Read Kahua LUKA 24 Bible Online

LUKA 24 - Kahua bible

LUKA 24

¹Igê na mahogohogotana na Sate na gete ka râ tanga na vaba. Ngaira ka toregi na marâ, i sigini koro, ga bani hagarêgi.

²Ngaira ka rigia, na hê na purupuru i pe goga i maana na vaba.

³Ngekana ngaira ka banu igê, ma ka pe bâsia na gahuana o Jesu na Araha.

⁴Ngaira ka tako makira renia, ma ki parama, ma karu vora me tangara na mane gi rua, garu tuguni renigi na tuguni siki ma ki togatoga.

⁵Na gete ka magu ngavê, ma ka tu bê so i ano, matena na mane agana garu tamasi tangara, karu vi: “Tanu hega kanimu garia na ani i mauri i pasita na ani, ga bani magahuru?

⁶Ngaia ki mareha ikê. Ngaia ki bani mêri aporo. Takusigi aporo na marâ, i bani visigi tangagamu, matena i oga i Galilea, vi,

⁷‘I tuguhia, ga mahatangenia o Karena Enoni tangara na enoni era, ma ka rapusia igê na kuruse. Ma igê na oruta na tangiana ngaia ki page mauri aporo.’”

⁸Ma na gete ka takusigi aporo na tamasinga iana.

⁹Ngaira ka aporo tenia na vaba, ma ka hagarongora na kariana tangahuru mataretage ma na ani getera hato renigi na tarani hato ngegana.

¹⁰Na gete ngegê ngaira kani ka Maria Matalena, ka Joana, ma ka Maria kenana o Jakobo. Ngaira ma tani na gete getera ka hagarongora na aposotolo renigi na tarani ngegana.

¹¹Ma na aposotolo ka vi ma, vi na gete ka tamasi bekabeka, ma ka pe tongesurira.

¹²Ma o Petero ki aharaga, ma ki tango tanga na vaba. Ngaia ki maroro so ma ki bâsigi ma na gahu ni gahua, ma ki mareha ta na marâ. Hemuri ngaia ki aporo, ma ki tako makira renia na tarana ngekana.

¹³Igê nga na tangiana ngekana na vererua na kariana o Jesu karu râ tanga na hinua i Emausi. Emausi ki pe hagatê tenia i Jerusaleme.

¹⁴I tara ngairerua karu tamasigi na ara ni marâ, ga bani vora me agana.

¹⁵Matena garu tamasigi ma karu heriri renia o Jesu, ma ngaia nga o Jesu ki râ me, ma ki râ haku henirerua.

¹⁶Ngairerua karu bâsia, ma karu pe bâgirara.

¹⁷O Jesu ki hagatererua, ki vi: “Na ta kanimuru hagakitagi i tara?” Ma ngairerua karu ura so i tara, ma karu bâ heruruhi.

¹⁸O Keleopa, na hitangerua, ki hagatea, ki vi: “Igo ko râ me tenia i Jerusaleme, ma igo ko pe giraragi vari na marâ, ga bani vora i ngekana igê na tangiani hato? Na ara ni enoni ka bani giraragi, ma igo ma vari kani mareha?”

¹⁹Ngaia ki hagate, ki vi: “Na tao?” Ngairerua karu arami, karu vi: “Na tarani, ga vora me renia o Jesu ni Nasarete. Na mane ngekana ki na poropete, ma i maana God me maata na enoni hato ngaia ki raramohaga hunia igê na tamasinga iana ma igê na tagaraha iana.

²⁰Na mane ni vogasiha ga teha ma na meraha iamami ka mahatangenia tanga o Pilato, ki suria ki me, ma ka rapusia igê na kuruse.

²¹Igami kami tako togo renia, vi ngaia ki na ani, i hagatahira na enoni ni Isiraele. Ma i ngekê kami tê tara renia! Ma ta na marâ nikâ. I oge na nora ki vora me na tarana vikê.

²²Tani na gete i pasimami ka hagakonegami. Igê na mahogotana ngaira ka vatugia na vaba,

²³ma ka pe rigia na gahuana. Ngaira ka aporo me, ma ka vi, vi ga bâsira na angelo, ma na angero ka hagarongora, vi ngaia ki mêri aporo.

²⁴Tani na hitangimami ka râ tanga na vaba, ma ka tarahua, i tagenana ma, manga ga bani visia na gete, ma ngaira ka pe bâsia o Jesu.”

²⁵Mo Jesu ki vi tangarerua, ki vi: “Igamurua kamuru bagatatako! Muru pe tongesurigi râ nga na marâ ga bani visigi na poropete!

²⁶I pe tuguhia vari na Mesaia, vi ge hatamigi na mamasiaganiha ngegana, hanana vi voravora re na Araha?”

