Read Kahua MATEO 23 Bible Online

MATEO 23 - Kahua bible

MATEO 23

¹Mo Jesu ki tamasi tangara na enoni ma na kariana.

²Ngaia ki vi: “Na Pariseo ma na mane ni hagesuringa ni rotu ka nahunia na ramoha, hanana ga ramatenigi na Ramata iana o Moise.

³Tahema ki tuguhigamu, mu têtê viteata ma kamu arâ surigi na ara ni marâ, ga bonasigamu renigi. Ma siana kamu amaka surigi na parongata, suria ngaira ka pe katogi na marâ, ga visigi.

⁴Ngaira ka hugusigi na ehogo i higa, ma ka hagahigera na enoni renigi, ma ngaira mareta ki mareha vê, vi ge tamanira sisite râ ma igê na toraha.

⁵Ngaira ka katogi ma na marâ, hanana vi na enoni ke bâsira ma ke visira koro renigi. Ngaira ka naka na pepa na ramata igê na marâ, i bâ manga na rata, ma ka rakugi i raeta ma i rimata. Ma bâ, na marâ ngegê ka bâ hahanetaga. Ma kamu bâ, na kakaveragani na tuguni iata ka borahu era!

⁶Ngaira ka ategi na atohata na enoni raha ma ka oga igê, matena ga magoto, ma na atohata na enoni raha i ruma ni sukuru nikâ.

⁷Igê na mahera ngaira ka obanira na enoni, vi ga hagahigasira ma ka visira, vi na ‘Araha’.

⁸Siana kamu obanira na enoni, vi ge visigamu, vi na ‘Araha’, renia igamu hato ka na ahegoata, ma kamu nahunia na Araha gi tage togo ma.

⁹Ma siana kamu visia ta na enoni i maveta, vi na Vaemami, renia God getea ma ki na Vaemami.

¹⁰Siana na enoni ka visigamu, vi na mane ni hagesuringa, renia na Mesaia ngaia getea ma ki na mane ni hagesuringa iami.

¹¹Na ani, i teha i pasimi, ki tuguhia, i tagara tangagamu.

¹²Ma na anima na enoni, i kasia akê marena, ka page kasia so; ma na enoni, i kasia so marena, ka page kasia akê.

¹³“I era ngavê tangagamu, igamu na mane ni hagesuringa ni rotu ma igamu na Pariseo! Mu bagasusuka! Mu urapusira na enoni, hanana vi ge tê viteana God, ma igamu nogami kamu pe tê viteana God. Ma na enoni, ga uhungia, vi ga têtê viteana God, igamu kamu hagabarasira.

¹⁴“I era ngavê tangagamu, igamu na mane ni hagesuringa ni rotu ma igamu na Pariseo! Mu bagasusuka! Mu hagabekasira na gete, ga nâ, ma kamu hanagogi tenira na nahuninga iata, ma hemuri igê na nunginungiha borahu iami, igamu kamu hagaparu ma. Renia na tarana vikana igamu kamu page hatamia bâraha na mamasiaganiha.

¹⁵“I era ngavê tangagamu, igamu na mane ni hagesuringa ni rotu ma igamu na Pariseo! Mu bagasusuka! Igamu kamu tagetage tange na hinua hagatê ma kamu vatugigi na hinua hato igê na marê, hanana vi gamu katoa na kere vere tage togo ma na enoni, hanana vi ge têtê viteami. Ma na matena mu katokato vikana, igamu kamu katoa ki araria na agua ni hagaitangiha teharigamu igamu nogami!

¹⁶“I era ngavê tangagamu, suria igamu kamu mangara na enoni, ga guru, ga bêngenira na enoni getera. Igamu kamu hagesurira na enoni, kamu vivi, ‘Manga na mane, ma ki tohetohe renia na Ruma ni Rotu, ngaia ki girara, i aharêngia na suruha iana; ma ki manga vi ngaia, ma ki tohetohe renia na golo i Ruma ni Rotu, ngaia ki asa, vi ge aharêngia na suruha iana.’

¹⁷Mu bagasusuka! I guru na maami! Na ta ki teha, na golo se na Ruma ni Rotu, i hagapua na golo?

¹⁸Ma nikâ mu hagesurira na enoni, kamu vivi, ‘Manga na mane, ma ki tohetohe renia na bea ni vogasiha, ngaia ki girara, i aharêngia na suruha iana; ma ki manga ngaia, ma ki tohetohe renia na voto igê na bea ni vogasiha, ngaia ki asa, vi ge aharêngia na suruha iana.’

¹⁹I guru ngavê na maami! Na ta ki teha, na votovoto se na bea ni vogasiha, i hagapua na votovoto?

