Read Kahua LUKA 4 Bible Online

LUKA 4 - Kahua bible

LUKA 4

¹O Jesu ki aporo tenia na ve i Jotano, ma na Higona Apu ki angaria. Na Higona Apu ki merâ igê na manihê.

²Ma i ngekana Satana ki uhungia igê surigi na tangiani tangahuru ge he. O Jesu ki pe ngê rârâ surigi na tangiani ngegana. Tahema i murini na tangiani ngegana ngaia ki magê.

³Satana ki vi tanga o Jesu, ki vi: “Manga vi igo ki no Karena God, hoi, gu vi tanga na hê ikê, ke vora renia na bereti.”

⁴O Jesu ki arami, ki vi: “Na Buka Apuna ki bani vi, vi na enoni ki pe mauri renia ma na ngêra.”

⁵Hemuri Satana ki metagere igê na agua i kerekê aha ma igê na kere matena sisite era ngaia ki hatani hagabâsia renigi na arahanga igê na agua hato i maveta.

⁶Ma ngaia Satana ki vi tanga, ki vi: “Inê be vatego renigi na arahanga hato ngegana ma na ruruguha hato ngegana. Na aniku ngegana, ma inê kê girara gê mahatangenigi renigi tanga na anima na enoni, gê obania.

⁷Hoita, na marâ hato ngegana ko page nahunigi, manga vi go susure ma ko bêtuhiê.”

⁸Mo Jesu ki arami, ki vi: “Na Buka Apuna ki bani vi, vi ngaia getea ma na Araha God iamu kanigo rahesia ma ko bêtuhia.”

⁹Ma hemuri Satana ki merâ o Jesu i Jerusaleme, ma ki hagêrasia i kere kê ngavê i gerina na Ruma ni Rotu, ma ki vi tanga, ki vi: “Manga o Karena God kani igo, hoi, gu reke so ku vato i ano.

¹⁰Suria na Buka Apuna ki bani vi, vi God ki page bonasira na angelo iana ka bâbâ surigo bâkoro.

¹¹Ma na Buka Apuna ki vi nikâ, ‘Ngaira ka page torego i rimata, hanana siana ko tapasu igê na hê.’”

¹²O Jesu ki arami, ki vi: “Na Buka Apuna ki bani vi, vi siana ko uhungia na Araha God iamu.”

¹³Matena Satana ki uhungia hato vikê o Jesu igê na ara ni tarani, ngaia ki naka so noga, ma ki râ vê pania.

¹⁴Ma hemuri o Jesu ki aporo i Galilea, ma na Higona Apu ki angaria ma ki hagaramonia. Ma na rongoha renia ki râhigi na hinua hato i ngekana.

¹⁵Ngaia ki hagesurira na enoni i ruma ni sukuru iata, ma na enoni hato ka visia koro.

¹⁶Mo Jesu ki râ i pasina i Nasarete, ma igê na Tangiana ni Mamaroha ngaia ki râ i ruma ni sukuru, manga bani hanana i arâ. Ngaia ki aharaga, hanana i tomatoma tenia na Buka Apuna.

¹⁷Ma ngaia ki tavoa na buka, i segea o Isaia na poropete. Ngaia ki gasia na buka, ma ki gari ki tarahua igê na segesegeha, i vi:

¹⁸“Na Higona Apu iana na Araha God ki angariê. Ngaia ki bani ateê, hanana gê ateate renia na Taroha Koro tangara na enoni matareha. Ngaia ki bani hagatorê, kê tokorenia na taroha, hanana ga aharupa na enoni rakuraku, ma hanana na enoni, ga guru, ka marava aporo na maata, ma hanana gê rupasira na enoni, ga hatamigi na mamasiaganiha,

¹⁹ma hanana gê hagarongora na enoni renia i sugi râ me noga na harisi, na Araha ki page hagatahira igê na kariana!”

²⁰O Jesu ki buhia na buka, ma ki vatea aporo tanga na mane, i bâsuria na ruma ni sukuru, ma ki oga so. Na enoni hato i ruma ni sukuru ka boretenia.

²¹Ma ngaia ki haganega ki tamasi tangara, ki vi: “Na tomatomaha ngekê tenia na Buka Apuna ki kahu vora me monari noga, i ngekê, igê nga na matena mu rongoa.”

²²Ngaira hato ka tamasi koro era renia, ma ka konekone renigi na tamasinga bâkoro iana, i visigi. Ngaira ka vi: “Ngaia ki no karena o Josepo, iê?”

