Read Kahua MATEO 3 Bible Online

MATEO 3 - Kahua bible

MATEO 3

¹I na bevoana ngekana o Joane Batisita ki kahu râ me, ki haganega ki ateate igê na manihê i Jutea.

²Ngaia ki vi: “Mu murisigegi na tasi iami ma kamu urisi parongami, renia na Arahanga iana God ki hagarangi me noga.”

³O Joane ki no vani, o Isaia na poropete i bani tamasi renia, ki vi: “Ta na enoni ki ngerengere i na manihê, ki vivi, ‘Mu rikia na tara tanga na Araha. Mu hagaotoa na tara tanga, ki arâ igê.’ ”

⁴O Joane ki tuguni renia na tuguni varevarehuga na varehuna na kamele. Ngaia ki hogotenia i kâna na hogosina, ga tagarahia renia na gavona na puruka. Ma ngaia ki ngêngê na papangari ma na pirui.

⁵Na enoni hato i Jerusaleme ma i na apanena hagenani i Jutea ma i na hinua hato hagarangia i ve i Jotano ka râ tanga.

⁶Ngaira ka visigi mataha na tasi iata ma ka angitenigi. Ma ngaia ki hagabatesimora i ve i Jotano.

⁷Rako na Pariseo ma na Satuseo ka râ me nikâ tanga, hanana vi hagabatesimora. Matena ngaia ki bâsira, ngaia ki vi: “Mu manga na ma, ga bera! O ti kani vi tangagamu, kamu girara mu gavagava tenia na hagaitangiha, God i page vategamu renia?

⁸Mu hagabângenigi nga na marâ, hanana vi igamu kamu bani murisigegi na tasi iami ma kamu bani urisigi na aitangihami.

⁹Ma siana kamu gahe suria o Abarahamo, kamu vi, ‘O Abaramo nga ki na êvarika!” Be vi tangagamu: God ki girara i katogi na hê igê, ka voravora re na raraha tanga o Abaramo!

¹⁰God ki surigamu noga. Igamu kamu mangagi na apinige. Na akesi ki nanê, vi tapigi ma ki bogegi na hunani na apinige. Na ara ni apinige, ga hungu renigi na guani bera, ka page tapigi so ma ka page sungigi.

¹¹Inê kê hagabatesimogamu renia na ve, na girarana vi, igamu kamu urisi parongami. Ma na mane, i page mumuriê me, ngaia ki page hagabatesimogamu renirerua na Higona Apu ma na gi. Ngaia ki tehariê ngavê, ma ki pe arariê, vi ve toregi na buti iana.

¹²Ngaia ki merâ me na penapena, i haata igê na raisi. Ngaia ki page bêbagi na raisi igê na ruma ni harisi; ma ngaia ki page sungigi na momogani, ma na gi ngekê ki tare tarema!”

¹³I na matena ngekana o Jesu ki râ me tenia i Galilea tanga na ve i Jotano. Ngaia ki râ me, hanana vi o Joane ki hagabatesimoa igê.

¹⁴Mo Joane ki uhungia, vi hagarigua ma ki vi: “I araria, gu hagabatesimoê igo; ma ki pe arariê, vi ve hagabatesimogo inê!”

¹⁵Mo Jesu ki aramia, ki vi: “Naka ma ke tâ manga gê visia tangago, renia igê na tarana ngekê igerua karu tanugi na ara ni marâ, God i obanigi.” Vikê o Joane ki agana.

¹⁶Matena o Jesu ki batesimo hato, ngaia ki akê me ototo râ tenia na ve. Ma ngaia ki rigia, i tahataha na vavearo, ma ki bâsia na Higona Apu iana God, i maramara kuvê ki so me i pasina ma ki angaria.

¹⁷Ma igê na vavearo God ki tamasi, ki vi: “Ikê na Kareku hetakui.