Read Kahua MAREKO 6 Bible Online

MAREKO 6 - Kahua bible

MAREKO 6

¹O Jesu ki pania na hinua ngekana, ma ki aporo i pasina, ma na kariana ka takua.

²Igê na Tangiana ni Mamaroha ngaia ki haganega ki hagesurira na enoni igê na ruma ni sukuru. Ga rako teha vê na enoni i ngekana, ma na matena ga rongoa, ngaira ka kone. Ngaira ka vi: “I he ki tarahugi igê na giraraha ngegana? O ti kani vatea renigi na takotako ga mataha mangagi ngegana? I katogi hega ka na mena?

³Ga pe bani girara vari? Ngaia ki na mane, i totora ruma, o karena ka Maria, ma na goana o Jakobo mo Jose mo Juta mo Simone. Ga pe bani girara vari? Ka goana kaniga gâga ikê.” Tahema ngaira ka usitenia.

⁴O Jesu ki vi tangara, ki vi: “Na poropete ngaia ki no vani, ga hanetasia i na ara ni hinua, nga noga ma na enoni i pasina ma na raraha iana ma na goana ga pe hanetasia.”

⁵Ngaia ki bara, vi ge katogi nikâ tani na mena i ngekana, nga noga ma tani na enoni, ga maeha, ngaia ki têbuhira ma ki hagakomagara.

⁶Ngaia ki konetenira bâraha, renia ga pe tongesuria. Mo Jesu ki râhigi na ara ni hinua i ngegana, ma ki hagesurira igê na enoni.

⁷Ngaia ki unira haku me na kariana tangahuru matarerua, ma ki hagatorangenira na vererua ma garu arâ haku. Ngaia ki vatera na ramoha, ga girara ga paira no ataro era.

⁸Ngaia ki bonasira, ki vi: “Igê na râha iami siana kamu totora henigamu na ngêra, se vi na anga, se vi na haga i na anga iami, nga noga ma na vato mu totora.

⁹Mu buti, ma siana kamu tuguni harigapi re na tuguni gi rua.”

¹⁰Ngaia ki vi tangara nikâ, ki vi: “Matena mu atata vê i hinua, mu gâga henira na enoni, ga unigamu banu i pasita, mataro me kamu kahu arâ pania na hinua ngekana.

¹¹Manga mu atata vê igê na hinua, ma na enoni i ngekana ka pe unigamu bani, se ga usi, vi ge rongoa na ateateha iami, mu arâ nga pania na hinua ngekana, ma kamu kangigi na mako i êgami. Vikana ngaira ka girara, vi pe koro na parongata.”

¹²Vikana ngaira ka râ, ma ka ateate tangara na enoni, hanana ga urusigi na parongata tenigi na tasi.

¹³Ngaira ka paira rako na ataro era, ma ka monera rako na enoni, ga maeha, ma ka hagakomagara.

¹⁴Hoita, na maneraha o Herote ki rongogi na tamasinga renia o Jesu, suria na tamasinga renia o Jesu ki râhigi na ara ni hinua. Tani na enoni ka vi: “O Joane Batisita ki mêri aporo! Tahema ngaia ki katogi na mena!”

¹⁵Ma tani ka vi, vi ngaia ki no Elia. Nikâ tani ka vi, vi ngaia ki na poropete, na hitangita na poropete i nago.

¹⁶Matena o Herote ki rongo vikana, ngaia ki vi: “O Joane Batisita ngekana! Gê bani bonasia na mane ni me iaku, ki bani rete nguria na bêna. Ngaia kani mêri aporo nge!”

¹⁷Ngaia marena o Herote ki bonasira na mane ni me iana, ka rakua ma ka hagatotongoa i ruma ni hagaitangiha. O Herote ki kato vikana, suria ngaia ki rêa ka Herotia kehana, na gete iana o Pilipo.

¹⁸O Joane Batisita ki ama ni vi tanga nga o Herote, ki vi: “Ikana ki mareha vi ge oto tangago, vi gu gâga henia kehamu.”

