Read Kahua LUKA 20 Bible Online

LUKA 20 - Kahua bible

LUKA 20

¹Ta na tangiana o Jesu ki oga i Ruma ni Rotu, ma ki hagesurira igê na enoni, ma ki ateate renia na Taroha Koro. Ma na mane ni vogasiha ga teha ma na mane ni hagesuringa ni Rotu henira na meraha ka haku me.

²Ma ngaira ka vi tanga, ka vi: “Gu visia me tangagami: na ramoha ta kanigo nahunia, ko tanugi re na marâ ngegana? O ti kani vatego na ramoha, ko katokato vikana?”

³O Jesu ki aramira, ki vi: “Hoi, naka be hagategamu nogaku. Mu visia me tangê:

⁴O ti kani vatea o Joane na ramoha, ki hagabatesimo? God, se na enoni?”

⁵Ngaira ka haganega ka hehagateri so mareta, ka vi: “Ge vi bâ hega? Manga vi ga aramia, ka vivi, vi ‘God’, ngaia ki page vi, ‘Hoi, hega kanimu pe bani tongesuria o Joane?’

⁶Ma ki manga vi ga vivi, vi ‘Na enoni’, na enoni hato igê ka page arihahunigia, suria ngaira hato kaniga tongesuria, vi o Joane ki poropete.”

⁷Tahema ngaira ka arami, ka vi: “Igami kami pe girara, vi o ti kani hagatorangenia.”

⁸Ma o Jesu ki vi tangara, ki vi: “Hoi, menê nogaku kê usi, vi ve visia tangagamu vi na ramoha ta, kanigê nahunia, kê tanugi re na marâ ngegana.”

⁹Ma o Jesu ki tamasi maramaraveta vikê tangara na enoni, ki vi: “Ta na mane ki hasia na mu ni vaini, ma na enoni tagara ka taharia na mu ni vaini tenia. Ma hemuri na avanuna na mu ni vaini ki pania na hinua iana, ma ki oga vê arihu era.

¹⁰Na matena ga mata noga igê na guani na vaini, ngaia ki hagatorangenia ta na kare vurivuri tangara na enoni, ga taharia na mu ni vaini, hanana vi meratongani na guani na vaini. Ma na enoni, ga taharia na mu, ka ramusia na kare vurivuri akana ma ka hagatorangenia vê ki aporo baguru.

¹¹Vikana ngaia ki hagatorangenia nikâ tani na kare vurivuri, ma na enoni, ga taharia na mu, ka ramusia nikâ, ka hagamakia, ma ka hagatorangenia vê ki aporo baguru.

¹²Ma hemuri ngaia ki hagatorangenia na oruta na kare vurivuri. Na enoni, ga taharia na mu, ka hagamamaria, ma ka kasia hura.

¹³Ma hemuri na avanuna na mu ni vaini ki vi, ‘Be kato hega? Inê be hagatorangenia o kareku hetakui. Inê kê girara, vi ngaira ka page hanetasia!’

¹⁴Ma na matena na enoni, ga taharia na mu, ka bâsia, ngaira ka hetamatamasi, ka vi, ‘O karena o avanuna na mu ngekana. Ngaia ki page nahunia na mu. Nika, ge nahuia ke me, ma ka page nahunia igia na mu ni vaini!’

¹⁵Ngekana ngaira ka kasia hura tenia na mu ni vaini, ma ka nahuia ki me.” O Jesu ki hagate, ki vi: “Hoi, na ta kani page katoa na avanuna na mu ni vaini tangara na enoni, ga taharia na mu?

¹⁶Ngaia ki page arâ me, ma ki page nahuira ka meme na mane ngegana, ma na enoni getera ka page taharia na mu ni vaini tenia.” Matena na enoni ga rongo vikana, ngaira ka vi: “I asa vê!”

¹⁷O Jesu ki bâ tatarê renira, ma ki hagate, ki vi: “Na ta ki na girarana na segesegeha ikê, i vi? ‘Na u, ga kasia na mane, ga torea na ruma, renia ga vi, vi pe koro, ngaia ki vora re na rangata na hagêguringa.’

¹⁸Na ara ni enoni, i tapasu igê na u ngekana, ngaia ki makomo agani. Ma ki manga na u ngekana, ma ki votavota huria ta na enoni, na enoni ngekana ki page amenamena.”

¹⁹Na mane ni vogasiha ga teha ma na mane ni hagesuringa ni Rotu ka uhungia, vi ga hagatutunguhia nga o Jesu igê na matena ngekana, renia ngaira ka vi, vi ngaia ki maramaraveta ma ki tamasi ohoho renira. Ma ngaira ka magutenira na enoni.

²⁰Ngekana ngaira ka ogakaria na matena, i arari. Ngaira ka vatevatera tani na mane, hanana vi ga maramarenuni koro, ma ka hagatorangenira, ka uhungia renigi na hagatenga, hanana vi ga girara, ga mahatangenia tanga na gavumane, i oto tanga vi suria.

