Read Kahua MATEO 20 Bible Online

MATEO 20 - Kahua bible

MATEO 20

¹“Na Arahanga iana God ki manga na avanuna na mu ni vaini. Igê na mahogotana ngaia ki râ ki garira na mane tagara tanga i mu ni vaini iana.

²Ngaia ma na mane tagara ka tage aganaria na vuriha, i araria na tangiana gi tage, na haga gi tage tanga na tangiana gi tage. Hemuri ngaia ki hagatorangenira, ka tagara i mu ni vaini iana.

³Matena i akê raha na arito, ngaia ki râ nikâ igê na mahera, ma ki tarahura tani na mane, ga goga i ngekana, i mareha na tagaraha tangara.

⁴Vikana ngaia ki vi tangara, ki vi: “Igamu nikâ mu râ kamu tagara i mu ni vaini, ma kê page vurigamu bâkoro.”

⁵Vikana ngaira ka râ. Hemuri igê na ritovagana ma nikâ igê na matena, i pepe i oru na arito ngaia ki kato vikana nikâ.

⁶Matena na arito ki pepe i tage, ngaia ki râ igê na mahera ma ki tarahura nikâ tani na mane, ga goga i ngekana, i mareha na tagaraha tangara. Ngaia ki hagatera, ki vi: ‘Tanu hega kanimu oga purua ma ikê suria na tangiana hagenani, ma ki mareha na tagaraha tangagamu?’

⁷Ngaira ka arami, ka vi: ‘Suria i mareha rârâ ta na enoni, vi ge hagatoragami.’ Ngaia ki vi tangara, ki vi: ‘Hoita, igamu nikâ, mu râ kamu tagara i mu ni vaini.’

⁸“Matena i mamaru me, na avanuna na mu ni vaini ki vi tanga na mane, i bâsurira na mane tagara, ki vi: ‘Gu unira me na mane tagara ma ko vurira. Go vurira hagenago na mane, gê hagatorara hagemuri, ma ko vurira hagemuri na mane, gê hagatorara hagenago.’

⁹Na mane, ga haganega ka tagara, matena i pepe i tage na arito, ka vurira renia na haga gi tage na vere tage.

¹⁰Vikê, matena na mane, ga hagatorara ka tagara hagenago, ka râ me ka tavogi na vurita, ngaira ka vi ma, vi ngaira ka page tavogi na haga rako. Ma hete ga vurira nogata renia na haga gi tage na vere tage.

¹¹Ngaira ka tavogi na vurita, ma ka haganega ka tamasi ngurunguru renia na avanuna na mu.

¹²Ngaira ka vi: ‘E, na mane, go hagatorara hemuri, ka tagara ma suria na pepe i tage na arito iê? Ma igami kami tagara suria na tangiana hagenani, ki sinarigami na arito, ma ku bâ, na vurimami, igami ma ngaira, ka tagenani ma!”

¹³“Na avanuna na mu ki aramia na hitangita, ki vi: ‘Bamane, gu rongo! Inê kê pe hagaparugo. Bâsia, igia ka bani aganaria na haga gi tage na vurina na tangiana gi tage.

¹⁴Hoi, gu têa na vurimu ma ko aporo i pasimu. Na mane ikê, gê hagatora hemuri, inê kê obania, gê vatea na vuriha, i tagenana manga na animu.

¹⁵Inê ki oto tangê, vi gê katoa na marâ, gê obania renia na haga iaku mareku. Se igo ko hengari ma vari, suria vi inê kê mahata?’”

¹⁶Mo Jesu ki vi: “Manga ngekê na enoni, ga hagemuri, ka page hagenago; ma na enoni, ga hagenago, ka page hagamuri.”

¹⁷O Jesu matena i akê i Jerusaleme, ngaia ki arira so na kariana tangahuru matarerua, ma ki tamasi pinihi tangara, matena ga arâ i tara.

