Read Kahua LUKA 22 Bible Online

LUKA 22 - Kahua bible

LUKA 22

¹Ga hagarangi me noga na Tangiani Raha, ga ngaua igê na bereti, i pe ahunga. Na atani na Tangiani Raha ngegana ka na Paseka.

²Na mane ni vogasiha ga teha ma na mane ni hagesuringa ni Rotu ka garia na tarana ta kani vi ga nanahuia o Jesu renia; suria ngaira ka magutenira na enoni.

³Ma Satana ki angaria o Juta Isikariote. Ngaira ki na hitangita na tangahuru matarerua na kariana o Jesu.

⁴Vikana ngaia o Juta ki râ ma ki meratamasi na mane ni vogasiha ga teha ma na araha iata na mane ni me, ga bâsuria na Ruma ni Rotu, hanana vi manga i he ki girara, vi mahatangenia o Jesu tangara.

⁵Ngaira ki koro na obata renia, ma ka vi, ge vuria.

⁶O Juta ki agana henira, ma ki haganega ki garia na matena, i koro tanga, hanana vi mahatangenia igê o Jesu tangara, hanana vi siana na enoni ke girara.

⁷Surigi na Tangiani Raha, ga ngaugi igê na bereti, i pe ahunga, ki ata me na tangiana, vi ga nanahuira igê na kareta na sipi.

⁸O Jesu ki hagatorangenirerua o Petero mo Joane, ma ki vi tangarerua, ki vi: “Muru arâ ma kamuru hagarêa na ngêra na Paseka tangagia, ka ngaua.”

⁹Ngairerua karu hagatea, karu vi: “I he kanigo obanigamirua, vi gamuru hagarêa igê?”

¹⁰Ngaia ki vi: “Muru rongo! Matena muru bêbanu vê i hinua raha, ta na mane, i torea na pi na ve, ki page arâ me vurusigamurua. Muru bêbanu suria i ruma, i bêbanu igê.

¹¹Ma kamuru vi tanga na avanuna na ruma, kamuru vivi, ‘Na Araha ki hagatego, vi i he na kiboru tangagami, na kariaku minê, hanana mi page ngêa igê na ngêra na Paseka?’

¹²Ngaia ki page hagabâsigamurua renia na kiboru raha i haha. Na ara ni marâ, muru obanigi, ka bani nanê igê, ma i ngekana kamuru hagarêgi na ara ni marâ.”

¹³Ngairerua karu râ, ma karu tarahugi na ara ni marâ, i bani visigi o Jesu tangarerua. Ma ngairerua karu hagarêa igê na ngêra na Paseka.

¹⁴Na matena ni ngêra o Jesu ma na kariana ka oga so, hanana vi ga ngêngê.

¹⁵Ma ngaia ki vi tangara, ki vi: “Inê kê obania bâraha vi ve ngêa na ngêra na Paseka ikê henigamu hagenago, ma kê kahu hatamia na mamasiaganiha raha.

¹⁶Be vi tangagamu: i asa, vi ve page ngêa nikâ, mataro me ki mataha igê na morana na girarana, na matena God i araha igê.”

¹⁷Mo Jesu ki têa na kâkâ, ki visia raha God, ma ki vi: “Mu têa ma kamu tono, igamu hato.

¹⁸Renia ve vi tangagamu: i asa iaku, vi ve tono nikâ na vaini ikê, haganega tenia i ngekê, mataro me ki arâ me na Arahanga iana God.”

¹⁹Ma ngaia ki têa na bereti, ma ki visia raha God, ki pipia, ma ki vutungira, ki vi: “Ikê na apeku, [gê tagarenia renigamu. Mu tanua na tarana ngekê, hanana mu takusiê igê.”

²⁰I tagenana ma, matena ga ngê hato, ngaia ki vatea na kâkâ tangara, ma ki vi: “Na kâkâ ikê ki na suruheri haoru iana God. Na gapuku, gê ringia renigamu, hanana i hagagatagatania na suruheri ngekê.]

²¹“Ma kamu bâ! O vani, i hagavuringeniê, ki meêbêrihu!

²²Renia o Karena Enoni ki page meme suria na katoha iana God. Ma ki era ngavê tanga na mane ngekana, i hagavuringenia!”

²³Ma ngaira ka haganega ka hehagateri, vi o ti na hitangita, kani page katokato vikana.

²⁴Na kariana o Jesu ka hemangari renia vi o ti na hitangita kani araha i berarogata.