²⁰Tahema, manga na mane, ma ki tohetohe renia na bea ni vogasiha, ngaia ki tohe renigi na bea ni vogasiha ma na votovoto hato igê.

²¹Manga na mane, ma ki tohetohe renia na Ruma ni Rotu, ngaia tohe renia na Ruma ni Rotu ma renia God nikâ, i oga i ngekana.

²²Manga na mane, ma ki tohetohe renia na vavearo, ngaia ki tohe renia na âgâga iana God ma renia God nikâ, i oga igê.

²³“I era ngavê tangagamu, igamu na mane ni hagesuringa ni rotu ma igamu na Pariseo! Mu bagasusuka! Mu vatea God na tangahuruta na marâ ga katogi na ngêra ki ngê koro na marâ mangagi na vanuhani ma na tonohana ma na ngêhanani, ma kamu hagêrahu, vi gamu râ surigi na marâ raha ngavê igê na hagesuringa renigi na Ramata i na Buka Apuna. Na Buka Apuna ki vi: mu katogi na tarani, ga oto, ma kamu hagabângenia na takiha, ma siana kamu hagahagaparu. Ki tuguhigamu, mu katogi na tarani ngegana henigi na ani getigi.

²⁴Mu baura na enoni ma ki guru na maami! Mu apea râ na rango ma kamu onumia na kamelo!

²⁵“I era ngavê tangagamu, igamu na mane ni hagesuringa ni rotu ma igamu na Pariseo! Mu bagasusuka! Igamu kamu tananigi na murini na kâkâ ma na apira, ma i raroni ka oga igê na hagahagaparunga ma na maongoha.

²⁶Igamu na Pariseo, ki guru ngavê na maami! Mu tananigi râ i nago na marâ, ga oga i rarona na kâkâ, ma hemuri ki page matarotaro nikâ na murina.

²⁷“I era ngavê tangagamu, igamu na mane ni hagesuringa renigi ni rotu ma igamu na Pariseo. Mu bagasusuka! Igamu kamu mangagi na matiku, ga maningaigi i metara ki siki. Ngaigi ki bâkoro i metara, ma i raroni ki vunu renigi na surita na enoni, ga me, ma na mapugani na kakagata.

²⁸I tagenana ma, i maata na enoni igamu kamu bâ hahanetaga, ma igê na aitangihami igamu kamu vunu renigi na hagaparunga ma na tasi.

²⁹“I era ngavê tangagamu, igamu na mane ni hagesuringa ni rotu ma igamu na Pariseo. Mu bagasusuka! Igamu kamu tagarahigi ki bâkoro na matiku tangara na poropete, ma kamu hagamahegi na matiku tangara na enoni, ga koro ma ka oto i maana God.

³⁰Ma igamu kamu vi, ‘Ge manga vi igami, ma kami bani oga i nago vê, i na matena iata na êvarimami, igami ki asa iamami, vi gami katogi na tarani era, ga katogi ma ka nahuira na poropete.’

³¹Hoi, ngekana ki vi, vi igamu ki na raraha iata na enoni, ga nahuira na poropete!

³²Hoi, mu katoa ma kamu hagahatongia na tauhata na êvarimi!

³³Igamu na eraganinuni, igamu ka na ma era! Manga i he kamu takusia, vi gamu gavagavatenia na agua ni hagaitangiha?

³⁴Tahema inê be vi tangagamu: Inê kê page hagatorangenira tangagamu na poropete ma na mane tako ma na mane ni hagesuringa: ma igamu kamu page nahuira na hitangita, ma tani kamu page ramusira i ruma ni sukuru iami, ma tani kamu page tarigenira tenigi na hinua tange tani na hinua.

³⁵Tahema ki page tarahugamu na hagaitangiha tanga na nahunga renira na enoni hato, haganega tenia na nahunga renia o Abele, na mane koro, mataro me igê na nahunga renia o Sekaria, o karena o Barakia, mu nahuia i Ruma ni Rotu i berarogaterua na bea ni vogasiha ma na kiboru apuna.

³⁶Inê be vi tangagamu nga: na hagaitangiha tange na nahunga hato ngegana ki page tarahura na enoni i ngekê.

³⁷“E, Jerusaleme, Jerusaleme! Igamu kamu nahuira na poropete, ma kamu arihahunira na mane tora tamasinga, God ki bani hagatorangenira tangagamu. Hagarako inê kê obania, ve ruigamu hato manga na kua hehene, i abahira na karena renigi na gagahana, ma igamu kamu usi.

³⁸Bâ, God ki page rumakaka hagetage renigamu.

³⁹Inê be vi tangagamu: i asa, vi gamu page bâsiê nikâ, mataro me igê na matena mu page vivi: ‘God ki tamania na ani i râ me igê na raramohana na Araha.’”