Read Kahua LUKA 2 Bible Online

LUKA 2 - Kahua bible

LUKA 2

¹Igê na matena ngekana o Augusito, na maneraha i teha igê na gavumane i Roma, ki obania, vi tomanira na enoni, ma ki bonasira na enoni hato igê na ara ni agua, i marungigi, ka segegi na atata.

²Na matena ngekana ki kahu haganega ka tomanira moramora igê na enoni, mo Kuirinio ki gavumane i Siria.

³Tahema na ara ni enoni ki arâ i hinua iana, hanana ga segea na atana.

⁴O Josepo ki tavoraha i hinua i Nasarete i Galilea tanga i Jutea, tanga na hinua i Beteleme, na hinua i vora igê o Tavite, na maneraha. O Josepo ki râ i ngekana, suria ngaia ki na raraha iana o Tavite.

⁵Ngaia ki râ i ngekana henia ka Maria, ga bani atengenia tanga. Ngaia ki obara.

⁶Ma na matena garu oga i Beteleme, ka Maria ki riki na gerina.

⁷Ngaia ki apara na bêbê ni kare, ki baraia renigi na gahu, ma ki hagatâhia igê na hahorê iata na puruka, suria i mareha ta na agua tangarerua igê na ruma ni mahuara.

⁸Ma i ngekana ka oga tani na mane, ga bâsuri sipi. Ngaira ka oga igê na bena ni go suria na bungiana, hanana ga anumasigi na totoha ni sipi iata.

⁹Ta na angelo iana na Araha ki vora me tangara ma na raramohana na Araha ki takirira. Ngaira ka magu teha ngavê.

¹⁰Ma na angelo ki vi tangara, ki vi: “Siana kamu magu! Bâ, inê kê torea me na taroha koro tangagamu, i page hagakoro obata bâraha na enoni hato.

¹¹Igê na bungiana i ngekê, i hinua iana o Tavite, ki kahu vora me igê na Hagamauri iami, o Kirisito na Araha.

¹²Na tarana i page hagatanga monari tangagamu renia, kani manga ikê: igamu kamu page tarahua na kere kare, ga bani baraia renigi na gahu, ma ki tâ igê na hahorê iata na puruka.”

¹³Ki parama na rehagaro raha na angelo iana na Araha, ma ki vora me henia na angelo, i bani vora me akani. Ngaira ka ki, ma ka visia raha God, ka vi:

¹⁴“Ka visia raha God, na Araha raha teha! Ma na marapeha i maveta tangara na enoni, ga hagakoro obana God.”

¹⁵Matena na angelo ka aporo i pasina God tenira, na mane, ga bâsuri sipi, ka hetamatamasi, ka vi: “Nika, ge râ i Beteleme, ke bâsia na tarana, i akê me akana, na tarana na Araha i kahu hagarongogia ma renia.”

¹⁶Vikana ngaira ka hata ni râ, ma ka tarahurerua ka Maria mo Josepo, ma ka bâsia na kere kare, i tâ igê na hahorê iata na puruka.

¹⁷Matena na mane, ga bâsuri sipi, ka bâsia na kare, ngaira ka hagarongorerua renia na marâ, i bani visia na angelo renia na kare ngekê.

¹⁸Na enoni hato, ga rongoa na tamasinga iata na mane, ga bâsuri sipi, ngaira ka konekone bâraha.

¹⁹Ka Maria ki takusigi tare na marâ hato ngegana ma ki garigi bâraha i obana.

²⁰Na mane, ga bâsuri sipi, ka aporo, ka visia koro ma ka visia raha God renigi na marâ hato, ga bani rongogi ma ka bani bâsigi. Na ara ni marâ hato ka tagenani ma na marâ, na angelo i bani visigi tangara.

²¹I murini na tangiani ge varu, matena i arari, vi ga retea râ na gavona na varana na kere kare, ngaira ka hêtana renia vi o Jesu. Na ata na angelo i bani hêtana renia, matena kenana ki mamênga, vi ge atuingenia.

²²I râ me na matena tangarerua o Josepo ma ka Maria, garu katogi igê na marâ, i visigi na Buka na Ramata iana o Moise, ma karu katogi na marâ, hanana garu matarotaro aporo surigi na tauha. Vikana ngairerua karu torea râ na kere kare i Jerusaleme, hanana garu tagarenia tanga na Araha.

²³Na ramata iana na Araha ki vi vikê: “I tuguhirerua na enani kare, garu vatea tanga na Araha na ara ni bêbê ni kare mane.”

²⁴Ngairerua karu râ nikâ, karu vogasi suria na ramata iana na Araha. Na ramata ngekê ki vi: “Ga vogasi renirerua na barisumata gi rua se na bêhâgaterua na kuvê.”

²⁵Hoita, i Jerusaleme ki oga igê ta na mane, o Simeone na atana. Ngaia ki na mane koro ma ki oto na parongana i maana God. Ma ngaia ki naasia na matena, God i page hagatahira igê na Ai ni Isiraele. Na Higona Apu ki angaria.

