Read Kahua LUKA 11 Bible Online

LUKA 11 - Kahua bible

LUKA 11

¹Ta na tangiana o Jesu ki nunginungi i ta agua. Matena i nunginungi hato, ta na hitangita na kariana ki vi tanga, ki vi: “Araha, gu hagesurigami, kami nunginungi, manga hanana o Joane i bani hagesurira na kariana.”

²O Jesu ki vi tangara, ki vi: “Mu nunginungi vikê: ‘Vaemamami, igo getego ko God. Gu katora na enoni hato, ke rahesigo. Gu marungigami, Araha.

³Vategami me i na ara ni tangiani na ngêra, ge ararigami.

⁴Gu bonotenigi na tasi iamami, renia igami nogamami kami bonotenigi na eraha, na enoni ga katogi tangagami. Ma siana ko naka na heuhungiha ki teharigami.’”

⁵Mo Jesu ki vi tangara na kariana, ki vi: “Ata ni vi ma: manga ta na hitangimi, ma ke râ i pasina na tamana igê na gupuna na bungiana, ma ke vi tanga, ke vi, ‘Bamane, gu vateê noga na guani na bereti gi oru.

⁶Ta na tamaku igê na râha iana ngaia ke râ me i pasiku, ma inê ki baguru ngavê na ruma.’

⁷Ma ki manga na tamamu i rarona na ruma ke arami, ke vi, ‘Siana ko hagamarâ apeku! Na maa ni ruma ki bani purupuru. Na kareku menê kami bani tâ ni mêruha, ma ki asa, vi ve aharaga be vatego ta na marâ.’

⁸Hoi, i manga ngekana ki hega? Be vi tangagamu: manga vi ngaia, ma ki pe aharaga ke vatego na bereti, suria vi ngaia ki na tamamu, ngaia ki aharaga ma ki vatego na ara ni marâ, go obanigi, renia igo ko pe maki, vi gu ama ni nungia nga.

⁹“Tahema inê kê vi tangagamu: mu nunginungi ma kamu page tavotavo; mu bâbâ ma kamu page tarahu; mu korekore ma na maa ni ruma ki page tahataha tangagamu.

¹⁰Suria na enoni, i nunginungi, ki page tavo; ma na enoni, i bâbâ, ki page tarahu; ma ki page tahataha na maa ni ruma tanga na enoni, i korekore.

¹¹O ti na hitangimi, o karena ki nungia na siare tenia, ki hega, i vatea vari na ma?

¹²Se i vatea vari na garagara pinihi, matena ngaia ki nungia na oruna na kua?

¹³Henaka vi igamu kamu pe korokoro, igamu kamu girara, mu vatera na karemi na marâ koro. Ma God Vaemami ki teharigamu ngavê ma ki page votoa na Higona Apu tangara na enoni, ga nungia.”

¹⁴O Jesu ki paia na ataro era, i bi. Matena na ataro ki hura vê, na mane ki haganega ki tamasi, ma na enoni hato ka konekone.

¹⁵Ma tani na hitangita ka vi: “Belesebulu, na araha iata na ataro era, kani vatea na ramoha, hanana i paira na ataro era.”

¹⁶Tani ka obania, vi ga uhungia. Tahema ngaira ka nungia, ki katoa na mena, hanana ga girara, vi God ki tamania.

¹⁷Mo Jesu ki bani giraragi na takotako iata, ma ki vi tangara, ki vi: “Na anima na marê, ma ki hevoavoa so marena ma ki heariha, na marê ngekana ki asa, vi ge ramo i hemuri. Manga na ahemata, ma ki hevoavoa so marena, na kare ka totoko.

¹⁸Vikê, manga Satana ma na kariana, ma ka hevoavoa so mareta ma ka hemeronge, manga i he na arahanga iana Satana ki girara i goga tare? Igamu kamu vi, vi inê kê paira na ataro era, renia Belesebulu ki vateê na ramoha, kê paira.

¹⁹Manga ve paira hura renia na ramoha, Belesebulu i vateê renia, tanu hega na kariami kaniga paira hura? Na kariami maremi ka hagatanga monari renia vi igamu kamu hagaparu bâraha!

