Read Kahua MATEO 27 Bible Online

MATEO 27 - Kahua bible

MATEO 27

¹Matena i tangi mahogo, ngaira hato na mane ni vogasiha ga teha ma na meraha i pasita na Siu ka harikato, hanana vi ga hagamesia o Jesu.

²Ngaira ka rakua renia na seni ma ka torea vê, ka mahatangenia tanga o Pilato, na gavumane.

³Matena o Juta, i bani hagavuringenia o Jesu, ki girara, vi ga bani suria o Jesu ki me, ngaia ki angi i parongana, ma ki toregi aporo na maani na haga tangahuru gi oru tangara na mane ni vogasiha ga teha ma na meraha.

⁴Ngaia ki vi: “Inê kê tasi, suria gê hagavuringenia na mane koro tanga na mera.” Ngaira ka arami, ka vi: “Ma ki vi gami hega? Igo ma!”

⁵O Juta ki arihatenigi na haga igê na agua apuna i Ruma ni Rotu, ma ki panira. Ma hemuri ngaia ki râ ki rigo.

⁶Na mane ni vogasiha ga teha ka ruguni na haga ma ka vi: “Na vatevate ngekê, ma na Ramata iaka i na Buka Apuna ka manimanigia, vi siana ka bagia henigi na haga tanga na Ruma ni Rotu.”

⁷Ngaira ka hekarigi, ma ngaira hato ka aganaria, hanana vi ga vuria renia na mako tenia na mane, i hagatotogi na apira na hê, hanana vi ga nahunia na matahuta na enoni mahuara.

⁸Tahema na mako ngekana ka hêtana renia vi na “Mako ni Gapu”, mataro me i ngekê.

⁹Vikê ngaira ka hagamonaria na tamasinga iana o Jeremia na poropete, i vi: “Ngaira ka toregi na maani na haga tangahuru gi oru: (na mena na Ai ni Isiraele ga bani naka tanga.)

¹⁰Ma ka vuria renia na mako tenia na mane, i hagatotogi na apira na hê, suria na Araha ki bani bonasiê renia.”

¹¹O Jesu ki ura i maana na gavumane, ma na gavumane ki hagatea, ki vi: “Na araha iata na Siu vari kanigo?” O Jesu ki arami, ki vi: “Ngaia kani go visia.”

¹²Ma ngaia ki pe aramira râ bê aporo rârâ na mane ni vogasiha ga teha ma na meraha, ga tuguria.

¹³Ngekana o Pilato ki vi tanga o Jesu, ki vi: “Go pe bani rongogi na ara ni marâ, ga visigi renigo?”

¹⁴Mo Jesu ki usi, vi ge arami bê aporo rârâ. Vikana na Gavumane ki kone bâraha.

¹⁵Igê na ara ni Tangiani Raha na Paseka na Gavumane ki kasia hura tare tenia na ruma ni hagaitangiha na anima na enoni, na Siu ga atea.

¹⁶I na matena ngekana ki oga i ruma ni hagaitangiha ta na mane, na enoni ka bani girara. Ngaia ki no Jesu Baraba.

¹⁷Vikê matena na enoni ka haku me, o Pilato ki hagatera, ki vi: “O ti na hitangiterua kani mu obania, vi gê kasia hura tenia na ruma ni hagaitangiha: o Jesu Baraba, se o Jesu, ga hêtana vi o Kirisito?”

¹⁸Ngaia ki bani girara bâkoro, vi ngaira ka mahatangenia o Jesu tanga, suria ngaira ka hengari.

¹⁹Matena o Pilato ki oga so i ruma ni kotiha, kaniana ki kasi tamasinga me tanga, ki vi: “Siana ko bêbanu igê na tamasinga renia na mane koro ngekana; suria na maruteha iaku i na bungi inê kê hatamia bâraha na mamasiaganiha renia ngaia.”

²⁰Na mane ni vogasiha ga teha ma na meraha ka vi tangara na enoni, ka nungia o Pilato, hanana vi kasia hura o Baraba, ma ki suria o Jesu ki meme.

²¹Ma na Gavumane ki hagatera, ki vi: “O ti na hitangiterua kani mu obania, vi gê kasia hura tangagamu?” Ngaira ka arami, ka vi: “O Baraba!”

