Read Kahua MATEO 26 Bible Online

MATEO 26 - Kahua bible

MATEO 26

¹Matena o Jesu ki hagesurira hato na enoni renigi na tarani hato ngegana, ngaia ki vi tangara na kariana, ki vi:

²“Igamu kamu bani girara, vi na tangiani gi rua mênga ma ki atata me na Tangiana Raha na Paseka, ma ka page mahatangenia igê o Karena Enoni tangara na enoni, hanana ga rapusia igê na kuruse.”

³Ma na mane ni vogasiha ga teha ma na meraha i pasita na Siu ka haku me i ruma raha iana o Kaiapa, na mane ni vogasiha i teha.

⁴Ma ngaira ka kato, vi ga hagatotongoa pinihi o Jesu ma ka hagamesia.

⁵Ngaira ka vi: “Siana ka katoa vikana igê na tangiana raha, i era ma na enoni ka katoa na perenga.”

⁶Matena o Jesu ki oga i hinua i Betani, i pasina o Simone, na mane asiahu,

⁷ta na gete ki merâ me na pi na hê, i vunu renia na marâ, i sigini koro ma ki raha na mena. Ngaia ki râ tanga o Jesu ma ki ringia i bêna, matena i oga ki ngêngê.

⁸Na kariana ka rigia na tarana ngekana ma ka mangariaga. Ngaira ka vi:

⁹“Tanu hega kaniga erasia purua ma na marâ, i komani sigini koro? Manga ge hagavuringenia, vikê ke tavoa renia na haga raha, ma na haga ke vatera na enoni, ga matareha!”

¹⁰O Jesu ki girara na tamasinga iata, ma ki vi tangara, ki vi: “Tanu hega kanimu ramonia na gete akana? Ngaia ki katoa na tarana koro ma ki oto tangê.

¹¹Na enoni, ga matareha, ka page goga tare henigamu, ma inê ki mareha vi ve page oga henigamu tare.

¹²Ngaia ki ringia na marâ ngekê i apeku. Na marâ ngekê ki vi, vi ngaia ki hagarêa na gahuaku, hanana ga bagia.

¹³Hoi, mu rongo! Igê na ara ni agua i maveta hagenani, ga ateate igê renia na Taroha Koro, na enoni ka page rongoa na sihonga renia na gete ngekê ma ka page takusia renia.”

¹⁴Ma hemuri na vere tage na hitangita na kariana tangahuru matarerua ki râ i pasita na mane ni vogasiha ga teha. Ngaia ki no Juta Isikariote.

¹⁵Ngaia ki vi: “Na ta kanimu page vateê, hanana ve mahatangenia o Jesu tangagamu?” Vikana ngaira ka tomanigi na haga tangahuru gi oru ma ka vatea.

¹⁶Haganega tenia i ngekana, o Juta ki garia igê na matena koro, hanana vi hagavuringenia igê o Jesu.

¹⁷Igê na ani gi tage na Tangiani Raha, ga ngêa igê na bereti, i pe ahunga, na kariana o Jesu ka râ me tanga ma ka hagatea, ka vi: “I he kanigo obanigami, vi gami hagarêa igê tangago na ngêra na Paseka?”

¹⁸Mo Jesu ki vi tangara, ka râ i hinua raha i pasina ta na mane. Ngaia ki vi tangara, ki vi: “Mu vi tanga na mane i ngekana, kamu vivi, ‘Na Araha ki vi vikê, na matena iaku ngekê; na kariaku menê kami ngaua igê na ngêra na Paseka i pasimu.’”

¹⁹Na kariana ka râ, manga i vi tangara o Jesu, ma ka hagarêa na ngêra na Paseka.

²⁰Matena i bungi me, o Jesu ma na kariana tangahuru matarerua ka oga so ka ngê.

²¹Matena ga ngêngê, o Jesu ki vi: “Be vi tangagamu: na hitangimi ki page hagavuringeniê.”