¹⁹Tahema ka Herotia ki mangariaga baraha tanga o Joane, ma ki rapasia, vi nahuia ki meme, ma ki asa suria o Herote.

²⁰O Herote ki magutenia o Joane, renia ngaia ki bani girara, vi o Joane ki na mane koro ma ki oto na parongana. Tahema ngaia ki anumasia. Ngaia ki obania, vi rongoa, henaka i hata era na obana ma i na ara ni bevoana ki rongoa.

²¹Hoita, i ngekê ki na matena iana ka Herotia. Na tangiana ki na tangiana iana o Herote i vora igê, ma ki magoto tangara na enoni raha igê na gavumane ma tangara na maneraha igê na henahuita ma tangara na maneraha ni hinua i Galilea.

²²Ka karena ka Herotia ki banu me ma ki mâ, ma ki hagakoro obata o Herote ma na kariana. Ngekana o Herote ki vi tanga na kere gete, ki vi: “Na ta kanigo obania? Inê page vatego na ani mavê na marâ, go obania.”

²³Ngaia ki tohe gatagata, ki vi: “Inê kê surua, vigê vatego nga na ani mavê na marâ, go obania. Manga vigu nungia teniê ta apanena na apanena iaku, ma be girara ve vatego.”

²⁴Vikana na kere gete ki hura vê, ma ki hagatea kenana, ki vi: “Na ta kani ve nungia?” Ngaia ki arami, ki vi: “Na bêna o Joane Batisita.”

²⁵Ki parama na kere gete, ma ki hatani aporo râ tanga o Herote, ma ki nungia, ki vi: “Inê kê obania, go vateê nga i ngekê na bêna o Joane Batisita igê ma apira.”

²⁶Henaka o Herote ki hata era nga me renia na tarana ngekana, ma ngaia ki asa, vi ge manimania, renia i bani tohe gatagata i maata na enoni hato.

²⁷Tahema ngaia ki hagatorangenia ototo râ nga ta na mane ni me iana, ki torea me na bêna o Joane. Na mane ni me ki hura vê, ki râ i ruma ni hagaitangiha, ma ki rete nguria râ na bêna o Joane,

²⁸ma ki torea igê na apira ki me banu, ma ki vatea na kere gete, ma na kere gete ki vatea kenana.

²⁹Matena ga rongo na kariana o Joane, ngaira ka râ me, ma ka torea na gahua ka naka.

³⁰Ngaira na aposotolo ka aporo me i pasina o Jesu, ma ka hagarongoa renigi na tagaraha, ga tanugi.

³¹O Jesu ma na kariana ka pe nahunia na matena hanana vi ge ngê igê, suria ga rako teha ngavê na enoni, ga heheuri me i pasita. Ngekana ngaia ki vi tangara, ki vi: “Nika, ge râ getegia i ta na agua panira na enoni, hanana mu girara mu mamaro sisite.”

³²Vikê ngaira ka tage getera igê na kere haka, ma ka râ tanga na agua, i hihirunga.

³³Ma ka rako na enoni, ga bâsira râ ga râ, ma ka bâgirarara nga. Tahema ngaira ka panigi na hinua hato iata ma ka tango hagenago i tara, ma ka ata i nago igê na agua, vi ga gotogoto igê o Jesu ma na kariana.

³⁴Matena o Jesu ki so tenia na kere haka, ngaia ki bâsia na hakuta raha na enoni i ngekana, ma ki takuira bâraha i obana, renia ga bâ mangara na sipi, ga mareha na avanuta, vi ge marupera. Tahema ngaia ki haganega ki hagesurira renigi rako na marâ.

³⁵Bevoana i pane na arito, na kariana ka râ me tanga o Jesu, ma ka vi: “Na arito ki susu noga ma na agua ikê ki asa, vi ge tarahua igê na ngêra.

³⁶Nakara vê na enoni, ke râ tange na ruma ma na hinua hagarangi hanana ge vuri mareta na ngêra.”