²²O Pilato ki hagatera, ki vi: “Ma o Jesu ga hêtana vi o Kirisito, kê henaka?” Ngaira hato ka arami, ka vi: “Rapusia igê na kuruse!”

²³Mo Pilato ki hagate, ki vi: “Na marâ era ta kani erasia?” Ma ngaira ka haganega ka ngerengere raha ngavê, ka vivi: “Rapusia igê na kuruse!”

²⁴O Pilato ki girara, vi bara tanga, vi ge katoa nikâ ta na marâ renia, ma na enoni ka haga ni katoa nga na perenga. Tahema ka torea me na ve tanga, ma ngaia ki tananigi na rimana i maata na enoni, ma ki vi: “Na mera iana na mane ikê ki pe takeê inê. Ma igamu ma hete!”

²⁵Ngaira hato na enoni ka arami bê aporo, ka vi: “I koro ma i takegami, igami ma na karemami, na hagaitangiha renia na mera iana!”

²⁶Ma hemuri o Pilato ki kasia hura o Baraba tangara; ngaia ki bonasira na mane ni me iana ka ramusia o Jesu, ma ki mahatangenia tangara, ka rapusia igê na kuruse.

²⁷Hoi, na mane ni me iana o Pilato ka mebanu o Jesu i ruma raha iana na Gavumane, ma na hakuta hagenani na mane ni me ka râ me, ma ka urarihia.

²⁸Ngaira ka tasigi na gahu iana ma ka hagatugunia renia na gahu rotorotoaga memera.

²⁹Ma ngaira ka hêria na mahe renigi na varo kakaruga ma ka bagia i bêna, ma ka vatea na vato, ki têa i rimana i otona; ma ka susure tanga ma ka kasi rurunga huria. Ngaira ka vi: “Mauru koro, Araha raha iata na Siu!”

³⁰Ngaira ka musuria ma ka tavoa na vato ma ka tahurua na bêna renia.

³¹Matena ga memarabe hato, ngaira ka tasia râ na gahu tenia, ma ka hagatugunia aporo renigi na gahu iana marena. Ma hemuri ka mehura, hanana ga rapusia igê na kuruse.

³²Ma i tara ngaira ka tarahua o Simone, na mane ni Sairini, ma ka bahenia me, ki torea na kuruse iana o Jesu.

³³Ngaira ka mataro me igê na agua, ga hêtana vi Gologota, i vivi “Na Agua ni Ratana Bê”.

³⁴Ma i ngekana ngaira ka hagatonomia o Jesu renia na vaini, ga bani toraria henia na marâ, i mahe. Ngaia ki namia anaki ma ki usitenia.

³⁵Ngaira ka rapusia igê na kuruse. Ma hemuri ngaira ka tongani na gahu iana, ma ka pile taisi renigi, hanana ga girara, vi o ti kani nahunia na hitangini na gahu.

³⁶Hemuri ngaira ka oga so ma ka bâsuria.

³⁷I avorana na bêna ngaira ka naka na segesegeha, ga visigi igê na marâ, ga tuguria renigi. Na segesegeha i vi: “O Jesu ngekana, na Araha raha iata na Siu.”

³⁸Hemuri ngaira ka rapusirerua na manero gi rua igê na kuruse, tani i otona o Jesu ma tani i mahana.

³⁹Na enoni, ga heraonge i tara, ka babaringe ma ka guharia o Jesu.

⁴⁰Ngaira ka vi: “Vego, go hogea na Ruma ni Rotu ma ko torea aporo surigi na tangiani gi oru! Gu hagatahigo so maremu, manga vi o Karena God kanigo! Gu so me tenia na kuruse!”

⁴¹Ma ka kato vikana nogata na mane ni vogasiha ga teha, na meraha, ma na mane ni hagesuringa ni rotu. Ngaira ka kasi rurunga huria, ka vi:

⁴²“Aige, ngaia ki bani hagatahira na enoni getera, ma ki asa iana, vi ge hagatahia so marena! Ngaia ki na Araha raha ni Isiraele iê? Manga vi ngaia, ma ki soso me tenia na kuruse i ngekê, ua, igia ka kahu tongesuria!

⁴³Ngaia ki hagêguritogo renia God, ma ki vi, vi ngaia ki no Karena God. Hoita, ge bâ, manga vi God ki obania, i hagatahia i ngekê!”