²⁰Hoita, inê kê paira hura na ataro era renia na raramohana God. Ma na tarana ngekê ki hagatanga monari renia vi na Arahanga iana God ki bani haganega i pasimi.

²¹“Matena na mane ramo ma ki nanê renigi na tangaruha iana ma ki bâbâ suria na ruma iana marena, na ara ni nahuninga iana ki gâga apêpugani.

²²Ma ki manga na mane, i ramo teharia, ma ki râ me, ma na avanuna na ruma ki makumakusiga, na merongana ki toregi vê na ara ni tangaruha, na avanu ni ruma i tako hagêgurigi, ma ki votogi na marâ, i hanagogi.

²³“Na anima na enoni i pe tamaniê, ngaia ki urapusiê nga; na anima na enoni i pe hagahakura na sipi heniê, ngaia ki tokorenira nga.

²⁴“Bevoana na ataro era ki huhura tenia ta na enoni, ngaia ki arâ igê na manihê, ma ki bâbâ rârâ renia na agua, vi mamaro igê. Manga i pe tarahua ta agua ni mamaroha, ngaia ki vivi i obana, ki vivi, ‘Be aporo tanga na ruma iaku, gê pania.’

²⁵Vikê ngaia ki aporo, ma ki rigia na ruma, i matarotaro bâkoro ma na ara ni marâ ka tâ igê na atohani.

²⁶Ma ngaia ki huhura vê, ma ki merarâ me na ani gi pi na ataro, ga era ngavê teharia. Ma ngaira ka arâ me ma ka goga igê. Me muri na marâ ka era teha vê teharia i nago.”

²⁷Matena o Jesu ki tamasi hato vikê, ta na gete i berarogata na enoni ki tamasi raha tanga o Jesu, ki vi: “Ki babarisi na gete, i obarangenigo ma ki hagasusugo!”

²⁸Ma o Jesu ki arami, ki vi: “Ga babarisi ngavê hete na enoni, ga rongoa na tamasinga iana God ma ka râ suria!”

²⁹Matena na enoni ka hakurihia o Jesu, ngaia ki vi nikâ: “Na enoni i na matena ikê ka era ngavê. Ngaira ka nungia na mena, hanana vi hagatanga monari tangara, vi God ki tamaniê. Ma ki mareha, nga noga ma na mena renia o Jona.

³⁰O Jona na poropete ki ateate tangara na Ai ni Ninive. Ma i tagenana ma, o Karena Enoni ki kahu hagesurira na enoni i na matena ngekê.

³¹Igê na Tangiana ni Suriha Raha na gete, i marungia i Seba, ki page rêrakê ma ki page ranganira na enoni, ga goga i na matena ngekê, renia ngaia ki râ me hagatê era ngavê, hanana vi karinga na hagesuringa ma na takotako mataha iana o Solomone. Ma be vi tangagamu: ta na ani ikê ki raha teharia o Solomone.

³²Igê na Tangiana ni Suriha Raha na Ai ni Ninive ka page rêrakê ma ka ranganigamu, renia ngaira ka urusi parongata era, matena ga rongoa o Jona, i ateate. Ma be vi tangagamu: ta na ani ikê ki raha teharia o Jona.

³³“Mareha ta na enoni, vi ge tanga na laiti ma ke pinihia, se vi ge naka i ruguhana na apira. Mareha. Ngaia ki naka hete igê na atohana na laiti, hanana na enoni ka bâsia na laiti, matena ga bêbanu me.

³⁴Na maamu ka manga na laiti tanga na apemu. Matena na maamu karu marava, na apemu hagenani ki mave bâkoro ngavê. Ma ki manga na maamu ma karu guru, na apemu hagenani ki roto.

³⁵Hoita, mu takusia maninga, siana ki rotoroto na marara i pasimi.

³⁶Manga na apemu hagenani, ma ki mave bâkoro ngavê, ma ki pe roto rârâ ta agua, ngaia ki togatoga hagenani, manga na laiti, i mavesigamu renia na mavetana.”

³⁷Matena o Jesu ki tamasi hato, ta na Pariseo ki guhia ki ngê i pasina. Vikana o Jesu ki banu i ruma, ki oga so ma ki mebêrihu.

