Read Kahua LUKA 14 Bible Online

LUKA 14 - Kahua bible

LUKA 14

¹Igê ta na Tangiana ni Mamaroha o Jesu ki râ ki ngê i pasina ta na maneraha i pasita na Pariseo, ma na enoni ka bore rapurapu renia.

²Ma ta na mane, i pipi na êgana ma na rimana, ki râ me tanga o Jesu.

³Mo Jesu ki tamasi, ma ki hagatera na mane ni hagesuringa ni Rotu ma na Pariseo, ki vi: “Na Ramata i na Buka Apuna ka hagamarumungenigia ma vari, vi ga hagakomagara na enoni igê na Tangiana ni Mamaroha, se mareha?”

⁴Ma ngaira ka muni ma. O Jesu ki têa na mane, ki hagakomaga, ma ki hagatorangenia vê ki râ.

⁵Ma ngaia ki vi tangara, ki vi: “Manga igamu, na anima na hitangimi, ma kamu nahunia o karena se na puruka, ma ngaia ki vota i rarona na vekaru igê na Tangiana ni Mamaroha, ki hega, mu okeokê râ nga igê na Tangiana ni Mamaroha, se i mareha?”

⁶Ma ngekana ngaira ki bara tangara ge aramia na hagatenga iana.

⁷O Jesu ki bâsira, vi manga i he tani na enoni, i guhira, ka ategi na atohata na maneraha ma ka oga so igê. Tahema ngaia ki tamasi maramaraveta vikê tangara ngaira hato, ki vi:

⁸“Manga ta na enoni, ma ki guhigamu tanga na ngêra na hagataku, siana kamu gâga so igê na atohata na maneraha, renia i era ma na avanu ni ngêra ki bani guhia ta na enoni, i raha teharigamu.

⁹Ma na avanu ni ngêra, i guhigamu tagenami, ki arâ me ma ki vi tangagamu, ki vivi, ‘Mu aharaga tarana na maneraha.’ Ma ngekana igamu kamu maki renia, ma kamu gâga so ma igê na atohata na enoni purua.

¹⁰Manga na matena i guhigamu, mu arâ ma kamu gâga so hete igê na atohata na enoni purua, na avanu ni ngêra ki page arâ tangagamu, ma ki vivi, ‘Bamane, mu râ me, ma kamu oga so igê na atohata na enoni raha.’ Na tarana ngekê ki hagarahasigamu i maata na enoni getera hato, i guhira.

¹¹Suria na enoni, i kasia akê marena, ka page kasia so; ma na enoni, i kasia so marena, ka page kasia akê.”

¹²Ma o Jesu ki vi tanga na avanu ni ngêra, i guhia, ki vi: “Manga go guhira na enoni tanga na kere ngêra, igê na ritovagana se igê na manurahi, siana ko guhira na tamamu, se vi na goamu, se vi na kariamu, se vi na enoni ruruguha, suria vi ngaira ka page guhigo nogata, ma igê na tarana ngekana igamu kamu page hebarubaru.

¹³Ma ki manga go magoto, go guhira hete na enoni matareha, na enoni ga abogo, na enoni ga meapeape, ma na enoni i guru na maata.

¹⁴Ngekana igo ko page hagâvo renia, suria i bara tangara, vi ge rugugi aporo tangago. Ma God ki page vurigo, matena ga mauri aporo na enoni koro.”

¹⁵Ta na hitangita na mane, ga bêrihu, ki rongo vikê, ma ki vi tanga o Jesu, ki vi: “Ga babarisi ngavê na enoni, ga page ngêngê haku i pasina God na Araha!”

¹⁶O Jesu ki vi tanga, ki vi: “Ta na mane i magoto, ma ki guhira rako na enoni.

¹⁷Matena i nanê na ngêra, ngaia ki hagatorangenia na kariana, ki râ ki heharo, ki vi, ‘Mu râ me, na ara ni marâ ki nanê!’