²⁷Mo Jesu ki hagararingenigi tangarerua na marâ hato na Buka Apuna i bani visigi renia, i haganega tenigi na buka, i segegi o Moise, ma na segesegeha iata na poropete hato.

²⁸Ngaira ka râ me hagarangia na hinua, ga tabea, mo Jesu ki bâ manga i riri tare.

²⁹Ma ngairerua karu ruruia, karu vi: “Gu oga so henigamirua. I susu noga na arito, ma ki sugia ma ge bungi.” Vikana ngaia ki banu ki oga henirerua.

³⁰Ngaia ki mererâbêrihu, ki têa na bereti, ma ki visia raha God. Ma hemuri ngaia ki pipia na bereti, ma ki vatererua.

³¹Ngairerua karu gasuga renia, ma karu kahu bâgirara, ma ngaia ki magahuru râ tenirerua.

³²Ngairerua karu hetamatamasi, karu vi: “Igerua karu obakoro ngavê ngao, matena ngaia i hagararingenigi na segesegeha apuna tangagerua i tara?”

³³Ngairerua karu aharaga ma karu aporo i Jerusaleme, ma karu tarahura na tangahuru mataretage na kariana o Jesu, ga haku henira na enoni getera.

³⁴Ma ngaira ka vi: “Monari, na Araha ki mêri aporo! O Simone kani bani bâsia!”

³⁵Ngairerua karu hagarongora renigi na marâ, ga tarahurerua i tara, ma manga i he ngairerua karu bâgirara na Araha, matena i pipia na bereti.

³⁶Matena garu hagarongora mênga vikana, ki parama na Araha, ma ki ura so i berarogata, ma ki vi tangara, ki vi: “Na marapeha henigamu.”

³⁷Ngaira ka bubununuga ngavê, ma ka magu era, suria ga vi ma, vi ga bâsia na ataro.

³⁸Ma ngaia ki vi tangara, ki vi: “Tanu hega kanimu magu? Tanu hega kanimu tako tugupu?

³⁹Mu bâsigi na ababa ni rimaku ma na êgaku. Mu bâ inê ngekê. Mu hatariê, ma kamu kahu girarê, renia na ataro ki pe tonga na hasigona ma na surina, ma kamu bâsia, inê ki tonga na apeku.”

⁴⁰Ngaia ki tamasi vikê, ma ki hagabâsira renigi na ababa ni rimana ma na êgana.

⁴¹Ma ki kere bara tangara, vi ge tongesuria, suria ngaira ki koro era na apeta ma ka kone. Vikana ngaia ki hagatera, ki vi: “Igamu kamu nahuni vari na agami ikê?”

⁴²Ngaira ka vatea na kere agua na siare i mako.

⁴³Ngaia ki tavoa ma ki ngêa.

⁴⁴Ma hemuri ngaia ki vi tangara, ki vi: “Na tarani nga ngegana inê kê bani vi tangagamu renigi, matena gê gâga mênga henigamu: kê vi, i tuguhigi, vi ga voravora me monari na ara ni marâ, o Moise i bani segegi reniê igê na Buka ni Ramata, ma na marâ hato, ga bani visigi reniê igê na segesegeha iata na poropete ma igê na Buka na Ki Apuna.”

⁴⁵Hemuri ngaia ki hagatako obata, hanana vi ga rongorongogiraragi na segesegeha igê na Buka Apuna.

⁴⁶Ma ngaia ki vi tangara, ki vi: “Ikê nga na marâ, ga bani segea: na Mesaia ki tuguhia ki hatamia na mamasiaganiha, ma ki mauri aporo tenira na enoni, ga me, igê na oruta na tangiana.

⁴⁷Ma ki tuguhigamu, mu ateate igê na raramohana tangara na enoni hato i maveta, hanana ga urisi parongata. Manga vikana God ki page bonotenigi na tasi iata. Mu haganega i Jerusaleme.

⁴⁸Mu tarohenigi na marâ, mu bani bâsigi ngegana.

⁴⁹Ma inê mareku be hagatorangenia tangagamu na marâ, i bani surua o Vaemaku. Ma ki tuguhigamu, mu gâga i hinua raha, ma kamu naasia na raramohana God, i page angarigamu.”

⁵⁰Ma hemuri ngaia ki merarâ tenia na hinua raha tanga i Betani. Ma i ngekana ngaia ki têbuhira igê ma ki hagapura.

⁵¹Matena i hagapura hato, ngaia ki râ vê panira, ma ki aporo i pasina God.

⁵²Ngaira ka rahesia ma ka aporo i Jerusaleme, ma ka vagevage ngavê.

⁵³Ma ngaira ka oga tare nga i Ruma ni Rotu, ma ka visia koro God.