Read Kahua MATEO 22 Bible Online

MATEO 22 - Kahua bible

MATEO 22

¹O Jesu ki tamasi maramaraveta nikâ tangara na enoni.

²Ngaia ki vi: “Na Arahanga iana God ki manga na maneraha, i hagarêa na magotoha na hagataku tanga o karena.

³Ngaia ki hagatorangenira na kariana, ka râ ma ka guhira na enoni, i bani harora. Ma ngaira na enoni ka usi, vi ge râ me.

⁴Ngekana ngaia ki hagatorangenira nikâ tani na kariana, ma ki vi tangara, ki vi: ‘Mu vi tangara na enoni, gê bani harora, kamu vivi, vi na magotoha iaku ki bani nanê. Na puruka ni ngauha iaku ma na bêhâgata ka bani nahuira, ma na ara ni marâ ka bani nanê. Mu râ me tanga na ngêra na hagataku!’

⁵Ma na enoni, ga bani harora, ka usi, ma ka bari suri ma na marâ iata. Tani ki râ i mu iana. Ma tani ki bâsuria na sitoa iana.

⁶Ma tani nikâ ka ranguira na kariana, ma ka ramusira ma ka nahuira ka me.

⁷Na maneraha ki mangariaga bâraha ma ki hagatorangenira na mane ni me iana, ka nahuira na enoni, ga nahuira na kariana, ma ka hagasuhia na hinua raha iata.

⁸Ma hemuri ngaia ki unira me na kariana, ma ki vi, ‘Na magotoha iaku tanga na hagataku ki nanê. Ma na enoni, gê bani harora, ki pe ararira, suria ngaira ka era.

⁹Vikana mu arâ i tara raha, ma kamu guhira na enoni hato, mu tarahura igê.’

¹⁰Hoi, na kariana ka râ ma ka hagahakura na enoni hato, ga tarahura: na ani ga koro ma na ani ga era. Ma na oha, ga hagataku igê, ki vunu mamasuaga ngavê renira na enoni.

¹¹“Na maneraha ki banu igê na oha, hanana i bâsira na enoni, i guhira. Ma ngaia ki bâsia ta na enoni, i pe tuguni renia na gahu, hanana vi ge marisina na hagataku.

¹²Na maneraha ki hagatea, ki vi: ‘Bamane, igo ko pe tuguni renia na gahu, hanana vi ge marisina na hagataku. Hega go banu me ikê?’ Ma na mane ki muni.

¹³Ma na maneraha ki vi tangara na kariana, ki vi, ‘Mu rakugi na rimana ma na êgana, ma kamu kasia hura i metara igê na roto hono. Ma i ngekana ngaia ki page angiangi ma ka page hengaki igê na rivona, renia i era na obana.’”

¹⁴Mo Jesu ki vi: “Ga guhira na ani ga rako, ma ka atera ma na ani, ga pe rako.”

¹⁵Na Pariseo ki râ ka hekarigi, renia vi manga i he kaniga uhungia o Jesu renigi na hagatenga.

¹⁶Ma hemuri ngaira ka hagatorangenira tani na kariata ma tani na kariana o Herote tanga o Jesu. Ngaira ka vi: “Araha, igami kami girara, igo ki mareha, vi gu hagahagaparu. Igo ko hagesurira bâkoro na enoni renigi na marâ, God i obanira na enoni, vi ga katogi, renia i pe marâ na apemu renigi na tamasinga iata na enoni, suria na parongamu ki tagenana ma tangara na ara ni enoni.

¹⁷Hoi, gu visia me tangagami na takotako iamu. I koro ma vari, surigi na Ramata iaka i na Buka Apuna, vi ga vuria na takesi tanga na Gavumane i Roma, se mareha?”

¹⁸O Jesu ki bani girara, vi ngaira ka obania, vi ga hagabekasia. Vikê ngaia ki vi: “Mu bagasusuka! Tanu hega kanimu uhungiê?

¹⁹Mu hagabâsiê renia na maana na haga, mu vuria takesi renia!” Ngaira ka hagabângenia tanga na maana na haga.

²⁰Ma ngaia ki hagatera, ki vi: “Ti ka na nununa ma na atana igê na haga ikê?”

