Read Kahua MATEO 13 Bible Online

MATEO 13 - Kahua bible

MATEO 13

¹I na tangiana ngekana o Jesu ki hura vê ma ki râ tanga na rano, ma i ngekana ngaia ki oga so igê, hanana vi hagesurira na enoni.

²Rako era vê na enoni ga hakuria. Tahema ngaia ki tage igê na kere haka ma ki oga so igê, ma na enoni ka ura ma i one.

³Ngaia ki hagesurira renigi rako na marâ igê na tamasinga maramaraveta. Ngaia ki vi: “Ta na mane ki râ, ki tokorenigi na maani na koni.

⁴Matena ngaia ki tokorenigi na maani na koni i mu iana, tani ka vota so i tara, ma na manu ka râ me ka ngêgi.

⁵Tani ka vota so igê na mako, i hêga ma ki bêratega.

⁶Ma na matena i ramo na arito, na koni ka hatani mêgu ma ka me, renia ga pe so maninga na vagani.

⁷Tani na maani na koni ka vota so i gupuni na tone. Na tone ka vavaka ma ka rubuhigi na gokoni.

⁸Ma tani na maani ka vota so igê na mako koro ma ka hungu renigi na guani: tani ka rako ngavê na guani; tani ka kere rako na guani; ma tani ka rako na guani.”

⁹Mo Jesu ki vi: “Mu karinga, manga vi gamu girara mu rongorongo!”

¹⁰Ma na kariana ka râ me tanga o Jesu, ma ka hagatea, ka vi: “Suria i hega kanigo tamasi maramaraveta, matena go hagesurira na enoni?”

¹¹O Jesu ki arami, ki vi: “Igamu kamu bani giraragi na katoha iana God na Araha, ma ngaira ka pe giraragi.

¹²Renia ga page vatea akê nikâ ta na marâ tanga na enoni, i bani nahunia ta na marâ, hanana ngaia ki page nahunigi rako era na marâ. Ma ki henaka vi na kere marâ sisite, ngaia ka page tavoa râ tenia na enoni, i pe nahunia rârâ ta na marâ.

¹³Inê kê tamasi maramaraveta tangara na enoni, matena gê hagesurira, suria ngaira ka bâbâ ma ka pe bâgirara; ngaira ka rongo, ma ka pe karinga se vige pe rongogirara.

¹⁴Suria ngaira ka manga ngekana, ngaira ka hagamonaria na tamasinga iana o Isaia, na poropete, i vi: ‘Naka ma mu rongorongo, ma ki asa, vi gamu rongogirara. Naka mu mu bâbâ, ma ki asa, vi gamu bâgirara.

¹⁵Renia na enoni ngegê ka guguruga. Ngaira ka bunigi na karingata, ma ka herepusigi na maata. Manga vi ngaira, ma ke pe katokato vikana, ngaira ka page bâbâgirara vari, ma ke page rongogirara vari, ma ke page mataha vari na obata, ma ke page maatiê, ma inê, God, be page hagakorora vari.’

¹⁶Ma igamu, kamu babarisi ngavê! Igamu kamu bâgirara ma kamu rongogirara.

¹⁷Mu rongo! Ga rako na poropete ma ka rako na kariana God, ga gunahia, vi ge bâsigi na marâ, mu bâsigi, ma ki asa iata, vi ge bâsigi; ma ka gunahia, vi ge rongogi na marâ, mu rongogi, ma ki mareha.

¹⁸“Mu karinga, hanana mu rongorongogirara na maramaraveta renia na mane, i tokorenigi na maani na koni.

¹⁹Na enoni, ga rongoa na taroha renia na Arahanga iana God ma ka pe rongogirara, ngaira ka mangagi na maani, ga vota so i tara. Satana ki râ me ma ki tahura vê tenira na taroha, God i naka i obata.

²⁰Na enoni, ga rongoa na taroha ma ka têa ma ka vagevage renia, ngaira ka mangagi na maani, ga vota igê na mako, i hêga.

²¹Ma ki asa na taroha, vi ge tâ tonge i obata. Ma ngaira ka page kasia râ. Suria matena i tarahura na bagabevoana se na henahuita renia na taroha, ngaira ka kasia vê ototo râ nga.

