Read Kahua MATEO 17 Bible Online

MATEO 17 - Kahua bible

MATEO 17

¹I murini na tangiani gi ono o Jesu ki merarâ o Petero mo hegoana o Jakobo mo Joane, ma ki meratagare igê na hungana, ngaira getera.

²Matena ga bâsia, o Jesu ki bâ riariaga: na maana ki mave ngavê manga na arito, ma na tuguni iana ki togatoga ma ki siki ahuru ngavê.

³Me muri na kariana gi oru ka bâsirerua o Moise mo Elia, garu metamasi o Jesu.

⁴Vikana o Petero ki tamasi ma ki vi tanga o Jesu, ki vi: “Araha, i ararigami, mi oga ikê. Manga go obania, ma be toregi so na ruhu gi oru ikê: tani tangago, tani tanga o Moise, ma tani tanga o Elia.”

⁵Matena i tamasi mênga, ma na vaha togatoga ki buhira, ma God ki tamasi igê na vaha ki vi: “Ikê o Kareku hetakui. Inê kê ageagesia bâraha. Mu rongoa na tamasinga iana!”

⁶Matena na kariana ka rongoa na ringena, i tamasi, ngaira ka magu ngavê ma ka aba so i ano.

⁷O Jesu ki râ tangara ki hatarira ma ki vi: “Aharaga! Siana kamu magu!”

⁸Ngekana ngaira ka atakê, ma ka pe bâsia ta na enoni, nga noga ma o Jesu.

⁹Matena ga rere me tenia na hungana, o Jesu ki hagapêpura, ki vi: “Siana kamu hagarongoa rârâ ta na enoni renia na marâ, mu rigia i ngekê, mataro me ki mauri aporo o Karena Enoni tenia na mera.”

¹⁰Ma hemuri na kariana ka hagatea o Jesu, ka vi: “Tanu hega ngaira na mane ni hagesuringa na rotu kaniga vi, vi o Elia ki hagenago me?”

¹¹O Jesu ki arami, ki vi: “I monari, o Elia ki arâ me hagenago, hanana i hagarêgi na ara ni marâ.

¹²Ma be vi tangagamu: o Elia ki bani râ me noga, ma na enoni ka pe bâgirara, ma ka katogi ma tanga na ani mavê na marâ, ga obanigi. I tagenana ma o Karena Enoni, ngaira ka page kikitenia nogana.”

¹³Ma na kariana ka kahu rongogirara, o Jesu i tamasi tangara renia o Joane Batisita.

¹⁴Matena ngaira ka râ vurusira na enoni, ta na mane ki râ me tanga o Jesu ma ki susure i maana.

¹⁵Ma ngaia ki vi: “Araha, gu takia o kareku! Ngaia ki manumanuga. Hagarako ngaia ki votavota tare igê na gi ma i ve, matena i manumanuga.

¹⁶Inê kê merâ i pasita na kariamu, ma ki asa iata, vi ge hagakomaga.”

¹⁷O Jesu ki arami, ki vi: “Igamu, ki mareha vê, vi gamu tongesuri, ma ki era ngavê na parongami! Hagehita kanigê pe oga henigamu? I na keta ke hato? Arihu me noga inê kê hatamia na mamasiaganiha renigamu. Torea me na kere mane!”

¹⁸O Jesu ki bonasia na ataro era, ki hura vê tenia na kere mane. Ma ngaia ki kahu komaga ototo râ.

¹⁹Ma hemuri na kariana ka râ me pinihi tanga o Jesu, ma ka hagatea, ka vi: “Tanu hega kani asa tangagami, vi gami paia na ataro era?”

²⁰O Jesu ki arami, ki vi: “Suria i pe gatagata na tongesuriha iami. Mu rongo! Manga na tongesuriha iami, ma ki raharaha manga na kere maana sisite na apinige, mu girara ma, mu vi tanga na kere hungana ikê, kamu vivi, ‘Râ tenia ikê tanga i ikana!’ Ma ngaia ki arâ. Mu girara ma, mu tanugi na ani mavê na marâ.

²¹Nga noga ma na nunginungiha ma na hariharinga kaniga girara, ga paia hura na ataro era manga na ani ikê, mareha vi ta na marâ râ nikâ.”

²²Matena na kariana hato ka haku me i Galilea, o Jesu ki vi tangara, ki vi: “I sugia ma, vi ge mahatangenia o Karena Enoni tangara na mane,

²³ga page nahuia; ma igê na oruta na tangiana ngaia ki page mauri aporo.” Na kariana ki rugu bâraha na obata.

²⁴Matena o Jesu ma na kariana ka ata vê i Kapenamu, na mane totora takesi tanga na Ruma ni Rotu ka râ me tanga o Petero, ma ka hagatea, ka vi: “Na Araha iamu ki vuria vari na takesi tanga na Ruma ni Rotu?”

²⁵O Petero ki arami, ki vi: “Mako!” Matena o Petero ki banu vê i ruma, o Jesu ki tamasi hagenago, ki vi: “Simone, na ta na takoha iamu? Na maneraha ka tavotavo takesi se na haga tenira o ti? Tenira na avanuni marê se tenira na mahuara?”

²⁶O Petero ki arami, ki vi: “Tenira na mahuara.” O Jesu ki arami, ki vi: “Hoi, i vi, vi na avanuni marê ki pe tuguhira, vi ge vuria na takesi.

²⁷I pe ararigia, vi ge hagaerasira na enoni igê. Vikana gu râ igê na rano ma ku kasikasi garo. Ko okea na siare, na ani i arara hagenago, ma i harana igo ko page tarahua igê na haga, i ararigerua, garu vuria renia na takesi tanga na Ruma ni Rotu.”