Read Kahua MAREKO 15 Bible Online

MAREKO 15 - Kahua bible

MAREKO 15

¹Igê na mahogotana na mane ni vogasiha ga teha, na meraha, ma na Kaunselo hagenani, ma na mane ni hagesuringa ni rotu ka hatani haku me ka hekarigi. Ngaira ka rakua o Jesu renia na seni, ma ka torea râ, ka tagarenia tanga o Pilato.

²O Pilato ki hagatea, ki vi: “Igo vari nga na Araha raha iata na Siu?” O Jesu ki arami, ki vi: “Manga go visia.”

³Na mane ni vogasiha ga teha ka tuguria o Jesu renigi rako na mara.

⁴Vikê o Pilato ki hagatea nikâ, ki vi: “I asa iamu, vi gu aramira? Bâ, ngaira ka tugurigo renigi rako na marâ!”

⁵Nikâ o Jesu ki usi, vi ge tamasi, mo Pilato ki konekone bâraha.

⁶Igê na ara ni Tangiana Raha na Paseka o Pilato ki rupasia tare tenia na ruma ni hagaitangiha na anima na mane, na enoni ga obania.

⁷I na matena ngekana ta na mane, o Baraba na atana, ki oga i ruma ni hagaitangiha. Ngaia ma na tamana ka nahu enoni, matena ga urapusia na gavumane.

⁸Bevoana ga haku me na enoni, ngaira ka nungia o Pilato, vi rupasia ta na mane pania na ruma ni hagaitangiha.

⁹O Pilato ki hagatera, ki vi: “Igamu kamu obania vari, vi gê rupasia tangagamu na Araha raha iata na Siu?”

¹⁰Ngaia ki bani girara bâkoro, vi na mane ni vogasiha ga teha ka tagarenia o Jesu tanga, suria ngaira ka hengari.

¹¹Ma na mane ni vogasiha ga teha ka vi tangara na enoni, ka naka vê o Jesu, ma ka nungia o Pilato, vi rupasia o Baraba tangara.

¹²O Pilato ki tamasi nikâ tangara na enoni, ki vi: “Na ta kanimu obania, vi gê katoa tanga na ani mu hêtana, vi na Araha raha iata na Siu?”

¹³Ngaira ka ngiria bê aporo, ka vi: “Rapusia igê na kuruse!”

¹⁴O Pilato ki hagatera, ki vi: “Na tarana era ta kani erasia?” Ngaira ka ngerengere ramo, ka vivi: “Rapusia igê na kuruse!”

¹⁵O Pilato ki obania, vi hagakoro obata na enoni, tahema ngaia ki rupasia o Baraba tangara. Ma hemuri ngaia ki bonasira na mane ni me, ka ramusia o Jesu, ma ka rapusia igê na kuruse.

¹⁶Na mane ni me ka mebanu o Jesu igê na beraro i ruma. (Ngaia ki na ruma raha iana na Gavumane.) Ma na mane ni me ka unira haku me na tamata.

¹⁷Ngaira ka aruha o Jesu renia na gahu rotorotoaga memera, ma ka hêria na mahe renigi na varo kakaruga, ma ka bagia i bêna.

¹⁸Ma ngaira ka kasi rurunga huria, ka vi: “Mauru koro, Araha raha iata na Siu!”

¹⁹Ma ngaira ka tahurua na bêna renia na apinige, ka musuria, ka susure i maana ma ka bêtuhia.

²⁰Matena ga memarabe hato, ngaira ka tasia na gahu rotorotoaga memera, ma ka hagatugunia aporo renigi na anina marena. Ma hemuri ngaira ka mehura, hanana ga rapusia igê na kuruse.

²¹I tara ngaira ka tarahua igê ta na mane, o Simone na atana, i aporo me i hinua raha tenia na bemu, ma ngaira ka tuguria, ki torea na kuruse iana o Jesu. (Na mane ngekê ki no Simone ni Sairini, o vaematerua o Alesanta mo Rupo.)

²²Ngaira ka merâ o Jesu tanga na agua, ga visia vi Gologota, i vi “Na Agua ni Ratana Bê”.

²³I ngekana ngaira ka uhungia, vi ga hagatonomia renia na vaini, ga toraria henia na rauga na mira, mo Jesu ki usi, vi ge tonomia.

²⁴Hemuri ngaira ka rapusia igê na kuruse, ma ka pile taisi renigi na gahu iana, hanana vi ga girara, vi o ti kani page nahunia tani na gahu.

