Read Kahua MAREKO 9 Bible Online

MAREKO 9 - Kahua bible

MAREKO 9

¹Mo Jesu ki vi nikâ: “Mu rongo! Ga oga na enoni i ngekê ga page tahitahi mêngara, mataro me ka rigia i arâ me ramataga na Arahanga iana God.”

²I murini na tangiani gi ono o Jesu ki merarâ o Petero mo Jakobo mo Joane, ma ki mera tagere igê na hungana raha, ngaira getera. Ngaira ka bâ vê, mo Jesu ki bâ riariaga,

³ma na tuguni iana ka togatoga ma ka siki ahuru ngavê. I asa ta na enoni i maveta, vi ge tanania na gahu, ke siki manga ngekana.

⁴Ma na kariana gi oru ka bâsirerua o Elia ma o Moise, garu metamasi o Jesu.

⁵Mo Petero ki tamasi, ki vi tanga o Jesu, ki vi: “Araha, i koro tangagami mi oga ikê! Igami kami toregi na ruhu gi oru, tani tangago, tani tanga o Moise, ma tani tanga o Elia.”

⁶Ngaia ki bagatatako, vi na ta ke visia, renia ngaia ma na tamana gi rua ka magu era.

⁷Na vaha ki râ me ma ki mamarusira, ma na ringena God igê na vaha ki vi: “Ikê o Kareku hetakui. Mu rongoa na tamasinga iana!”

⁸Ngaira ka gasuga ma ka bâ rârâ ma ka bâsia o Jesu ngaia getea ma kani oga henira.

⁹Matena ga rere me tenia na hungana, o Jesu ki hagapêpura, ki vi: “Siana kamu hagarongoa rârâ ta na enoni renia na tarana, mu bani bâsia râ ikini, mataro me o Karena Enoni ki mauri aporo tenia na mera.”

¹⁰Ngaira ka râ suria na marâ, i visia, ma ngaira so mareta ngaira ka hetamatamasi, ka vi: “Na ta ka na girarana na tamasinga ‘mauri aporo tenia na mera’?”

¹¹Ma ngaira ka hagatea o Jesu, ka vi: “Renia i hega na mane ni hagesuringa ni rotu kaniga vi, vi o Elia ki hagenago me?”

¹²Ngaia ki aramira, ki vi: “Monari, o Elia ki hagenago me, hanana i hagarêgi na ara ni marâ hato. Ma ki hega na Buka Apuna kani visia, vi o Karena Enoni ki page hatamia bâraha na mamasiaganiha, ma ka page kikitenia?

¹³Hoi, be vi tangagamu: o Elia ki bani râ me noga, ma tani na enoni ka bani katogi tanga na ani mavê na marâ, ga obanigi ma na Buka Apuna i visigi renia.”

¹⁴Matena ga aporo i pasita na tamata na kariana getera, ngaira ka bâsira na hakuta raha na enoni henira. Tani na mane ni hagesuringa ni rotu ka mera hetuguri na kariana.

¹⁵Na enoni, matena ga bâsia o Jesu, ngaira ka konetenia bâraha ka gahasia ma ka vagevagesia.

¹⁶O Jesu ki hagatera na kariana, ki vi: “Na ta kanimu mera hetuguri renia?”

¹⁷Ta na mane igê na hakuta na enoni ki aramia, ki vi: “Araha, inê kê merâ me tangago o kareku, i bi, renia i atataroga.

¹⁸Na ara ni bevoana, matena na ataro ki angaria, ngaia ki apuripuri i ano, ma ki huhura na hutohuto i harana, ma ki hengaki na rivona, ma ki gagaga na apena hagenani. Inê kê nungira na kariamu, vi ge paia na ataro tenia, ma ki mareha.”

¹⁹O Jesu ki vi tangara, ki vi: “Igamu, ki mareha vê, vi gamu tongesuri! Hagehita kanigê page gâga henigamu? I na keta ke hato? I arihu era me noga inê kê hatamia na mamasiaganiha renigamu. Torea me na kere mane!”

²⁰Ma ngaira ka torea me tanga o Jesu. Matena na ataro ki bâsia o Jesu, na kere mane ki hagaata, ki vota so i ano, ma ki apuripuri, ma ki hutohutoga na harana.

²¹O Jesu ki hagatea o vaemana na kare, ki vi: “I arihu me manga i he kani manga ngekê?” Ngaia ki arami, ki vi: “I haganega me tanga, matena i sisite mênga.

²²Hagarako ngaia ki haga ni nanahuia, ki kasia igê na gi ma ki kasia i ve. Gu takuigami ma ku tamanigami, manga vi pe asa tangago!”

²³O Jesu ki vi: “I monari, manga vi pe asa tangago! Ki mareha ta na marâ, vi ge asa tanga na enoni, i nahunia na tongesuriha.”

²⁴O vaemana na kare ki parama, ma ki tamasi raha, ki vi: “Inê kê nahunia na tongesuriha, ma ki sisite ma. Gu hagaraha na tongesuriha iaku! U tamaniê!”

