Read Kahua LUKA 19 Bible Online

LUKA 19 - Kahua bible

LUKA 19

¹O Jesu ki râ nikâ, ma ki banu i Jeriko, ma ki ritare.

²Ma i ngekana ki oga igê ta na maneraha iata na mane ga totora takesi, o Sakeo na atana, ma ngaia ki na mane ruruguha.

³Ngaia ki rapasia bâraha, vi ge bâsia, vi o ti ki no Jesu. Ngaia ki na mane, i raki, ma ki bara tanga, vi ge bâsia o Jesu, renia na enoni ka ura pusia.

⁴Tahema ngaia ki tango ki nanago, ma ki hane igê na apinige na fiki, hanana vi bâsia o Jesu, i arâ me ki riri i ngekana.

⁵Matena o Jesu ki mataro me i na agua ngekana, ngaia ki atakê, ma ki vi tanga o Sakeo, ki vi: “Sakeo, gu so me rêrê, renia i arariê, vigê arâ vê i pasimu i rikini akê.”

⁶O Sakeo ki so rêrê, ma ki unia banu i pasina, ma ki koro na obana.

⁷Na enoni hato, ga bâsia, ka haganega ka tamasi ngurunguru, ka vi: “E, bâ ngaia ki banu ki oga i pasina na mane era!”

⁸O Sakeo ki aharaga, ma ki vi tanga na Araha, ki vi: “Araha, gu rongo! Inê be vatera na enoni matareha na apanena na nahuninga iaku. Ma ki manga gê hagaparua ta na enoni, inê be barua aporo hagehe na haga iana!”

⁹O Jesu ki vi tanga, ki vi: “I ngekê God ki bani bonotenigi na tasi i ruma ikê. Na mane ngekê nikâ ki na raraha iana o Abarahamo.

¹⁰Renia o Karena Enoni ki râ me, hanana i garira ma ki hagatahira na enoni, ga tarupe.”

¹¹Ma o Jesu ki tamasi maramaraveta tangara na enoni, ga rongoa, i tamasi vikana. Ngaia ki hagarangia noga i Jerusaleme, ma ngaira ka takusia ma, vi God ki sugi vora me, hanana vi marungira na enoni.

¹²Tahema ngaia ki vi: “Ta na maneraha ki râ i ta na marê hagatê, hanana vi na maneraha, i teha igê na gavumane i ngekana, ki kasia ki araha, ma hemuri ki kahu aporo me.

¹³Matena i tavoraha, ngaia ki unira me i nago na enoni tagara iana tangahuru gi tage, ma ki tonganira renigi na haga na golo, ma ki vi tangara, ki vi, ‘Matena gê arâ, mu hagavarahagi na haga, gê vategamu.’

¹⁴Hoita, na enoni i pasina ka merongasia, ma ngekana, i murina i bani râ ngaia, ngaira ka hagatorangenira na mane tora tamasinga, hanana vi ga vivi, ‘Igami kami pe obania o vani akana, vi ge marungigami.’

¹⁵“Henaka i manga ngekana, ma ngaia ki vora re na araha iata, ma ki aporo me. Ngaia ki unira ototo râ na enoni tagara iana, i bani vatera na haga, ka râ nga i pasina, hanana vi girara tenia na ara ni hitangita, manga i he kani hagaraha na haga iana.

¹⁶Na ani, i ura me hagenago, ki vi, ‘Araha, na haga tangahuru gi tage ka banu me nikâ henia na haga gi tage, go vateê.’

¹⁷Na araha ki vi tanga, ki vi, ‘I koro era! Igo na enoni tagara, gê hagêguritogo renigo. Suria inê kê girara gê hagêguritogo renigo igê na marâ sisite, inê be kasigo, ku marungigi na hinua tangahuru gi tage.’

¹⁸Ki ura me tani ma ki vi, ‘Araha, na haga gi rima ka banu me nikâ henia na haga gi tage, go vateê.’

¹⁹Tanga na ani ngekê na araha ki vi, ‘Inê be kasigo, ku marungigi na hinua ri rima.’

²⁰“Ki ura me nikâ tani, ma ki vi, ‘Araha, ikê na haga iamu ea. Inê kê baraia ma renia na gahu ma kê bagia.

²¹Inê kê magutenigo, renia igo ko oparigi ma na marâ, go pe hasigi maremu.’

²²Na araha ki vi tanga, ki vi, ‘Igo na enoni tagara go pe koro! Inê kê surigo renigi na tamasinga iamu maremu, kani ga surigo. Igo ko bani girara, inê ki na mane, gê rabaraba, ma kê totora purua ma, ma kê oparigi ma na marâ, gê pe hasi mareku.

²³Hoi, tanu hega kanigo pe vatea na haga iaku tangara na enoni, ke hagavaraha. Manga go vatea na haga iaku tangara na enoni, ke hagavaraha, vikê inê be girara ve torea aporo na haga iaku henigi tani kê nikâ, matena gê aporo me.’