²²Na maani, ga vota i gupuni na tone, ngaira ka na enoni, ga rongoa na taroha, ma ka tako bâraha ma renigi na marâ ni maveta ma ka vanasigi na ruruguha. Ma na marâ ngegana ka heboroge i obata ma ka rubuhia na taroha, ma ngaira ki asa vige hungu.

²³Ma na enoni, ga rongoa na taroha ma ka rongogirara, ngaira ka mangagi na maani, ga vota igê na mako koro. Ngaira ka hungu: tani ka rako ngavê na guani; tani ka kere rako na guani; ma tani ka rako na guani.”

²⁴O Jesu ki tamasi maramaraveta nikâ tangara na enoni, ki vi: “Na Arahanga iana God ki manga na mane, i hasi na maani koro na koni i mu iana.

²⁵Ma ta na bungiana, matena ga mêru na enoni hato, na merongana ki kauni me ki tokorenigi na maani na rauga era i mu ni koni, ma ki gava.

²⁶Ma na matena ga vavaka ma ka obo na koni, na rauga era ka vavaka henigi.

²⁷Na enoni tagara iana na avanuna na mu ka râ me tanga, ma ka vi: ‘Araha, igo ko bani hasi na maani koro na koni i mu iamu. Ma i he kaniga râ me igê na rauga era?’

²⁸Ngaia ki arami, ki vi: ‘Na merongaku kani kato vikana.’ Ngaira ka hagatea, ka vi: ‘I hega go obanigami vari, vi gami arâ kami vavogi râ?’

²⁹Ngaia ki arami, ki vi: “Mareha. Suria i era ma, kamu vavavo na koni henigi.

³⁰Nakagi vê, ki akê haku na koni ma na rauga era, mataro me ka maua na koni, ma hemuri kê kahu vi tangara na enoni, ga huhuhu na guani na koni, ka ragaraga i nago na rauga era, ka hugusigi ma ka kasikasi na ehogoni igê na gi. Ma hemuri ka totora na koni ma ka bêbagi i ruma ni harisi iaku.’”

³¹O Jesu ki tamasi maramaraveta nikâ tangara na enoni, ki vi: “Na Arahanga iana God ki manga na guana na suga. Na guana ki sisite era.

³²Ta na mane ki torea ma ki hasia i mu iana. Ma na matena i bâgo, ngaia ki teharigi na rauga hato. Ngaia ki vora re na apinige raha ngavê. Ma na manu ka râ me ma ka bea igê na arani.”

³³O Jesu ki tamasi maramaraveta nikâ tangara na enoni, ki vi: “Na Arahanga iana God ki manga na isiti. Ta na gete ki apea ma ki aroa igê na apira henia na makona na susugu tanga na bereti, mataro me ki ahunga na makona na susugu tanga na bereti.”

³⁴O Jesu ki hagarongora na hakuta na enoni renigi na marâ hato ngegana igê na tamasinga ni maramaraveta. Ngaia ki pe visia ototo râ nga ta na marâ tangara, nga noga ma igê na maramaraveta.

³⁵Ngaia ki katokato vikê, hanana i hagamonaria na tamasinga iana na poropete, i vi: “Inê be tamasi maramaraveta, matena gê tamasi tangara. Inê be hagarongora renigi na marâ, ga bani pinihi me tenia na haganegahana na maveta.”

³⁶O Jesu ki panira na hakuta na enoni ma ki banu vê i ruma. Na kariana ka râ me tanga, ma ka vi: “Gu visia me tangagami na girarana na maramaraveta iamu renigi na rauga era.”

³⁷O Jesu ki arami, ki vi: “Na mane, i hasigi na maani koro na koni, ngaia ki no Karena Enoni.

³⁸Na mu ki na maveta. Na maani koro na koni ngaira ka na enoni, ga tê viteana God na Araha. Na rauga era ngaira ka na enoni, ga tê viteana Satana.

³⁹Ma na merongana, i tokorenigi na maani na rauga era, ngaia nga kani Satana. Na matena i maua na koni, ngaia ki na matena na hatongina na maveta. Ma na enoni, ga huhuhu na koni, ngaira ka na angero.