²²Na kariana ka tako bâraha, ma ka haganega ka hagatea tatage o Jesu, ka vi: “Araha, inê ki mareha iê?”

²³O Jesu ki arami, ki vi: “Na hitangimi i meêbêrihu, i anomia na bereti iana heniê igê na apira, ngaia nga na ani, i page hagavuringeniê.

²⁴O Karena Enoni ki page me, manga i bani visia na Buka Apuna; ma ki era nga vê tanga na mane, i hagavuringenia o Karena Enoni. I gahanita ma kini vora me!”

²⁵O Juta, na mane i hagavuringenia, ngaia ki hagate, ki vi: “Araha, go visia, vi inê vari?” O Jesu ki arami, ki vi: “Ngaia kani go visia.”

²⁶Matena ga oga ka ngêngê, o Jesu ki têa na bereti, ki rahesia God, ki pipia na bereti ma ki vatera na kariana. Ngaia ki vi: “Mu têa ma kamu ngêa. Ikê ki na apeku.”

²⁷Ma hemuri ngaia ki têa na kâkâ, ki rahesia God, ma ki vatera na kariana. Ngaia ki vi: “Mu tono, igamu hato,

²⁸renia ikê ki na gapuku, i hagagatagatania na suruheri iana God; na gapuku ki page gogo tanga na bonoteniha ni tasi iata na enoni hato.

²⁹Be vi tangagamu: i asa, vi ve tonomia nikâ na vaini ngekê, mataro me na tangiana gê tonomia igê na vaini haoru henigamu i pasina na Araha God Vaemaku.”

³⁰Ma hemuri ngaira ka kirigi na ki na Paseka, ma ka hura vê ka râ i Hungana ni Olive.

³¹Mo Jesu ki vi tangara, ki vi: “Igê na bungiana i ngekê akê igamu hato kamu page gava paniê. Renia na Buka Apuna ki vi, ‘God ki page nahuia ki meme na avanuta na sipi, ma na totoha ni sipi ki page totoko.’

³²Ma i murina gê mauri aporo, inê kê page nanago tarami i Galilea.”

³³Mo Petero ki tamasi tanga o Jesu, ki vi: “Ngaira hato ka girara ga page gava, nga noga ma inê. Ki asa ngavê!”

³⁴O Jesu ki vi tanga o Petero, ki vi: “Gu rongo vego! I rikini bungi igo ko page hagaiga hageoru pusigo maremu reniê, ma ki kahu angiangi na kua mane.”

³⁵O Petero ki arami, ki vi: “Inê ki asa, ve page hagaiga pusiê mareku renigo, henaka ma gê meme henigo!” Ma ngaira hato na kariana ka tamasi vikana nogata.

³⁶Hemuri o Jesu ki merarâ na kariana i na agua, ga visia vi Gesemani, ma ki vi tangara, ki vi: “Mu oga so ikê, ma inê kê arâ ikana kê nunginungi.”

³⁷Ngaia ki merarâ o Petero mo karena gi rua o Sebeteo. Ngaia ki hataera bâraha na aitangihana ma ki anumanuma bâraha.

³⁸Ma ngaia ki vi tangara, ki vi: “E, i hataera bâraha na aitangihaku, gê haga ni meme renia nga. Mu oga so ikê ma kamu bâbâ heniê.”

³⁹Ngaia ki ura râ sisite, ki aba so i ano, ma ki nunginungi, ki vi: “Vaemaku, manga i pe asa, gu torea vê na kâkâ na mamasiaganiha ikê teniê. Ma ki koro ma, igo ma.”

⁴⁰Ma hemuri ngaia ki aporo me tangara na kariana gi oru, ma ki tarahura, ga mêru. Ma ngaia ki vi tanga o Petero, ki vi: “Tanu hega mu pe girara vari mu bâbâ heniê suria ma na kere matena abubu?

