Read Kahua MAREKO 10 Bible Online

MAREKO 10 - Kahua bible

MAREKO 10

¹Mo Jesu ki pania na agua ngekana, ma ki râ i Jutea, ma ki tarêhia na ve i Jotano. Ma nikâ na hakuta na enoni ka haku me tanga, ma ngaia ki hagesurira, suria ngaia ki hagesurira tare na enoni.

²Tani na Pariseo ka râ me tanga o Jesu, ma ka uhungia, ka vi: “Visia me tangagami: surigi na Ramata iaka i na Buka Apuna ki koro ma vari, vi na mane ki kasia na gete iana se mareha?”

³O Jesu ki arami ki hagatera, ki vi: “Na ramata ta kani bani vategamu o Moise?”

⁴Ngaira ka arami, ka vi: “O Moise ki hagamarumungenia, vi na mane ki segea na pepa ni hekasigi, ma ki kahu kasia na gete iana.”

⁵O Jesu ki vi tangara, ki vi: “O Moise ki segea na ramata ngekana tangagamu, suria ma igamu kamu guguruga bâraha.

⁶Ma igê na haganegahana, matena i hagavorara na ara ni marâ hato, ‘God ki hagavorara na enoni, na ani mane ma na ani hehene.

⁷Tahema na mane ki panirerua o vaemana ma kenana ma ki gâga haku henia na gete iana,

⁸ma ngairerua karu voravora manga na vere tage togo ma.’ Ngekana ngairerua ki mareha, vi garu vora na verarua, ma karu manga hete na vere tage togo ma.

⁹Manga ngekana, siana na enoni ka rupasirerua na mane ma na gete, renia God ki takurerua.”

¹⁰Matena ga aporo banu i ruma, na kariana ka hagatea o Jesu renia na tarana ngekê.

¹¹Ngaia ki vi tangara, ki vi: “Na mane, i kasia kaniana ma ki auragia na gete getea, ngaia ki oga erasia kaniana, suria i gamogamo;

¹²tagenana ma na gete, i kasia o vaniana ma ki auragia na mane getea, ngaia ki oga erasia o vaniana, suria i gamogamo.”

¹³Tani na enoni ka merarâ me na kere kare tanga o Jesu, hanana vi têtêbuhira, ma na kariana ka ramonira na enoni agana.

¹⁴Matena o Jesu ki bâsira, ngaia ki mangariaga tangara, ma ki vi tangara, ki vi: “Nakara na kere kare ke râ me i pasiku! Siana kamu urapusira, suria na enoni, ga maratorata na kare ngegê, ngaira ka rongoa na viteana God, na Araha.

¹⁵Mu rongo! Na enoni, i pe rongoa na viteana God manga na kare, ngaia ki pe obania God vi ge araha tanga.”

¹⁶Ma ngaia ki topera na kere kare, ki têbuhira ma ki nungia God tangara.

¹⁷Matena o Jesu i tavoraha nikâ, ta na mane ki tango me, ki aba so i maana o Jesu, ma ki hagatea, ki vi: “Araha koro, na ta ki tuguhiê vi ve katoa, hanana ve nahunia renia na mêriha mora ma tarema?”

¹⁸O Jesu ki hagatea, ki vi: “I hega kanigo visiê, vi gê koro? Mareha ta na enoni, vi ge koro. God ngaia getea ma kani koro.

¹⁹Igo ko giraragi na ramata: ‘Siana ko nahuia ki me na enoni; siana ko gamogamo; siana ko hanago; siana ko hagaparu; siana ko hagabeka; hanitasirerua o vaemamu ma kenamu.’”

²⁰Na mane ki vi: “Araha, haganega me tenia gê sisite mênga, inê kê bani marupegi me na ramata hato ngegana.”

²¹O Jesu ki boretenia, ma ki takuia, ma ki vi: “Na ani gi tage ma na marâ ki mamênga, vi gu tanua. Go arâ ma ko hagavuringenigi na nahuninga hato iamu, ma na haga ko vatera re na enoni, ga matareha, hanana go page nahunigi na ruruguha i pasina God. Ma hemuri ko arâ me ma ko takuê.”

²²Matena na mane ki rongo vikê, ngaia ki bâ heruruhi, ma ki râ vê, ma ki rugu na obana, renia ngaia ki ruruguha teha ngavê.

²³O Jesu ki ono tatarê renira na kariana, ma ki vi tangara, ki vi: “Aige, i bara tangara na enoni ruruguha, vi ge rongoa na tamasinga iana God na Araha!”

²⁴Matena na kariana ka rongo vikê, ngaira ka konekone, mo Jesu ki ama ni vivi nga: “Kariaku, aige, i bara, vi ge rongoa na tamasinga iana God na Araha!

²⁵I bara tangara na enoni, vi ge suvarenia na kamelo igê na maana na nila, ma ki bara teha tangara na enoni ruruguha, vi ge rongoa na tamasinga iana God na Araha.”

²⁶Matena ngekana na kariana ka kone teha ngavê, ma ka hehagateri, ka vi: “Se, ti kani girara vi tahitahi va?”

²⁷O Jesu ki boretenira, ma ki arami, ki vi: “Na tarana ngekê ki asa tangara na enoni, ma ki pe asa tanga God; na marâ hato ka pe asa tanga God.”

²⁸Mo Petero ki tamasi, ki vi: “Bâ, igami kami bani panigi na ara ni marâ ma kami takugo.”