³⁷O Jesu ki arami, ki vi: “Igamu maremi mu vatera na ngêra.” Ngaira ka hagatea ka vi: “Igo ko obania vari, vi gami arâ kami kasikasi na haga i rakorako ngavê na ararina na mena na tagaraha igê na hageha gi varu, hanana mi vurivuri na bereti renigi tangara tani na rehagaro na enoni, ka ngêngê?”

³⁸Ngekana o Jesu ki hagatera, ki vi: “Na bereti gi hita kanimu nahunigi? Mu râ kamu bâ.” Matena ga râ ka bâ hato, ngaira ka hagarongoa, ka vi: “Na bereti gi rima ma na siare gi rua nikâ.”

³⁹Mo Jesu ki vi tangara na kariana, ka voavoasira na enoni hato, ka oga hehegitigi, ma ka oga so igê na go.

⁴⁰Vikana na enoni ka oga harahara na anie na me ma na anie, tani na me ka tangarê gi tage ma tani na me ka tangahuru gi rima.

⁴¹Mo Jesu ki têgi na bereti gi rima ma na siare gi rua, ki atakê, ma ki rahesia God. Ngaia ki pipigi na bereti ma ki vatera na kariana, ka vutungira na enoni renigi. Nikâ ngaia ki votorerua na siare gi rua tangara ngaira hato na enoni.

⁴²Ngaira hato na enoni ka ngê ma ka ngê masu.

⁴³Ma hemuri na kariana o Jesu ka hagavunusigi na heni tangahuru gi tage matarerua renigi na bereti ma na siare, ga hita râ.

⁴⁴I pasita ngaira hato na enoni, ga ngê, ka vora na mane na rehagaro gi rima.

⁴⁵Ki parama o Jesu, ma ki vi tangara na kariana, ka tage igê na kere haka ma ka nanago tarana i Betesaita, igê na apanena tarê na rano, ma ngaia ki oga so, hanana vi hagatorangenira vê na hakuta na enoni.

⁴⁶Matena i arira hato na kariana, ngaia ki tagere igê na kere hungana, hanana vi nunginungi.

⁴⁷Matena i su na arito, na kere haka ki tariha i gupuna na rano, mo Jesu ki oga getea i bemu.

⁴⁸Ngaia ki bâsira na kariana ga tagara bâraha, renia ga harutea na kere haka, suria i tora i matota na roga. Tahema igê na kahuagana na tangiana ngaia ki râ i pasita, i râ igê na basina na rano. Ngaia ki râ ki teharenira.

⁴⁹Ma ngaira ka basia, i arâ i basina na rano. Ngaira ka vi ma vi, “Na ataro!” Ma ka hengerehi.

⁵⁰Renia na matena ga bâsia, ngaira ka magu bâraha. Mo Jesu ki parama, ma ki tamasi tangara, ki vi: “Mu ape gatagata! Inê nga! Siana mu magu!”

⁵¹Ma ngaia ki akê i pasita igê na kere haka, ma na roga ki hato panira. Na kariana ka kone ngavê ma ka bubununuga.

⁵²Ngaira ka pe girara, vi na ta kani renigi na bereti. Ngaira ka takotako tugupu.

⁵³Ngaira ka tarê igê na rano, ma ka goto i Senesarete, ma ka huna i ngekana.

⁵⁴Matena ga pania na kere haka, na enoni ka bâgirara ototo râ nga, vi o Jesu.

⁵⁵Ma ngaira ka râhigi na ara ni hinua i ngekana, ma na enoni ka tugira na enoni ga maeha igê na bea iata tange na agua, ga rongoa, vi i oga igê o Jesu.

⁵⁶Ma i na ara ni agua o Jesu ki râ igê, tange na kere hinua, na hinua raha, se na ruma, na enoni ka torera me na enoni, ga maeha, tange na mahera, ma ka nungia, vi ge hagamarumungenira na enoni maeha, ke hataria na taretarena na tuguni iana; ma na ani hato, ga hataria, ngaira ka komaga aporo renia.