Read Kahua MATEO 14 Bible Online

MATEO 14 - Kahua bible

MATEO 14

¹I na matena ngekana o Herote, i marungia i Galilea, ki rongo tarohana o Jesu.

²Ngaia ki vi tangara na kariana, ki vi: “Ngaia monari ka no Joane Batisita, i mêri aporo. Tahema na ramoha ngegana ka angaria.”

³O Herote ki bani bonasira na mane ni me iana ka rakua o Joane ma ka hagatotongoa ma ka kasia igê na ruma ni hagaitangiha. Ngaia ki kato vikana suria ka Herotia, ka na gete iana o Pilipo o vesina.

⁴O Joane Batisita ki ama ni vi nga tanga o Herote, ki vivi: “Igo ki apu tangago, vi gu êragia na gete ngekê!”

⁵O Herote ki obania, vi nahuia, ma ngaia ki magutenira na Siu, suria ngaira ka takusia, vi o Joane ki na poropete.

⁶Igê na tangiana iana o Herote i vora igê, ka karena ka Herotia ki mâ tangara na enoni, ga haku tanga na magotoha. O Herote ki koro ngavê na obana.

⁷Tahema ngaia ki suru tanga, ki vi: “Inê kê tohe, gê page vatego na ani mavê na marâ, go nungia!”

⁸Ma suria na obaniha iana kenana, tahema ngaia ki nungi, ki vi: “Gu vateê ototo me i ngekê na bêna o Joane Batisita igê na apira!”

⁹Na maneraha ki hata era na obana, ma suria ngaia ki bani suru, ki tohe i maata na enoni hato, ga magoto, ngaia ki bonasira na mane ni me iana, ka vatea na marâ, i nungia.

¹⁰Ngekana na mane ni me ka râ i ruma ni hagaitangiha ma ka retea râ na bêna o Joane.

¹¹Ngaira ka torea me na bêna igê na apira, ma ka vatea na kere gete, ma na kere gete ki torea râ tanga kenana.

¹²Ma na kariana o Joane ka râ me ka torea na gahuana o Joane ma ka bagia. Ma hemuri ngaira ka râ ma ka hagarongoa o Jesu renia.

¹³Matena o Jesu ki rongoa na gasuga vikana, ngaia ki tage igê na kere haka ma ki râ pania na agua ngekana, ma ki râ tanga na tênga, ngaia getea. Na enoni ka rongoa, vi râ, ma ngaira ka tavoraha tenigi na hinua iata, ma ka hatare râ suria.

¹⁴Matena o Jesu ki goto vê i one, ngaia ki bâsira rako era na enoni, ga bani ata, ka oga karia. Ma ngaia ki takuira nga vê, ma ki rikira na hitangita ga maeha.

¹⁵Igê na manurahi na kariana ka râ me tanga o Jesu ma ka vi: “I bungi noga, ma na agua ikê nikâ ki na tênga. Gu hagatorangenira aporo nenuni, ma ku nakara vê, ke râ i hinua ke vuri na ngauha tangara mareta.”

¹⁶O Jesu ki arami, ki vi: “Ngaira ki pe ararira, vi ge arâ. Igamu maremi mu hagangêra.”

¹⁷Ngaira ka arami, ka vi: “Igami kami nahunigi ma na guani gi rima ma na bereti ma na siare gi rua.”

¹⁸O Jesu ki vi: “Mu toregi me ikê tangê!”

¹⁹Ngaia ki bonasira na enoni, ka oga so harahara igê na go. Ma hemuri ngaia ki têgi na guani gi rima na bereti ma na siare gi rua. Ngaia ki atakê i vavearo ma ki rahesia God. Ngaia ki pipigi na bereti ma ki vatera na kariana, ma na kariana ka vutungira na enoni renigi.

²⁰Na enoni hato ka ngê masu. Ma hemuri na kariana ka hagavunusigi na heni tangahuru matarerua renigi na ngêra, ga hagahitagi na enoni.

²¹Na mane hato, ga ngê, ka vora na rehagaro gi rima, ma na gete ma na kere kare ka pe tomanira banu me.

²²Hemuri o Jesu ki vi tangara na kariana, ka tage igê na kere haka ma ka nanago tarana tanga na apanena tarê na rano. Matena ga râ, ngaia ki hagatorangenira vê na enoni ka aporo.

²³Matena i hagatorangenira vê ka râ, ngaia ki tagere getea igê na kere hungana, hanana vi nunginungi. Matena i bungi me, o Jesu, ngaia getea ma, kani oga i ngekana.

²⁴I na matena ngekana na kere haka ki bani gupu râ igê na rano. Na navo ka hitaria bâraha na kere haka, renia i tora i matota na roga.

²⁵Matena i tangi ki arâ, o Jesu ki râ tangara, i râ i basina na rano.

²⁶Matena na kariana ka bâsia, i arâ i basina na rano, ngaira ka magu teha vê. Ngaira ka ngere, suria ga magu, ma ka vi: “E, na ataro!”

²⁷Mo Jesu ki tamasi ototo râ tangara, ki vi: “E, inê nga ngekê! Ke bê! Siana kamu magu!”

²⁸Mo Petero ki tamasi, ki vi: “Araha, manga vi igo monari, hoi, gu bonasiê, be râ vê tangago i basina na rano.”

²⁹O Jesu ki arami, ki vi: “Gu râ me! Ngekana o Petero ki reke so tenia na kere haka, ma ki haganega ki râ i basina na rano tanga o Jesu.

³⁰Matena i rigia na roga, ngaia ki magu, ma ki haganega ki kumu so igê na rano. Ngaia ki ngere, ki vi: “Araha, gu hagatahiê!”

³¹Mo Jesu ki tagara ototo râ ki têa, ma ki vi: “Go bagahagêguri! Tanu hega kanigo tako tugupu?”

³²Ngairerua karu akê aporo igê na kere haka, ma na roga ki so.

³³Na kariana, ga oga igê na kere haka, ka bêtuhia o Jesu. Ngaira ka vi: “I monari, igo ki no Karena God!”

³⁴Ngaira ka tage tarê igê na rano ma ka goto i Senesarete.

³⁵Na enoni i ngekana ka bâgirara o Jesu. Vikana ngaira ka kasi tamasinga tangara na hinua hato i na apanena i ngekana, hanana vi na enoni ka torera me tanga o Jesu na enoni, ga maeha.

³⁶Ngaira ka nungia, hanana vi hagamarumungenira na enoni, ga maeha, ka hataria na bogona na tuguni iana. Ma na enoni hato, ga hataria, ka komaga aporo renia.