Read Kahua MAREKO 2 Bible Online

MAREKO 2 - Kahua bible

MAREKO 2

¹I murini na kere tangiani pe rako o Jesu ki aporo râ i Kapenamu, ma na enoni ka rongo tarohana, vi ngaia ki oga i hinua ngekana.

²Ma ka haku me na enoni, ga rako era, ma ngekana ki mareha ta na agua tangara, ma ki vunu nikâ na metara i maa ni ruma. Mo Jesu ki ateate renia na taroha tangara.

³Ma tani na enoni ka râ me, ga tugia me na mane, i meapeape, vi ga merâ tanga o Jesu; ga tugi na vere he.

⁴Ma suria ga vunu era na enoni, tahema i bara tangara, vi ge merâ tanga o Jesu. Vikana ngaira ka tahakurua vato na gerina na ruma i avorana o Jesu. Matena ga tahakurua hato, ngaira ka kunia vato na mane henia na bea, i tâ igê.

⁵O Jesu ki rigia na tongesuriha raha iata, ma ki vi tanga na mane, i meapeape, ki vi: “Goaku, na tasi iamu inê kê bani bonotenigi.”

⁶Ma i ngekana ka oga igê tani na mane ni hagesuringa ni rotu. Ngaira ka tako munimuni i obata, ka vi:

⁷“Tanu hega kani tamasi erasia God? I asa ta na enoni, vi ge girara ge bonotenigi na tasi, nga noga ma God!”

⁸O Jesu ki giraragi ototo râ na parongata, ma tahema ngaia ki hagatera, ki vi: “Tanu hega mu takusia na tarana vikana?

⁹I mataku vari, vi gê vi tanga na mane, i meapeape ngekê, kê vivi, ‘Na tasi iamu inê kê bani bonotenigi,’ se kê vivi ‘Gu aharaga, ku tavoa na banamu ma ku râ’?

¹⁰Hoita, inê kê hagatanga monari tangagamu, renia vi o Karena Enoni ki tonga na raramohana i maveta, hanana i girara i bonotenigi na tasi.” Ngekana ngaia ki vi tanga na mane, i meapeape, ki vi:

¹¹“Be vi tangago: gu aharaga, ku tavoa na banamu ma ku râ i pasimu!”

¹²Matena ngaira hato ka boretenia na mane, ma ngaia ki aharaga, ki tavoa na banana ma ki hagasusu vi arâ. Ngaira hato ka konekone bâraha, ma ka visia raha God, ka vi: “Igia ka pe bâsia rârâ noga na tarana manga i ngekê!”

¹³O Jesu ki aporo râ nikâ tanga na one igê na Rano i Galilea. Rako era na enoni ga râ tanga, ma ngaia ki haganega ki hagesurira.

¹⁴Ma na matena i arârâ, ngaia ki bâsia ta na mane ni tora takesi, na atana ki no Levi, karena o Alapeo. Ngaia ki oga i ruma ni tagaraniha iana. O Jesu ki vi tanga, ki vi: “U takuê!” O Levi ki aharaga ma ki takua.

¹⁵Ma hemuri o Jesu ki ngêngê i pasina o Levi. Ma ka rako na mane ni tora takesi ma na enoni, ga aharê igê na ramata, ka râ suria o Jesu, ma tani ka ngê henira o Jesu ma na kariana.

¹⁶Tani na mane ni hagesuringa ni rotu ngaira ka na Pariseo ngaira ka bâsia o Jesu, i ngêngê henira na enoni, ga aharê igê na ramata, ma henira na mane ni tora takesi. Vikana ngaira ka hagatera na kariana, ka vi: “Tanu hega ngaia kani ngêngê henira na mane ni tora takesi ma na enoni, ga aharê igê na ramata?”

¹⁷O Jesu ki rongo ma ki arami, ki vi: “Na enoni, ga ape koro, ka pe naasia na toketa, nga noga ma hete na enoni, ga maeha, kaniga naasia na toketa. Inê kê pe râ me be unira na enoni, ga pe aharê igê na ramata, ma kê râ me hete tangara ma na enoni, ga aharê igê na ramata.”

¹⁸Ta na tangiana na kariana o Joane Batisita ma na Pariseo ka hari. Tani na enoni ka râ tanga o Jesu ma ka hagatea, ka vi: “Tanu hega na kariana o Joane Batisita ma na kariata na Pariseo kaniga harihari, ma na kariamu igo ki mareha?”

¹⁹O Jesu ki arami, ki vi: “Igamu kamu takusia vari, vi na enoni, ga goga igê na ngêra na hagataku ka harihari? I asa vê! I asa iata, vi ge kato vikana, matena i oga henira na mane i êragi haoru.

²⁰Ma ki page arâ me na matena, ga page merâ vê igê na mane i êragi haoru panira, ma igê na tangiana ngekana ngaira ka kahu harihari igê.

²¹“I asa ta na enoni, vi ge aba i na bani tuguni renia na tarisigana, i mamênga vige herugirugi. Manga i katoa vikana, na tarisigana, i mamênga vige herugirugi, ki tarisia tagua na bani tuguni, ma na tuguni ki tatari raha.

²²Ma nikâ, i asa ta na enoni, vi ge karangia na vaini haoru i raroni na bani anga na gavota na puruka. Manga i katoa vikana, na anga ka page raboa renia na vaini, ma na vaini ma na anga ka page era. Naka vê! Na anga haoru tanga na vaini haoru!”

²³Ta na Tangiana ni Mamaroha o Jesu ki barebare suria na tara i gupuna na mu ni koni. Ma na kariana ka takua, ma ngaira ka haganega ka husi na guani na koni.

²⁴Ngekana ngaira na Pariseo ka vi tanga o Jesu, ka vi: “Bâ, ngaira na kariamu ka husi na koni igê na Tangiana ni Mamaroha! Na tarana ngekana ki apu, suria na Ramata iaka i na Buka Apuna ki manimania!”

²⁵O Jesu ki aramira, ki vi: “I hega? Mu pe bani tomania vari na tamasinga renia na tarana, i tanua o Tavite, matena i hato na ngêra tenia? Ngaia ma na kariana ka magê.

²⁶Tahema ngaia ki banu i na ruma iana God, ma ki ngêa na bereti, ga bagia tanga God. Na tarana ngekê ki vora me, matena o Abiatare ki mane ni vogasiha i teha. Suria na Ramata iaka i na Buka Apuna, nga noga ma na mane ni vogasiha kaniga girara ga ngaua na bereti ngekana. Ma o Tavite ki ngêa ma ki vatera nikâ na kariana.”

²⁷Mo Jesu ki vi: “God ki hagavora na Tangiana ni Mamaroha tanga na korohata na enoni, ma ki pe hagavorara na enoni tanga na korohana na Tangiana ni Mamaroha.

²⁸Vikana o Karena Enoni ki araha tanga na Tangiana ni Mamaroha nikâ.”