²⁴“Ma ngaia ki vi tangara na enoni, ga ura i ngekana, ki vi, ‘Mu tavoa râ na haga na golo tenia, ma kamu vatea nga na enoni tagara, i bani nahunigi na haga tangahuru gi tage.’

²⁵Ma ngaira ka vi tanga, ka vi, ‘Araha, ngaia ki bani nahunigi na haga tangahuru gi tage!’

²⁶Ngaia ki arami, ki vi, ‘Be vi tangagamu: ga page vatea akê nikâ ta marâ tanga na enoni, i bani nahunia na marâ; ma ka page tavoa râ na kere marâ sisite tenia na enoni, i takusia, vi ngaia ki nahunia.

²⁷Hoita, ma tangara na merongaku, ga pe obaniê, vi ve marungira: rakura me ikê, ma kamu nahuira ka meme i maaku.’”

²⁸O Jesu ki tamasi hato vikana, ma hemuri ki uria nga na râha iana, ki nanago ki akê i Jerusaleme.

²⁹Matena i hagarangia i Betepage ma i Betani, igê na Hungana ni Olive, ngaia ki hagatorangenirerua na kariana gi rua, karu nanago.

³⁰Ngaia ki vi tangarerua, ki vi: “Muru arâ igê na hinua ikana. Matena muru bê banu vê igê, igamurua kamuru page tarahua igê na bêhâgana na tonki, ga baroa ma ka pe tagiria rârâ na enoni. Muru rupasia, ma kamuru merâ me ikê.

³¹Manga vi ta na enoni ma ki hagategamurua, ki vivi, ‘Muru rupasia tanga na tao?’ Muru vi tanga, kamuru vivi, ‘Na Araha kani obania.’”

³²Ngairerua karu râ, ma karu tarahugi na ara ni marâ, o Jesu i bani visigi.

³³Matena garu rupasia na bêhâgana na tonki, na avanuna ka hagate, ka vi: “Muru rupasia tanga na tao?”

³⁴Ma ngairerua karu arami, karu vi: “Na Araha kani obania!”

³⁵Ma ngairerua karu merâ na bêhâgana na tonki tanga o Jesu. Ma hemuri ngairerua karu vatarangenigi na gahu iaterua igê na gerina na bêhâgana na tonki, ma karu tamania o Jesu, ki hane ki oga igê.

³⁶Matena i tage ki râ, na enoni ka vatarangenigi na gahu iata i tara, karia ki râ igê.

³⁷Matena ngaia i hagarangia i Jerusaleme, igê na benitara i Hungana ni Olive, rako era na kariana ka haganega ka visia koro God ma ka visia raha renigi na ara ni mena, ga bani bâsigi. Ngaira ka ngerengere, ka vivi:

³⁸“God ke tamania na maneraha, i arâ me igê na raramohana na Araha! Marapeha i pasina God, ma ka visia raha God!”

³⁹Ma tani na Pariseo i pasita na enoni ka tamasi raha tanga o Jesu. Ngaira ka vi: “Araha, gu ramonira na kariamu, ke muni!”

⁴⁰O Jesu ki arami, ki vi: “Be vi tangagamu: manga vi ngaira, ma ka munimuni, na hê ka page ngerengere nogata!”

⁴¹Ngaia ki hagarangia me era noga na hinua raha, ma na matena i rigia, ngaia ki angisia.

⁴²Ngaia ki vi: “E, ge vora re, vi gamu rongogirara i ngekê na marâ, i torea me na marapeha! Ma ki asa iami, vi gamu rongogirara!

⁴³Renia i page tarahugamu na matena na bagabevoana: na merongami ka page rihigamu igê ma ka page apêpusigamu, ka page rarogamu igê ma ka page sugarigamu.

⁴⁴Ngaira ka page hagasuhigamu hagetage, igamu ma na enoni i pasimi. Ngaira ka page hogegi na ara ni ruma hato, ma na hê na ruma ki asa, vi ge tâtâ igê na peregani, ma ka haripage ma, renia igamu kamu pe hinarua na girarana na matena, God i arâ me ki hagatahigamu igê.”

⁴⁵O Jesu ki banu i Ruma ni Rotu, ma ki haganega ki tarigenira hura na enoni, ga hagavuri igê.

⁴⁶Ngaia ki vi tangara, ki vi: “Na tamasinga iana God i bani goga igê na Buka Apuna, ki vi, ‘Na ruma iaku ki na ruma ni nunginungiha.’ Ma igamu kamu tanua renia vi na agua tangara na enoni hanago!”

⁴⁷I na ara ni tangiani o Jesu ki hagesurira na enoni i Ruma ni Rotu. Na mane ni vogasiha ga teha, na meraha i pasita na enoni, ma na mane ni hagesuringa ni Rotu ka obania, vi ga nahuia ki meme,

⁴⁸ma ka rapa makira renia, suria ngaira hato na enoni ka obania ma, vi ge karingagi na ara ni tamasinga iana.