Read Kahua MAREKO 7 Bible Online

MAREKO 7 - Kahua bible

MAREKO 7

¹Na Pariseo ma tani na mane ni hagesuringa ni rotu ka râ me tenia i Jerusaleme ma ka hakuria o Jesu.

²Ngaira ka bâsira tani na kariana o Jesu, ga ngêngê renigi na rimata “i bera”: ngaia kani ngaira ka pe manuhigi na rimata suria na tauhata na Pariseo ka obania, vi na enoni ka arâ suria.

³Renia na Pariseo ma na Siu getera nikâ ka râ surigi na tauhata na êvarita: ngaira ka manuhigi i nago na rimata suria na tauha, me muri ma ka kahu ngêngê.

⁴Ma nikâ ngaira ka manuhigi i nago na ngêra, ga vurigi igê na makete, ma hemuri ma ka kahu ngêngê. Ma ngaira ka râ surigi rako na tauhata getigi na êvarita, manga na tauha tanga ga tananigi na kâkâ, apira, kuki ma na bea.

⁵Tahema na Pariseo ma na mane ni hagesuringa ni rotu ka hagatea o Jesu, ka vi: “Tanu hega na kariamu kaniga pe râ suria na tauhata na êvarika, ma ka ngêngê ma renigi na rimata ‘i bera’?”

⁶O Jesu ki aramira, ki vi: “O Isaia na poropete ki tamasigamu monari! Mu bagasusuka! Ngaia ki sege, ki vi: ‘God ki vi: Na enoni ngegana ka rahesiê igê ma na tamasinga iata, ma ka usi, vi ge râ surigi na ramata iaku.

⁷Ngaira ka rahesiê purua ma, renia ga hagesuri renigi na ramata iata na enoni, ma ka vi ma, vi na ramata iana God.’”

⁸Mo Jesu ki vi: “Igamu kamu bani kasigi na ramata iana God, ma kamu râ surigi na tauhata na enoni.”

⁹Mo Jesu ki vi nikâ, ki vi: “Aige! Mu girara bâkoro ngavê hanana vi gamu kasia na ramata iana God, ma kamu arâ surigi na hagesuringa iami maremi!

¹⁰Renia o Moise ki ramata, ki vi, ‘Takuirerua o vaemamu ma kenamu’, ma ‘Manga ta na enoni, ma ki visia bera o vaemana se kenana, ka nahuia nga ki meme.’

¹¹Ma igamu kamu vi, vi i koro ma, vi na enoni ki pe tamania o vaemana se kenana,

¹²manga vi nahunia ta na marâ, i araria, vi tamania o vaemana se kenana renia, ma ki vi ma, vi na marâ ngekana ki “Koba”, (i vi, na anina God ma).

¹³Manga ngekana, igamu kamu urusia na hagesuringa iana God renigi na tauha iata na enoni, mu hagatarêngenigi tangara na enoni getera. Ma kamu katogi rako na marâ getigi ga manga na ani ikana.”

¹⁴Mo Jesu ki unira me nikâ na hakuta na enoni, ma ki vi tangara, ki vi: “Igamu hato, mu karingê maninga!

¹⁵Na enoni i asa, vi ge era renia na marâ, i bêbanu i rarona na enoni.

¹⁶Mu karinga maninga, manga vi gamu girara mu rongorongo!”

¹⁷Matena ngaia i bani panira na hakuta na enoni ma ki bani banu i ruma, na kariana ka hagatea renia na maramaraveta ngekana.

¹⁸O Jesu ki vi tangara, ki vi: “Igamu kamu bonobonoga mangara na enoni getera! Mu pe rongogirara vari? I asa hage hagetage, vi ge era na enoni renia na marâ, i bêbanu i rarona na enoni,

¹⁹renia i mareha, vige banu igê na aitangihana na enoni, ma ki banu hete igê na bahurina, me muri ki hura me i boromarena.” (Manga ngekê o Jesu ki visia vi na ara ni ngêra ki koro ma ga ngêngê.)

²⁰Ngaia ki visia nikâ vi: “Na enoni ki era renia na marâ, i huhura me tenia na enoni.

²¹Renia tenia na rarona, tenia na aitangihana na enoni ka huhura me igê na takoha era, ga katoa na enoni, ki paronga i era, ki hanago, ki henahu,

²²ki gamogamo, ki hagatage, ma ki katogi na ani mavê na marâ era; ki hagahagaparu, ki tanu era, ki hengari, ki visira bera na enoni, ki paroparo, ma ki tanugi tare na marâ, ga pe koro.

²³Na ara ni marâ hato ngegana ka huhura me tenia na aitangihana na enoni, ma ka katoa ki era na enoni renigi.”

²⁴Mo Jesu ki râ, ma ki râ tange na hinua hagarangia na hinua raha i Taire. Ngaia ki banu i ruma, ma ki pe obania, vi ta na enoni ke girara, vi ngaia ki gâga i ngekana. Ma ki bara tanga, vi ge oga pinihi.

²⁵Ki parama ta na gete, ma ki rongoa, vi o Jesu ki gâga i ngekana, ma ngaia ki râ me ma ki aba so i maana. Ka karena ki atataroga.

²⁶Na gete ngekê ngaia ki na mahuara, i pasina kani i Penisia i Siria. Ngaia ki nungia o Jesu, vi paia hura na ataro era tenia ka karena.

²⁷Mo Jesu ki arami, ki vi: “Naka kê hagangêra i nago na kare. I pe arari, vi ge tavogi na ngêra iata na kare ma ke kasikasi tangara na o.”

²⁸Na gete ki arami, ki vi: “Mako, Araha! Ma na o i ruguhana na bea ka ngêgi na apigani na ngêra iata na kare!”

²⁹Vikana o Jesu ki vi tanga, ki vi: “Renia na aramiha koro iamu gu aporo i pasimu; na ataro era ki bani hura tenia ka karemu.”

³⁰Vikana ngaia ki aporo i pasina, ma ki bâsia igê na karena, i tâ igê na bea. Na ataro era ki bani hura monari tenia.

³¹O Jesu ki panigi na hinua hagarangia i Taire, ma ki ritare i Sitone tanga na Rano i Galilea, suria na tara i Hinua Tangahuru.

³²Tani na enoni ka merâ me na mane, i pungu na karingana ma ki bi, ma ka nungia o Jesu, vi têtêbuhia.

³³Vikana o Jesu ki meura râ tenira na enoni, ma ki purenigi na kakêna igê na karingana na mane, ma ngaia ki musu, ma ki hataria na meana renia.

³⁴Mo Jesu ki atakê, ma ki manava so raha, ma ki vi tanga na mane, ki vi: “Epata!”, i vi, “Tahataha!”

³⁵Ki parama, ma karu tahataha na karingana na mane, ma ki marumu na meana, ma ki haganega ki tamasi bâkoro.

³⁶Mo Jesu ki hagapêpura ngaira hato, vi siana ka tamasia rârâ tanga ta na enoni. Ngaia ki hagapêpura bâraha, ma ngaira ka ama ni tamasia ma.

³⁷Ma ngaira hato, ga rongoa, ka konekone bâraha. Ngaira ka vi: “Na ara ni marâ hato i katogi ka koro era! Henaka ma na enoni, i pungu na karingata, ngaira ka kahu rongorongo, ma na enoni, ga bi, ngaira ka kahu tamasi!”