²¹Ngaira ka arami, ka vi: “Na anina na Gavumane i Roma!” Ngekana o Jesu ki vi tangara, ki vi: “Hoita, mu vatea na Gavumane na anina na Gavumane, ma kamu vatea God na anina God.”

²²Matena ngaira ka rongo vikê, ngaira ka konekone ma ka râ ahoro vê tenia.

²³Igê na tangiana ngekana tani na Satuseo ka râ me tanga o Jesu. (Ngaira ka na enoni, ga vi, vi na enoni, ga me, ki asa, vi ge mêri aporo.)

²⁴Ngaira ka vi: “Araha, o Moise ki hagesurigia, vi, ‘Manga na mane, ma ki pe apara kare ma ki meme, ki tuguhia o goana, vi auragia na gete, i me tenia, hanana vi garu apara kare tanga na mane, i me akana.

²⁵Hoi, i nago i pasimami ka oga o vahegoata gi pi. Na mane i nago ki êragi, ma ngaia ki pe apara kare ma ki me. Ma ngekana o vesina ki êragia kehana i nâ.

²⁶Na ruata na mane ki tagenana ma nika, i pe apara kare henia kehana, ma ki tagenana ma nikâ na oruta na mane ma ngaira hato o vahegoata gi pi.

²⁷Ma hemuri na gete akana ki me.

²⁸Hoi, igê na tangiana, ga mauri aporo igê na enoni, ga me, o ti kani kaniana? Suria ngaira hato kaniga bani êragia!”

²⁹O Jesu ki aramira, ki vi: “Mu beka ngavê! Renia i hega? Suria igamu kamu pe girara na Buka Apuna, ma kamu pe girara, vi God ki raramohaga hunia.

³⁰Suria na enoni, ga me, matena ga mauri aporo, ngaira ka mangara na angero i pasina God, ma ngaira na mane ma na gete ka pe êragi.

³¹Hoi, renia na mauriha aporo iata na enoni, ga me: mu pe bani tomania vari na marâ, God ki bani visia tangagamu i na Buka Apuna? Ngaia ki vi vikê:

³²‘Inê nga kani na God iana o Abaramo, na God iana o Isako ma na God iana o Jakobo.’ Ki vivi, ngaia ki na God iata na enoni, ga mauri, ma ki mareha vê, vi na God iata na enoni, ga me.”

³³Matena na enoni ka rongo vikana, ngaira ka konetenia ngavê na hagesuringa iana.

³⁴Matena na Pariseo ka rongoa, vi o Jesu ki hagamunira na Satuseo, ngaira ka haku me.

³⁵Ma na hitangita ki uhungia o Jesu renia na hagatenga. Ngaia ki na mane ni hagesuringa ni rotu.

³⁶Ma ngaia ki hagatea o Jesu, ki vi: “Araha, na ani ta na ramata kani teha igê na Buka na Ramata?”

³⁷O Jesu ki arami, ki vi: “Ki tuguhigo, go takuia na Araha God iamu i maurihamu hagenani.”

³⁸Na ramata ngekê ki teha ma ki raha ngavê.

³⁹Na ruata na ramata, i raha ngavê, ngaia ki manga ikê: ‘Ki tuguhigo, go takuira na enoni getera manga igo maremu.’

⁴⁰Na ramata gi rua ngegê ka na hunani na ara ni ramata hato iana o Moise ma na hagesuringa iata na poropete.”

⁴¹Matena na Pariseo ka haku me, o Jesu ki hagatera, ki vi:

⁴²“Na ta ka na takotako iami renia na Mesaia? Na raraha iana o ti akana?” Ngaira ka arami, ka vi: “Na raraha iana o Tavite.”

⁴³O Jesu ki hagate, ki vi: “Hoi, hega na Higona Apu kani hagatakusia o Tavite, ki visia o karena vi Araha? Suria o Tavite ki vi,

⁴⁴‘Na Araha ki vi tanga na Araha iaku: Gu oga so i otoku, be vatego na arahanga ma be nakago ku êguga renira na merongamu.’

⁴⁵Hoi, o Tavite ki visia vi Araha, ma ki tanu hega na Mesaia ki no karena o Tavite?”

⁴⁶I asa vê ta na enoni, vi ge aramia o Jesu. Ma tenia i ngekana ki mareha rârâ ta na enoni, vi ge hagatea nikâ o Jesu.