¹⁸Ngaia ki vi tangara, ki vi: “Mu rongo! Igia ka akê i Jerusaleme. Ma i ngekana na enoni ka page mahatangenia o Karena Enoni tangara na mane ni vogasiha ga teha ma na mane ni hagesuringa ni rotu. Ngaira ka page suria ki meme.

¹⁹Ma hemuri ngaira ka page mahatangenia tangara na enoni, ga pe Siu. Ma ngaira ngegê ka page rurusia, ka page ramusia, ma ka page rapusia igê na kuruse. Ma ngaia ki page mauri aporo igê na oruta na tangiana.”

²⁰Ma hemuri na gete iana o Sebeteo ki mererârua o karena tanga o Jesu. Ngaia ki tu bê tanga ma ki nungia, hanana vi aganaria na obaniha iana.

²¹O Jesu ki hagatea, ki vi: “Na ta go obania?” Ngaia ki arami, ki vi: “Gu suru hanana vi o kareku gi rua igê, karu page goga so henigo, tani i otomu ma tani i mahamu, matena go Araha raha.”

²²O Jesu ki aramirerua, ki vi: “Igamurua kamuru pe girara na marâ, muru nungia. Muru girara vari, muru totono igê na kâkâ na mamasiaganiha, gê page totono igê?” Ma ngairerua karu arami, karu vi: “I ararigamirua ma.”

²³O Jesu ki vi tangarerua, ki vi: “I monari, vi igamurua kamuru page totono igê na kâkâ na mamasiaganiha iaku, ma inê ki pe oto tangê, vi ve atererua na enoni, tani tanga na otoku ma tani tanga na mahaku. Nga noga ma God Vaemaku hete kani page nakarerua na agua ngegana tangarerua na enoni, ngaia i bani atererua ngaia tange.”

²⁴Matena na tangahuru gi tage na kariana getera ka rongo vikê, ngaira ka mangariaga tangarerua o hegoana.

²⁵Ngekana o Jesu ki unira haku me ngaira hato, ma ki vi: “Igamu kamu girara, na mane, ga araha i pasita na enoni, ngaira ka ramata tangara, ma na maneraha ka hagatagarahira.

²⁶Ma na tarana ngekê ki mareha vi ge ararigamu igamu. Manga na hitangimi, ma ki obania vi araha, ki tuguhia, i tagara tangara na ani getera.

²⁷Ma ki manga na hitangimi, ma ki obania vi maneraha, ngaia ki tuguhia, i voravora re na kare vurivuri iami.

²⁸I tuguhigamu, mu manga hete o Karena Enoni: ngaia ki pe râ me, hanana vi ge hagatagarahira na enoni, ma ki râ me hete, hanana vi tagara tangara ma ki meme, hanana i hagatahira na enoni hato.”

²⁹Matena ngaira ka pania noga i Jeriko, rako era vê na enoni ka takua o Jesu.

³⁰Ma na akerena na tara karu goga igê na mane gi rua, i guru na maaterua. Matena garu rongo, vi o Jesu ki riritare, ngairerua karu haganega karu ngere. Karu vi: “Araha, Karena o Tavite, gu takigamirua!”

³¹Na enoni ka ramonirerua, ma ka vi tangarerua, karu muni. Ma ngairerua karu ama ni ngerengere raha nga, karu vivi: “Araha, Karena o Tavite, gu takigamirua!”

³²Mo Jesu ki ura so i tara ma ki unirerua me. Ngaia ki hagatererua, ki vi: “Na ta kani muru obaniê, vi gê katoa tangagamurua?”

³³Ngairerua karu arami, karu vi: “Araha, igamirua kamuru obanigo, vi go hagamaravagi na maamamirua!”

³⁴O Jesu ki takirerua ma ki hatarigi na maaterua. Ki para ma, ma ka marava na maaterua. Ma ngairerua karu takua o Jesu.