⁴¹Mu bâbâ, ma kamu nunginungi, hanana mu pe votavota igê na tasi. Na nununa na enoni ki agana ki urapusia na heuhungiha, ma na apena ki marababaga.”

⁴²Nikâ na ruata na matena o Jesu ki râ ki nunginungi, ki vi: “Vaemaku, manga i asa, vi gu torea vê na kâkâ na mamasiaganiha ikê teniê, i koro ma gê totono; igo ma.”

⁴³Nikâ ngaia ki aporo tangara na kariana, ma ki tarahura ga mêru; i higa bâraha na maata.

⁴⁴O Jesu ki panira, ma ki râ nikâ, ki nunginungi na oruta na matena, ma ki nunginungi manga i bani nunginungi i nago.

⁴⁵Ma hemuri ngaia ki aporo tangara na kariana ma ki vi: “E, mu mêru ma kamu mamaro mêngagamu? Bâ! I ngekê ki mataro me na matena, ga mahatangenia igê o Karena Enoni tangara na enoni era.

⁴⁶Mu aharaga! Ke vete! Bâ, na mane, i hagavuringeniê, kani ikana!”

⁴⁷O Juta, na hitangita na kariana tangahuru matarerua, ki mataro me, matena o Jesu i tamasi mênga. Ga râ me henia rako era na enoni, ga tangaru renigi na tatapa borahu ma na tarure. Na mane ni vogasiha ga teha ma na meraha i pasita na Siu ngaira ka hagatorangenira.

⁴⁸Na mane, i hagavuringenia, ki hagarari tangara na enoni, ki vi: “Na mane, gê siginia, ngaia nga! Mu hagatotongoa!”

⁴⁹Matena i ata me o Juta, ngaia ki oto râ tanga o Jesu, ma ki vi: “Hoi, Araha,” ma ki siginia.

⁵⁰O Jesu ki arami, ki vi: “Goaku, gu katoa rêrê na tarana, go tabea me!” Ma hemuri na enoni ka ura me ma ka hagatotongoa o Jesu, ma ka têa gatagata.

⁵¹Na hitangita na kariana o Jesu ki amuria akê na tatapa borahu iana, ma ki tahurua renia na kare vurivuri iana na mane ni vogasiha i teha, ma ki retea râ na karingana.

⁵²Mo Jesu ki vi tanga, ki vi: “Gu naka aporo na tatapa igê na angana, renia na enoni, ga amurigi na tatapa, ka page meme renigi na tatapa.

⁵³Go pe bani girara vari, vi inê kê girara gê avarasia o Vaemaku? Manga ve nungia, ngaia ke girara, ge hagatorangenira me tangê ototo râ nga na rehagaro tangahuru matarerua na angero ma tani nikâ, hanana ge tamaniê.

⁵⁴Ma ki manga ngekê, tanu hega kani viga hagamonarigi na tamasinga i na Buka Apuna, ga vi, vi ga voravora me nga igê na tarana ngekê?”

⁵⁵Ma hemuri o Jesu ki tamasi tangara na enoni, ki vi: “Na manero vari kani inê? Tahema igamu kamu migirâ me na tatapa borahu ma na tarure, hanana vi gamu hagatotongoê! I na ara ni tangiani inê kê goga tare i Ruma ni Rotu ma kê hagesurira na enoni, ma igamu kamu pe bani hagatotongoê.

⁵⁶Ma na tarani hato ngegana ka akê me, hanana ga hagamonarigi na tamasinga iata na poropete i na Buka Apuna.” Ma hemuri ngaira na kariana ka gava pania.

⁵⁷Na enoni, ga bani hagatotongoa o Jesu, ka merâ i pasina o Kaiapa, na mane ni vogasiha i teha. Ma i ngekana ka bani haku me igê na mane ni hagesuringa ni rotu.

⁵⁸O Petero ki mumuria me, mataro me ki taha me i beraro i ruma iana na mane ni vogasiha i teha. Ngaia ki banu i beraro i ruma, ma ki oga so igê henira na mane ni me, ga bâsuria na ruma, hanana i bâsia, vi manga i he.