²³Ngaia ki vi tangara, ki vi: “Inê kê bani girara, igamu kamu obania, vi gamu visia tangê na tamasinga, i vikê, ‘Mane mangata, u rikigo maremu.’ Ma igamu kamu obania nikâ, vi gamu vi tangê, kamu vivi, ‘Gu tanugi i hinua iamu maremu na marâ, mi bani rongogi, go katogi i hinua i Kapenamu.’”

²⁴Mo Jesu ki vi nikâ: “Inê be vi tangagamu: na poropete ngaia ki no vani, na enoni i hinua iana ga kitenia.

²⁵Mu rongo! I monari, na matena iana o Elia ka rako na gete na nâ i Isiraele. Ma igê na matena ngekana ki na magêha raha igê na agua hagenani, renia i pe rangi rârâ surigi na harisi gi oru ma na hageha gi ono.

²⁶Ma kamu bâ, God ki pe hagatorangenia o Elia tanga na hitangita na gete na nâ ni Isiraele. Ma ngaia ki hagatorangenia ma tanga na gete na nâ i Sarepata, i na apanena i Sitone.

²⁷Ma na matena iana o Elisa na poropete ka rako na enoni asiahu i Isiraele. I mareha ngavê na ani gi tage ma, vi ge mavo, nga noga ma o Naamana, na mane ni Siria, kani mavo.”

²⁸Matena na enoni i ruma ni sukuru ka rongogi na marâ ngegana, ngaira hato ka mangariaga ngavê.

²⁹Ngaira ka aharaga, ma ka oke baba henia o Jesu, ka mehura tenia na hinua, ma ka metagere igê na tarohane i hinua ngekana, hanana vi ga purisia vato igê na tarihu.

³⁰Ma o Jesu ki tara râ ma i guputa na hakuta na enoni, ma ki râ vê, ki râ.

³¹Ma hemuri o Jesu ki râ i Kapenamu, na hinua i Galilea. Ma i ngekana, igê na Tangiana ni Mamaroha, ngaia ki hagesurira na enoni.

³²Ngaira hato ka konekone renia na tauhana, suria ngaia ki tamasi manga na maneraha, i ramata.

³³Ma i ngekana i ruma ni sukuru ki oga igê na mane, i atataroga. Ngaia ki ngere raha, ki vi:

³⁴“E, Jesu ni Nasarete, na ta kanigo katoa tangagami? Go râ me vari, vi go hagaerasigami? Inê kê girarago, vi o ti kani igo! Igo va ani God i hagatorangenigo!”

³⁵O Jesu ki ramonia na ataro, ki vi: “Gu muni vê! Ma ku hura râ tenia na mane ikê!” Na ataro ki katoa na mane, ki apuri i maata na enoni hato, ma ki hura vê maninga ma tenia.

³⁶Na enoni hato ka gasuga, ma ka hetamatamasi, ka vi: “Tanu hega kani tamasi vikana? Ngaia ki na maneraha, i girara i ramata, ma ki bonasira na ataro era, ma ngaira ka huhura ka arâ!”

³⁷Ma na rongoha renia o Jesu ki râhigi na ara ni hinua i na apanena ngekana.

³⁸O Jesu ki pania na ruma ni sukuru, ma ki râ ki banu i ruma iana o Simone. Ka hungâna o Simone ki maeha, ki matoro bâraha, ma ngaira ka hagarongoa o Jesu renia.

³⁹Ngaia ki râ ma ki ura hagarangia na bea iana, ma ki bonasia na matoroha ki hato. Ma ki avogea na matoroha ma ngaia ki aharaga nga ma ki hagamako tangara.

⁴⁰Bevoana i bani su na arito, na ara ni enoni ka torera tanga o Jesu na tamata, ga maeha renigi na ani mavê na mera. Ngaia ki têbuhira na enoni hato, ga maeha, ma ki rikira hato.

⁴¹Na ataro era nikâ ka hura vê tenira rako na enoni, ma ngaira ka ngerengere, ka vivi: “Igo ki no Karena God!” O Jesu ki hagapêpura ma ki pe hagamarumungenira, vi ge tamasi, renia ngaira ka bani girara, vi ngaia ki na Mesaia.

⁴²Igê na mahogotana o Jesu ki pania na hinua, ma ki râ i bemu. Na enoni ka haganega ka garia, ma na matena ga tarahua, ngaira ka uhungia, vi siana ki arâ panira.

⁴³Ma ngaia ki vi tangara, ki vi: “I tuguhiê, ve ateate renia na Taroha Koro renia na Arahanga iana God i hinua getigi nikâ, renia tahema God ki hagatorangeniê me.”

⁴⁴Tahema ngaia ki ateate i ruma ni sukuru i Jutea.