²⁵O Jesu ki vi tangara, ki vi: “Na araha i maveta ikê ka marungira ma ka ramonira na kariata, ma na maneraha ka obanira na enoni, vi ge visira, vi ga koro.

²⁶Ma na tarana ngekê ki pe ararigamu, vi gamu tanua. Ma ki tuguhia na enoni raha i pasimi, ki manga hete na enoni purua. Ma ki tuguhia na enoni, i araha, ki manga hete na enoni tagara.

²⁷O ti kani teha, na enoni, i oga so ma tanga i ngêngê, se na enoni, i totora me na ngêra? Ngaia nga ka na ani i oga so ma tanga i ngêngê. Ma i berarogami inê nga kanigê manga na enoni, i totora me na ngêra.

²⁸“Ma igamu nga ngana ani, mu bani oga heniê igê na ara ni mamasiaganiha iaku.

²⁹Ma ki tagenana ma o Vaemaku ki hagêguriê, kê araha, inê nogaku be hagêgurigamu, kamu araha.

³⁰Igamu kamu page meêbêrihu, matena inê kê araha. Ma igamu kamu page gâga so igê na atohata na maneraha, hanana mu surira na varo ninuni tangahuru matarerua iana o Isiraele.

³¹“Simone, Simone! Bâ, Satana ki nungia God, ki hagamarumungenia, ki uhungigamu hato, manga na mane, i haata na raisi. Ma God ki hagamarumungenia.

³²Ma inê kê bani nungia God tangago, Simone, hanana go ramoramo igê na tongesuriha. Ma na matena go ahariê aporo, ki tuguhigo, go hagaramonira na tamamu.”

³³O Petero ki arami, ki vi: “Araha, inê kê nanê, hanana vi gê arâ henigo igê na ruma ni hagaitangiha, ma kê meme henigo!”

³⁴O Jesu ki arami, ki vi: “Petero, be vi tangago: i rikini akê matena na kua mane ki mamênga, vi ge angiangi ma igo ko bani hagaiga hageoru, vi igo ko pe girarê.”

³⁵Ma o Jesu ki vi tangara, ki vi: “I nago matena gê hagatorangenigamu ma igamu kamu pe migirâ na kato ma na anga se na buti, ta na marâ ki marehasigamu vari?” Ngaira ka arami, ka vi: “Mareha!”

³⁶O Jesu ki vi: “Ma i ngekê, manga vi na enoni, ma ki nahunia na kato se na anga, ngaia ki koro ma, i migirâ. Ma ki manga vi na enoni, ma ki pe nahunia na tatapa borahu, i koro, ki hagavuringenia na tuguni iana ma ki vuria na tatapa.

³⁷Suria inê kê vi tangagamu vikê, kê vi: na segesegeha apuna ki vi, ‘Na enoni ka takusia, vi ngaia ki na enoni era.’ Ma ki tuguhia, i voravora me monari tangê na tamasinga ngekana. Suria na marâ, ga bani segegi reniê inê, ka page voravora me monari.”

³⁸Na kariana ka vi: “Bâ, Araha, na tatapa borahu gi rua ikê!” Ngaia ki arami, ki vi: “E, nakarerua vê ma!”

³⁹O Jesu ki hura vê, ma ki râ igê na Hungana ni Olive, manga bani hanana i arâ tare, ma na kariana ka râ henia.

⁴⁰Matena ga ata me i ngekana, ngaia ki vi tangara, ki vi: “Mu nunginungi, hanana mu ramoramo pusia na heuhungiha.”

⁴¹Ma ngaia ki ura râ panira tanga na agua, na ararina na agua na mane i girara i arihatenia na hê, ki mataro râ igê. Ma ngaia ki susure, ma ki nunginungi.

⁴²Ngaia ki vi: “Vaemaku, manga go obania, ma ko torea vê paniê na kâkâ na mamasiaganiha ikê. Ma ki koro ma, igo ma.”

⁴³[Ma tenia na vavearo na angelo ki vora me tanga ma ki hagaramonia.

⁴⁴Ngaia ki hataera ngavê, ma ngaia ki amani nunginungi nga. Na mavaruna ka manga na êsusu na gapu, ga susu so i ano.]

⁴⁵Hato na nungiha iana, ma ngaia ki aharaga ma ki aporo i pasita na kariana, ma ki bâsira ga mêru, renia i rugu bâraha na obata.

⁴⁶Ma ngaia ki vi tangara, ki vi: “Hega mu mêru? Mu aharaga, ma kamu nunginungi, hanana mu ramoramo pusia na heuhungiha.”