²¹Na mane, ga maramarenuni koro ngegana, ka vi tanga o Jesu, ka vi: “Araha, igami kami girara, vi na tamasinga iamu ma na hagesuringa iamu ka oto. Igami kami girara, vi na parongamu ki tagenana ma tangara na ara ni enoni, ma ko hagesurira na enoni renigi ma na marâ, God i obanira na enoni, vi ga tanugi. Ma na hagesuringa iamu ki monari.

²²Gu visia me, i koro ma vari surigi na Ramata iaka i na Buka Apuna, vi ga vuria na takesi tanga na gavumane i Roma, se i mareha?”

²³Ma o Jesu ki bani giraragi na katokato iata, ma ki vi tangara, ki vi:

²⁴“Mu hagabâsiê renia na haga na siliva! O ti ka na nununa ma na atana igê na haga ikê?” Ngaira ka arami, ka vi: “Na anina na gavumane i Roma.”

²⁵Ngekana o Jesu ki vi: “Hoi, mu vatea na gavumane na anina na gavumane, ma kamu vatea God na anina God.”

²⁶I bara hagetage tangara, vi ge hagaparua i ngekana i maata na enoni. Tahema ngaira ka muni ma, ma ka konetenia na aramiha iana.

²⁷Tani na Satuseo ka râ i pasina o Jesu. (Ngaira ki na enoni, ga vi, vi na enoni, ga me, ki asa, vi ge mauri aporo.) Ngaira ka hagatea, ka vi:

²⁸“Araha, o Moise ki bani segea na ramata ikê tangagia, ki vi, ‘Manga na mane, ma ki me tenia na kaniana, ma ki mareha, vi garu apara kare, ki tuguhia o vesina, i auragia ka nâ ngekana, hanana vi garu apara kare tanga na mane, i me.’

²⁹Manga vi o vahegoata gi pi. Na mane i nago ki êragi, ma ki pe apara kare, ma ki me.

³⁰Ma hemuri na ruata na mane ki êragia ka nâ ngekana.

³¹Ma hemuri na oruta na mane, ma ki tagenana ma henira na vahegoata gi pi: ngaira hato ka pe apara kare ma ka me.

³²Ma hemuri na gete ki kahu me nogana.

³³Hoita, na matena ga mauri aporo na enoni, ga me, igê na tangiana ni mêriha aporo, o ti kani kaniana? Ngaira hato vahegoata gi pi kaniga êragia!”

³⁴O Jesu ki aramira, ki vi: “Na mane ma na gete i na matena i ngekê kaniga auragi.

³⁵Na mane ma na gete, God ki takusira, vi ga mauri aporo tenira na enoni, ga me, ma ka mauri i na matena ngekana i muri me, ngaira ki asa vige êragi.

³⁶Ngaira ka mangara na angelo, ma ki asa, vi ge me. Ngaira ki na karena God, renia ngaira ka bani mêri aporo.

³⁷Ma o Moise ki hagatanga monari ngavê, vi na enoni, ga me, ka page mauri aporo. Igê na sihonga renia na apinige, i noro, o Moise ki visia na Araha, vi ‘na God iana o Abarahamo, ma na God iana o Isako, ma na God iana o Jakobo.’

³⁸Na girarana na marâ i visia ngekana, ki vi, ngaia ki na God iata na enoni, ga mauri, mareha vi iata na enoni, ga me, suria tanga God ngaira hato ka mauri.”

³⁹Tani na mane ni hagesuringa ni Rotu ka tamasi, ka vi: “Go vi koro, Araha!”

⁴⁰Suria ngaira ka magu, vi ge hagatea nikâ o Jesu.

⁴¹O Jesu ki vi tangara, ki vi: Tanu hega kani vi ga visia, vi na Mesaia, i page voravora me, vi ngaia ki no karena Tavite?

⁴²Renia ngaia marena o Tavite ki visia igê na Buka ni Ki, ki vi: ‘Na Araha ki vi tanga na Araha iaku, ki vi: Gu oga so ikê heniê igê na atohaku,

⁴³mataro me inê kê nakara na merongamu i ruguhana na êgamu, hanana go marungira.’

⁴⁴Tahema o Tavite ki visia, vi ngaia ki na Araha. Tanu hega na Mesaia ki no karena o Tavite?”

⁴⁵Matena na enoni hato ka karinga, o Jesu ki vi tangara na kariana, ki vi:

⁴⁶“Mu hinarura na mane ni hagesuringa ni Rotu. Ngaira ka tuguni borahu, ma ka arârâ, ma ka obanira na enoni getera, vi ge hagahigasira igê na tavani hakuta. Ngaira ka ategi na atohata na maneraha i ruma ni sukuru, ma na atohata na maneraha igê na agua ni ngêra, matena ga magoto.

⁴⁷Ngaira ka hagabekasira na gete na nâ, ma ka hanagogi na nahuninga iata, ma hemuri igê na nunginungiha borahu iata ngaira ka hagaparu ma! Na hagatotongoha tangara ki page era ngavê!”