Read Kahua MATEO 28 Bible Online

MATEO 28 - Kahua bible

MATEO 28

¹I murina na Tangiana ni Mamaroha, igê na mahogohogotana na Sate, ka Maria Matalena ma tani ka Maria karu râ, karu rigia na matiku.

²Ki parama, ma ki nunu raha. Na angero iana na Araha, i râ me tenia God, ki purisia râ na purupuru na hê, ma ki oga so igê.

³Na bâbâhana ki bâ manga na marangeia, ma na tuguni iana ki siki ahuru ngavê.

⁴Na mane ni me, ga anumasia na matiku, ka bubununuga, ka tata ma ka bagamame.

⁵Na angero ki tamasi tangarerua na gete, ki vi: “Siana kamuru magu. Inê kê bani girara, vi igamurua kamuru bâbâ renia o Jesu, ga bani rapusia igê na kuruse.

⁶Ngaia ki mareha ikê. Ngaia ki bani mêri aporo, manga i bani visia. Muru arâ me ikê, ma kamuru rigia na agua, i tâ igê.

⁷Hoi, muru râ rêrê ma kamuru hagarongora na kariana, kamuru vivi, ‘Ngaia ki bani mêri aporo tenia na mera, ma i ngekê ngaia ki nanago tarami i Galilea, ma i ngekana igamu kamu page bâsia igê.’ Ngaia ma ngekê na marâ, gê obania, vi gê hagarongogamurua renia.”

⁸Ngekana ngairerua karu hatani pania na matiku. Henaka vi ngairerua karu magu, ma ngairerua karu vagevage bâraha nikâ, ma karu tango, hanana vi garu hagarongora na kariana.

⁹Ki parama o Jesu, ma ki râ me vurusirerua, ma ki vi: “Na marapeha henigamurua.” Ngairerua karu ura me i pasina, karu susure i maana, ma karu ruigi na êgana. O Jesu ki vi tangarerua, ki vi:

¹⁰“Siana kamuru magu. Muru arâ ma kamuru hagarongora na goaku, ka arâ i Galilea, ma i ngekana ngaira ka page bâsiê igê.”

¹¹Matena garu bani râ na gete ngegana, tani na mane ni me, ga anumasia na matiku, ka aporo i hinua raha ma ka hagarongora na mane ni vogasiha ga teha renigi na ara ni marâ, ga bani vora me.

¹²Na mane ni vogasiha ga teha ma na meraha ka hekarigi ma ka harikato. Ngaira ka vatera na mane ni me na haga raha,

¹³ma ka vi tangara, ka vi: “Mu vivi, vi na kariana kaniga râ me igê na bungiana ma ka hanagoa na gahuana, matena mu mêru igamu.

¹⁴Manga vi na Gavumane, ma ki rongoa na tarana ngekê, igami kami page hagabeka, ki tangatanga monari. Manga ngekê, siana kamu takotako bâraha renia.”

¹⁵Na mane ni me ka tora na haga ma ka kato, manga hanana ga bonasira. Na hagaparunga ngekê ki râhira na Siu, ma ki mataro me i ngekê, na sihonga ngekê ki arâ mênga.

¹⁶Na kariana tangahuru matare tage ka râ i Galilea tanga na hungana, i bani visia o Jesu tangara, vi ga arâ igê.

¹⁷Matena ga bâsia, ngaira ka bêtuhia, henaka tani na hitangita ka tako tugupu renia.

¹⁸O Jesu ki ura hagarangira, ma ki vi tangara, ki vi: “God ki bani kasiê, kê marungira na ara ni marâ hato i pasina ma i maveta.

¹⁹Hoita, mu arâ nga tangara na enoni hato i maveta hagenani, ma kamu hagesurira, ka voravora re na kariaku: mu hagabatesimora igê na raramohana Vaemana mo Karena ma na Higona Apu,

²⁰ma kamu hagesurira, hanana ga arâ surigi na ara ni marâ, gê bani hagatoragamu renigi. Mu rongo! Inê be tamanigamu tare, mataro me na hatongina na maveta.”