²⁹O Jesu ki vi tangara, ki vi: “I monari, be vi tangagamu: manga ta na enoni, ma ki pania na ruma iana, se na vi goana, se vi kenana, se vi o vaemana, se vi na karena, se vi na mako iana, reniê inê ma renia na taroha koro,

³⁰ngaia ki page nahunigi rako na marâ i na matena i ngekê teharia i nago. Ngaia ki page nahunira hagatangarê na ruma, goana, kenana, karena ma na mako teharia i nago. Ma ki page tarahua na henahuita nikâ. Ma i na bevoana i muri me ngaia ki page nahunia na mauriha mora ma tarema.

³¹Ma na ani rako, ga hagenago i na matena i ngekê, ngaira ka page hagemuri, ma na ani rako, ga hagemuri i na matena i ngekê, ngaira ka page hagenago.”

³²Ngaira ka râ suria na tara, i akê i Jerusaleme. O Jesu ki hagenago tarata na kariana, ma ngaira ka konekone. Na enoni, ga râ suria, ngaira ka magu. Ma nikâ o Jesu ki unira me na kariana tangahuru matarerua tenira na enoni, ma ki tamasi renigi na marâ, ngaia i page tarahugi.

³³O Jesu ki vi tangara, ki vi: “Bâ, igia ka akê i Jerusaleme, ma i ngekana ngaira ka page mahatangenia igê o Karena Enoni tangara na mane ni vogasiha ga teha ma na mane ni hagesuringa ni rotu. Ngaira ka page suria ki meme, ma hemuri ngaira ka page mahatangenia tangara na enoni mahuara, ga mareha vi na Siu.

³⁴Ma ngaira ka page rurusia, ma ka page musuria, ma ka page ramusia, ma ka page nahuia ki meme. Ma igê na oruta na tangiana ngaia ki page mauri aporo.”

³⁵Mo Jakobo mo Joane, o karena o Sebeteo, karu râ me tanga o Jesu, ma karu vi: “Araha, igamirua kamuru obania, vi go vategamirua ta na marâ.”

³⁶O Jesu ki hagatererua, ki vi: “Na ta kanimuru obaniê, vi gê vategamurua?”

³⁷Ma ngairerua karu arami, karu vi: “Igamirua kamuru obania, go hagamarumungenigamirua kamuru araha henigo ma kamuru gâga so henigo igê na atohamu, na vere tage i otomu ma na vere tage i mahamu, matena go araha raha teha.”

³⁸O Jesu ki vi tangarerua, ki vi: “Igamurua kamuru pe girara vi na ta, kanimuru nungia. Muru girara vari, muru totono igê na kâkâ ni mamasiaganiha, gê page totono igê? Ma kamuru girara vari, muru batesimo, manga hanana i tuguhiê, vigê batesimo?”

³⁹Ngairerua karu arami, karu vi: “Mako! Igamirua kamuru girara.” O Jesu ki vi tangarerua, ki vi: “I monari, igamurua muru totono igê na kâkâ ni mamasiaganiha, gê page totono igê, ma kamuru batesimo, manga hanana i tuguhiê, vi gê batesimo.

⁴⁰Ma ki asa iaku, ve atererua na enoni, vi tani tanga na otoku ma vi tani tanga na mahaku. God ma kani page vatera na agua ngegana tangara na enoni, i bani hagarêgi tangara.”

⁴¹Matena na tangahuru gi tage na kariana getera ka rongoa na tarana ngekê, ngaira ka mangariaga tangarerua o Jakobo mo Joane.

⁴²Ngekana o Jesu ki unira me na kariana hato, ma ki vi: “Igamu kamu girara, na mane, ga visira vi ga araha i pasita na enoni, ngaira ka ramata tangara, ma na maneraha iata ka hagatagarahira.

⁴³Na tarana ngekê ki mareha, vi ge ararigamu igamu. Manga na hitangimi, ma ki obania vi araha, ngaia ki tuguhia, i tagara tangara na ani getera.

⁴⁴Ma ki manga na hitangimi, ma ki obania vi maneraha, ngaia ki tuguhia, i voravora re na kare vurivuri tangara na ani getera.

⁴⁵Suria o Karena Enoni nikâ ki pe râ me, hanana vi ge hagatagarahira na enoni. Ngaia ki râ me hete, hanana vi tagara tangara na enoni, ma ki meme, hanana i hagatahira rako na enoni.”

⁴⁶Ngaira ka ata me i hinua i Jeriko. Matena o Jesu ma na kariana ma na hakuta raha na enoni ka pania Jeriko, ta na mane, i guru na maana, ki ngani ki gâga i papana na tara. Na mane ngekê ki no Batimeo, o karena o Timeo. Ngaia ki nungi haga, suria i guru.

⁴⁷Matena i rongo, vi o Jesu ni Nasarete ki râ me, ngaia ki haganega ki ngerengere, ki vi: “Jesu! Karena o Tavite! Gu takiê!”

⁴⁸Na enoni rako ka ramonia, ma ka vi tanga ki muni. Ma ngaia ki ama ni ngerengere raha nga ma ki vivi: “Karena o Tavite! Gu takiê!”

⁴⁹O Jesu ki ura so i tara, ma ki vi: “Unia ke râ me.” Ngekana ngaira ka unia ki râ me na mane, i guru na maana ngekana. Ma ngaira ka vi tanga, ka vi: “U ramo! Ku aharaga! Ngaia ki unigo.”

⁵⁰Ngaia ki tasia na tuguni iana, ma ki asihura ki râ tanga o Jesu.

⁵¹O Jesu ki hagatea, ki vi: “Na ta kanigo obania, vi gê tanua tangago?” Na mane, i guru na maana, ki arami, ki vi: “Araha, inê kê obania vi ve bâbâ.”

⁵²O Jesu ki vi tanga, ki vi: “U arâ, gu rite aporo suria go tongesuriê.” Ki parama, ma karu marava aporo na maana, ma ki râ suria o Jesu i tara.