Read Kahua LUKA 18 Bible Online

LUKA 18 - Kahua bible

LUKA 18

¹Ma o Jesu ki tamasi maramaraveta vikê tangara na enoni, ki hagesurira, hanana vi tuguhira, ga nunginungi tare, ma siana hagetage ki meme na apeta, vi ge nunginungi.

²“I ta na hinua ki oga igê na maneraha ni hagatamasinga, i pe magutenia God ma ki pe hanetasira na enoni nikâ.

³Ma i hinua ngekana ki oga nikâ na gete na nâ, i ama ni arâ ma me tare i pasina, ma ki nungia tare, vi tamania. Ngaia ki vi, ‘Gu hagaotoa na tarana i berarogamami inê ma na merongaku!’

⁴I arihu me noga na maneraha ni hagatamasinga ki usi, vi ge tamania. Me hemuri ngaia ki tako, ki vi, ‘Naka ma inê kê pe magutenia God, sê ge pe hanetasira na enoni,

⁵inê be tamania na gete na nâ ikê ma be hagaotoa na tarana, i hagate renia, suria ngaia ki hagamarâ apeku tare. Manga i mareha, ngaia ki page ama ni arâ ma me, ma ki hagâsi apeku.’”

⁶Ma na Araha ki vi: “Mu karinga na marâ, i visia na maneraha ni hagatamasinga, i era na parongana.

⁷Hoi, i hega? Mu takusia vari, vi God ki pe tamanira na kariana, ga avarasia tare i na ara ni tangiani ma na bungiani? Mareha!

⁸Be vi tangagamu: ngaia ki hatani tamanira rêrê. Ma na matena o Karena Enoni ki page arâ me igê, i hega, ngaia ki page tarahua vari na tongesuriha i pasita na enoni, se i mareha?”

⁹O Jesu ki tamasi maramaraveta vikê tangara na enoni, ga vi, vi ngaira ka koro, ma ka kitenira na ara ni enoni getera.

¹⁰“Na mane gi rua karu akê i Ruma ni Rotu, hanana vi garu nunginungi. Ta na mane ki na Pariseo, ma ta na mane ki na mane i totora takesi.

¹¹Na Pariseo ki ura getea ma ki nunginungi, ki vi, ‘God, inê kê visigo koro, renia inê kê pe hagatage, ma kê pe hagahagaparu, ma kê pe gamogamo mangara na ara ni enoni getera. Inê kê visigo koro, renia inê kê pe manga o vani i totora takesi ikê.

¹²Inê kê harite ngêra i na ara ni tangiani gi rua igê na wiki. Ma inê kê vatego na tangahuruta tenigi na ara ni meku, gê tagara.’

¹³Ma na mane, i totora takesi, ki ura hagatê, ma ki tu bê so ma, ma ki tahurua na matona, ma ki vi, ‘God, gu takiê, inê na enoni era!’”

¹⁴O Jesu ki vi: “Be vi tangagamu: bâ, na mane ngekê ki aporo i pasina ma ki koro i maana God, ma na Pariseo ki mareha. Renia na enoni ka page kasia so na enoni, i kasia akê marena, ma ka page kasia akê na enoni, i kasia so marena.”

¹⁵Tani na enoni ka merarâ me na kareta sisite tanga o Jesu, hanana vi têtêbuhira. Ma na kariana ka bâsira ma ka ramonira renia.

¹⁶Ma o Jesu ki unira me na kere kare i pasina, ma ki vi: “Mu nakara na kere kare ka râ me i pasiku. Siana kamu vi pusira, renia na enoni, ga mangara na kere kare ngegê, ngaira ka tê viteana God na Araha.

¹⁷Mu rongo! Na anima na enoni, i têtê viteana God manga na kere kare, ngaia ki obania, vi God ki marungia.”

¹⁸Ta na mane ruruguha, i maneraha i pasita na Siu, ki hagatea o Jesu, ki vi: “Araha koro, na ta kani tuguhiê, ve katoa, hanana ve nahunia renia na mêriha mora ma tarema?”

¹⁹O Jesu ki hagatea, ki vi: “Hega kanigo visiê, vi gê koro? Mareha ta na enoni, vi ge koro. God, ngaia getea ma, kani koro.