²⁵I ahakê na arito, matena ga rapusia igê na kuruse.

²⁶Ngaira ka segea na marâ, ga tuguria renia, ga sege ka vi: “Na Araha raha iata na Siu.”

²⁷Ngaira ka rapusirerua nikâ na manero gi rua, na ani i otona ma na ani i mahana o Jesu.

²⁸Vikana ngaira ka hagamonaria na marâ na Buka Apuna i bani visia, ki vi: “Ga tomania henira na manero.”

²⁹Na enoni, ga hetaratarari, ka babaringe ma ka guharia o Jesu, ka vi: “Se vego! Igo ko bani visia, vi go hogea na Ruma ni Rotu ma ko torea aporo surigi na tangiani gi oru!

³⁰Hoi, gu so me tenia na kuruse ma ko hagatahigo maremu!”

³¹Ma ngaira nogata na mane ni vogasiha ga teha ma na mane ni hagesuringa ni rotu ka memarabe o Jesu, ka hetamatamasi, ka vi: “Ngaia ki hagatahira na ani getera, ma ngaia so marena ki asa.

³²Ge bâsia na Mesaia, na Araha raha iata na Isiraelita, i soso me tenia na kuruse i ngekê, ma ka kahu tongesuria!” Ma na manero gi rua, ga rapusirerua henia o Jesu, ngairerua nikâ karu guharia o Jesu.

³³Igê na ritovagana ki roto na agua hagenani, mataro me ki pane na arito.

³⁴Igê na panehagana na arito o Jesu ki ngere raha, ki vi: “Eloi, Eloi, lema sabakatani?” i vi, “God iaku, God iaku, hega go paniê?”

³⁵Tani na enoni i ngekana ka rongoa ma ka vi: “Rongo, ngaia ki unia o Elia!”

³⁶Ta na hitangita ki metango râ na rumurumu, ki anumia igê na vaini, ma ki naka igê na bogona na apinige. Ma hemuri ngaia ki tagarenia akê, hanana vi hagatonomia o Jesu renia, ma ki vi: “Naka, ke bâ, o Elia vari ki arâ me ki torea vato tenia na kuruse!”

³⁷O Jesu ki ngere raha ma ki me.

³⁸Na gahu raha, i kuku i Ruma ni Rotu, ki tatari hagenani i gupu.

³⁹Na araha iata na mane ni me, i ura i ngekana, ki maturia na kuruse, ma ki bâsia, manga hanana o Jesu i ngere raha ma ki me. Ngaia ki vi: “I monari, na mane ngekê ki no Karena God.”

⁴⁰Tani na gete, ga oga i ngekana, ka ura hagatê, ma ka bâbâ me. I berarogata ka oga ka Salome, ka Maria Matalena, ma ka Maria na kenaterua o Jakobo sisite mo Jose.

⁴¹Ngaira ka takua o Jesu, matena i gâga i Galilea, ma ka tamania. I ngekana ka rako nikâ igê na gete, ga râ me henia tanga Jerusaleme.

⁴²I bungi noga, matena o Josepo i Arimatea ki ata me.

⁴³Ngaia ki na mane, ga hanetasia igê na Kaunselo. Ngaia ki naasia na Arahanga iana God. I ngekana ki na tangiana, ga tatêha igê. (Ngaia ki na tangiana i nago tarana na Tangiana ni Mamaroha.) Vikê o Josepo ki pe magu ma ki râ i pasina o Pilato ki nungia na gahuana o Jesu.

⁴⁴O Pilato ki kone, renia i rongoa, vi o Jesu ki bani me. Ngaia ki unia me na araha iata na mane ni me, ma ki hagatea, manga vi o Jesu ki bani me.

⁴⁵Matena i rongoa hato na tamasinga iana na araha iata na mane ni me, o Pilato ki vi tanga o Josepo, ki torea na gahuana o Jesu.

⁴⁶O Josepo ki vuria na gahu siki, ki torea vato na gahuana o Jesu, ki baraia renia na gahu siki ma ki naka igê na vaba, ga bani karua igê na hê. Hemuri ngaia ki purisia na hê raha ma ki purusia renia na maana na vaba.

⁴⁷Ka Maria Matalena ma ka Maria na kenana o Jose karu bore suria, ma karu bâsia na agua, o Josepo i bagia igê na gahuana o Jesu.