Read Kahua MATEO 25 Bible Online

MATEO 25 - Kahua bible

MATEO 25

¹“Igê na tangiana ngekana na tarani igê na Arahanga iana God ka page voravora me mangagi na tarani renira na kere gete tangahuru igê na matena na hagataku. Ngaira ka migirâ me na laiti, matena ga râ vurusia na mane vi auragi haoru.

²Na kere gete gi rima ka bonobonoga, ma na ani gi rima nikâ ka takotako bâkoro.

³Na ani, ga bonobonoga, ka migirâ me na laiti iata ma ka pe tora nanê na kerosini henira.

⁴Ma na ani, ga takotako bâkoro, ka migirâ me na laiti iata ma ka tora nanê nikâ na kerosini henira.

⁵Na mane, vi auragi haoru, ki hagarihu, vi ge ata me. Tahema kere gete ka haganega ka mêru agâga ma ka mêru.

⁶“Igê na gupuna na buniana ta na enoni ki ngere, ki vi, ‘Na mane, vi auragi haoru, ki arâ me akana! Mu râ vurusia!”

⁷Na kere gete tangahuru ka rite ma ka hagarêgi na laiti iata.

⁸Ma na ani, ga bonobonoga, ka vi tangara na ani, ga takotako bâkoro, ka vi, ‘Kegamu, mu vategami tani na kerosini iami, suria na laiti iamami ka mamata noga.’

⁹Ma na ani, ga takotako bâkoro, ka arami, ka vi, ‘I asa vê. Na kerosini ki pe ararigia igia hato. Mu râ i na sitoa ma kamu vuri tangagamu maremi.’

¹⁰Vikê na kere gete, ga bonobonoga, ka râ ka vuri na kerosini, ma na matena ga bani râ, na mane, vi auragi haoru, ki ata me. Na kere gete gi rima, ga nanê, ka banu henia i ruma tanga na ngêra na hagataku. Ma ka purusia me na maa ni ruma.

¹¹Hemuri na kere gete getera ka ata me nogata. Ngaira ka ngere, ka vi, ‘Araha, araha! Gu tangahia vê taramami, kami banu vê!’

¹²Ma na mane, vi auragi haoru, ki arami, ki vi, ‘E, inê kê pe giraragamu!’”

¹³Mo Jesu ki vi: “Hoita, mu nananê tare, suria igamu kamu pe girara vi i na keta se vi na matena.

¹⁴“I page manga na mane, i sugia ma, vi ge arâ hagatê. Ngaia ki unira me na kariana ma ki hagêgurira, ka bâbâsurigi na nahuniga iana.

¹⁵Na ara ni hitangita ngaia ki vatea renigi na haga, i marisina na tauhana: tani ki vatea renigi na rehagaro gi rima na haga, ma tani ki vatea renigi na rehagaro gi rua na haga, ma tani ki vatea renigi na rehagaro gi tage na haga. Ma hemuri ngaia ki kahu tavoraha.

¹⁶Na mane tagara, i têgi na rehagaro gi rima na haga, ngaia ki oto râ, ki hagatagarahagi na haga, ma ki hagavarahagi me nikâ na rehagaro gi rima na haga.

¹⁷I tagenana ma na mane tagara, i têgi na rehagaro gi rua na haga: ngaia ki hagavarahagi me nikâ na rehagaro gi rua na haga.

¹⁸Ma na oruta na mane tagara, i têgi na rehagaro gi tage na haga, ngaia ki râ ki oparia na kiru, ma ki pinihigi igê na haga iana na araha iana.

¹⁹“I arihu me era i muri, ma na araha iata na mane tagara ngegê ki aporo me, ma ki gari tenira, vi manga i he kani ga hagavarahagi na haga iana.

²⁰Na mane tagara, i têgi na rehagaro gi rima na haga, ki banu me, ma ki tagarenigi na rehagaro gi rima me nikâ na haga, i hagavarahagi. Ngaia ki vi, ‘Araha, igo ko bani vateê na rehagaro gi rima na haga. Bâ, tani na rehagaro gi rima me nikâ na haga, gê hagavarahagi kani igê.’

²¹Na araha iana ki vi, ‘Koro era! Na kariaku koro kani igo, gê hagêguritogo renigo. Suria igo ko bani bâsurigi na haga raha. Gu banu me heniê ma ku vagevage heniê!’

²²“Ma hemuri na ruata na mane tagara, i têgi na rehagaro gi rua na haga, ki banu me, ma ki vi, ‘Araha, igo ko bani vateê na rehagaro gi rua na haga. Gu bâ, na rehagaro gi rua me nikâ na haga, gê hagavarahagi kani igê.’

²³Na araha iana ki vi, ‘I koro era! Na kariaku koro kani igo, gê hagêguritogo renigo. Renia igo ko bani bâsurigi maninga na kere haga, inê be hagêgurigo, ku bâsurigi na haga raha. Gu banu me heniê ma ku vagevage heniê!’