¹⁸Ma ngaira hato na enoni ka vi, viga bara, vi ge râ. Tani ki vi, ‘Inê kê vuria na mako, vi gê arâ kê bâsia. Hetaki, inê kê pe arâ vê.’

¹⁹Ma tani ki vi, ‘Inê kê vurira na haritama gi rima na puruka, ma kê arâ noga kê uhungira, hanana tagara. Hetaki, inê kê pe arâ vê.’

²⁰Ma tani nikâ ki vi, ‘Inê kê kahu êragi haoru. Tahema i asa, vi ve râ vê.’

²¹“Na kariana ki aporo ma ki hagarongoa na araha iana renigi na tarani hato ngegana. Na avanuna na magotoha ki mangariaga baraha, ma ki vi tanga na kariana, ki vi, ‘Gu râ rêrê igê na mahera ma igê na tara ni hinua, ma ko merarâ me na enoni ga matareha, na enoni ga abogo, na enoni i guru na maata, ma na enoni ga meapeape.’

²²Ma hemuri na kariana ki vi, ‘Araha, na tagaraha, go visia, ki bani hato, ma na ruma ki baguru mênga ta agua.’

²³Vikana ma na araha ki vi tanga na kariana, ki vi, ‘Gu râ nikâ igê na tara i bemu ma igê na tara sisite, ma ko bonasira na enoni, ka bêbanu me, hanana i vunuvunu na ruma iaku.

²⁴Be vi tangagamu hato: na enoni, gê guhira i nago ma ka pe râ me, ngaira ki asa iata vi ge page ngêa na hinaga iaku.’”

²⁵Na hakuta raha na enoni ka takua o Jesu. Ngaia ki aharira, ma ki vi tangara, ki vi:

²⁶“Na enoni, i arâ me i pasiku, ma ki takuira bâraha ma o vaemana, ma kenana, ma na gete iana, ma na karena, ma na goana, ma ngaia so marena tehariê inê, ngaia ki asa, vi na kariaku.

²⁷Na enoni, i mumuriê, ma ki pe torea na kuruse iana marena, ngaia ki asa, vi na kariaku.

²⁸“Manga ta na hitangimi, ma ki kato, vi torea na bebetehe na he, ngaia ki tuguhia, ki goga so noga, hanana i tarahugi i hagenago na meni na marâ, hanana i girara, vi na haga iana ki araria, vi hatungia na tagaraha renia se i mareha.

²⁹Manga i pe arari na haga, ma ngaia ki haganega ki tagarahia na hunana na bebetehe na hê, ngaia ki asa iana, vi ge hatungia. Ma na enoni hato, ga bâsia, ka page rurusia.

³⁰Ngaira ka page vivi, ‘E bâ, ngaia ki bani haganega ki torea na bebetehe ma ki hagarisua!’

³¹“Manga na maneraha, ma ki merarâ na rehagaro tangahuru na mane ni me iana, hanana vi ga meheariha na maneraha getea, i merarâ me na rehagaro tangahuru gi rua na mane ni me, ngaia ki gâga so, ma ki hagakita i hagenago manga vi ngaia ma ki girara i teharia na maneraha ngekana se i mareha.

³²Manga i mareha, i koro, ki hagatorangenira na mane tora tamasinga, hanana ga metamasi na maneraha ngekana, matena i hagatê mênga me tenia, hanana ga hagatea vi manga i he ka na takotako iana, hanana vi ge hato na henahuita.”

³³Mo Jesu ki vi: “Manga ngekana ki asa na hitangimi, vi ge vora na kariaku, manga vi ngaia ma ki pe panigi na ara ni marâ hato iana.

³⁴“Na solo ki na marâ koro, ma ki manga i pe marasiga, ngaia ki mareha rârâ ta na tarana, vi ge page hagakoroa aporo renia.

³⁵Ngaia ki pe arari tanga na mako i mu, se vi tanga na bê ni roro ni hasinga. Na enoni ka kasia râ ma. Mu rongo, manga hanana mu rongorongo.”