Read Kahua LUKA 5 Bible Online

LUKA 5 - Kahua bible

LUKA 5

¹Ta na tangiana o Jesu ki ura i one igê na Rano i Senesarete, matena na enoni ka hepara renia, hanana vi ga rongo na tamasinga iana God.

²Ngaia ki rigirerua na kere haka gi rua, garu goto i one. Na mane hugohugo ka panirerua so, ma ka râ ka tananigi na hugo iata.

³O Jesu ki akê igê tani na kere haka, na anina o Simone, ma ki nungia, ki gusurenia ataha sisite tenia na one. O Jesu ki oga so igê na kere haka, ma ki hagesurira na enoni.

⁴Matena i tamasi hato, ngaia ki vi tanga o Simone, ki vi: “Gu gusurenia ataha nga i kere taha, ma na tamamu mego kamu kunigi so na hugo iami, hanana mu hugora na siare.”

⁵O Simone ki arami, ki vi: “Araha, i na bungi hagenani igami kami uhungia bâraha, vi gami hugora na siare, ma ki mareha ngavê. Ma suria go obania, hoi, i koro ma ve kunigi so na hugo.”

⁶Ngaira ka kunigi so na hugo iata, ma ka hugora rako teha vê na siare, ma na hugo ka haga ni mu renira.

⁷Ngekana ngaira ka karuhira na tamata igê tani na kere haka, ka râ me ma ka tamanira. Ngaira ka râ me ma ka hagavunusirerua ngavê na kere haka gi rua renigi na siare, ma karu haga ni kokoro renigi.

⁸Matena o Simone Petero ki bâ vikana, ngaia ki susure i maana o Jesu, ma ki vi: “Araha, râ vê teniê, suria inê ki na mane era!”

⁹Ngaia ma na enoni hato getera, ga oga henia, ka konekone bâraha, renia ga hugora rako teha ngavê na siare.

¹⁰Ma ka konekone bâraha nikâ na tamana o Simone, o Jakobo mo Joane, na karena o Sebeteo. O Jesu ki vi tanga o Simone, ki vi: “Siana ko magu! Haganega tenia i ngekê igo ko page hugora na enoni.”

¹¹Ngaira ka gururerua banu i one na kere haka, ka panigi so na ara ni marâ, ma ka takua o Jesu.

¹²Ta na tangiana o Jesu ki oga i ta na hinua, ma i ngekana ki oga igê ta na mane, i asiahu ngavê. Matena i bâsia o Jesu, ngaia ki susure ki aba so i ano i maana o Jesu, ma ki nungia, ki vi: “Araha, manga go obania, ma ko hagamavoê!”

¹³O Jesu ki gusia na rimana ma ki hataria, ki vi: “Inê kê obania, gê hagamavogo. U mavo!” Ki parama na asiahu, ma ki hato tenia na mane.

¹⁴O Jesu ki hagapêpua, ki vi: “Siana ko hagarongoa rârâ ta na enoni renia na tarana ngekê. Ma ko ototo râ nga hete tanga na mane ni vogasiha, ma ko hagabângenigo maremu tanga, ki bâsigo. Ma hemuri ko tagarenia na vogasiha iamu, manga i bani visia o Moise, hanana na enoni hato ka girara vi igo ko mavo.”

¹⁵Ma na rongoha renia o Jesu ki râhigi nga na hinua, ma ka rako era na enoni ga râ me, hanana vi ga rongoa ma ka nungia, ki hagakomagara.

¹⁶Ma ngaia ki râ i bemu, hanana i nunginungi igê.

¹⁷Ta na tangiana, matena o Jesu ki hagesurira na enoni, tani na Pariseo ma na mane ni hagesuringa ni rotu ka oga i ngekana. Ngaira ka râ me tenigi na ara ni hinua i Galilea ma i Jutea ma tenia i Jerusaleme. Igê na raramohana na Araha, o Jesu ki girara i rikira na enoni, ga maeha.

¹⁸Tani na mane ka râ me, ma ka tugia na mane, i meapeape, ma ka uhungia, vi ga mebanu i ruma, hanana vi ga naka i maana o Jesu.

¹⁹Ma suria ga rako era na enoni, ngekana ki bara tangara, vi ge mebanu. Tahema ngaira ka metagere i gerina na ruma, ma ka tahakurua vato, ma ka kunia so henia na bea i berarogata na enoni i maana o Jesu.