²⁶Ma na Higona Apu ki bani hagagirara, hanana vi ngaia ki pe meme, mataro me ki bâsia i nago na Mesaia, na Araha i bani surua.

²⁷Na Higona Apu ki hagatakusia o Simeone, ki banu i Ruma ni Rotu. Bevoana na enana karu torea na kere kare o Jesu, ngairerua karu mebanu i Ruma ni Rotu, hanana vi garu katoa igê tanga o Jesu na marâ, na Ramata i na Buka Apuna ga bonasirerua renigi.

²⁸O Simeone ki topea na kere kare, ki visia koro ma ki visia raha God, ki vi:

²⁹“Araha, i ngekê igo ko hagamonaria na suruha iamu. Hoi, gu hagamarumungeniê, na kariamu, be magahuru râ, suria i togo na aitangihaku.

³⁰Renigi na maaku mareku igê inê kê bâsia na Hagamauri, go bani surua.

³¹Igo ko hagatorangenia tangara na enoni hato i maveta.

³²Ngaia ki na marara, i mavesigi na aitangihata na enoni, ga pe Siu. Ma ngaia ki hagarahasira na kariamu, na Ai ni Isiraele.”

³³Na vaemana ma kenana na kare karu konetenigi na marâ, i visigi o Simone renia.

³⁴O Simone ki nungia God tangarerua, ma ki vi tanga ka Maria, kenana o Jesu, ki vi: “God ki bani atea na kare ikê, hanana i page hagavotarira ma ki hagarahasira na ani rako na Ai ni Isiraele. Ngaia ki na tamasinga, i râ me tenia God, ma ka rako na enoni, ga page ura pusia.

³⁵Ma ngaia ki page hagabângenigi mave na takotako pinihi iata. Ma na mamasiaganiha ki page tarahugo igê na aitangihamu, i tagenana manga i takego na tatapa borahu.”

³⁶Ma i ngekana ki oga nikâ igê ta na poropete hehene, ka Ana na atana, ka karena o Panuele, tenia na varo ninuni iana o Asere. Ngaia ki gemêa ngavê. Ngaia ki êragi surigi na harisi gi pi.

³⁷Ma hemuri ngaia ki nâ surigi na harisi tangahuru ge varu matara ke he. Ngaia ki gâga tare i Ruma ni Rotu. Igê na tangiani ma na bungiani ngaia ki rahesia God, ki harihari, ma ki nunginungi.

³⁸Igê nga na matena ngekana ngaia ki guru me, ma ki visia koro God, ma ki tamasi renia na kere kare tangara na enoni hato, ga naasia God, vi hagatahia i Jerusaleme.

³⁹Matena o Josepo ma ka Maria garu bani katogi na ara ni marâ hato surigi na ramata iana na Araha, ngairerua karu aporo i pasiterua, i hinua i Nasarete i Galilea.

⁴⁰Ma na kare ki raha akê me, ki ramo na apena ma ki mataha ngavê na obana, ma God ki takuia bâraha.

⁴¹I na ara ni harisi na enana o Jesu karu arâ tare i Jerusaleme tanga na Tangiana Raha na Paseka.

⁴²Matena o Jesu ki tangahuru matarerua na harisi iana, ngairerua karu râ tanga na Paseka, manga bani hanana ga arâ.

⁴³Matena ga hato na Tangiani na Paseka, ngairerua karu tavoraha aporo tanga i pasiterua, ma na kere mane o Jesu ki oga so i Jerusaleme. Na enana karu pe hagarea.

⁴⁴Ngairerua karu takusia ma, vi ngaia ki oga henira na enoni getera, ga tage râ. Tahema ngairerua karu râ na tangiana hagenani, ma hemuri ngairerua karu haganega karu bâbâ renia i berarogata na goaterua ma na tamaterua.

⁴⁵Ngairerua karu pe tarahua. Ma ngekana ngairerua karu garia karu aporo i Jerusaleme.

⁴⁶Igê na oruta na tangiana ngairerua karu tarahua i Ruma ni Rotu. Ngaia ki oga henira na mane ni hagesuringa iata na Siu. Ngaia ki karingara ma ki hagatera renigi rako na marâ.

⁴⁷Na enoni hato, ga rongoa, ka konekone renigi na aramiha ma na takotako mataha iana.

⁴⁸Na enana karu hagagira renia, matena garu bâsia, ma kenana ki vi tanga, ki vi: “Kareku, i hega kanigo katogamirua vikê? Inê ma o vaemamu, igamirua kamuru tako bâraha vê, matena muru garigo.”

⁴⁹O Jesu ki aramirerua, ki vi: “Tanu hega kanimuru gariê? Muru pe girara vari, vi i tuguhiê, vigê gâga i pasina o Vaemaku?”

⁵⁰Ma ngairerua karu pe rongogirara na marâ, i visia tangarerua.

⁵¹Hoita, o Jesu ki aporo henirerua tanga i Nasarete ma ki tê viteaterua. Kenana ki takusigi tare na marâ hato ngegê ma ki garigi i obana.

⁵²Mo Jesu ki raharaha, ma ki mataha nga na obana, ma God ma na enoni ka takuia nga.