Read Kahua MAREKO 12 Bible Online

MAREKO 12 - Kahua bible

MAREKO 12

¹Mo Jesu ki tamasi maramaraveta tangara, ki vi: “Ta na mane ki hasia na mu ni vaini, ma ki panga rihia, ma ki oparia na kiru tanga na rusi i piringigi igê na guani na vaini, ma ki torea na bebetehe. Ma hemuri na enoni tagara ka taharia na mu ni vaini, ma na avanuna na mu ni vaini ki aporo igê na râha iana tanga i pasina.

²Ma na matena i mata na guani, ngaia ki hagatorangenia ta na kare vurivuri tangara na enoni ga tagara, hanana vi ga metongani renigi tani na vaini.

³Ma na enoni tagara ka ranguia, ma ka ramusia, ma ka hagatorangenia vê baguru.

⁴Me muri na avanuna na mu ni vaini ki hagatorangenia nikâ ta na kare vurivuri. Na enoni tagara ka tahurua na bêna, ma ka guharia ka hagamakia.

⁵Na avanuna na mu ni vaini ki hagatorangenia nikâ ta na kare vurivuri, ma ngaira ka nahuia ki me. Ma ngaira ka katora vikana nikâ rako na kare vurivuri getera: ga ramusira tani ma ka nahuira ka me tani.

⁶Na ani gi tage ma na kare kani hita so, hanana vi na avanuna na mu ni vaini ki girara vi hagatorangenia nikâ. Na ani ngekê ngaia ki no karena i takuia baraha. Hoita, ngaia ki hagatorangenia o karena ngekana tangara na enoni tagara. Ma ngaia ki vi, ‘Inê kê girara, vi ngaira ka page hanetasia o kareku.’

⁷Ma na mane tagara ngegana ka hetamatamasi, ka vi, ‘O karena o avanuna na mu ni vaini ngekana! Nika, ge nahuia ke me, ma ka page nahunia igia na mu ni vaini!’

⁸Tahema ngaira ka ranguia o karena ma ka nahuia ki me, ma ka kasia hura na gahuana tenia na mu ni vaini.”

⁹O Jesu ki hagate, ki vi: “Hoi, ta kani page katoa na avanuna na mu ni vaini? Ngaia ki page arâ me, ma ki page nahuira ka meme na mane ngegana, ma na ani getera na enoni tagara ka page taharia na mu ni vaini.

¹⁰Igamu kamu bani tomania noga na tarana ngekana igê nga na Buka Apuna! ‘Na u, ga kasia na mane, ga torea na ruma, renia vi pe koro, na u ngekê ki vora na rangata na hagêguringa.

¹¹Na Araha ki katoa tarana ngekana, ma ki bâkoro era!’”

¹²Na meraha iata na Siu ka uhungia, vi ga hagatotongoa o Jesu, renia ga girara, vi ngaia ki tamasi maramaraveta renira ngaira. Ma ngaira ka magutenira na enoni. Tahema ngaira ka pania so o Jesu ma ka hetake vê ka râ.

¹³Ma tani na Pariseo ma tani na kariana o Herote ka râ me, hanana vi ga uhungia o Jesu renigi na hagatenga.

¹⁴Ngaira ka râ me tanga, ka vi: “Araha, igami kami girara, vi igo ki mareha ngavê, vi gu hagahagaparu. Igo ko tamasi monari tare. Igo ki na mane haritagi, renia na parongamu ki tagenana ma tangara na ara ni enoni, ma ko visigi ma na marâ, God i obanira na enoni, vi ga katogi. Hoi, gu visia me: surigi na Ramata iaka i na Buka Apuna ki koro ma vari, vi ga vuria na takesi tanga na Gavumane i Roma se mareha? I tuguhigia, vi ga vurivuri takesi se mareha?”

¹⁵Mo Jesu ki girara na katokato iata, ma ki aramira, ki vi: “I hega mu uhungiê? Me na haga be bâsia!”

¹⁶Ngaira ka vatea na maana gi tage, ma ngaia ki hagatera, ki vi: “Na nununa ma na atana o ti kani ikê?” Ngaira ka arami, ka vi: “Na maneraha teha igê na gavumane.”

¹⁷Vikê o Jesu ki vi: “Hoi, mu vatea na maneraha teha igê na gavumane na anina, ma kamu vatea God na anina God.” Ma ngaira ka konetenia ngavê.

¹⁸Tani na Satuseo ka râ me tanga o Jesu. (Ngaira ki na enoni, ga vi, vi na enoni, ga me, ki asa, vi ge mêri aporo.)

¹⁹Ngaira ka vi tanga o Jesu, ka vi: “Araha, o Moise ki bani segea na ramata ikê tangagia, ki vi: ‘Manga vi na mane, ma ki meme tenia ngaia kaniana, ma ki mareha, vi garu apara kare, ki tuguhia o vesina, vi auragia kehana i nâ ngekê, hanana vi garu apara kare tanga na mane, i me.’

²⁰Manga vi o vahegoata gi pi. Na mane i nago ki êragi, ki pe apara kare, ma ki me.

²¹Me muri na ruata na mane ki êragia kehana i nâ ngekê, ma ngaia ki pe apara kare nikâ, ma ki me. I tagenana ma henia na oruta na mane,

²²ma henira heheuri na mane i murita. Ngaira hato o vahegoata gi pi ngegana ka êragia na gete ngekê, ka pe apara kare, ma ka me. Ma hemuri na gete ki me nogana.