⁴⁷Na mane ni me ka ata me, matena i tamasi mênga. O Juta, na hitangita na tangahuru matarerua na kariana o Jesu, kani bêngenira. Ngaia ki oto me i pasina o Jesu, hanana vi nunugua.

⁴⁸Ma o Jesu ki vi: “Juta, igo ko hagavuringenia vari o Karena Enoni renia na nunuguha?”

⁴⁹Matena na kariana o Jesu, ga oga henia, ka bâsia na tarana ngekana, ngaira ka vi: “Araha, i araria, mi meraheariha renigi na tatapa borahu?”

⁵⁰Ma ta na hitangita ki tapia na kare vurivuri iana na mane ni vogasiha i teha, ma ki retea râ na karingana i otona.

⁵¹Mo Jesu ki arami, ki vi: “Siana! Naka vê! Ngaia ki hataria na karingana na mane ma ki hagenani aporo.

⁵²Ma hemuri o Jesu ki vi tangara na mane ni vogasiha ga teha ma na araha iata na mene ni me, ga bâsuria na Ruma ni Rotu, ma tangara na meraha, ga râ me i ngekana, hanana vi ga hagatotongoa, ki vi: “Tanu hega kanimu migirâ me na tatapa borahu ma na bêata? Na manero vari kani inê?

⁵³I na ara ni tangiani inê kê gâga henigamu i Ruma ni Rotu, ma igamu kamu pe bani hagatotongoê. Ma i ngekê ki na matena iami, ma na matena iana na araha ni mengo.”

⁵⁴Ngaira ka hagatotongoa o Jesu, ma ka torea vê, ka me banu i ruma iana na mane ni vogasiha i teha. Mo Petero ki mumurira me hagatê.

⁵⁵Ga bani tanga na gi i beraro i ruma, mo Petero ki oga so henira na enoni, i rangira na gi.

⁵⁶Ma ta na kere gete tagara ki bâsia o Petero, matena i oga so i ngekana, ki rangia na gi. Ngaia ki boretenia, ma ki vi: “Ngaia nikâ kani oga henia!”

⁵⁷Mo Petero ki hagaiga, ki vi: “Se kego, inê kê pe hagarea ngavê!”

⁵⁸I na kere matena i muri ta na mane ki bâsia nogana, ma ki vi: “Igo nikâ ka na hitangita!” Mo Petero ki arami, ki vi: “Se vego, inê ki mareha!”

⁵⁹I rârâ, ma ta na mane nikâ ki hingia bâraha, ki vi: “Monari era, o va ani ikê kani oga henia, suria ngaia nikâ ki na mane i Galilea!”

⁶⁰Ma o Petero ki arami, ki vi: “Se vego, inê kê pe hagarea na marâ, go visia!” Matena i tamasi mênga vikana, ki parama, ma ki angi na kua mane.

⁶¹Na Araha ki ahoro râ ma ki boretenia o Petero, mo Petero ki takusigi aporo na tamasinga iana na Araha, i bani tamasigi, ki vi: “Hageoru igo ko page vivi, vi igo ko pe hagareê, ma hemuri ki page angiangi na kua mane i rikini akê.”

⁶²Mo Petero ki hura vê ma ki angi bâraha ngavê.

⁶³Na mane ni me, ga bâsuria o Jesu, ka memarabe ma ka tahurua.

⁶⁴Ngaira ka bara na maana, ma ka hagatea, ka vi: “O ti kani tahurugo? Mêsigo ma ko girara!”

⁶⁵Ma ngaira ka tamasi erasia, ma ka guharia bâraha.

⁶⁶Matena i tangi me, na meraha i pasita na Siu, na mane ni hagesuringa ni Rotu ma na mane ni vogasiha ga teha ka haku me, ma na mane ni me ka merâ me o Jesu tangara.

⁶⁷Ngaira ka vi: “Gu visia me, na Mesaia vari kani go, se mareha?” O Jesu ki arami, ki vi: “Manga ve visia vê, igamu ki asa vigamu tongesuriê.

⁶⁸Ma manga ve hagategamu, igamu ki asa vigamu, mu aramiê.

⁶⁹Ma tenia i ngekê o Karena Enoni ki page gâga so henia God raramohaga hunia igê na atohana.”

⁷⁰Ngaira hato ka vi: “Hoi, o Karena God vari kanigo?” Ngaia ki aramira, ki vi: “Mu vi gamu vi inê, inê nga!”

⁷¹Ma ngaira ka vi: “Igia ka pe obania ta na enoni, vi ge tamasi renia! Igia mareka ka bani rongogi na tamasinga iana marena!”