³⁸Na Pariseo ki kone, matena i bâsia o Jesu, i ngê ma ki pe manuhi rima i nago.

³⁹Ngekana na Araha ki vi tanga, ki vi: “Oi, igamu na Pariseo, kamu tananigi na murini na kâkâ ma na apira, ma i raroni na obami igamu kamu hagatage ma kamu erataga ngavê.

⁴⁰Igamu kamu bagatatako! I hega, God ki tagarahigi ma na murini, ma na raroni ki mareha?

⁴¹Ma ki tuguhigamu, mu vatera na enoni matareha na marâ i raroni na kâkâ ma na apira iami, hanana na ara ni marâ ka matarotaro tangagamu.

⁴²“I era ngavê tangagamu, igamu na Pariseo! Mu vatea God na ara ni tangahuruta na marâ ni tariani, na marâ manga na vanuhani ma na tonohani ma na ani getigi hato, ma igamu kamu hagêrahu, vi gamu paronga oto tangara na enoni se vigamu takuia God. I tuguhigamu, mu ototo surirerua na tarani gi rua ngegana, ma siana kamu hagêrahusigi na ani getigi.

⁴³“I era ngavê tangagamu, igamu na Pariseo! I ruma ni sukuru igamu kamu obania bâraha, vi gamu gâga igê na atohata na enoni raha, ma igê na tavani hakuta igamu kamu obanira na enoni, vi ge visigamu raha ma ke hanetasigamu.

⁴⁴I era ngavê tangagamu! Igamu kamu mangagi na anoano, na enoni ka pe bâgiraragi, ma ka purigi, suria ngaira ka pe giraragi.”

⁴⁵Ta na hitangita na mane ni hagesuringa ni Rotu ki vi tanga o Jesu, ki vi: “Araha, matena go tamasi vikana, igo ko guharigami nikâ!”

⁴⁶O Jesu ki arami, ki vi: “I era ngavê tangagamu nikâ, igamu na mane ni hagesuringa ni Rotu. Mu hagahigera na enoni, ka tora higa, ma igamu maremi ki mareha ngavê, vi gamu tamanira igê na toraha.

⁴⁷I era ngavê tangagamu! Mu tagarahigi bâkoro na matiku tangara na poropete, ma na poropete ngegana na êvarimi nogata ka nahuira ka meme.

⁴⁸Vikana igamu maremi kamu vi, vi na marâ, ga katogi na êvarimi, ka koro, renia ngaira nga kaniga nahuira ka meme na poropete, ma igamu nga kanimu tagarahigi na matiku tangara na poropete.

⁴⁹Tahema igê na Buka Apuna, ga hêtana vi Takoha Mataha iana God, ngaia ki vi, ‘Inê be hagatorangenira na poropete ma na mane tora tamasinga tangara. Ngaira ka page nahuira na hitangita ma ka merongasira tani.’

⁵⁰Vikê na enoni i na matena i ngekê ka page hatamigi na mamasiaganiha renia na mera iata na poropete hato, na êvarita ka bani nahuira, haganega me tenia na matena, God i hagavoragi igê na ara ni marâ hato;

⁵¹tenia na matena o Kaini i nahuia igê o Abele, mataro me o Sekaria, na enoni ka nahuia i berarogaterua na bea ni vogasiha ma na kiboru apuna. Be vi tangagamu: i monari, na enoni i na matena i ngekê, ka page hatamigi na mamasiaganiha renigi na mera iata na poropete hato.

⁵²“I era ngavê tangagamu, igamu na mane ni hagesuringa ni Rotu! Igamu kamu bani tavoa râ na ‘ki’ tanga ga tangahia renia na maa ni ruma ni giraraha. Igamu maremi, ki asa nogami, vigamu banu igê, ma igamu kamu hagabarasira na enoni, ga uhungia vi ga bêbanu igê!”

⁵³Matena o Jesu ki pania na agua i ngekana, na mane ni hagesuringa ni Rotu ma na Pariseo ka tamasi merongasia ngavê, ma ka hagatea renigi na marâ rako.

⁵⁴Ngaira ka uhungia, viga katoa ki votavota igê na tu na tamasinga iata, hanana vi arami tasi, ma ka ramonia.