²⁰Igo ko bani giraragi na ramata: ‘Siana ko gamogamo; siana ko nahu enoni; siana ko hanago; siana ko hagaparu; go takuirerua hete o vaemamu ma kenamu.’”

²¹Na mane ki arami, ki vi: “Haganega tenia na matena gê sisite mênga, inê kê bani oto surigi me na ramata hato ngegana.”

²²Matena o Jesu ki rongo vikana, ngaia ki vi tanga, ki vi: “Na ani gi tage ma na marâ kani mamênga, vi gu katoa. Go arâ ma ko hagavuringenigi na nahuninga hato iamu, ma na meni ko vatera na enoni matareha, ma hanana go page nahunigi na ruruguha i pasina God. Ma hemuri ko arâ me ma ko takuê.”

²³Ma na matena na mane ki rongo vikana, ngaia ki bâ heruruhi, renia ngaia ki ruruguha teha ngavê.

²⁴O Jesu ki bâsia, i bâ heruruhi, ma ki vi: “Aige, i bara tangara na enoni ruruguha, vi ge tê viteana God na Araha!

²⁵I bara tanga na kamelo, vi ge tara banu igê na maana na nila, ma ki bara teha vê hete tanga na enoni ruruguha, vi ge tê viteana God.”

²⁶Na enoni, ga rongoa, ka hagatea, ka vi: “Se, ti kani girara i tahitahi?”

²⁷O Jesu ki arami, ki vi: “Na marâ, i bara tangara na enoni, ngaia ki pe bara tanga God.”

²⁸Mo Petero ki vi: “I hega igami? Igami kami bani panigi na ara ni marâ hato iamami, hanana mi takugo.”

²⁹O Jesu ki vi tangara, ki vi: “I monari. Ma be vi tangagamu vikê: na anima na enoni ma ki pania na ruma iana, se vi na gete iana, se vi na goana, se vi na enana, se vi na karena, hanana God ki marungia,

³⁰ngaia ki page nahunigi rako na marâ i na matena i ngekê teharia i na matena i nago, ma ki page nahunia na mauriha mora ma tarema i na matena i muri me.”

³¹O Jesu ki mera ura râ na kariana tangahuru matarerua, ma ki tamasi tangara, ki vi: “Mu rongo! Igia ka arâ i Jerusaleme. Ma i ngekana ka page voravora me igê na ara ni marâ, na poropete ka bani segegi renia o Karena Enoni.

³²Ga page mahatangenia tangara na enoni, ga pe Siu, ma ngaira ka page rurusia, ma ka page guharia, ma ka page musuria.

³³Ngaira ka page ramusia, ma ka page nahuia ki meme. Ma ngaia ki page mauri aporo igê na oruta na tangiana.”

³⁴Na kariana ka mareha ngavê, vi ge rongogiraragi na marâ ngegana, na girarani na tamasinga ngegana ka pe rongo mataha tangara, ma ngaira ka pe aitangisia na marâ, i visia o Jesu.

³⁵O Jesu ki hagarangia noga i Jeriko, ma ta na mane, i guru na maana ki oga so i na akerena na tara, ma ki baganunungi.

³⁶Matena ki rongoa na hakuta na enoni ga ritare, ngaia ki hagate, ki vi: “Na ta ikê?”

³⁷Ma ngaira ka vi tanga, ka vi: “O Jesu ni Nasarete kani ritare.”

³⁸Ngaia ki ngere, ki vi: “Jesu! Karena Tavite! Gu takiê!”

³⁹Na enoni, ga nanago, ka ramonia, ma ka vi tanga, ki muni. Ma ngaia ki ama ni ngerengere raha nga, ki vivi: “Karena Tavite! Gu takiê!”

⁴⁰Vikana o Jesu ki ura so, ma ki bonasira na enoni, ka merâ me na mane, i guru na maana. Matena i hagarangi me, o Jesu ki hagatea, ki vi:

⁴¹“Na ta kanigo obania, vi gê tanua tangago?” Ma ngaia ki arami, ki vi: “Araha, inê kê obania ve bâbâ.”

⁴²Ma o Jesu ki vi tanga, ki vi: “Ge marava na maamu. Gu rite aporo, suria go tongesuriê.”

⁴³Ki parama, ma ki rite aporo, ma ki râ suria o Jesu i tara, ma ki visia koro God. Matena na enoni ka rigia vikana ngaira hato ka visia raha God.