⁴⁰Na enoni ka hugusigi na rauga era ma ka kasigi na ehogoni igê na gi. Igê na hatongina na maveta ki tagenana ma manga ngekana.

⁴¹O Karena Enoni ki page hagatorangenira na angero iana, ma ngaira ka page hagahakura tenia na Arahanga iana na enoni hato, ga hagatasira na enoni, ma na enoni hato getera, ga tanu era.

⁴²Ma ngaira ka page kasira igê na anguruna na gi. Ma i ngekana ngaira ka page angiangi ma ka hengaki igê na rivota, renia i era na obata.

⁴³Ma na kariana God ka page togatoga manga na arito i pasina na Araha God, o Vaemata. Mu karinga manga vi gamu karinga!

⁴⁴“Na Arahanga iana God ki manga na ruruguha, i pinihi igê na mako. Ma ta na mane ki tarahua. Vikana ngaia ki ahunia aporo. Ma ki koro teha vê na apena renia. Tahema ngaia ki râ ki hagavuringenigi hato vê na ara ni nahuninga iana. Ma hemuri ki râ nikâ ma ki vuria re na mako ngekana.

⁴⁵“Ma nikâ na Arahanga iana God ki manga na mane, i vurigi na oruni na egugu. Ngaia ki bâbâ renigi na ani i bâkoro.

⁴⁶Ta na tangiana ngaia ki tarahua na ani i bâkoro ngavê. Tahema ngaia ki râ ki hagavuringenigi hato vê na nahuninga iana, ma ki vuria re na oruna na egugu akana.

⁴⁷“Nikâ, na Arahanga iana God ki manga na hugo, ga kasia igê na rano. Ma na ani mavê na siare ka togo igê.

⁴⁸Matena i vunu na hugo, na mane hugohugo ka okea banu i one, ka oga so ma ka nakara hegetigi na ani koro ma na ani era: na ani koro ka tugunigi igê na erere, ma na ani era ka kasigi râ.

⁴⁹Igê na hatongina na maveta ki page manga ngekana nikâ. Na angero ka page arâ ma ka atera hura na enoni era tenira na enoni koro, ma ka page kasira igê na agua igê na anguruna na gi.

⁵⁰Ma i ngekana ngaira ka page angiangi ma ka hengaki igê na rivota, renia ga mamasiaga.”

⁵¹O Jesu ki hagatera, ki vi: “Igamu kamu bani giraragi vari na marâ ngegê?” Ngaira ka arami, ka vi: “Ua.”

⁵²Ngekana ngaia ki arami, ki vi: “Hoi, tahema manga na mane ni hagesuringa ni rotu, ma ki voravora re na mane ni hagesuringa igê na Arahanga iana God, ngaia ki manga na avanuna na ruma, i nakanaka hura na ani haoru na marâ ma na bani ani tenia na ruma ni nahuninga iana.”

⁵³Matena o Jesu ki tamasi maramaraveta hato vikana, ngaia ki pania na agua ngekana.

⁵⁴Ma ngaia ki aporo i hinua iana. Ngaia ki hagesurira na enoni igê na ruma ni sukuru iata, ma na enoni, ga rongoa, ka konekone bâraha. Ngaira ka hehagateri, ka vi: “E, i he kani tarahua igê na takoha mataha vikana? Ma ki manga i he kani katogi na mena?

⁵⁵Ga pe bani girara vari, vi ngaia ka no karena na mane, i totora na ruma? Ga pe bani girara vari, vi ka Maria kani kenana? Ga pe bani girarara vari, vi o Jakobo mo Josepo mo Simone mo Juta ka na goana?

⁵⁶Ga pe bani girarara vari, vi kesina hato kaniga oga ikê? I he kani tarahugi igê na tarani hato ngegana?”

⁵⁷Ngekana ngaira ka usitenia o Jesu. O Jesu ki vi tangara, ki vi: “Na poropete nga ki no vaini na enoni ka hanetasia i na ara ni hinua, nga noga ma i pasina ma na raraha iana marena ka pe hanetasia.”

⁵⁸Ngaia ki pe katogi rako na mena i ngekana, suria ngaira ka pe tongesuria.