Read Kahua MATEO 4 Bible Online

MATEO 4 - Kahua bible

MATEO 4

¹Hoi, na Higona Apu ki katoa o Jesu, ki râ igê na manihê, hanana vi Satana ki uhungia.

²Ma i ngekana o Jesu ki hari surigi na tangiani tangahuru gi he ma na bungiani tangahuru gi he, ma ki magê.

³Satana ki râ me tanga, ma ki vi: “Manga vi igo ki no Karena God, gu vi tangagi na hê igê ke voravora renigi na bereti.”

⁴O Jesu ki arami, ki vi: “Na Buka Apuna ki bani vi, vi ‘Na enoni ki pe mauri renia ma na ngêra, ma ki mauri renigi na ara ni tamasinga iana God.’ ”

⁵Me muri Satana ki merâ o Jesu i Hinua Apuna i Jerusaleme, ma ki akê hagêrasia i kerekê ngavê igê na gerina na Ruma ni Rotu.

⁶Ma ngaia ki vi tanga, ki vi: “Manga vi igo ki no Karena God, hoi, gu reke so i ano. Suria na Buka Apuna ki vi, ‘God ki page bonasira na angero iana, ka bâbâ surigo. Ngaira ka page torego i rimata, hanana siana ko tapasu igê na hê.’ ”

⁷O Jesu ki arami, ki vi: “Ma na Buka Apuna ki vi nikâ, ‘Siana ko uhungia na Araha God iamu.”

⁸Ma hemuri Satana ki meakê o Jesu igê na barana, ma ki hagabâsia renigi na arahanga hato i maveta ma na ruruguha hato surigi.

⁹Ma Satana ki vi: “Inê be vatego renigi na ara ni marâ hato ngegana, manga vi go susure ma ko rahesiê.”

¹⁰Mo Jesu ki arami, ki vi, “Muni vê, Satana! Na Buka Apuna ki vi, ‘Ngaia getea ma na Araha God iamu ko rahesia ma ko bêtuhia.’ ”

¹¹Vikê Satana ki râ vê pania, ma na angero ka râ me ma ka tamania o Jesu.

¹²Matena o Jesu ki rongoa, vi o Joane ki oga i ruma ni hagaitangiha, ngaia ki râ vê tanga i Galilea.

¹³Ngaia ki pania na hinua i Nasarete, ma ki râ ki oga i Kapenamu, na hinua i hagarangia na Rano i Galilea, igê na apanena iaterua o Sebuluni mo Napatali.

¹⁴Na tarana ngekê ki hagamonaria na tamasinga iana na poropete o Isaia, i vi:

¹⁵“Enoni igê na mako iana o Sebuluni! Enoni igê na mako iana o Napatali! Enoni i tara ataha tanga na asi, i na apanena tarê na ve i Jotano, i Galilea, ga oga igê na enoni, ga pe Siu!

¹⁶Na enoni, ga oga igê na roto, ka bani rigia na marara raha! Na marara ki mavesira na enoni, ga oga igê na roto hono, na agua ni mera.”

¹⁷Haganega na matena ngekana, o Jesu ki haganega ki ateate renia na taroha iana, ki vi: “Mu murisigegi na tasi iami, ma kamu urisi parongami! Na Arahanga iana God ki hagarangi me noga.”

¹⁸Matena o Jesu ki ritare i one igê na Rano i Galilea, ngaia ki bâsirerua o hegoana: o Simone, ga hêtana nikâ vi o Petero, mo Anterea o vesina. Ngairerua ka na mane hugohugo, garu hugora na siare igê na Rano.

¹⁹O Jesu ki vi tangarerua, ki vi: “Muru râ me, ma be hagesurigamurua, hanana mu hugora na enoni.”

²⁰Ngairerua karu panigi ototo râ nga na hugo iaterua ma karu takua.

²¹Ngaia ki râ vê sisite, ma ki bâsirerua nikâ tani o hegoana, o Jakobo mo Joane, na karena o Sebeteo. Ngairerua mo Sebeteo, o vaematerua, ka goga igê na kere haka iata, ma ka hagarêgi na hugo iata. O Jesu ki unirerua.

²²Ngairerua karu panirerua ototo râ nga na kere haka mo vaematerua, ma karu takua o Jesu.

²³O Jesu ki râhia i Galilea hagenani. Ngaia ki hagesurira na enoni i ruma ni sukuru iata. Ngaia ki ateate renia na Taroha Koro renia na Arahanga iana God, ma ki rikira na enoni tenigi na ani mavê na maeha ma na mera.

²⁴Ma na tarotarohana ki râhia na apanena i Siria hagenani. Vikê na enoni ka merarâ me tanga o Jesu na enoni, ga maeha, ga tarahura na ani mavê na maeha ma na mera: na enoni, ga atataroga, ma na enoni, ga manumanuga, ma na enoni, ga tavi. Mo Jesu ki rikira ngaira hato.

²⁵Rako era na enoni ka takua: na enoni ni Galilea, na enoni ni Hinua Tangahuru, ma na enoni ni Jerusaleme, mi Jutea, ma na enoni tenia na apanena tarê na ve i Jotano.