Read Kahua MAREKO 3 Bible Online

MAREKO 3 - Kahua bible

MAREKO 3

¹Mo Jesu ki aporo banu i ruma ni sukuru. Ma i ngekana ki oga igê ta na mane, i tavi na rimana.

²Tani na enoni, ga oga i ngekana, ka obania, vi ga ramonia o Jesu, manga ngaia ma ki katoa ta na marâ, i pe koro. Tahema ngaira ka ono rapurapu renia, hanana vi ga bâsia, manga vi hagakomaga ta na enoni igê na Tangiana ni Mamaroha se mareha.

³O Jesu ki vi tanga na mane, i tavi na rimana, ki vi: “Râ me ikê, i maata na enoni.”

⁴Ma ngaia ki hagatera na enoni, ki vi: “Na ta kani hagamarumungenigi na Ramata iaka i na Buka Apuna tangagia, hanana vi ga katogi igê na Tangiana ni Mamaroha? Ga tamanira na enoni se ga hagaerasira na enoni? Ga hagatahia na mêrihana na enoni se ga hagamesia na enoni?” Ma ngaira ka muni ma.

⁵O Jesu ki mangariaga, ki bâ tatarê renira, ma ki takira nikâ, renia ngaira ka togeaga ma na parongata ki pe koro. Ma ngaia ki vi tanga na mane, ki vi: “Gu otoa na rimamu!” Ngaia ki otoa na rimana, ma ki koro aporo.

⁶Ngekana ngaira na Pariseo ka hura vê tenia na ruma ni sukuru, ma ka oto râ nga ka hetamatamasi henira tani na mane na haku iana o Herote. Ma ngaira ka harikato renia, vi ga nanahuia o Jesu.

⁷O Jesu ma na kariana ka râ vê tanga na Rano i Galilea, ma na hakuta raha na enoni ka râ suria. Ngaira na enoni ngegê ka râ me tenigi na hinua i Galilea, i Jutea,

⁸tenia i Jerusaleme, tenia na apanena i Itumea, tenia na apanena harê na ve i Jotano, ma tenigi tani na hinua hagarangirerua na hinua raha i Taire me Sitone. Na hakuta raha ngekê ki râ me tanga o Jesu, renia ga bani rongo tarohana renigi na tarani, i katogi.

⁹Renia na hakuta ki raha teha, o Jesu ki vi tangara na kariana, ka ragea na bêta ki nanê tanga, hanana vi siana na enoni, ke toratorangia, suria ga hebungi bâraha.

¹⁰Ngaia ki bani hagakomagara rako na enoni, ma ngaira hato na enoni, ga maeha, ka heuha me tanga, hanana vi ga hataria.

¹¹Ma i na ara ni matena na enoni ma, ga atataroga, ka bâsia o Jesu, ngaira ka votavota so i maana, ma ka ngerengere raha, ka vivi: “Igo ki no Karena God!”

¹²Mo Jesu ki hagapêpura na ataro era, ki vi: “Siana kamu visia vi o ti kani inê.”

¹³Mo Jesu ki akê igê na kere hungana, ma ki unira me na mane, i obanira. Ma ngaira ka râ me tanga.

¹⁴Ma ngaia ki atera na tangahuru gi tage matarerua, ma ki hêtata vi na aposotolo. Ngaia ki vi tangara, ki vi: “Hoi, inê kê ategamu, hanana mu goga heniê; ma nikâ inê be hagatorangenigamu, kamu ateate,

¹⁵ma kamu page tongatonga renia na ramoha, hanana mu girara mu paira na ataro.”

¹⁶Na mane tangahuru gi tage matarerua, i atera kani igê: o Simone (o Jesu ki hêtana renia vi o Petero);

¹⁷vahegoana o Jakobo mo Joane, ngairerua na karena o Sebeteo (o Jesu ki hagatanirerua vi Boaneregesi, na girarana na tamasinga ngekê ki vi “Mane ni Akuruha”);

¹⁸o Anterea, o Pilipo, o Batolomeo, o Mateo, o Toma, o Jakobo, ngaia na karena o Alapeo, o Tateo, mo Simone, na mane ramo,

¹⁹mo Juta Isikariote, va ani i hagavuringenia o Jesu.

²⁰Mo Jesu ki aporo i pasina. Ma ta na hakuta raha na enoni ka hakuria me nikâ. Ngekana ki bara tangara o Jesu ma na kariana, vi ge ngê.

²¹Matena na goana o Jesu ka rongoa na tarana ngekana, ngaira ka râ, hanana vi ga merâ tenira, suria na enoni ka vi, vi, “Ngaia ki bekabeka!”

²²Tani na mane ni hagesuringa ni rotu ka râ me tenia i Jerusaleme, ka vi: “Belesebulu, na ataro, kani angaria!” Ma tani ka vi: “Suria na araha iata na ataro ki tamania, tahema kani girara i paira na ataro.”

²³Ngekana o Jesu ki unira me na enoni, ma ki tamasi maramaraveta tangara, ki vi: “Manga i he Satana ki girara vi paia marena?

²⁴Manga na agua, ma ki hevoavoa so marena ma ki heariha tare, na agua akana ki asa, vi ge ramo i hemuri.

²⁵Manga na ahemata, ma ki hevoavoa so marena ma ki heariha tare, na ahemata ngekana ki asa, vi ge ramo hemuri.

²⁶Tahema manga vi na arahanga iana Satana ma ki voasia so marena, na ramoha iana ki asa, vi ge oga tare, ma ngaia ki asa vige ramo ma ki page hato râ ma.

²⁷“I asa ta na enoni, vi ge girara ge hogea banu na ruma iana na mane ramo, hanana vige hanagogi na nahuninga iana. Manga i obania, ngaia ki rakua i nago na mane ramo, ma hemuri ma ki kahu girara i hanago tenia na ruma.

²⁸“Hoita, rongo! God ki girara i bonotenigi na tasi hato iata na enoni ma na tamasinga era hato iata, henaka viga visigi akê hagarako.

²⁹Ma na enoni, i tamasi erasia na Higona Apu, God ki asa hagetage, vi ge page bonotenia na tasi iana, renia na tasi ngekana ki goga tare ma tarema.”

³⁰(O Jesu ki vi vikana, suria tani na enoni ka vi, vi, “Ngaia ki atataroga.”)

³¹Ma kenana ma na goana o Jesu ka ata me. Ngaira ka ura i metara na ruma, ma ka kasi tamasinga banu tanga, vi arâ me i pasita.

³²Na hakuta na enoni, ga oga so rihia o Jesu, ka hagarongoa, ka vi: “Vego, kenamu ma na goamu kaniga goga i metara ma ka obanigo.”

³³O Jesu ki aramira, ki vi: “Ti kenaku? Ti na goaku?”

³⁴Ngaia ki bâ tatarê renira na enoni, ga oga so rihia, ma ki vi: “Bâ, ngaira igê kenaku ma na goaku!

³⁵Suria manga na enoni, ma ki katoa na marâ, God i bonasia renia, ngaia nga ki na goaku ma kenaku.”