²⁴“Ma hemuri na oruta na mane tagara, i têgi na rehagaro gi tage na haga, ki banu me nogana, ma ki vi, ‘Araha, inê kê girara, vi igo ki na mane go rabaraba; igo ko totora purua ma; igo ko oparigi ma na ngêra, go pe hasihasi maremu.

²⁵Inê kê magutenigo, tahema gê râ kê pinihigi na haga iamu igê na kiru. Gu bâ na animu igê.’

²⁶“Na araha iana ki vi tanga, ki vi, ‘Na eraganinuni!’ Go marababaga! Iê, igo ko bani girara, vi inê kê totora purua ma, ma kê oparigi ma na ngêra, gê pe hasihasi mareku!

²⁷Hoi, tanu hega kanigo pe nakagi na haga iaku i pasita na enoni, ga hagatagarahigi na haga, hanana ve toregi aporo henigi nogani na varahani, matena gê aporo me.

²⁸Hoi, mu tavogi na haga pania tanga na mane, i nahunigi na rehagaro tangahuru gi tage.

²⁹Renia ga page vatea akê nikâ na enoni, i bani nahunia ta na marâ; hanana i page nahunigi rako ngavê na marâ; ma na enoni, i pe nahunia rârâ ta na marâ, ka page tavoa pania na kere marâ, sisite, i takusia, vi ngaia ki nahunia.

³⁰Hoi, ma na eraganinuni ikê, mu kasia hura i metara igê na roto hono, ma i ngekana ngaia ki page angiangi ma ka hengaki igê na rivona, suria i hatamia na mamasiaganiha.’

³¹“Matena o Karena Enoni ki arâ me igê na raramohana raha henira na angero hato, ngaia ki page oga so igê na atohana na maneraha,

³²ma ka page hagahakura me i maana na enoni hato i maveta. Ma ngaia ki page voasira, ka voravora ki rua, tagenana manga na mane, i voasira na sipi tenira na goti.

³³Ngaia ki page nakara na sipi i otona ma na goti i mahana.

³⁴Ma hemuri na Araha ki page vi tangara na enoni i otona, ki vivi, ‘Vaemaku ki koro era tangagamu! Mu râ me! Râ me ma kamu nahunia na arahanga, God i bani naka tangagamu i nago kere vê noga, matena i hagavora na maveta.

³⁵Inê kê magê, ma igamu kamu vateê na ngêra. Inê ki mamata na rioku, ma igamu kamu vateê kê tono. Inê kê mamahuara, ma igamu kamu uniê banu i pasimi.

³⁶Inê kê rupaturi, ma igamu kamu vateê na gahu. Inê kê oga i ruma ni hagaitangiha, ma igamu kamu vatugiê.’

³⁷“Ma na enoni, ga koro ma ka oto i maana God, ka page hagatea, ka vivi, ‘Araha, i na matena ta kani vigami bâsigo, go magê, ma kami hagangêgo? Se i na matena ta kani vigami bâsigo, i mamata na riomu, ma kami vatego ko tono?

³⁸I na keta kani vigami bâsigo, go mamahuara, ma kami unigo banu i pasimami, se go rupaturi ma kami vatego na gahu?

³⁹I na matena ta kani vigami bâsigo, go maeha se go oga i ruma ni hagaitangiha, ma kami vatugigo?’

⁴⁰Na Araha ki page arami bê aporo, ki vivi, ‘Hoita, be vi tangagamu: i na ara ni mateni mu katogi na tarani ngegana tanga na hitangita na goaku, henaka vi ngaia ki na enoni purua, igamu kamu katogi tangê inê!

⁴¹“Ma hemuri ngaia ki page vi tangara na enoni i mahana, ki vivi, ‘Mu râ vê teniê, suria God ki bani usitenigamu! Râ vê tanga na gi, i nonoro tare, God i bani naka tangara Satana ma na angero iana!

⁴²Inê kê magê, ma igamu kamu pe vateê na ngêra. Inê ki mamata na rioku, ma igamu kamu pe vateê be tono.

⁴³Inê kê mamahuara, ma igamu kamu pe uniê banu i pasimi. Inê kê rupaturi, ma igamu kamu pe vateê na gahu. Inê kê maeha se gê oga i ruma ni hagaitangiha, ma igamu kamu pe marupeê.’

⁴⁴“Ma ngaira ka page hagatea, ka vivi, ‘Araha, na matena ta kani vigami bâsigo, go magê, se i mamata na riomu, se go mamahuara, se go rupaturi, se go maeha, se go oga i ruma ni hagaitangiha, ma kami pe tamanigo?’

⁴⁵Na Araha ki page aramira bê aporo, ki vivi, ‘Hoita, be vi tangagamu: i na ara ni mateni mu usisi, vi gamu tamania na hitangita na enoni purua ngegana, igamu kamu bani usi, vi gamu tamaniê inê.’

⁴⁶Na ani vigana ngaia ki page kasira vê tanga na hagaitangiha, i goga tare. Ma na ani, ga koro ma ka oto i maana God, ka page nahunia na mauriha mora ma tarema.”