Read Kahua MAREKO 16 Bible Online

MAREKO 16 - Kahua bible

MAREKO 16

¹Matena ki hato na Tangiana ni Mamaroha, ka Maria Matalena, ma ka Maria kenana o Jakobo, ma ka Salome ka vurigi na rauga, i sigini koro, ma na marâ manga na suru, hanana vi ga arâ ma ka monea na gahuana o Jesu renigi.

²Igê na mahogotana na Sate, matena i raboa me na arito, ngaira ka râ tanga na vaba, ga bagia igê o Jesu.

³Matena ga arâ, ngaira ka hetamatamasi, ka vi: “O ti kani page purisia râ na hê tenia na maana na vaba tangagia?”

⁴(Ngaia ki na apena bagahê raha.) Ma ngaira ka ahaukê ma ka rigia na hê, ga bani purisia râ.

⁵Ngekana ngaira ka banu igê na vaba, ma i rarona ngaira ka bâsia igê ta na mane haoru, i oga i na apanena i otota, i tuguni renia na tuguni siki. Ma ngaira ka gasuga renia.

⁶Ma ngaia ki vi: “Siana kamu gasuga. Igamu kamu râ me, hanana vi gamu bâsia o Jesu i Nasarete, ga bani rapusia igê na kuruse. Ma ngaia ki mareha ikê. Ngaia ki bani mêri aporo! Bâ, na agua, ga bani naka igê kani ikê.

⁷Hoita, mu râ ma kamu torea na taroha ngekê tangara o Petero ma na tamana, kamu vivi, ‘Ngaia ki nanago tarami i Galilea. I ngekana igamu kamu page bâsia igê, manga i bani vi tangagamu.’”

⁸Vikana ngaira ka hura vê ma ka gava pania na vaba, renia ga magu ma ki tata na apeta. Ma ngaira ka pe hagarongoa rârâ ta na enoni, suria ngaira ka magu.

⁹[I murina i mêri aporo o Jesu, igê na mahogotana na Sate, ngaia ki vora me hagenago tanga ka Maria Matalena. Ngaia ki bani paira na ataro era gi pi tenia na gete ngekê.

¹⁰Ka Maria Matalena ki râ ma ki hagarongora na kariana o Jesu renia. Ngaira ka angisia ma ki rugu na obata.

¹¹Ma na matena ga rongoa, vi ngaia ki bâsia o Jesu i mêri, ngaira ka pe tongesuria.

¹²Me muri o Jesu ki vora riariaga tangarerua na kariana gi rua, matena garu râ i bemu.

¹³Ngairerua karu aporo ma karu hagarongora na tamaterua, ma ngaira ka pe tongesuria.

¹⁴Ma hemuri tatare o Jesu ki vora me tangara na kariana tangahuru matara gi tage, matena ga ngêngê. Ngaia ki ramonira, suria ngaira ka pe tongesuri, ma suria ngaira ka usi, vi ge tongesurira na enoni, ga bâsia, vi ngaia ki mêri aporo.

¹⁵Ngaia ki vi tangara, ki vi: “Mu arâ i maveta hagenani, ma kamu ateate renia na Taroha Koro tangara na ara ni enoni hato.

¹⁶I page tahi na enoni, i tongesuri ma ki batesimo; ma ka page suria hagaitangia na enoni, i pe tongesuri.

¹⁷Na enoni, ga tongesuri, ka page girara ga katogi na mena ngegê: ngaira ka page paira na ataro era igê na raramohaku; ngaira ka page tamasi renigi na tamasinga, ga râ hehegitigi;

¹⁸manga ga taua na ma, se ga tonomia ta na marâ, i girara i meme renia na enoni, ki asa iata, vi ge page ape era renia; ngaira ka page têtêbuhira na enoni, ga maeha, ka komaga.”

¹⁹Matena na Araha o Jesu i meratamasi hato, ngaia ki aporo i pasina God, ma ki oga so henia igê na atohana.

²⁰Na kariana ka râ ma ka ateate igê na ara ni agua, ma na Araha ki tamanira, ma ki hagatanga monari renia na ateateha iata, suria i vatera na ramoha, hanana ga katogi na mena.] TANI NIKÃ, NA HAGAHATONGINA NA TAROHA KORO SURIA O MAREKO [Na gete ka râ tangara o Petero ma na tamana, ma ka ata barobaro renia na taroha, i bani visia tangara na mane haoru. Ma hemuri ngaia marena o Jesu ki hagatorangenira na kariana, ka ateate i na ara ni agua hato renia na Taroha Koro, i monari tare; ngaia ki na taroha na vuripusiata na enoni, i vatera na mauriha mora ma tarema.]