⁴⁴Ma ngairerua na manero, ga rapusirerua henia o Jesu, karu guharia nogaterua.

⁴⁵Igê na ritovagana na roto hono ki buhia na agua hagenani, rârâ mataro me ki pane na arito.

⁴⁶Na ararina i pane na arito, o Jesu ki ngere raha, ki vi: “Eli, Eli, lema sabagatani?”, i vi, vi “God iaku, God iaku, renia ta ko paniê?”

⁴⁷Tani na enoni, ga ura i ngekana, ka rongoa, ma ka vi: “E, ngaia ki avarasia o Elia!”

⁴⁸Ta na hitangita ki gaha ototo râ, ki têa na rumurumu, ki anomia igê na vaini, ki naka igê na bogona na apinige, ma ki uhungia, vi hagatonomia o Jesu renia.

⁴⁹Ma tani ka vi: “Gu naka noga, ke bâsia, manga vi o Elia ki arâ me ma ki hagatahia!”

⁵⁰O Jesu ki ngere raha nikâ, ma ki me.

⁵¹Ma na gahu raha, i kuku i Ruma ni Rotu, ki tatari hagenani, ki so i gupu. Ma ki nunu, ma na hê ka apapa,

⁵²ma na anoano ka avagavaga, ma ka rako era na kariana God, ga bani me, ka mêri aporo.

⁵³Ngaira ka hurakê me tenigi na anoanota. Ma na matena o Jesu ki bani mêri aporo, ngaira ka banu i Hinua Apuna, ma i ngekana ka rako na ai i hinua, ga bâsira.

⁵⁴Matena na maneraha iata na mane ni me ma na me iana, ga bâsuria o Jesu, ka hatamia na nunu ma ka bâsigi na marâ hato getigi, ga vora me, ngaira ka magu bâraha, ma ka vi: “I monari, o Karena God ngekana!”

⁵⁵I ngekana ka rako na gete, ga bani takua o Jesu tenia i Galilea ma ka tamania. Ngaira ka ura hagatê, ma ka bâbâ râ.

⁵⁶I berarogata ka oga ka Maria Matalena, ka Maria kenaterua o Jakobo mo Josepo, ma na kenaterua o karena o Sebeteo.

⁵⁷Matena i bungi me, ta na mane ruruguha i Arimatea ki ata me. Ngaia ki no Josepo, ma ngaia nikâ ki na kariana o Jesu.

⁵⁸Ngaia ki râ i pasina o Pilato, ma ki nungia renia na gahuana o Jesu. O Pilato ki bonasira na mane ni me iana ka vatea o Josepo.

⁵⁹Vikana o Josepo ki torea ma ki baraia renia na gahu haoru, i siki.

⁶⁰Ma ngaia ki bagia na gahuana igê na matiku iana marena, ga kahu karua ma igê na hê. Hemuri ngaia ki purisia na apena na bagahê raha tanga na maana na matiku, ma ki songoa renia, ma ki râ pania.

⁶¹Ka Maria Matalena ma tani ka Maria karu oga so i ngekana, karu maatia na matiku.

⁶²Igê na tangiana i muri, i murina na tangiana ga hagarêa igê na Tangiana ni Mamaroha, na mane ni vogasiha ga teha ma na Pariseo ka metamasi o Pilato.

⁶³Ngaira ka vi: “Araha, igami kami girara, matena i mauri mênga na mane ni hagaparunga ngekana, ngaia ki vi, ‘Inê kê page mauri aporo i murini na tangiani gi oru.’

⁶⁴Tahema, gu bonasira na mane ni me, ke anumasia maninga na matiku, mataro me igê na oruta na tangiana, i era ma na kariana ka râ ka hanagoa, ma ka hagarongora na enoni, vi ngaia ki mêri aporo tenia na mera! Manga ngekana, na hagaparunga ngekê ki page era ngavê teharia na ani i nago.”

⁶⁵O Pilato ki vi tangara, ki vi: “Mu merarâ na mane ni me, hanana ga anumasia na matiku igê na tarana, mu takusia, vi i koro.”

⁶⁶Vikana ngaira ka râ tanga na matiku, ma ka naka na giraraha igê na purupuru na hê, ma ka nakara so na mane ni me, hanana ga anumasia.