²³Hoita, matena ga mauri aporo na enoni, ga me, igê na tangiana ni mêriha aporo, o ti na hitangita kani kaniana? Suria ngaira hato o hegoata gi pi kaniga êragia!”

²⁴O Jesu ki aramira, ki vi: “I bono na osumi! Mu bagatatako! Ma kamu girara vi manga i he? Renia igamu kamu pe girara na Buka Apuna, ma kamu pe girara God i raramohaga hunia.

²⁵Renia matena ga mauri aporo na enoni, ga me, ngaira ka mauri mangara na angero iana God, ma na mane ma na gete ki asa, vi ge êragi.

²⁶Hoi, renia na mauriha aporo: vari mu pe bani tomania na sihonga i na Buka iana o Moise renia na apinige, i noro? Renia i na buka ngekana God ki bani vi tanga igê o Moise, ki vi, ‘Inê na God iana o Abaramo, inê na God iana o Isako, minê na God iana o Jakobo.’

²⁷Tahema ngaia ki na God iata na enoni, ga mauri, mareha vê vi iata na enoni, ga me, suria na enoni ka pe meme su ngavê. Igamu na Satuseo, kamu tasi nga vê!”

²⁸Ta na mane ni hagesuringa ni rotu ki oga i ngekana, ma ki rongora, ga hetamasi. Ngaia ki rongoa o Jesu, i aramira bâkoro na Satuseo. Tahema ngaia ki râ me tanga o Jesu, ma ki hagatea, ki vi: “Na ramata ta ki teha?”

²⁹O Jesu ki vi: “Na ramata, i teha, ki manga ikê: ‘Rongo, igamu na Isiraelita! Na Araha, na God iaka, ki na Araha gi tage togo.

³⁰I tuguhigamu, vigamu takuia na Araha God iami igê na mêrihami hagenani.’

³¹Na ruata na ramata, i teha, ki manga ikê: ‘I tuguhigamu, vigamu takuira na tamani manga igamu maremi.’ I mareha ta na ramata getea, vi ge teharirerua na ramata gi rua ngegê.”

³²Na mane ni hagesuringa ni rotu ki vi tanga o Jesu, ki vi: “Go vi koro era, Araha! I monari manga go visia: na Araha ngaia getea ma ki God, ma ki mareha vê, vi ta na God getea.

³³Tahema ki tuguhia na enoni, vi takuia God igê na mêrihana hagenani, ma ki tuguhia, i takuia na tamana manga ngaia marena. Na enoni, i marupererua na ramata gi rua ngegê, ngaia ki koro teharia na enoni, i susu tanga God igê na bea ni vogasiha se i vogasia God.”

³⁴O Jesu ki girara, ngaia ki arami koro era, ma vikê ngaia ki vi tanga, ki vi: “Igo ko têa noga na Arahanga iana God.” Ma hemuri ki mareha ta na enoni, ge magu, vi ge hagatea nikâ o Jesu.

³⁵Matena o Jesu i hagesurira na enoni i Ruma ni Rotu, ngaia ki hagatera, ki vi: “Tanu hega na mane ni hagesuringa ni rotu kaniga visia, vi na Mesaia, i page voravora me, vi ngaia ki no karena o Tavite?

³⁶Na Higona Apu ki hagatakusia o Tavite, ki vi: ‘Na Araha ki vi tanga na Araha iaku, ki vi: Gu oga so heniê igê na atohaku, mataro me na matena gê nakara na merongamu i ruguhaterua na êgamu.’

³⁷O Tavite ngaia marena ki visia, vi Araha. Hoi, ma ki tanu hega na Mesaia kani girara i voravora vi na karena o Tavite?” Na hakuta raha na enoni ka vagevage, matena ga rongoa o Jesu i tamasi.

³⁸Matena i hagesurira, ngaia ki vi: “Mu hinarura na mane ni hagesuringa ni rotu. Renia ngaira ka tuguni renigi na tuguni borahu, ma ka arârâ, ma ka obanira na enoni getera, vi ge hanetasira igê na mahera.

³⁹Ngaira ka obania, viga gâga igê na atohata na maneraha i ruma ni sukuru, ma ka obania, vi ga gâga igê na atohata na maneraha igê na matena ni ngêra.

⁴⁰Ngaira ka hagabekara na gete, ga nâ, ma ka hanagogi na nahuninga iata. Ma hemuri igê na nunginungiha borahu iata ngaira ka hagaparu ma! Ngaira ka page hatamia ngavê na mamasiaganiha.”

⁴¹Matena o Jesu i oga so hagarangia na agua ga hakuhaku haga igê i na Ruma ni Rotu, ngaia ki boretenira na enoni, ga hakuhaku haga tanga na rotu. Rako na enoni ruruguha ka kasi na haga raha i rarona na bokesi.

⁴²Ma ki râ me nikâ na gete na nâ, i matareha, ma ngaia ki kasia na kere haga sisite ma i rarona na bokesi: na senti gi rua ma vari.

⁴³O Jesu ki unira me haku na kariana, ma ki vi tangara, ki vi: “Bâsia! Na nâ matareha ikê ki kasia i rarona na bokesi na haga, i raha teharigi na haga iata na enoni getera.

⁴⁴Renia na enoni getera ka nahunigi bâraha na haga, ma ngaira ka kasi i na bokesi tani na haga, na ani ga pe obanigi tangara mareta, vi ge ngêngê renigi. Ma kamu bâsia na nâ ikê. Ngaia ki matareha ngavê. Henaka ma ngaia ki kasi hato ngavê na haga iana, na haga i obania, vi ngêngê renigi.”