Read Kahua MATEO 7 Bible Online

MATEO 7 - Kahua bible

MATEO 7

¹“Siana kamu surira na enoni, hanana God ki pe surigamu nogami.

²Renia God ki page surigamu tagenana ma, manga igamu mu surira na enoni. Ma na matena i surigamu, ngaia ki page arâ surigi na tarani, mu katogi, matena mu surira na enoni.

³Tanu hega kanimu boretenia na ahasugana na apinige i maana na goami, ma kamu pe rigia na bogona na apinige i maami maremi?

⁴Manga i he kani vi mu girara, mu vi tanga na goami, kamu vivi, ‘Me, goaku, be tavoa râ na ahasugana na apinige tenia na maamu,’ matena na bogona na apinige ke oga i maami maremi nogami?

⁵Mu bagasusuka! Mu raragea râ igê hagenago hete na bogona na apinige tenia na maami maremi, ma hemuri kamu kahu girara, mu bâbâ maninga ma kamu tavoa râ na ahasugana na apinige tenia na maana na goami.

⁶“Na marâ ga apuna siana kamu kasikasi tangara na o, i era ma ka apariri me ka ngasigamu. Siana kamu kasikasi na haga mora tangara na bo, i era ma ka purigi.

⁷“Mu nunginungi ma kanimu tavotavo. Mu bâbâ ma kanimi page tarahu. Mu korekore ma na maa ni ruma ki page tahataha tangagamu.

⁸Suria na ara ni enoni, i nunginungi, ngaia ki page tavotavo. Ma na enoni, i bâbâ, ngaia ki page tarahu. Ma ki page tahataha na maa ni ruma tanga na enoni, i korekore.

⁹O ti na hitangimi i vatea na hê tanga o karena matena i nungia na bereti?

¹⁰Se mu vatea vari na ma, matena i nungia na siare?

¹¹Henaka vi igamu kamu pe koro, ma igamu kamu girara, mu vatera na karemi na marâ koro. Ma God Vaemami ki teharigamu ngavê ma ki page votogi na marâ koro tangara na enoni, ga nungia.

¹²“Na ara ni marâ, mu obanira na enoni getera, vi ga tanugi tangagamu, mu tanugi tangara nogami. Na tarana ngekê ki na girarani na Ramata iana o Moise ma na hagesuringa iata na poropete.

¹³“Mu bêbanu nga igê na maa ni ruma, i roro. Suria na maa ni ruma, i raha, ma na tara, i mataku, karu hagataregia tanga na mera, ma ka rako na enoni, ga arâ surirerua.

¹⁴Ma na maa ni ruma, i roro, ma na tara, i kere bara, karu hagataregia tanga na mauriha mora, ma ki mareha vi ge rako na enoni, ge tarahua.

¹⁵“Mu hinarura na poropete hagaparu. I metara ngaira ka bâ mangara na sipi, ma igê na aitangihata ngaira ka mangara na o vasiga, ga garagara.

¹⁶Igamu kamu page bâbâgirarara igê na tauhata. Na tone ki asa, vi ge hungu renigi na guani na apinige na vaini, ma na ria ki asa, vi ge hungu renigi na guani na apinige na fiki.

¹⁷Na apinige koro ki hunguhungu renigi na guani koro, ma na apinige era ki hunguhungu renigi na guani bera.

¹⁸I asa na apinige koro, vi ge hungu renigi na guani bera, ma ki asa na apinige era, vi ge hungu renigi na guani koro.

¹⁹Na ara ni apinige, ga pe hunguhungu renigi na guani koro, ka page tapigi ma ka sungigi.

²⁰Hoi, tahema vikana, igamu kamu page bâgirarara na poropete hagaparu renigi na tauhata.

²¹“I asa iata, vige banu i pasina God na Araha na enoni hato, ga avarasiê, ka vivi, ‘Araha, Araha’. Ngaira ma hete na enoni, ga katogi na marâ, God Vaemaku i obanigi, kaniga bêbanu i pasina.

²²Igê na Tangiana na Suriha Raha ka page rako na enoni, ga avarasiê, ka vivi, ‘Araha, Araha! Igê na raramohamu igami kami tarohenia na taroha iana God! Igê na raramohamu igami kami paira na ataro rako ma kami katogi rako na mena!’

²³Ma inê kê page vi tangara, kê vivi, ‘Inê kê pe hagaregamu. Mu râ vê, igamu na enoni era!’

²⁴“Hoita, vikê na ara ni enoni, ga rongogi na tamasinga iaku ma ka râ surigi, ngaira ka maratorana na mane, i takotako mataha ma ki torea na ruma iana igê na mako pusuga.

²⁵Ki rangi raha. Ka maganu na ve. Ma na roga ki hitaria ramo na ruma ngekana. Ma na ruma ki pe ahoge, suria ngaia ki torea igê na mako pupusuga.

²⁶“Ma na ara ni enoni, ga rongogi na tamasinga iaku ma ka pe râ surigi, ngaira ka maratorana na mane, i bonobonoga ma ki torea na ruma i one.

²⁷Ki rangi raha. Ka maganu na ve. Na roga ki hitaria ramo na ruma ngekana, ma na ruma ki ahoge ma ki era hagetage.”

²⁸Matena o Jesu ki visigi hato na tarani ngegê, na hakuta na enoni ka konetenia na tarana, i hagesurira igê.

²⁹Ngaia ki pe mangara na mane ni hagesuringa ni rotu i pasita. Ngaia ki hagesuria manga na maneraha ni ramata.