ma na ani mavê na tamasinga era iata na enoni. Ma na enoni, i tamasi erasia na Higona Apu, i asa hagetage, vi God ke bonotenigi na tasi iana.

³²Na enoni, i tamasi erasia o Karena Enoni, God ki page bonotenigi na tasi iana. Ma na anima na enoni, i tamasi erasia na Higona Apu, God ki asa, vi ge page bonotenigi na tasi iana. Mareha vê!

³³“Manga na apinige koro iami, ma ki akê bâkoro, na guani ka korokoro nikâ. Ma ki manga na apinige iami, ma ki pe akê bâkoro, na guani ka pe korokoro nikâ. Na ara ni apinige igamu kamu girara renia na guana.

³⁴Igamu na ma, mu bera! Igamu kamu era! Manga i he kani vigamu girara, mu visigi na tarani, ga koro? Na marâ, ga oga igê na osumi, ka hura me i harami.

³⁵Na mane koro ki nakanaka hura na marâ koro tenia na ruma ni ruruguha koro iana; ma na mane era ki nakanaka hura na marâ era tenia na ruma ni ruruguha era iana.

³⁶“Hoi, be vi tangagamu: Igê na Tangiana ni Suriha Raha na ara ni enoni ka suria renigi na tamasinga purua, i bani visigi.

³⁷Suria God ki page surigamu renigi na tamasinga iami, i surigamu bâkoro se i hagaitangigamu.”

³⁸Ma tani na Pariseo ma tani na mane ni hagesuringa ni rotu ka tamasi, ka vi: “Araha, igami kami obania vigami bâsigo gu katoa na mena.”

³⁹O Jesu ki tamasi ramo, ki vi: “Igamu i ngekê kamu era ngavê, ma kamu pe tê viteana God! Mu obania na mena teniê iê? I asa vê! Nga noga ma na mena iana o Jona na poropete.

⁴⁰O Jona ki oga surigi na tangiani gi oru ma na bungiani gi oru i rarona obana na pusuasi. Ma ki tagenana ma o Karena Enoni ngaia ki page goga surigi na tangiani gi oru ma na bungiani gi oru i rarona na mako.

⁴¹Igê na Tangiana ni Suriha Raha na ai ni Ninive ka rêrakê ma ka page ranganigamu, suria ngaira ka urisigi na parongata iera, matena ga rongoa na ateateha iana o Jona. Hoi, be vi tangagamu: na hitangita ikê ki teharia o Jona!

⁴²Igê na Tangiana ni Suriha Raha na gete, i marungia i Seba, ki page rêrakê ma ki page ranganigamu, suria ngaia ki râ me hagatê era ngavê, hanana vi karinga na hagesuringa ma na takoha mataha iana o Solomone. Hoi, be vi tangagamu: na hitangita ikê ki teharia o Solomone!

⁴³“Matena i huhura vê na ataro era tenia ta na enoni, ngaia ki arâ igê na manihê ma ki bâbâ rârâ renia na agua, vi mamaro igê. Manga i pe tarahua ta na agua ni mamaroha,

⁴⁴ngaia ki vivi i obana, ki vivi, ‘Be aporo tanga na ruma iaku, gê pania.’ Vikê ngaia ki aporo, ma ki rigia i baguru na ruma, ki matarotaro ma na ara ni marâ ka tâtâ igê na atohani.

⁴⁵Ma ngaia ki huhura vê ma ki merarâ me na ani gi pi na ataro, ga era ngavê teharia ngaia. Ma ngaira ka arâ me ma ka goga igê. Ma hemuri na marâ ka kahu era teha ngavê tanga na enoni ngekê teharia i nago. Na tarana ngekê ki page tarahugamu na enoni erataga i ngekê.”

⁴⁶Matena o Jesu ki tamasi mênga tangara na enoni, kenana ma na goana ka ata me. Ngaira ka oga so ma i metara, ma ka obania, vi ga bâsia.

⁴⁷Vikê ta na enoni, i oga i ngekana, ki vi tanga o Jesu, ki vi: “Bâ, kenamu ma na goamu kaniga goga i metara ga obanigo.”

⁴⁸O Jesu ki arami, ki vi: “Ti kani kenaku? Ti ka na goaku?”

⁴⁹Ma ngaia ki usira râ na kariana, ki vi: “Bâ, kenaku ma na goaku ngaira igê!

⁵⁰Suria na enoni, i têtê viteana God Vaemaku ma ki arâ suria, ngaia nga ki na goaku ma kenaku.”