Read Kahua MATEO 19 Bible Online

MATEO 19 - Kahua bible

MATEO 19

¹Matena o Jesu ki visigi hato na tarani ngegana, ngaia ki pania i Galilea, ma ki aporo tanga na apanena i Jutea, i na apanena tarê na ve i Jotano.

²Rako era vê na enoni, ga takua, ma ngaia ki rikira i ngekana.

³Tani na Pariseo ka râ me tanga ma ka uhungia, ka hagatea, ka vi: “Na Ramata iaka i na Buka Apuna ka hagamarumungenia ma vari na mane, hanana vi kasia na gete iana renia, i pe koro igê na ani mavê na marâ, se mareha?”

⁴O Jesu ki arami, ki vi: “E, mu pe bani tomania na tarana ngekana igê na Buka Apuna, i vi, ‘Igê na haganegana God ki hagavorara na enoni, na ani mane ma na ani hehene.

⁵Ma ngaia God ki vi, “Tahema na mane ki page panirerua o vaemana ma kenana, ma ki page goga haku tare henia na gete iana, ma ngairerua karu voravora re na vere tage togo ma.’”

⁶Vikana ngairerua ki mareha, vi garu manga na vererua, ma karu manga hete na vere tage togo ma. Hoi, siana na enoni ki voasirerua hegitigi na mane ma na gete, suria God ki takurerua.”

⁷Na Pariseo ka hagatea, ka vi: “Ma ki hega na Ramata iana o Moise, kani hagamarumungenia na mane, hanana vi vatea na gete iana na pepa ni hekasigi ma ki kahu kasia?”

⁸O Jesu ki arami, ki vi: “O Moise ki hagamarumungenigamu, kamu kasira na gete iami, suria ma igamu kamu guguruga bâraha, ma igê na haganegana ki pe manga ngekana.

⁹Hoi, be vi tangagamu: na anima na mane, i kasia na gete iana, nga noga ma igê na êragiha na ramata ka manimania ngaia na mane ki gamogamo, manga vi auragia ta na gete getea.”

¹⁰Na kariana ka vi tanga, ka vi: “Manga vi na berarogaterua na mane ma na gete iana, ma ki manga ngekê, ki araria ma, vi siana na enoni ka auragi.”

¹¹O Jesu ki arami, ki vi: “Mareha vi na enoni hato, kani ge girara, ge arâ suria na hagesuringa ngekê; nga noga ma na enoni, God i tamanira, kani ga arâ suria.

¹²Renia tani na enoni ka pe girara, vi ge auragi, suria ngaira ka vora vikana nogata; tani ka pe girara, vi ge auragi, suria na enoni ka katora vikana; ma tani ka pe auragi renia na Arahanga iana God. Na enoni, i girara i arâ suria na hagesuringa ngekê, ki koro, i arâ suria.”

¹³Tani na enoni ka merarâ me na kere kare tanga o Jesu, hanana vi têtêbuhira, ma ki nungia God tangara. Ma na kariana ka ramonira na enoni ngegana.

¹⁴O Jesu ki vi: “Mu nakara na kere kare ke râ me i pasiku; siana kamu vi pusira, renia na enoni, ga mangara na kere kare ngegê, ngaira ka tê viteana God.”

¹⁵Ma ngaia ki têbuhira hato ma ki kahu râ.

¹⁶Ta na tangiana ta na mane ki râ me tanga o Jesu. Ngaia ki hagatea, ki vi: “Araha, na ta ki tuguhiê, vi ve katoa, hanana ve nahunia renia na mêriha mora ma tarema?”

¹⁷O Jesu ki arami, ki vi: “Tanu hega go hagateê renia vi na tarana ta ki koro? Na vere tage togo ma ki koro. Manga go obania, vi go nahunia na mêriha mora ma tarema, hoi, i tuguhigo, go marupegi na ramata.”

¹⁸Ngaia ki hagatea, ki vi: “Na anita na ramata?” O Jesu ki arami, ki vi: “Siana ko nahunahu enoni; siana ko gamogamo; siana ko hanago; siana ko hagaparu;

¹⁹go hanetasirerua o vaemamu na kenamu; ma ko takuira na enoni getera manga igo maremu.”

²⁰Na mane haoru ki arami, ki vi: “Inê kê bani râ surigi na ramata hato ngegana. Na ta nikâ ki arariê, vi gê katoa?”

²¹O Jesu ki vi tanga, ki vi: “Manga vi igo, ma ko obania, vi go korokoro ngavê, go arâ ma ko hagavuringenigi na nahuninga hato iamu, ma na haga na meni ko vatera na enoni, ga matareha, ma hanana go page nahunigi na ruruguha i pasina God; ma hemuri ko arâ me ma ko takuê.”

²²Matena na mane haoru ki rongo vikana, ngaia ki babau ma ki ahoro vê ki râ, suria ngaia ki ruruguha bâraha.

²³Ma hemuri o Jesu ki vi tangara na kariana, ki vi: “Be vi tangagamu: na enoni ruruguha ki bara ngavê tanga, hanana vi ge tê viteana God na Araha.

²⁴Be vi tangagamu nikâ: i bara tanga na kamelo, vi ge tara banu igê na maana na nila, ma ki bara teha ngavê tanga na enoni ruruguha, vi ge tê viteana God.”

²⁵Matena na kariana ka rongo vikana, ngaira ka kone teha ngavê, ma ka hagate, ka vi: “Se, va ti kani girara i tahitahi?”

²⁶O Jesu ki ono rapurapu renira, ma ki arami, ki vi: “Tangara na enoni ki asa, ma tanga God na ara ni marâ ki pe asa.”

²⁷Mo Petero ki tamasi. Ngaia ki vi: “Bâ, igami kami bani panigi na ara ni marâ hato iamami, ma kami takugo, ma na ta kani vigami page nahunia?”

²⁸O Jesu ki vi tangara, ki vi: Be vi tangagamu; matena na ara ni marâ ka page haoru aporo, o Karena Enoni ki page goga so igê na atohana na araha, ma igamu na kariaku tangahuru matarerua kamu page goga so nogami igê na atohami, hanana mu surira na varo ninuni tangahuru matarerua iana o Isiraele.

²⁹Ma na ara ni enoni, i bani panigi na ruma iana, se i panira na goana, se o vaemana, se kenana, se na karena, se na mako iana, reniê inê, ngaia ki page nahunigi kê nikâ na tangarê na marâ haritonga teharigi na nahuninga iana i nago, ma ki page nahunia na mêriha mora ma tarema.

³⁰Ma na ani rako, ga hagenago i na matena i ngekê, ka page hagemuri; ma na ani rako, ga hagemuri i na matena i ngekê, ka page hagenago.