⁵⁹Na mane ni vogasiha ga teha ma na Kaunselo hagenani ka garia ta na tarana, hanana vi ga hagatoraia o Jesu renia ma ka hagamesia.

⁶⁰Ma ki asa iata, vi ge tarahua ta na marâ, henaka ga rako na enoni, ga aharaga ka hagatoraia. Ma hemuri na vererua na mane karu akê me,

⁶¹ma karu vi: “Na mane ikê ki vi, ‘Inê kê girara gê hogea na Ruma ni Rotu iana God, ma i murini na tangiani gi oru inê kê page torea aporo ototo râ nga’”

⁶²Na mane ni vogasiha i teha ki aharaga ma ki vi tanga o Jesu, ki vi: “I asa iamu vari, vi gu aramirerua bê aporo na mane, garu tugurigo renigi?”

⁶³Mo Jesu ki muni ma. Na mane ni vogasiha i teha ki tamasi nikâ tanga o Jesu, ki vi: “Inê kê obanigo, vi go tohetohe renia na God mamauri. Gu visia me, igo vari ki na Mesaia, o Karena God?”

⁶⁴O Jesu ki aramia, ki vi: “Ngaia kani go visia. Ma be vi tangagamu igamu hato: haganega tenia i ngekê, igamu kamu page bâsia o Karena Enoni, i goga so henia God raramohaga hunia igê na atohana, ma ki arâ me igê na vaha i vavearo.”

⁶⁵Vikana na mane ni vogasiha i teha ki tarisigi na tuguni iana ma ki vi: “Ngaia ki tamasi erasia God! Igia ka pe obania râ nikâ ta na enoni, vi ge visigi nikâ tani na marâ. Ngaia nga ngekê igamu kamu bani rongoa, vi ngaia ki tamasi erasia God!

⁶⁶Na ta kamu takusia?” Ngaira ka arami, ka vi: “Ngaia ki tugia monari na bevoa, ma ki araria, vi meme.”

⁶⁷Ma hemuri ngaira ka musuria na maana, ma ka tahurua; ma na enoni, ga bahitaria,

⁶⁸ka vi: “Mesaia, mêsigo ma ko girara me, vi o ti kani bahitarigo!”

⁶⁹O Petero ki oga so i metara, i beraro i ruma, ma ta na kere gete tagara iana na mane ni vogasiha i teha ki râ me tanga, ma ki vi: “Igo nikâ na kariana o Jesu ni Galilea.”

⁷⁰Ma ngaia ki hagaiga pusia marena renia i maata ngaira hato, ki vi: “Inê kê pe girara na marâ, go visia.”

⁷¹Ma ngaia ki râ vê tanga na maa ni ruma na beraro i ruma. Ma na ani getea na kere gete tagara ki bâsia, ma ki hagarongora na mane, ga oga i ngekana, ki vi: “Na kariana o Jesu ni Nasarete kani nga!”

⁷²O Petero ki hagaiga pusia marena nikâ renia, ma ki arami, ki vi: “Inê kê tohe, gê pe girara na mane ngekana!”

⁷³I na kere matena i muri na mane, ga ura i ngekana, ka râ me i pasina o Petero, ma ka vi: “Mako, igo ki na hitangita! Suria i hega? Suria mi rongo hagagara renigi na tamasinga iamu!”

⁷⁴Mo Petero ki tohe, ki vi: “Manga gê pe tamasi monari, God ki araria, ge hagaitangiê! Inê kê pe girara ngavê na mane ngekana!” Hoi, igê na matena ngekana na kua mane ki angi.

⁷⁵Mo Petero ki takusia aporo na marâ, o Jesu i bani visia tanga, i vi, vi “Igo ko page hagaiga pusigo maremu hageoru reniê, ma hemuri ki kahu angiangi na kua mane.” Ngaia ki hura vê i rugu bâraha na obana, ma ki angi.