²⁵O Jesu ki bâsira na hakuta na enoni, ga hakurira me. Ngekana ngaia ki bonasia na ataro era, ki vi: “Inê kê vi tangago, ataro go bi, o karinga pungu, gu hura me tenia na kere mane, ma siana ko angaria aporo nikâ.”

²⁶Na kere mane ki hagaata bâraha, ma na ataro ki ngere, ma ki hura me. Na kere mane ki bâ manga na gahua. Vikana na enoni hato ka vi ma, vi ngaia ki me.

²⁷Mo Jesu ki ragea aharaga ki ura.

²⁸I murina i banu i ruma o Jesu, na kariana ka hagatea, ka vi: “I hega, kani gami pe girara, vi gami paia na ataro?”

²⁹O Jesu ki aramira, ki vi: “Na nunginungiha ma kani girara, i paira na ataro manga na ani ngekê, mareha vi ta na marâ getea.”

³⁰Ngaira ka râ pania na agua ngekana ma ka ritare i Galilea. O Jesu ki pe obania ta na enoni, vi ge girara na agua, i oga igê,

³¹renia ngaia ki hagesurira na kariana, ki vi: “Ga page mahatangenia o Karena Enoni tangara na enoni, ka page nahuia ki meme. Ma igê na oruta na tangiana ngaia ki page mauri aporo.”

³²Ngaira ka pe rongogirara na girarana na tamasinga ngekê, ma ka magu, vi ge hagatea renia.

³³Ngaira ka ata me i Kapenamu, ma na matena o Jesu ki bani banu i ruma, ngaia ki hagatera na kariana, ki vi: “Na ta kanimu hetuguri renia i tara?”

³⁴Ma ngaira ka muni ma, renia i tara ngaira ka hetuguri so mareta, renia vi o ti kini teha.

³⁵O Jesu ki oga so, ki unira me na kariana tangahuru matarerua, ma ki vi tangara, ki vi: “Manga ta na enoni, ma ki obania vi tehateha igê na arahanga, ki tuguhia, i hagemuri ma ki tamanira na ani hato getera.”

³⁶Ngaia ki têa me na kare, ma ki hagêrasia ki ura i maata. Ma ngaia ki ruia ma ki vi tangara, ki vi:

³⁷“Na enoni i unira banu na kare manga na ani ikê reniê inê, ngaia ki uniê banu nogaku inê, ma na enoni, i uniê banu nogaku inê, ngaia ki pe uniê banu ma inê, ma nikâ hete na ani, i bani hagatorangeniê.”

³⁸O Joane ki vi tanga o Jesu, ki vi: “Araha, igami kami bâsia na mane, i paira na ataro igê na raramohamu, ma igami kami manimania tenia, suria ngaia ki mareha vi na tamamami.”

³⁹O Jesu ki arami, ki vi: “Siana kamu manimania tenia, renia na enoni, i katoa na mena igê na raramohaku, ngaia ki asa, vi ge visiê bera ototo râ nga.

⁴⁰Renia na enoni, i pe urapusigia, ngaia ki tamanigia.

⁴¹Hoita, mu rongo! Na enoni, i hagatonomigamu renia na ve, suria vi igamu ki na kariana o Kirisito, ngaia ki page nahunia na mena koro renia.

⁴²“Bâsira na kare igê ka tongesuriê. Manga ta na enoni, ma ki hagesuria bera na hitangita na kare ngegê, ngaia ki araria ma, ga baroa i riona na hê raha ma ka kunia i asi.

⁴³Tahema manga igo, ma ko tasitasi renia na rimamu, retea râ! I ararigo vigo nahunia na mêriha mora henia na rimamu gi tage, ma ki pe ararigo, vi gu nahunirerua na rimamu gi rua, matena go arâ igê na agua ni hagaitangiha, igê na gi i tarê tarema.

⁴⁴[Ngekana ‘na mamagata ki asa, vi ge me ma na gi ki asa, vi ge page me.]

⁴⁵Manga igo, ma ko tasitasi renia na êgamu, retea râ! I ararigo vigo nahunia na mêriha mora henia na êgamu gi tage, ma ki pe ararigo, vi gu nahunirerua na êgamu gi rua, ma ke kasigo igê na agua ni hagaitangiha. [

⁴⁶Ngekana ‘na mamagani ki asa, vi ge me ma na gi ki asa, vi ge page me.’]

⁴⁷Ma ki manga igo, ma ko tasitasi renia na maamu, akangia râ! I ararigo, vigo rongoa na tamasinga iana God igê na Arahanga iana, matena go nahunia na maamu gi tage, ma ki pe ararigo vi gu nahunirerua na maamu gi rua, ma ke kasigo igê na agua ni hagaitangiha.

⁴⁸Ngekana ‘na mamagata ki asa, vi ge me ma na gi ki asa, vi ge page me.’

⁴⁹“Na gi ki page hagakorora na enoni hato, manga na asi i hagakoroa na vogasiha.

⁵⁰Na asi ki na marâ koro tanga na ngêra. Ma ki manga i pe marasiga, manga i he kani page marasiga aporo na asi? I gâga na hekomaniha i pasimi kani i koro, manga na ngêra i marasiga renia na asi, ma igamu kamu hekorokoro.”