Read Kahua LUKA 21 Bible Online

LUKA 21 - Kahua bible

LUKA 21

¹O Jesu ki bâ rârâ ma ki bâsira na mane ruruguha, ga kasikasi haga i rarona na bokesi ni haga tanga na Ruma ni Rotu.

²Ma nikâ ngaia ki bâsia ta na gete, i nâ ma ki matareha ngavê, ma ki kasirerua na senti gi rua i rarona na bokesi.

³Ma ngaia ki vi: “Be vi tangagamu: na gete na nâ matareha ikê ki kasi nga i rarona na bokesi na haga, i raha teharigi na haga ga kasi na enoni hato getera.

⁴Renia na enoni getera ka kasi na ani ga hita na haga, na haga ga pe obanigi tangara so mareta. Ma ke bâsia na nâ ikê. Ngaia ki matareha ngavê, ma ngaia ki kasi hato ngavê na haga, hanana vi ngêngê renigi.”

⁵Tani na hitangita ka tamasi renia na Ruma ni Rotu, ka vi: “E, na ruma ki bâkoro era renigi na hê bâkoro ma renigi na votovoto, na enoni ga tagarenigi tanga God.” Ma o Jesu ki vi:

⁶“Mu bâsigi na marâ hato ngegana. I page arâ me na matena, i asa vê tani na hê, vi ge oga gatagata igê na peregana. Ngaigi hato ki page agorata so i ano.”

⁷Ngaira ka hagatea, ka vi: “Araha, i na keta ki page voravora me igê na tarana ngekana? Ma na ta ki na girarana, hanana mi girara na matena, i page voravora me igê na marâ ngekê?”

⁸O Jesu ki vi: “Mu bâsigamu! Siana ta na enoni ki hagabekasigamu! Renia rako na mane ka page arâ me, ma ka vivi, vi ngaira kani inê, ka vivi, ‘Inê kani ngaia!’ Ma ka vi nikâ, ‘Nga na matena ngekê!’ Ma siana kamu arâ surira.

⁹Siana kamu magu, matena mu rongogi na henahuita, na ani ga hagarangi ma na ani ga hagatê. Na marâ ngegana ka page hagenago me, ma ka mareha, vi ge vi, vi na hagahatungina ki hagarangi me noga.”

¹⁰Ma ngaia ki vi nikâ: “Na marê ka page hemeronge heri. Na gavumane ka page heariha heri.

¹¹Ma igê na ara ni agua ka page voravora me na nunu raha, ma na magêha, ma na mera. Ma ka page voravora me na marâ, ga hagamagusira na enoni, ma na girarani raha i vavearo.

¹²“Ma i nago tarani ga voravora me na marâ ngegana, ka page rakugamu, ma ka page merongasigamu, ma ka page hagatamasigamu i na ruma ni sukuru, ma ka page toregamu reniê inê i maata na maneraha ma na gavumane.

¹³I ngekê ki na matena koro tangagamu, mu tarohenia igê na Taroha Koro.

¹⁴Mu garigari takoha i nago tarani na marâ ngegana, ma kamu vi, vigamu kamu pe hataera i obami, vi gamu teharira igê na tamasinga iami.

¹⁵Renia inê nga kanigê page vategamu na tamasinga ma na takoha mataha, ma ki asa ta na merongami, vi ge tamasi pusigi, se vige hagaigagi na tamasinga iami.

¹⁶Na enami, ma na goami, ma na kariami, ma na tamami ka page mahatangenigamu, ma ka page hagamesira na hitangimi.

¹⁷Na ara ni enoni ka page kitenigamu reniê inê.

¹⁸Ma ki asa hagetage ta na marâ, vi ge erasigamu.

¹⁹Mu nganganihaga, suria igê na tarana ngekana igamu kamu page tahitahi.

²⁰“Bevoana mu bâsira na mane ni me ga rihia Jerusaleme, mu page girara, vi ngaira ka sugi hagasuhia.

²¹Ma i na matena ngekana, na enoni, ga oga i Jutea, ki ararira ga gavagava tange na hungani. I koro, na enoni, ga goga i hinua raha, ka pania, ma na enoni, ga oga i bemu, siana ka bêbanu i hinua raha.

²²Renia na tangiani ngegana ki na ‘Tangiani ni Hagaitangiha’, ma ka hagamonarigi igê na ara ni marâ, na Buka Apuna i bani visigi.

²³Na tangiani ngegana ka page aera ngavê tangara na gete, ga obara, ma tangara na gete, ga hagasusu kare. Na bagabevoana, i era ngavê, ki page tarahua na agua ngekê, ma God ki page hagaitangira na enoni ngegê.

²⁴Ngaira ka page nahuira ka meme renigi na tatapa borahu, ka page rakura ma ka page torera tangagi na agua hato getigi, ma na enoni ahuroto ka page hagaerasia ngavê i Jerusaleme, ma ka page nahunia, mataro me ki hatohato na matena, vi ge nahunia vikana igê.

²⁵“Na girarani ka page voravora me igê na arito ma na hageha ma na higu. Ma na enoni i maveta ka page anumanuma bâraha renigi na bagabevoani, ma ka page magutenia na asi, renia i rongo raha ma ki maguhiguhi raha.

²⁶Na enoni ka page bubununuga, matena ga naasia na eraha, i tarahua na maveta hagenani. Ma na marâ i vavearo ka page hagatasigi na tarata.

²⁷Ma hemuri o Karena Enoni ki page voravora me, i arâ me igê na vaha. Ngaia ki raramohaga hunia, ma ki bâbâ hahaneaga teha.

²⁸Matena ga haganega ka voravora me na tarani ngegana, mu aharaga ma kamu bâbâ rikiriki, suria na tahingami ki hagarangi me noga.”

²⁹Mo Jesu ki tamasi maramaraveta vikê tangara, ki vi: “Mu bâsia na apinige na fiki ma na ara ni apinige getigi.

³⁰Bevoana mu bâsia na hagahisi, igamu kami girara, vi hagarangi me noga na matena na hutohutoêa.

³¹I tagenana ma, na matena mu bâsigi na tarani ngegana, ga voravora me, igamu kamu page girara, vi God ki sugi râ me, ke marungira na enoni.

³²“Mu rongo! Na ara ni tarani ngegana ka page voravora me togâta na enoni, ga gâga i na matena i ngekê.

³³Na vavearo ma na ano karu page hato, nga ma na tamasinga iaku ki asa, vi ge page hato.

³⁴“Mu bâsigamu! Siana kamu aruma bâraha surigi na magotoha ma ki ruguhigamu na tonoha, ma na takoha raha renia na mauriha na apemi. Manga i mareha, ki parapara ma vari, ma ki tarahugamu na Tangiana ni Hagaitangiha.

³⁵Renia ngaia ki manga na etu, i tura na enoni hato i maveta hagenani.

³⁶Mu bâbâ, ma kamu nunginungi tare, hanana mu ramoramo, kamu tahitahi tenigi na ara ni marâ, ga page voravora me ngegana, ma kamu rêra i maana o Karena Enoni.”

³⁷I na bevoana ngekana surigi na tangiani o Jesu ki hagesurira igê na enoni i Ruma ni Rotu, ma na matena i susu na arito, ngaia ki huhura, ma surigi na bungiani ngaia ki gâga igê na Hungana ni Olive.

³⁸Igê na mahogotani na ara ni enoni ka arâ i Ruma ni Rotu, hanana vi ga karinga.