²⁰Matena o Jesu ki bâsia na tongesuriha raha iata, ngaia ki vi tanga na mane, ki vi: “Goaku, na tasi iamu ka bani bonotenigi.”

²¹Na Pariseo ma na mane ni hagesuringa ni rotu ka haganega ka hehagateri, ka vi: “Vati ngekê, i tamasi erasia God igê na tarana ngekana? I asa ta na enoni, ge girara, vi ge bonotenigi na tasi! Ngaia getea ma God kani girara!”

²²O Jesu ki giraragi na parongata, ma ki vi tangara, ki vi: “Tanu hega kanimu takusia na tarana ngekê?

²³Na ta kani mataku, vi ga visia. ‘Na tasi iamu ka bani bonotenigi’, se ga vivi, ‘Gu aharaga ma ku râ’?

²⁴Hoita, inê kê hagatanga monari tangagamu, o Karena Enoni ki tonga na raramohana i maveta, hanana i bonotenigi na tasi.” Tahema ngaia ki vi tanga na mane, i meapeape, ki vi: “Be vi tangago: gu ahara, ko tavoa na banamu, ma ko arâ i pasimu.”

²⁵Ki parama na mane, ma ki aharaga i maata na enoni hato, ki tavoa na banana, i tâ igê, ma ki visia raha God, matena i tavoraha i pasina.

²⁶Ngaira hato ka konekone bâraha! Ngaira ka magu ngavê, ma ka visia raha God, ka vi: “I ngekê igami kami kahu bâsigi na marâ raha!”

²⁷Hato vikana, mo Jesu ki hura vê, ma ki bâsia ta na mane, i totora takesi, o Levi na atana. Ngaia ki oga i ruma ni tagaraniha iana. O Jesu ki vi tanga, ki vi: “U takuê!”

²⁸O Levi ki aharaga, ma ki panigi na ara ni marâ hato ma ki takua o Jesu.

²⁹Ma hemuri o Levi ki magoto i ruma iana tanga o Jesu. Ma i ngekana ka oga rako igê na mane, ga totora takesi, ma na enoni getera, ga ngê henirerua.

³⁰Tani na Pariseo ma tani na mane ni hagesuringa ni Rotu, ga Pariseo nikâ, ka tamasi ngurunguru tangara na kariana o Jesu. Ngaira ka hagatera, ka vi: “Tanu hega igamu kanimu ngê ma kamu tono henira na mane ga totora takesi ma na enoni, ga aharê igê na ramata?”

³¹O Jesu ki aramira, ki vi: “Na enoni, ga apekoro, ka pe naasia na mane mangata, nga noga ma na enoni, ga maeha, kaniga naasia na mane mangata.

³²Inê kê pe râ me, be unira na enoni koro, hanana vi ge murisigegi na tasi iata ma ke urusigi na parongata, ma kê râ me hete tangara na enoni era.”

³³Tani na enoni ka vi tanga o Jesu, ka vi: “Na kariana o Joane ka harihari ma ka nunginungi hagarako, ma na kariata na Pariseo nikâ, ma na kariamu igo ka ngêngê ma, ma ka totono.”

³⁴O Jesu ki arami, ki vi: “Igamu kamu takusia vari, vi igamu kamu girara mu hagaharira na enoni, ga gâga igê nga ngêra na hagataku, matena na mane êragi haoru i gâga henira? I asa vê!

³⁵Ma ki page arâ me na matena, ga page merâ vê igê na mane êragi haoru, ma igê na tangiani ngegana ngaira ka page harihari igê.”

³⁶Mo Jesu ki visia na tamasinga maramaraveta ngekê tangara nikâ ki vi, “I asa ta na enoni, vi ge aba na bani tuguni renia na tarasigana na gahu, i girara i herugirugi. Manga i katoa vikana, ngaia ki tarisia na gahu haoru, ma na tarisigana na gahu haoru, i girara i herugirugi, ki pe araria na bani tuguni.

³⁷Ma nikâ, i asa ta na enoni, vi ge karangia na vaini haoru i rarona na bani anga na gavota na puruka. Manga i katoa vikana, na anga ka page raboa renia na vaini haoru, ma na vaini ki page mea, ma na anga ka page era.

³⁸Naka vê! Na vaini haoru tanga na anga haoru.

³⁹Ma ki mareha ta na enoni, vi ge obania na vaini haoru, matena i bani tonomia na bani vaini. Ngaia ki vi, vi na bani vaini ki koro teharia na ani haoru.”